مادة : الخريف
08-28-2013 03:34 PM


أجلس في مكان جاف ثم أجب مستعيناً بالله تعالى على جميع الأسئلة التالية مع تبيين خطوات الحل ما أمكن ذلك :

السؤال الأول:

يأتي افصل الخريف في كوكب المريخ كل 4 اشهر ويأتي في كوكب المشتري كل 9 أشهر فبعد كم من الزمن يأتي فصل الخريف في كوكب المحليات ؟ (يقرب الكسر لأول خانة مئوية)

السؤال الثاني:

فاضت أرواح 6 اشخاص من اسرة واحدة بعد أن إنهار عليهم حائط المنزل بسبب عدم التصريف .. هات ثلاثة أحاديث وآية توضحان أن أرواحهم في ذمة المسؤولين

السؤال الثالث :

إستلم مقاول مبلغ 800 مليون جنية لنظافة مجري بطول 3 كيلومتر فإذا كانت ذمة هذا المقاول لا يتعدى طولها الواحد مليميتر أحسب ما تمت نظافته من المجري مستعيناً (بمسطرة) !

السؤال الرابع :

إنهمر المطر فنظر المسؤول إلى سقف الغرفة فوجده يرشح ماءا وأحد (المروق) يصدر صوتاً ينبئ بانه سوف ينكسر لا محالة فتذكر المسؤول أنه لم يقم بفتح (السباليق) فخرج وهو يحمل (طوريته) حيث فوجئ بالمياه تحاصر المنزل من كل الجوانب … أكمل هذه القصة الخيالية (التي لن تحدث)

السؤال الخامس :
صرح معتمد الخرطوم بمنع المواطنين البناء بالطين والجالوص .. هات 3 (بيوت) (شعر) بالسيخ والطوب والأسمنت يعضدون ما ذهب إليه المعتمد !

السؤال السادس :
إمتلأ ملعب كرة في أحد الأحياء بالماء حتي تغير لونه إلى الأخضر ، أحسب عدد الباعوض والذباب داخل خط 18

السؤال السابع :
إذا كان إرتفاع المياه عند هطول أحدي الأمطار بسوق أم درمان هو 30 سم وإذا كان تجار السوق و(حتي ستات الشاي) يدفعون ما عليهم من رسوم وجبايات كل 30 يوم ، أحسب (إرتفاع) كمية اللعنات التي يرسلها التجار في الدقيقة الواحدة

السؤال الثامن :
ضربت صاعقة أحد المنازل بشرق النيل فإذا كانت سرعة ضؤ الصاعة هي 299,792,458 م/ث وسرعة صوتها هو 1224 كيلومتر في الساعة .. أحسب السرعة التي يصل فيها رجال الدفاع المدني لموقع الحادث

السؤال التاسع :
قامت أحدي الشركات بإنشاء نفق وفي أول مطرة قام النفق (مسك موية) ..فهل تعتقد بان العيب في (الشركة) أم في (الزول الأداهم العطاء) أم في (النفق) … ناقش بس ما تجيك جلطة

السؤال العاشر:

تم وصول طائرة إغاثة إلى مطار الخرطوم في الساعة السابعه وخمس وأربعون دقيقة وثلاثون ثانية وفي تمام الساعة السابعة وخمس وأربعون دقيقة وواحد وثلاثون ثانية تم ضبط جزء من هذه الإغاثة بمخازن تبعد واحد وثلاثون كيلومتراً من المطار .. قارن بين (الهدهد) في قصة بلقيس وهذه القصة في ثلاثة أسطر فقط

السؤال الحادي عشر :
أكتب أبيات قصيدة (حلا الخريف حلا … أهلاً به وسهلا ) كاملة ثم وضح بالأدلة أن الشاعر لم يكن (تاجر إغاثة)

كسرة :
وقع رجل سبعيني في حفرة تغطيها مياه الأمطار (فإنكسرت مخروقتو) فقام بفتح بلاغ لدي النيابة مطالباً (حكومة السودان) بتعويض .. مستعيناً بقانون الإحتمالات قم بإستخراج نسبة إحتمال أن يكسب القضية وأبقى قابلني !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و؟

تعليقات 27 | إهداء 1 | زيارات 6995

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#755360 [ابوبهجه]
0.00/5 (0 صوت)

08-29-2013 06:51 PM
اسأل الله لك الصحة الفافيه
واتحداك ان تجاوب انت على هذه الاسئله
انا بصراحه عايز خيارات


#755273 [جمال مصطفى]
0.00/5 (0 صوت)

08-29-2013 03:56 PM
خلوني اجاوب السؤال العاشر اكان اقدر

معناه ان الاغاثة تحولت الى الاسواق بأسرع من سرعة عفاريت الجن فى تحويل عرش بلقيس الى مكان سيدنا سليمان ، واسرع من الذي عنده علم من الكتاب الذي حول عرش بلقيس قبل ان يرتد طرف سيدنا سليمان اليه .
طبعا وبنفس سرعة سرقة هذه الاغاثة هنالك سرعة فى التبريرات من المسؤولين إختزلوها جميعها فى خطاالمواطنين الغلابة لانهم بنوا بالجالوص وفى مجاري السيول ، الله يرحم السودان الحالي .ويبعث لنا سودان آخر ما عاوز اقول حديد .


#755127 [ردود على واحد تانى]
0.00/5 (0 صوت)

08-29-2013 01:08 PM
(ودالباشا)


انت عارفه زى جوع بطنك وانت معلق قديم عموما اضحكنى ردك حيث تلاشت كل الود


#755079 [أبو أحمد]
0.00/5 (0 صوت)

08-29-2013 12:04 PM
ياستاذ السؤال الثالث عايز توضيح أكثر :
من هو المقاول ؟؟ هل هو السجل الشركة بعدما رسى عليهو العطاء ؟؟ أم هو الادوهو العطاء بالغمتى ؟؟


#754996 [الكتاحة]
5.00/5 (1 صوت)

08-29-2013 10:37 AM
استاذ الأدارة فن يصقله العلم .وبالرغم من التطور العلمي والتكنولوجي الذى يسهم في نقل التجارب عبر وسائط ليس من بينها السفر لماليزيا والصين لا تتوقع من الجهلاء وأن شاركهم مخترعوا نظريات الهندسة والبناء النجاح فهذه مخرجات ثورة التعليم تدعمها المحسوبية التى تفضل أسوأ السيئين لأدارة شاننا العام ومالذي جرى في وزارة الخارجية ببعيد فكيف يعقل أن تقوًم قدرات موظف قضى في العمل العام سنوات ويعلم ممتحنه أنه لايمتلك من المواهب الأ قربى فلان.الأصلاح يبدأ من فووووووووق وبالمناسبة انتوا في دولة ناجحة في عالم اليوم حاكمها عسكري ولا طبيب؟ انتبهوا ياشعب المشكلة أداااااااااارة.


#754900 [A.nasir]
5.00/5 (3 صوت)

08-29-2013 09:06 AM
انا سجلت للامتحان دا : دور تاني (امتحانات المجاهدين)وانشاء الله حاجيب (الفل مارك) مع مرتبة (الرشف) الاولى ويتم استيعابي في جامعتك يا استاذ جبرا.


#754663 [أيمن الرشيد]
5.00/5 (4 صوت)

08-28-2013 10:42 PM
أستاذ الفاتح :
سؤال رقم صفر
الواحد يقرأ مقالك يضحك ويضحك وأول ما يخلص
ياخد نفس عميق ويتنهد ويتحسر على ما وصل اليه
حال البلاد . علل هذه الحاله مستصحباً حبوب الضغط .


#754645 [لتسالن]
5.00/5 (3 صوت)

08-28-2013 10:12 PM
يا عبقري (ساخر سبيل) لا نفد مداد قلمك، و خفف الله من ألمك، و لنتعز بقول المتنبي:

ذو العقل يشقى في النعيم بعقله
وأخو الجهالة بالشقاوة ينعم
لا يخدعنك من عدو دمعه
وارحم شبابك من عدو ترحم
لا يسلم الشرف الرفيع من الاذى
حتى يراق على جوانبه الدم
والظلم من شيم النفوس فأن تجد
ذا عفة فلعلة لايظلم
ومن البلية عذل من لا يرعوي
عن غيه وخطاب من لا يفهم


#754643 [Arkamani]
5.00/5 (4 صوت)

08-28-2013 10:07 PM
الاستاذ جبرة متعك الله بالصحة والعافية لو سمحت بس الامتحان ده في منو نسخة مجاهدين؟؟


#754640 [ودالباشا]
4.50/5 (2 صوت)

08-28-2013 10:04 PM
الحمدالله يا جبرا بقيت صحفى انت لو كنت فى لجنة الامنحانات كنت ضيعت الناس ياخى انت لخبطة قوانين الفيزياء مع معادلات الكيمياء والاحياء بالجبر وهندسة المساحه مع علوم البيئة انت اصلو مصاحب بكرى


ردود على ودالباشا
United States [البيان الواضح] 08-29-2013 10:37 AM
بتاع الحمراء

United States [واحد تانى] 08-29-2013 02:01 AM
بكري دا منو .....!!


#754624 [الحقاني]
5.00/5 (1 صوت)

08-28-2013 09:23 PM
س12 لماذا لم تخطط حكومات الانجليز والوطنية ونميري وعبود منطقة ابوآدم وخططتها حكومتنا الحالية لماذا ؟
13س-سمي الوادي الأخضر وتم تخطيطة للسكن مامصير غاطنية ؟
14س-اجلت سلطات ولاية الخرطوم بعض الأسر الضعيفة بالقوة الجبرية بحجة السكن العشوائي وتم حشرهم في منخفض بين الجبلين اسمه الجخيس صف مصيرهم المحتوم مع المطر والغيوم ؟
15س_سكن مواطني الجريف شرق عشرات السنين في امن وامان وتم حصارهم في السنين الأخيرة ب 1-ترس ترابي منجهة النيل كطريق لم يكتمل 1-احياء راقية من جهة الشرقفي بلداتهم القديمه 3- مزارع خمسة نجوم من الجنوب والشرق غيرت مجرى السيل نحوهم
اكتب مقال تصف به توقعاتك لحالهم بعد الامطار والسيول
س16 -اختار الكلمة الشاذة المستفيدون من كوارث الأمطارهم 1- تجار مواد الإغاثة 2-تجار مواد البناء 3-محمداحمدالغلبان
17- منعت السلطات شباب نفير من العمل ل 1- لأنها قامت بالواجب واكثر 2- خوفا على الشباب من الأوحال والطين 3- لشيء في نفس يعقوب


#754623 [هاجر حمد]
0.00/5 (0 صوت)

08-28-2013 09:22 PM
اجابة السؤال الخامس :
ان الذي سمك السماء بني لنا
بيتا دعائمه اعز واطول
بيت زرارة محتبٍ بفنائه
ومجاشع وابو الفوارس نهشل
يعني ديل كلهم يكونوا متفرجخين وعاملين فيها خمسة بقرش في بيت زبالة ! تمام هم مؤتمر وطني بتاع زمان لاكين برضو البيوت ما زبالة ! مش ! ولا شنو ؟


#754616 [Adam Ibrahim]
5.00/5 (1 صوت)

08-28-2013 09:09 PM
يا أستاذ ماممكن تدينا امتحان (فجأتن) فى مادة الخريف الاصلاً بجينا (فجأتن).. هسى ما مستعدين لكن نوعدك حنعلن عن كافة الاستعدادات للخريف اقصد الامتحان الجاى..


#754573 [ود ابو زهانة]
5.00/5 (2 صوت)

08-28-2013 07:26 PM
ياخى انت تاعبنا مالك ؟؟ اسئلتك دى وجهها لعبدالررحيم حمدى أشطر زول من ناس الانقاذ فى الحساب وما تعذبنا معاك .. ده من شطارته فى الحساب خلانا نلحس كوعنا ... ياجبرة ... عذبتنا مالك


#754552 [دا كلام ما صاااااح]
5.00/5 (3 صوت)

08-28-2013 06:51 PM
السؤال التانى ومن غير احاديث وآيات
فى بلد الكفار الما بعرفوا الدين .. مرة حصل حادث حركة .. ولما جوا بتاعين المرور وعملوا رسم للحادث .. طلع السبب عيب فى الزلط (بحساب معامل الأحتكاك فى حالة الفرامل الشديدة ومقارنة بالسرعة المسموح بها فى تلك المنطقة).. قامت البلدية صلحت عربات الحادث وعوضت المتضررين من الحادث ..
اهو جبنا ليك الدليل العقلانى .. لأنه مسألة الآيات والأحاديث دى بقت تتفصل على حسب الأغراض
وما توفيقى الا بالله
ويارب النجاح فى كل صباح


#754535 [زايغ]
5.00/5 (2 صوت)

08-28-2013 06:14 PM
دا اختبار صعب انا ما شايلو السنة دى ح اخليهو للسنة الجاية يمكن اقدر احل السنة الجاية.او يمكن السنة الجاية اكون مسعول كبير واغش بكل سهولة.والدايرنى يقابلنى فى غابة السنط الساعة2 صباحا.


#754531 [mansour]
5.00/5 (2 صوت)

08-28-2013 06:10 PM
السؤال الثامن والعاشر انا اقول ليك ان سرقه مواد الاغاثه اسرع من سرعه ضوء الصاعقه التي ضربت البيت
اما السؤال التاسع فالعيب ليس في واحد من الثلاثه فالعيب في المطر ذاته التي فاجأت الجميع ولم تنذرهم وجات انحشرت في هذا النفق خوفا من ملاحقه الامن لها ووزير الدفاع بالنظر


#754529 [ود الاسكافي]
0.00/5 (0 صوت)

08-28-2013 06:05 PM
قارن بين (الهدهد) في قصة بلقيس وهذه القصة في ثلاثة أسطر فقط:3 اسطر كتيرة واحد كفاية..الهدهد روي ماراه والعندو علم من جماعتنا خطف الاغاثة


#754527 [mohammad saad]
0.00/5 (0 صوت)

08-28-2013 06:02 PM
التحية للاستاذ جبرة
يتعين على جميع (الشهداء) ديل طبعاً الناس الدخلوا الامتحان بتاعك دة كتابة الاجابة على اللوح المحفوظ
يتم جمع اوراق الاجابة مع الكفن
تعلن النتائج في اليوم الموعود
انا لله وانا اليه راجعون
وحسبنا الله على من ظلم هذا الشعب المكلوم


#754485 [ابوالهول]
5.00/5 (3 صوت)

08-28-2013 04:54 PM
السؤال (12)
اذا كانت الكارثة ان يموت نصف الشعب السوداني "حسب معايير والينا الهمام"...ويبلغ اخر تعداد للشعب السوداني 20 مليون نسمة ...وعدد الذي تضرروا 9 مليون فقطن ..!!!
فكم تبقى من انفس لبلوغ هذا المستوى والمعيار المذكور اعلاه ؟
ملحوظة :ممنوع استعمال جداول اللوغريثمات


#754483 [yasir abdelwahab]
5.00/5 (3 صوت)

08-28-2013 04:54 PM
انا غايتو يا استاذ حسب قدراتي العلميه وانا خريج جامعة اسلامية ميه الميه...بجاوب ليك علي التاسع والعاشر...
السؤال التاسع.....العيب في السماء....كيف تصب مطرة في الخريف؟؟؟؟مش المصريين والشوام بقول السماء بتشتي...عمرهم ما قالو المطره حتصب..والمقاول خريج الجامعه الاسلامية ببيروت!
السؤال العاشر....ما هو لانو الهدهد بطئ سيدنا سليمان استعان بالذي عنه علم....والله اعلم...

ديل حيرو الهدهد وبلقيس و سيدنا سليمان زاتو...عليه السلام...


#754481 [jangy]
5.00/5 (1 صوت)

08-28-2013 04:51 PM
اخونا الفاتح من المتضررين القدامى من الامطار والسيول وقد حسبتة قد نسى تلك الايام منتصف ثمانينات القرن الماضى حيث كان مغتربا ومشلهتا معنا فى الرياض وكانت الاغاثة لاهلة من حر مالة ريالات سعودية دات الحجم العائلى سافرت بها للسودان ومن المطار لمنزل العائلة بابروف فوجت البيت قد اختفت ملامحة الحيطة من الجهتين كانت ممددة على الارض ويتوسطها باب عتيق وتعمدت الدخول من موقع الباب ظنا ان اصحاب الدار قد اعتادو النظر لتك الناحية ولا سبيل لاعلان دخولى للمنزل غير الصفقة فكان رد والدتة التى وبدون ادنى شك قد تتلمز على يدها فى السخرية قالت يا ولدى مش انت الجيت ماشى بى جاى قلت ايوة الخلاك تلف اللفة الطويلة دى شنو البيت دا مابقى كلو باب وهسى فى لفتك دى كان عضاك كلب وللا جا ود حرام خطف شنيطك دى كنت تسوى شنو قلت ليها يا حاجة حمداللة على السلامة الجاتكم فى الحيطان وولدك الفاتح مرسل ليكم الاغاثة سالت عن حالو وهو كيف قلت ليها انا ما بعرفو واول مرة اقابلو عرف انا مسافر السودان ادانى الظرف دا...شفتو كيف اغاثة عبر البحار تصل فى نفس اليوم لمستحقها واغاثة من المطار للسوق والعايز خيمة وللا بطانية يمشى سوق ليبيا


#754462 [واحد مكشكش]
5.00/5 (1 صوت)

08-28-2013 04:15 PM
الاجابة على السؤال التاسع ان العيب يا جبرة فى الزول المسك الكومشن وكتح الرماد فى خشمنا المغبش بطبعه من ال................ الباقى تمو خيال يا جبرة


#754460 [نور الدين محمد عوض]
5.00/5 (1 صوت)

08-28-2013 04:12 PM
إنشاء الشعب بعد الرب ،،،
نتقابل فى شارع القصر ،،،،
ونُقف صف لحق الشعب ،،،،
ونشيل الشُلة شيلا هووب ،،،،
وجوه براميل الزبالة نكبهم كب ،،،،
:

:
حتماً لك الخلاص وطني


#754456 [سارى الليل]
4.00/5 (3 صوت)

08-28-2013 04:10 PM
يا جبرة والله الاسئلة كلها ساهلة الا السؤال السادس كان تقول لينا خط 6 عشان خط ال18 ده بيكون فيهو دشليون البلايين من البعوض ولو قعدنا نحسب من يوم الليلة لحد ما تلقى خبر خط هيثرو نحن ما بنكون عرفنا عدد الذباب والبعوض الفى خط 18 ولو استعنا بفيثاغورث الانقاذ ربيع الواطى الذى اتهمنا زورا وبهتانا بان متوسط دخل الفرد 1800 دولار عشان كده يا جبرة خلينا من حكاية الواحد والتمانية لانها لمتنا مع ربيع الواطى ونحن هسة غايتو بدينا فى الحساب بخط 6 بميدان انقولا بالحارة 68 وباذن الله سنرسل الاجابات الى السيد وائل مجدى غسان مهند محمد حاتم سليمان مدير تلفزيون جمهورية ام درمان وذلك فى العام 3006 فى فى عام الرمادة الثانى فى السودان الفضل .


#754438 [أزرق]
5.00/5 (2 صوت)

08-28-2013 03:44 PM
لن ينجح احد


#754434 [ابوسحر]
5.00/5 (1 صوت)

08-28-2013 03:40 PM
واالله هذا الامتحان ما لاقنا لا في الشهادة السودانية
ولا في الجامعة
ولا حتي في امتحان وزارة الخارجية العجيب؟؟؟
لكن باقدر ارد علي السوال التاسع

في الزول الاعطاهم العطاء؟؟؟؟


الفاتح جبرا
الفاتح جبرا

مساحة اعلانية
تقييم
10.00/10 (5 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة