تعليقات البيتزا
09-23-2013 12:15 PM


على الفيسبوك وبعض المواقع الأليكترونية الأخري التي تقوم بنشر مقالات العبدلله قمت بالأمس بوضع صورة لطبق من (الهوت دوق) ثم علامة (الجمع) ثمً طبق من (البيتزا) مع وضع علامة يساوي وكان الهدف من هذه (المعادلة) الشهية هو معرفة ردود أفعال مرتادي هذه المواقع وجلهم من فئة الشباب على بعض التصريحات (المستغرشة) التي صرح بها بعض المسؤولين مؤخراً والتي تصف (الشعب الفضل) بالنغنغة ودعة العيش و(كمان جابت ليها بيتزا وهوت دوغ) في بلد أصبح الفقراء فيه يلجأ لوجبات مثل (كمونية السمك) وكوارع (الجداد) لتعويض نقص البروتين الحيواني بعد أن أصبحت اللحوم في حكم (المعدوم) !
فإلى تعليقات (الشباب) علها تكون مؤشراً يستند إليه (أولى الأمر) عند إتخاذ أي قرارات (مستقبلية)
ولو إنو (مش باين)

التعليقات :
• غايتو على حسب نوع الهوت دوغ من وين ( القوصى ولا ابورجيلة ولا لولى ولا كيرى ساى )
• نعمل شنو؟ إبتلاء من ربنا (البيتزا طبعاً)
• المعادلة دي تساوي مواطن سوداني مرتااااح مدغلب وسميييييييين
• هو الإنسان ده بطن بس ؟ وين الصحة وين التعليم وين الأمن ؟
• إنعدام الكفاءة الوطنية وفوضى الفساد لا محالة تساوي الفشل
• يا أستاذ ديل لحدت هسه بيتستروا على لصوص هيثرو عندهم عين يرفعوا الدعم؟
• الحجات دى والله رخيصة لحدت نحنا بطنا طمت شنو يعني سندوتش هوت دوق بي 15 ألف ؟
• المعادلة دي تساوي إنجازات 24 عام !
• مافي خيارات تاني يا أستاذ غير (الهوت دوق) و(البيتزا) …. لانشون مثلاً
• خلاص كان مافي طريقة نجاوب نسوي شنو ؟ قبل م أجاوب مصاصة العصير وينها؟ هو البيتزا والهوت دوق ديل بيشربوهم سااااي كده؟
• داير اسألكم إنتو صحي البيوت زمان كانت شينة ؟ ولا الناس دي مخلوعه من العمارات
ذي ما بقول المثل .. الما شنو كده ما عارف (يخلعك)
• في سؤال محيرني ما لاقي ليهو إجابة؟ رفع الدعم ح يستفيدو منو الفقراء كيف يعني؟
لو اصلآ في دعم من اساسو؟ لو في مواطن شغال طماطم في سوق الله أكبر ذي ده ح يستفيد شنو ؟
ده خلوهو نقول بتاع كارو ح يستفيد شنو ؟
• الشعب لابد لأن يكون فقيراً .. الفقراء يدخلون الجنة
• بعد ده نجاوب ليك السؤال … دقيقة بس (الإنقاذ دليفري ) يوجد بالمحل بيتزا و(هوت دوق ) باسعار مغرية ومريحة مع خدمة التوصيل للمنازل حتي لو بقت (شينة) .. أسعارنا غير مرفوعة الدعم … الإنقاذ دليفري اربعة وعشرون عاما من الغلاء اقصد العطاء
• بيتزا زائد (هوت دوغ) تساوي تلبك معوي وهذا مايعاني منه الشعب السوداني حاليا من فرط رغد العيش والرفاهية المطلقة. . تعيش الحكومه. .
• والله يا أستاذ بقينا ما فاهمين حاجة يظهر طشتنا شبكت .. أقصد شبكتنا طشت
• راجع نفسك وما تكون جائر.. وخلى حياتنا تعود لهناها .. (مهداة للريس)
• بعد ده .. الأكل بالنظر !!
• هههاهههههههه هههههه الله يجازيك يا وزير الهناء مليت بطونا بالبيتزا… نسينا شكل الكسره والعصيده ذاتو
• أحييييييييييييييي يا قلبي هوت دوق وبيتزا .. بس خلونا في القراصة كان بي بصل بناكلها وبيوتنا بتاعت الجالوص الشينه د عاجبااانا
• تخيل انو مجرد وجبة ذي دي بقت عندنا ترف كان الله في عون المواطن السوداني المش عارف يلاقيها من فين وللا من فين؟
• شعب مرفه يصعب فطامه (ههههه) !
• الزارعنا غير الله الاجی اقلعنا افطططططططمونا وريحونا ذاتو
• أموت وأعرف (الصنف) ده بجيبوهو من وين؟
• ويخرج المواطنون بعدما إلتهموا كل مخزون إيطالي بيتزا وديبونيرز بيتزا متوجهين إلى القصر الجمهوري مرددين شعارات (يا حكومة هسي هسي لازم تجيبو لينا جالاكسي) والبعض الاخر يردد (عايزين 10 تي شيرت وأجهزة أندرويد لكل بيت) كما يهتف متضرري السيول مرددين (يا حكومة مافي غلاء بس عايزين سوني ضد الماء) .. حكم والله نعيش كتير نشوف كتير
• الشعب إتدلع شديد والفطامه بقت صعبه يا أستاذ
• يا جماعة صدقوني (الحكومة كيسا فاااضي)
• اتحدى اي زول شاف الهوت دوق قبل الإنقاذ …!!!
• بكرة يجيك وزير ويقول لينا انتو ما كنتو بتعرفو الاندومي ذااااتو
• انا لغاية أسي ما بعرف الهوت دوق دا يا جماعة ..ممكن توصفوهو ليا؟
• علي فكرة الموضوع ما يزعلكم .. بالجد عرفنا جنس الاكل ده في عهد (الإنكاس) زمان كنا بنقعد في صينية فيها لحمة وخضار طازة وبعد كدة في فواكه .. لكن هسي الجوع قطع قلبنا بأكل البتزا والهوت دوغ
• في سبيل البيتزا قمنا نبتغي نَيْلَ العَشَاء .. لا لهوت دوغ قد عملنا نحن للفول فداء

كسره :
تحذر جمعية (مستغرشون) من زيادة تصريحات المسؤولين (المستغرشة) وتهيب بهم إلى أن (يروقوا اللعب) شوية حتى تنقشع قصة (رفع الدعم دي) عشان القصة ما ناقصة وكده !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

تعليقات 20 | إهداء 0 | زيارات 11363

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#788749 [فرح الغلابه]
0.00/5 (0 صوت)

10-03-2013 11:56 AM
فكره " لمن يريد ان يخوض الانتخابات الجايه ويفوز بالرئاسة فليجعل رمزه الوت دوغ "


#774482 [ابوسحر]
0.00/5 (0 صوت)

09-24-2013 12:15 PM
• في سبيل البيتزا قمنا نبتغي نَيْلَ العَشَاء .. لا لهوت دوغ قد عملنا نحن للفول فداء

دا احسن تعليق يا سيد جبرا؟؟؟؟؟؟


#774201 [المنحوس]
0.00/5 (0 صوت)

09-24-2013 09:24 AM
يا جماعه الراكوبة كلامكم ده لا بودي ولابجيب كفاية اقلام نحنا عاوزين نطلع الشارع زي ناس مدني خلاص طفح الكيل


#773820 [محمد علي مصطفي]
0.00/5 (0 صوت)

09-23-2013 11:06 PM
ناس الإنقاز ربوهم بالهوت دوق والبيتزا ولا بالكسره بالمويه وكسره ناشفه كمان الله ينشفها عليهم زى مانشفوها علينا حسبي الله حسبي الله عليكم ياملاعيييييييييييييييييين


#773749 [ابوالنيل]
0.00/5 (0 صوت)

09-23-2013 09:48 PM
طبعا أمريكا دى مقاطعانا مش عشان ارهاب وخلافه ..السبب هو البيتزا الأيطالية ..أصلو الدول الرأسمالية دى جنها وجن تشجعوا منتجات غير أمريكية ..أنا أفتكر مافى داعى تغيظ أمريكا فأن على الحكومة أن تمنع البيتزا والهوت دوق من المطاعم حتى لو كانت صناعة محلية وعلى كده بمذكرة من خارجيتنا لأمريكا بوقف التعامل بهاتين السلعتين تكون حكومتنا قد كسيت رضا أمريكا وستمنح الخارجية الأمريكتة التأشيرة فورا وبلا تردد للبشير وعندها يمكن للبشير أن يجبب معاهو توكيل للكنتاكى والبيرقر الأمريكى لمنظمة (سند )أو أى شركة أخرى من شركات أقاربه أو اخوانه ويكون عمل فينا جميل لن ينساه له أهل السودان بأنه بنفسه أدخل الكنتاكى والبيرقر للسودان...


#773594 [ابوكوارع]
5.00/5 (1 صوت)

09-23-2013 07:12 PM
كِسرة (قديمه جديدة) :
أخبار تنفيذ توجيهات السيد الرئيس توزيع وجبة (هوت قدو قدو) على البيوت شنو ؟؟؟


#773590 [somila]
0.00/5 (0 صوت)

09-23-2013 07:05 PM
انشاءالله ناكل ردة


#773582 [Osman]
0.00/5 (0 صوت)

09-23-2013 06:55 PM
طبعاً الجماعة ذكروا الهوت كات أقصد دوق والبيزا ونسوا انو علمونا برضه نأكل الكافيار بتاع البحر الاسود وطبعاً ده الكيلو بتاعه بي 2000 دولار يعني 16 مليون يا جبرا !!! انت بتتكلم بلغة الجبرا ؟ يعني خط هيثرو ده لسه ما جاب حقه ؟ شوفو لينا خط الكلاكلة يا ريس


#773576 [ابوبهجه]
0.00/5 (0 صوت)

09-23-2013 06:45 PM
متعك الله بالصحه والعافية
الناس نست ملحات الامات ( ام رقيقه و ام دقوقه وام عوينات و امبارد و ام تكشو )
الناس ديل نسو اصلهم وما عارفين ان البيتزا هى الكرته بتاعت المطاعم
سلم على وداد واسألها من الملحات الفوق دى اكيد بتعرفها


#773558 [omer]
0.00/5 (0 صوت)

09-23-2013 06:22 PM
علي النعمه ناس الانخاس ديل ولاد ....بشكل شغلوكم كوولكم بالهوت دوق والبيتزا والبيوت الشينه ونسيتو الموضوع فعلا هو الموضوع شنو


#773547 [Fato]
0.00/5 (0 صوت)

09-23-2013 06:09 PM
ياجبرة الشعب فهم الرئيس غلط لأنه هو ماقاصد (الهوت دوغ)أكلة السجك العايشين بيها فقراء أوربا وأمريكا بل هو يقصد فى عهده عرفنا كلاب أمنه الذين ارسلوا ربع الشعب للمقابر وفى هذه الر جل صادق وماتفهموه غلط.أما بيتزا وزير ماليته الأرتيرى فهو صادق لأنه كان بيأكلها فى أرتيريا لما كانت مستعمرة أيطالية وبرضو فهمناه غلط.الان ياود جبرة شعب مدينة مدنى الذى تنغنغ ب(الهوت دوغ والبيتزا)خرج عن قمقمه وطلع الشارع فياريت ناس الخرطوم وأمدرمان المنغنغين بأكلات الرئيس وحمار ماليته يطلعوا أيضا عشان تصبح ثورة البيتزا والهوت دوغ.


#773392 [عصمتووف]
3.00/5 (1 صوت)

09-23-2013 02:25 PM
بيتزا بي كول وكجيك وهوت دوق بمصران مرس


#773387 [ezoo]
5.00/5 (1 صوت)

09-23-2013 02:17 PM
بالمناسبة البيتزا و الهوت دوق تعتبران من الوجبات الرئيسية للفقراء والمساكين في الدول المتقدمة.... يعني من أرخص الوجبات .....

دي مجرد ملحوظة بس


#773366 [هوت دوق]
4.00/5 (1 صوت)

09-23-2013 02:01 PM
انت الهوت دوق دا دايرنو بالعيش والابالفطيرة لانو السيد/ الوزيرالرئيس ماوضح النوع


#773358 [المتفائلة جدا]
5.00/5 (2 صوت)

09-23-2013 01:52 PM
بعد رفع الدعم حنفطر كرواسان ونتغدى بديك رومى ولا تركى مابعرف وحنتعشى كافيار.. مش كل جماعة المؤتمر اللاوطنى صرحوا قالوا رفع الدعم حيصب فى مصلحة المواطن والمطره تانى حتصب عصير وبيبسى .. يعنى يا ناس شرق النيل حتشربوا عصير لمن تغرقوا..
أقول ليكم قولة زى ماقال أحد المعلقين
يا جماعة صدقوني (الحكومة كيسا فاااضي)ورفع الدعم سببوا الكيس الفاضى ده ماعندهاشىء تبيعوا تانى ما هم باعوا كل حاجة ما باقى ليهم شىء غير مجمع النور والقصر الجمهورى والشعب السودانى ولو كان فى زول بشترينا منهم نحن ذاتنا كان باعونا.. الله يطيرهم طيرة ناس مرسى من الكرسى ..إنشاء الله رفع الدعم ده يغطس حجرهم..قولوا آمين..


#773289 [osama]
4.50/5 (2 صوت)

09-23-2013 01:06 PM
واللة هوت دوق دى ما شفتة بعنى خليك من اكلتو ياخى انحنا من اكل الطعمية الكتير بقينا نبعر زى الغنم عدييييييييل


ردود على osama
[ABU SHAWARIB] 09-24-2013 11:20 AM
دى قلبت فيها ( الشنقلوتا )


#773248 [ود اللالح]
5.00/5 (3 صوت)

09-23-2013 12:34 PM
تحياتي استاذنا اجابة المعادلة = الامين كشكوش + حمد النيل ضيف الله
اسالوا عن الاول طلاب حنتوب دفعة ناس نميري والثاني اسالوا اهل شندي عندما كان المشير ملازم بشندي وكان حمد النيل ضيف الله مقدم


ردود على ود اللالح
[ود اللالح] 09-23-2013 08:56 PM
الاحباء- انا اتجنبت كلمة الاخوان عشان بقيت الكلمة دى ما بحبها - العلقوا علي اجابتي للمعادلة مشكورين . اصاب الاخ الكلب الحار في الجزء الاول وحتى لا يتعب كثير ويتفرغ للثورة المقدم كان متزوج المشير عندما كان ملازما . وبالنسبة لصديقى الاخر انا والله ما خايف ولا بخاف واذا عايز تتاكد اسال ناس جامعة الجزيرة من 85 وحتى 92 عن حافظ الشيخ . ولكم التحية والنصر قادم انشاء الله . وان الله ناصرنا على الذين لم يحاقظوا علي بضع سنتمترات من اجسادهم فكيف يحافظوا على امن ووحدة بلد بطول وعرض السودان .

European Union [الكلب الحار] 09-23-2013 02:18 PM
تسلم يا ود الالح

محمد الامين كشكوش كان بيزعط الترابي ودي معروفة حتى النميري كان بيقول ليهو حسن كشكوش
اما شندي انا ما مشيتها لكن عارف حمدالنيل ضيفالله قمبرجي لانو ساكن في الموردة جارنا وعندوا قصة الجيش ده حااااااار كدي نسال ونجيك تاني

United States [nasr] 09-23-2013 02:01 PM
انت مادام عارف القصة ماتحكيها لينا خايف من شنو..................


#773245 [ابوالهول]
5.00/5 (3 صوت)

09-23-2013 12:30 PM
(( ليس بالبيتزا وحدها يحيا الانسان ....
بل بالهوت دوق تبنى الاوطان...))
المعتكف بالله


#773243 [المنحوس]
5.00/5 (1 صوت)

09-23-2013 12:27 PM
متعك الله بالصحة استاذنا جبرا


#773237 [ابوزول]
5.00/5 (3 صوت)

09-23-2013 12:25 PM
والله ياجبرة أنا خائف الجماعة يختوا صورتك مع كلابيش وعلامة يساوي ........يا اخوي اعمل حسابك الجماعة سمهم فاير اليومين دول


الفاتح جبرا
الفاتح جبرا

مساحة اعلانية
تقييم
10.00/10 (8 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة