الجن الأحمر
09-01-2013 04:44 AM


في عددها ليوم الأربعاء الماضي الموافق 28 أغسطس 2013م وعلى صفحتها الأخيرة أوردت الزميلة (الرأي العام) خبراً بعنوان (خرجوا على 20 دفعة – 40 ألف جان يخترقون جسد فتاة بنهر النيل) يقول الخبر عزيزي القارئ (أصيبت فتاة عشرينية بولاية نهر النيل بأنماط سلوكية غريبة أثر إختراق جسدها نحو 40 ألف جان الأسابيع الماضية وقال شهود عيان للرأي العام أن ذوى الفتاة ذهبو بها إلى الشيخ (أ.أ) بمدينة بربر الذي خاطب الجان وطالبه بالخروج إلا أنه رفض وأعتذر للشيخ بحجة أن دخولهم كان بغرض تجربة إحتمال جسد الإنسان لعدد كبير منهم إلا أن الشيخ أصر عليهم بالخروج من الفتاة التي أصيبت بالهذيان والدخول في غيبوبة أحياناً ، وبلغ النزاع بين الشيخ والجان لأكثر من 11 ساعة وتوصلت المفاوضات إلى خروجهم 20 في كل دفعة مما إضطر الشيخ إلى السهر حتى الصباح لإخراج الجان لتعود الفتاة إلى صحتها النفسية الطبيعية ) .. إنتهى الخبر يا سادتي الأماجد ويبدو أن التفاوض بين الإنسان والجان أجدي وأسهل من التفاوض بين الإنسان وأخيه الإنسان فها هو الجان قد أذعن للشيخ بالخروج ولم تستغرق المفاوضات سوى بضع ساعات (لا دوحة ولا وفد مقدمة ولايحزنون) تم الإتفاق فيها على طريقة الخروج الآمن على دفعات !
غير أن أبانا الشيخ يبدو أنه (دقس) ولم يهتبل لفرصة التي جاءته على طبق من ذهب فهو لم يستفد من هذا التجمع (الشيطاني) الكبير ومن طاعة الجن له خوفاً والبلاد تعاني ما تعاني من كوارث السيول والأمطار فالعبد لله لو كان مكان الشيخ لإختلفت المفاوضات
- مش حرام عليكم يا جان البلد غرقانه وبدل ما تساعدونا تجوا تدخلو في جسد البت المسكينة دي؟
- وعاوزنا نعمل شنو؟
- تعملوا شنو كيف؟ ما شايفين الخراب ده
- الخراب ده ما سببو إنتو؟ تعملو نايمين ولمن الخريف يجي تقعدو تكوركو
- نكورك ما نكورك ما دخلكم .. إنتو تطلعو من جسد البت دي دلوقتي وكل 20 منكم يمشو ليهم (بركة موية) ينشفوها !
- بس كده
- لا وكمان أي بيت وأي مدرسة وأي حيطه واقعة تبنوها .. وأي شارع باظ تصلحوهو
- ده ما كتير علينا يا الشيخ
- كتير عليكم ده شنو إنتو (جان) وللا (لجان شعبية)؟ يا تعملو البقولو ليكم ده يا (آيات الحرق) !
- لا .. لا ما تحرقنا يا الشيخ .. لو عاوزين (بنيه تحتية) ذاااتا نعملا ليكم
- البنية التحتية دي سيبوها (عندنا ليها وزارة) بس أغيثو لينا الناس المنكوبة دي ورجعوا لينا الحاجات الإتهدمت دي وإلا سوف نذيقكم بإذن الله عذاب الحريق
- حريق لا .. حريق لا .. سمعاً وطاعة !
بينما كانت الحياة تسير على ذات الوتيرة من الرتابة .. الأسر المنكوبة تجلس على بقايا ممتلكاتها وسط أكوام الطين والمياه الراكضة والذباب والباعوض .. والمسؤولون يصرحون بإحتوائهم للأزمة وفجأتن ووسط ذهول الجميع تعود كل الأشياء إلى ما كانت عليه قبل كارثة الأمطار .. تختفي البرك والمستنقعات .. تعود المباني والبيوت والشوارع إلى هيئتها التي كانت .. !!
وتصدر صحف اليوم التالي وهي تحمل مانشتات تصريحات المسؤولين :
- الحكومة تقوم بإعادة الحياة إلى طبيعتها
- 40 الف مهندس وعامل يعيدون البسمة إلى الأسر المنكوبة
- إعادة تشييد كل المدارس والمباني في وقت قياسي
- تشييد 40 ألف منزل منهار في يوم واحد
وبينما العبدلله يقرأ في عناوين الصحف يمثل أمامة (الناطق الرسمي للجان) :
- إن شاء الله خير يا شمهريرة ّ
- خير شنو يا الشيخ ؟
- أمبارح اليوم كوووولو تعبانين نشتغل والحكومة تقول إنها أعادت الحياة إلى طبيعتها ؟
- ما عليك يا شمهريره هم أصلهم كده .. كويس إنك جيتني لأني امبارح نسيت ليا حاجة
- نسيت شنو يا الشيخ !
- نسيت اقول ليك إنك تجمع الإغاثات الجات دي كوووولها من المخازن الفيها (خاصة الخيم ام جنريترات ومكيفات) وتوزعها للناس البستحقوها الكانو متضررين !
- والله يا الشيخ إلا دي الما بنقدر عليها؟
- ليه يا شمهريرة
- لأنو دي يا الشيخ تحت حيازة (الجن الأحمر) !!

كسرة :
نسينا نسأل (شمهريره) عن أخبار ملف خط هيثرو؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و؟

تعليقات 33 | إهداء 2 | زيارات 11292

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#758247 [المندكورو وقع في براسن الفشل!]
0.00/5 (0 صوت)

09-03-2013 11:16 AM
فعلا ياجبرة احد الامور المحيرة في هذه البلد كترة شيوحها ومدعيي الجان والوصول والقبول بينما نعاني من فشل لايحتاج الي نظارة واصغر شافع يعلم باننا اكثر البلاد فشلا في المنظومة والتاريخ الحديث!!واكثرها فساد واكثرا اتساخا واكثرها تدعولرا في كل المجالات !!فلماذا كما قلت لاينبري احد ممن نحبهم ونجلهم ونعتقد بوصولهم بتسليط جني لو ميني جن للقضاء علي الذباب فقط!!!ولا كما قال تعالي لو يسلبهم الذباب شيئا لايستنقزوه!!!ده نحنه طيارتنا حلوة طيارتنا دي لانو شكلها معمولة في المنطقة الصناعية!!تهدر في روؤسنا منذ ايام والبعوض والذباب ينهش فيينا!!بس خملة لمساعدة المريدين! في القضاء علي البعوض!!وياسيدي بس يطلعوا شيوية بترول مش ذي حق السعودية !!شوية بس عشان يساعدوا حكومتنا في الفشل المزمن الذي تعيشه!! وله لو شغلم بس تطليع! يطلعونا لينا الحكومة دي بره ويريحونا انشاء الله نخليها فاضية من غير وزراء فاشلين وكمان بينهبوا !! اي حل !!عفريت خرتيت!!وله عاجباهم الحالة النحنه فيها!ماجن الحكومة راكبنا وماعايز يطلع بكل الطرق!!! اسه نحنه الا نطقع!!!مافي غيبوبة منذ سنوات!!


#757866 [التويجري]
0.00/5 (0 صوت)

09-02-2013 07:38 PM
ربنا يدخل البسمة والسرور علي قلبك يا استاذنا.والله فعلا السودان بلد قامة يحكمه أقزام.عقول سودانية علي مستوي الدولة مامستفيدة منها واستاذنا نموذج لاحد هذه العقول لو اعطوها جزء يسير لكان حالنا غير.وخط هيثرواده يطلع كيف من الجن الأحمر دا!!!!!


#757840 [أبو عمر]
0.00/5 (0 صوت)

09-02-2013 06:16 PM
ربنا يحفظك ياجبرة فشيتنا و بتفش دائما هذا الشعب المغبون والزيك دة يا جبرة يستحق يكون والى الخرطوم لأنك مطلع على كل الممارسات السيئة لهذا النظام الفاسد وواضح إنك راجل نضيف وأكيد بحول الله حا تصلح الحال


#757804 [تينا]
0.00/5 (0 صوت)

09-02-2013 05:05 PM
كيف حالك أخوى الفاضل ((( الصوت ))) أنا حيييييييييية ترانى بفرفر كيف صحتك . تحياتى


#757756 [كضاب]
0.00/5 (0 صوت)

09-02-2013 03:54 PM
بل دخل بها الشيخ فخرجت الشياطين
والغبى يفهم


#757611 [ابوبهجه]
0.00/5 (0 صوت)

09-02-2013 12:14 PM
صباح الخيريا استاذ
خلاص تعبت من الانس مرقت لى الجن
خط هيثرو اسأل منه جن الانس ده اصعب من الجن الاحمر زاتو


#757566 [ود فارس]
0.00/5 (0 صوت)

09-02-2013 11:32 AM
تحب ان يكتب لك باللغة العربية الفصحة يا ابو انس اكيد عامل فيها جعلي وشريفي و الرسول بقرب ليك ( قبل كم سنه كدي واحد سعودي بتريق على اصحابه السودانيين قال ليهم السودانيين ديل عندهم عزه ما ليها داعي لاهم عرب اشراف و لا عندهم قروش )


#757563 [ود الخضر]
0.00/5 (0 صوت)

09-02-2013 11:28 AM
وفجأتن عاد التاريخ الي الوراء الي 30-6-1989 وعاد الاموات الي الحياه ودب النشاط من جديد وووو


#757458 [هدهد]
5.00/5 (1 صوت)

09-02-2013 09:36 AM
يا ود جبرا الاربعين الف ديل بالقديم؟


#757331 [نص صديري]
5.00/5 (1 صوت)

09-02-2013 03:47 AM
scooby doo where are you?


#757288 [زول سودانى]
0.00/5 (0 صوت)

09-02-2013 12:28 AM
لو فى توجيه صاح المفروض كل الف يوجه الى وزير (اقل من الف ما يعملوا شى مع الابالسة ديل)ويشلوا اياديهم اللى بت---- ولسانهم اللى بيلحس الكوع


#757283 [quickly]
0.00/5 (0 صوت)

09-02-2013 12:08 AM
هههههههه قوية والله ياجبرة .. الشيطان يستعيذ من الكيزان


#757282 [ابوانس]
5.00/5 (1 صوت)

09-02-2013 12:07 AM
المياه الراكدة من الركود ام الراكضة من الركض يا استاذ


ردود على ابوانس
European Union [المتفائلة جدا] 09-02-2013 10:12 AM
يا أخ أبو أنس ناس حسى ناس السودان كلهم بقولوا موية زرقاء فى ذمتك دى كبيت ليك موية فى كباية قزاز لقيتها لونها أزرق ؟؟ وكل الناس برضو بتقول موية راكضة بالدارجى يعنى ..والأستاذ جبرا بيكتب بالدارجى عشان كلنا نفهم..وزى مابتقول حبوبتى خلى الفلفسة دى وما تشتت إنتباه الناس من الموضوع الأساسى وشكرا..


#757165 [زرياب]
5.00/5 (1 صوت)

09-01-2013 06:55 PM
كم انت رائع ايها المبدع المسكوووووووون بالإبداع ( وليس بالجماعة الاولانيين) ولا التانين
( الجن الأحمر )...كل التجلّة والتقدير لكم و لقلمكم الرائع


#757161 [ودالماحى]
5.00/5 (1 صوت)

09-01-2013 06:45 PM
الاخ الفاتح تحياتى والله ديل الجن الاحمر زاتو يحتار فيهم- اغاثة شنو لببترجع دى تلقاها بتشطب فى العماره السادسه عن جوقة المسئولين- ديل الجن الاحمر اظنو شغال لحسابهم


#757086 [معز محمود]
5.00/5 (1 صوت)

09-01-2013 04:27 PM
الكلام برضو بقئ راتب


#757072 [تينا]
3.00/5 (1 صوت)

09-01-2013 04:01 PM
ها. ها . ها . ها . ها مقال عسل عدييييل ((( ان شاء الله أجن وأزيد فى الجن ))) رحمك الله يا الكحلاوى


#756978 [جادو]
4.00/5 (1 صوت)

09-01-2013 02:11 PM
أربعون ألف من الجان في جسد فتاة !! لا حول و لا قوة إلا بالله ، عدد كبير ، لو كل و احد من هؤلاء الجن توجه إلى واحد من أفراد العصابة الحاكمة بدءاً من رئيس النظام و من ثم إلى الجيش العرمرم من التنفيذيين و التشريعيين بالمركز و الولايات لكفونا شر القتال و لسقط النظام في يوم واحد !


ردود على جادو
[الصوت] 09-01-2013 08:30 PM
بتقصد يسقطوا الجن في يوم واحد هههههههههههههههههههه


#756950 [hussein musa]
0.00/5 (0 صوت)

09-01-2013 01:37 PM
ياشيخنا قررت الجوع اخيرا ..لكن بناتي والدي الاربعة اكبرهم 22سنة
عمرهم ماشافو السودان ..كافي البلي..سمعوا بيه سمع..وامهم الروسية سمعت بالكلام عيونها نططت..قالت نرجع البد دي علي جثتي..يانانسي عجاج اموت في الجن..ما نا بفاعل..يالفاتح جبرالله ..يبدوا انحنا اصبحنا
الجججججججججججن ذاتوا..يبدو امرا عجبا.....


#756920 [hussein musa]
0.00/5 (0 صوت)

09-01-2013 01:15 PM
عن اخبار الجن..سالت قريبتي عن الخبر وانا خاصة27 سنة اغتراب عن البلد بعيد عنكم في اوربا..كدت لي الخبر وقالت لي ما اربعين الف وبس
..الشعب السوداني كله مركوب..الرررررررررررروب..يعني الجن استقر
واحتل السودان..خلي بالك دا جن اسرائلي يهودي..ححححححي..قيييييوم
اللهم انقذ السودان..ابو كريم..ابرا ياما من الجن..كفانا جن اجبهجة...


#756889 [ابو احمد]
5.00/5 (2 صوت)

09-01-2013 12:44 PM
دي قوية جدا ياجبرة ههههههههه


#756868 [Adam Ibrahim]
3.00/5 (1 صوت)

09-01-2013 12:18 PM
لم استطع التوقف عن الضحك.. يديك العافية حبيبنا جبرا..

ماهو اذا كان مواد الاغاثة تحت حيازة (الجن الاحمر)، معناتا ملفات خط هيثرو حتكون تحت يد (الجن الارقط)..

ديل استعانوا بشيوخ محترفين (زى لعيبة الكورة وكده) من السنغال والكاميرون ودلتا فولتا العليا.. لانو المحليين ما لاحقين يغطوا الشغل الكتيير ده.. شى المحكمة الجنائية والارصدة المجمدة والربيع العربى وعبد العزيز الحلو.. ووووووووووووو الخ


ردود على Adam Ibrahim
United States [Fato] 09-01-2013 06:40 PM
أخوى / ادم مش سمعنا الأخبار كل مرة أنه الرئيس البشير معتكف للتغيير القادم أنت عارف أعتكافه ده مع كبير الجن الأحمر حتى يحدد ليه منو اللى بيلعب(اسف منو البجيبوه للوزارة الفلانية)لأنه الجماعة الكيزان ديل ما تبع الجن الأحمر وما شايف راكبين فى الشعب ده كيف وغايتو نشوف شيخ البت دى كان يخارجهم مننا لو قدر.


#756824 [دا كلام ما صاااااح]
4.00/5 (2 صوت)

09-01-2013 11:33 AM
من زمان قلنا السودان دا بيصلح بى واحد من اتنين
يا اما فقيرا يروب الموية بى كراماته ..
او فكى كاااارب بتاع سفلى وحجابات من النوع الصاح
جونا الأتنين فى واحد ..بالنهار هتافات هى لله هى لله .. وتحت تحت بيعملوا شنو يعلم الله
غتسوا حجر البلد


#756776 [شمهريره]
0.00/5 (0 صوت)

09-01-2013 10:38 AM
والله الدقسه كان في طلب واحد كان البلد دي كلها إرتاحت من تعب 24 سنه


#756742 [المتفائلة جدا]
5.00/5 (1 صوت)

09-01-2013 09:57 AM
ده مش جن أحمر ..ده جن كلكى ولابس ملكى ..ولا جن أزرق أقصد أسود ولابس سفارى .
يلهف فى خيرات البلد منذ ربع قرن بالليل وبالنهارى..
ولما تجى الكوارث بفرح وبيستثمرها أيما إستثمارى..
ده لهف أراضى الخلق وسكنهم فى خطوط السيل والمجارى ..
وحتى لو إتلحسوا.. نصهم ولا كلهم حيفرح .. ده العاوزه ليخلوا
له الجو فيبيض ويصفر أيما إصفرارى..
كم لهف وكم لغف وين قروش النفط مافى سيرة عنها ولا حد جاب ليها طارى..
وإنت يا ود جبرا جننتنا خط هيثرو و خط هيثرو
وسودان طير عدمت االطيارة إلا كان نطير لهيثرو حمام ولا قمارى..
لكن أدعو ربى الكريم أن تطير الإنقاذ طيرة ناس مرسى من الكرسى ويشتت شملهم..
ونزرهم ونقبضهم ياربى تحت المجارى..


ردود على المتفائلة جدا
[Fato] 09-01-2013 06:32 PM
روعة يا(المتفائلة جدا)والله روعة وجبرة أروع الرائعين,دمتم للوطن عزا.شكرا أختى.


#756726 [هاجر حمد]
0.00/5 (0 صوت)

09-01-2013 09:39 AM
سألوا الشيخ بلة الغايب الله يطراه بالخير عن امكانية مساعدة الجن لنا في التشييد والبناء فرد ساخرا : وكمان عايزنهم يشتغلوا ليكم ! اهو ديل اشتغلوا لينا للاخر حتي قابلهم الجن الاحمر فتوقفوا ! يا شيخ بله مافيش فرق جن قناصة تلم في الحمر ديل تعدمهم نفاخ النار الله يقطع دابرم دنيا واّخرة


#756724 [المغتاظ]
0.00/5 (0 صوت)

09-01-2013 09:36 AM
اموت واعرف العداهم منووو . DELUTION


ردود على المغتاظ
United States [محمد حسن] 09-02-2013 08:05 PM
هم اللي آلولو نحنا أربعين ألف


#756708 [ابو ايه]
5.00/5 (2 صوت)

09-01-2013 09:19 AM
والله يا جبرة ما بضحك إلا لمن اقراء مقالاتك... تحياتى


#756691 [نصرالدين]
5.00/5 (1 صوت)

09-01-2013 09:00 AM
نفس الشيخ جاء والسيول تجتاح المنازل من كل الجهات وبعد السلام عليه بتقبيل اليدو بالانحناءة المعهود من الحضوروالمتضررين -التأدب المعهود- من الرجال والنساء المحتشدين وفي وجوههم الحسرة المشوبه بالتفاؤل -بوجود الشيخ -..... قالت أحدي الحاضرات ذات المعتقد القوي في هذا الشيخ:(أها يا شيخي ، أشربها ، ما كتيرة عليك)!!رد أحد الحاضرين -كان وجوده للفرجة فقط- في استغراب : أها قولي شربها يعني يبولها ليكم وين!!!! في شيوع الدجل ومساهمة أهل الانقاذ في مزج المقدسات بالدجل والخرافات ،كل شيء يتم حدوثه دون غرابة.. حيث تم ابعاد علماءنا الأفاضل عن دورهم التنويري الأصيل ، وحل هذا التفكير الغبي حتي في السياسة ::::مش أحد الاتقاذيين كان يطالب بتطويع الجن المسلم لخدمة الاستراتيجية القومية (المختفية)..يمكن خطفها ذاك الجان!! هو الجن ذاتو انقاذي ممنهج،،، وأدل علي ذلك بالزواج من أربعة والبحث بعد ذلك واللهط والغلف والاجتماعات العديدة -عديمة الفائدة-والظهور الشوفاني والهتاف الأجوف الجاف ,وووو ... هل يوجد اَدمي له قدرة علي تلك المهام العديدة


#756689 [سارى الليل]
0.00/5 (0 صوت)

09-01-2013 08:58 AM
والله يا جبرة انا خايف عليك من خط هيثرو ده الحقك بت الدامر دى تانى الا نجيب فقراء من جبل مرة وتحديدا من منطقة كونجو وقال ليك يا جبرة كونجو دى كلام بالعربى مافى رطانة ابو كديس والله يديك العافية .


#756688 [ودالباشا]
5.00/5 (1 صوت)

09-01-2013 08:57 AM
انت نسيت يا استاذ ديل هم ذااااااتم شيوخ


#756597 [اسف يا سودان]
5.00/5 (2 صوت)

09-01-2013 06:21 AM
راااااااااااائع


#756586 [السيــــــــــــــــــــــــــــــول]
0.00/5 (0 صوت)

09-01-2013 05:20 AM
انت عارف ياجبرا الكيزان بشعروا بى سعاده
فى حالة التشبيه بالجن الاحمر لانهم يفوقون سوء الظن34


الفاتح جبرا
الفاتح جبرا

مساحة اعلانية
تقييم
10.00/10 (8 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة