خليتوا لينا حاجة؟
10-06-2013 03:23 PM


مؤخراً أعلنا إنشاءنا لجمعية (مستغرشون) وهي جمعية تعني بتسليط الضوء على تصريحات بعض المسؤولين التي تصيب المتلقي بالإستغراش (الإستغراب والدهشة) وقد إنتشرت مؤخراً هذه النوعية من الإفادات والتصريحات الغريبة الشئ الذي حدى بأحدهم أن يعلق قائلاً : الجماعة ديل بيجيبوا (الصنف) ده من وين؟
تعالوا معا لنقرأ ما ّأفاد به السيد (قطبي المهدي) وقد تم سؤاله عن تأثير القرارات الأخيرة على المواطن وذلك على القناة الإخبارية (سكاي نيوز) ، قال لا فض فوه :
- ﺍﻟﺸﻌﺐ ﺍﻟﺴﻮﺩﺍﻧﻲ ﻟﻦ ﻳﺘﺎﺛﺮ ﺑﻬﺬﻩ ﺍﻟﺰﻳﺎﺩﺍﺕ ﻷﻥ ﻣﻌﻈﻤﻪ ﻳﺴﺘﺨﺪﻡ (ﺍﻟﺪﻭﺍﺏ) ومعظمهم يآكلون (الفيتريتا )!
كان من الممكن أن يكون الإستغراش قليلا لا يؤثر على (وظائف الكبد) أو (سلامة المرارة) لو أن هذا (المهدي) قدس الله سره لم يستخدم كلمة (معظم) والتي تفيد الكثرة والغلبه (يعني لو قال بعض ممكن كان تكون مبلوعة شوية) لكنه (أصر) وألح إلحاحاً بأن معظم أفراد الشعب السوداني الفضل يستخدمون الدواب من بغال وحمير وحصين في تنقلاتهم وحلهم وترحالهم لذا فإن زيادة أسعار (البنزين) لا تشغلهم كثيراً ما دام ليس هنالك زيادة في أسعار (البرسيم) !
بالطبع كلام غريب وعجيب لا يمكن لأحد أن (يفكر) فيه وإن فكر فيه أن (يتفوه) به وإن تفوه به أن يتفوه به على قناة فضائية يشاهدا كل العالم ليشهد ويتأكد بما لا يدع مجالاً للشك بان بعض مسؤولينا من أصحاب (الإعاقات الذهنية) .
منذ زمن بعيد والعبدلله ينادي بإزالة التظليل الذي على زجاج (دواب) المسؤولين وأهو دي النتيجة فليس هنالك أي تفسير لما أدلي به سعادة هذا المسؤول سوي أن هنالك خلل في تظليل زجاج (دابته) جعله يري أرجل المواطنين وقد تقطعت (سفنجاتهم) وبليت (مراكيبهم) وعلاها الغبار كأظلاف الدواب !
في ظل هذا النوع من الإفادات التي صرح بها هذا (القطبي) لم أكن (لأستغرش) لو أن الحوار إستمر على الوجه التالي :
- وكيف يا سيد قطبي تقومون بتوفير العلف والبرسيم لهذا العدد المهول من الدواب !
- (مبتسماً) : لا تنسي يا سيدتي أننا بلد زراعي لديه (نفرة زراعية) وكده !
- وكم يبلغ سعر (لتر) البرسيم الآن
- والله هو رخيص لكن ما عارفو بي كم؟ عشان أنا (دابتى) بتستخدم (برسيم سوبر)
- هل تؤثر (فضلات) هذا الكم الهائل من (الدواب) على نظافة مدنكم؟
- لا… لا أبداً فالمواطنين من الثراء بحيث كل زول عامل ليهو (بامبرز) لى (دابتو) !
- إذن كيف توفرون هذا الكم من البامبرز وهل هو في متناول الجميع؟
- البامبرز في متناول الجميع .. والحكومة تقوم بدعم البامبرز !
- وإنتا سعادتك عامل بامبرز لي دابتك؟
- لا .. لا لأنو كلما (تجي تعملا) بنوديها (ماليزيا) تعملا هناك وتجي !

وكلو كوم وحكاية (الفتريتا) دي كوم تاني .. يا جماعة أبقوا ليكم على حاجة يا نحنا شعب فقير و(عين أبو أهل الخلفوهو) طالع وبياكل (فيتريتا) … يا شعب مرفه ومرطب ومرتاح وبياكل بيتزا وهوت دوق !!

كسرة :

بفي أن نعلم ان هذا (القطبي) الذي يقول بأن معظم أهل السودان فقراء يمتطون الدواب ويأكلون الفتريتا قد سبق وتمت سرقة المبالغ التالية من منزله :
(91) ألف جنيه سوداني و(13.140) يورو و(11.360) فرنك سويسري و(645) ألف ليرة لبنانية و(420) ألف ليرة سورية و(20) ألف جنيه مصري و(9) آلاف ريال سعودي و(5) آلاف جنيه استرليني و(26) ألف دولار !!!
فعلا والله نحنا فقراء هو غنتو خليتو لينا حاجة !!

- كسرة ثابتة (قديمة) :
- أخبار ملف خط هيثرو العند النائب العام شنو(وووو وووو وووو وووو وووو)+و+و+و؟
-
- كسرة ثابتة (جديدة) :
- أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟





تعليقات 27 | إهداء 1 | زيارات 10689

خدمات المحتوى


التعليقات
#793636 [tiger]
5.00/5 (1 صوت)

10-07-2013 03:20 PM
ههههههههههههههههههههههههههههه
والله دي قوية شدييييييد يابرنارد شو السودان
الله يخليك لينايارب


#793343 [الحردان]
0.00/5 (0 صوت)

10-07-2013 11:27 AM
للعلم فقط امي الحاجة باعت كل الغنم بتاعتنا 4 غنمايات لأرتفاع وندرة البرسيم الربطة وصلت 5 الف وبالحجز .... والغنم كلهن ياالله يجيبوا رطلين لبن في اليوم مع التكاليف الاخري كده خسرانة ... وشوال الفتريتة من 26 الف جنية وصل 215 الف جنية ... كده معناتو نحن شعب مترف جدا !!! احسن تاكل ليك بيتزا ولاتشتري ربطة كسرة .


#793129 [ودالبطانه العربي]
0.00/5 (0 صوت)

10-07-2013 09:33 AM
يعني الشعب والدواب (حمير وحصين ...الخ) بياكلوا من نفس شوال الفتريتة اذن نحن (حمير وحصين...الخ)


#792916 [AbuIslam]
0.00/5 (0 صوت)

10-07-2013 07:06 AM
السلام عليك يا عزيزي فاتح جبرا اسال الله ان يفتح على اهل السودان فتحا مبينا ويخلصهم من هذا السرطان الانقاذي بس عندي سؤال
هو هذا القطبي عندو صرافة غير مرخصة في بيتو والل شنو حكاية هذه العملات والله شئ عجيب الله يجمد الدم في عروق هكذا مسولين


#792818 [إبن السودان البار ***]
5.00/5 (2 صوت)

10-07-2013 01:04 AM
وزير سوداني فاسد يصرح بأن معظم أبناء بلده بيتوصلوا بالدواب ويأكلوا الفيتاريتة حاف بدون بيض أو لحمة أو دجاج أو سمك وهلم جررر ؟؟؟ والشيخ محمد بن راشد ذو الرؤية الثاقبة والوطنية الدافقة يصرح في الصحف بصورته وهو ممسك بموبايل ويقول أريد أن يخلص كل مواطن جميع معاملاته مع الحكومة بهذا الجهاز الصغير ؟؟؟ أما في موضوع الأكل فلم يتحدث عنه لأن موضوع الغذاء الآدمي الذي يتكون من اللحوم والخضارات والفواكهة الطازجة وغيره قد تم حله وبوفرة شديدة منذ بيع اول برميل للبترول من الأمارات ؟؟؟ وكل ذلك إتباعاً لقولة المرحوم الشهيرة طيب الذكر الشيخ زايد بن سلطان الرئيس السابق لدولة الأمارات والذي قال ( لا خير في البترول إن لم يفد إنسان الإمارات ) هذا هو الفرق بين حكامنا الفاسدين وحكام الأمارات الوطنيين ؟؟؟


ردود على إبن السودان البار ***
[حسين حسين] 10-07-2013 02:39 PM
نحن في السودان وليس الامارات ، والمقارنة منعدمة لأن الواقع مختلف وحجم المشاكل مختلف جداً..


#792817 [سودانى اطلاقا ما منفرج الأسارير]
0.00/5 (0 صوت)

10-07-2013 12:58 AM
يا جماعة الخير..والله وبالله وتالله لو انتو فاكرين ناس ألأنقاذ ديل عبطا او ما ناقشين.. دا تبقو انتو الدايشين وهبل وتفتيحتكم زيرو كبير .. الجماعه ديل غالبيتم العظمى قروا فى المدارس اللى كانت مدارس و لما كانو المدرسين مدرسين والجامعات "ما هجنقله" زى حسّا ويتعدو على اصابع ألأيد الواحده..ولما كانت البيئه التعليميه فى المدارس والجامعات "جبنه فلمنك" زى ما بيؤولو اولاد بمبه عن الشي مو شي!! كانو بسلامتهم ماكلين .. شاربين.. ساكنين "بوردنقهاوسز" و "هوستلز" ومتريضين كوول انواع الرياضه .. اها ناس وجدوا كوول هذا اللى انتو جارين وراهو لأولادكم وبتفتكرو انو اولادكم لو لقوه يعملو الهوائل..
جماعة ألأنقاذ تفتيحه .. كيف؟؟ انقلابين حصلوا فى السودان .. كتيرين من كبارم حضروهن وشافو اسباب انهيار النظامين .. اها لمن عايزين يعملو انقلابن .. جهجهوكم من "ديى ون" .. شيخن راح كوبر مع السياسيين اللى كانوا دايشيبن وانقبضو .. جوكم بوزرا لاطعم لهم ولا لون لهم ولا رائحه .. لا فى العير ولا فى النفير .خلوكم طول الوقت منتظرين اجابة على شمو عن سؤالكم اللى قعدتو تسألوه ليهو: الناس ديل جبهه وهو يقول ليكم لا ما جبهه .. ديل ضباط وطنيين احرار .. خلوكم فى استغراشكم ومن زمان طبعا درسوا اسباب انهيار النظامين اللى سبقوهم وزى ما غشوكم وشغلوكم بحكاية الى القصر رئيس والى كوبرحبيس
ادخلوكم ألأسلام وشغلوكم بالشريعه والتوجه الحضارى واسلمة المناهج واعادة صياغة ألأنسان السودانى وشالو قروشكم عن ظريق الدينار بدل الجنيه.. الى آخر الحواديت .. تمكين .. تهليل .. تكبير .. تامين الثوره ..تسييس الجيش.. النقابات.. تكوين المليشيات .. دفاع شعبلا..شرطه شعبيه ..امن آخر صيحه.. بيوت اشباح.. واخرتا آل ايه آل بنيان مرصوص ..وبسلامتكم سبّحنو بحمد التجمع وسبحتو مع القرارات المصيريه وعلقتو آمالكم ب "تهتدون واعادة هيكلة التجمع وبجيش ألأمه الزاحف
ها ناس زز انا لو زوزيت بيكم مع ناس ألأنقاذ ديل يا صبّحت بيكم الواطه ولآ لحّقتكم امّات طه ..اها بعد العملو فيكم وفى احزابكم الفتتتوها شذر MOTHER تقوللى منو وتقوللى شنو : "الحبيب الرمز .. الحسيب النسيب.. آل سلّم تسلم .. توقيعات وتعبئه وتصعيد".. ورونا الناقشين انتو ولآ هم!!!


#792727 [بكري]
1.50/5 (4 صوت)

10-06-2013 11:03 PM
(أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟)

بلاش من السيد الرئيس وبلاش كلام فارغ معاك.. شـد حـيلك شـوية ياجبرا وخلينا من هذه الخزعبلات.. مشكور..


ردود على بكري
[حقاني] 10-07-2013 06:22 AM
حرام عليك يا بكري .. بكلامك الفارغ و خزعبلاتك لاثناء الاستاذ جبرا عن هدفه لمحاربة الفساد ....

فقد بح صوته سنين عددآ ( حسب الواوات المشار اليها ) و لا حياة لمن تنادي .. و ان استنجد بالرئاسة


#792708 [Aa]
0.00/5 (0 صوت)

10-06-2013 10:46 PM
جميل ياجميل


#792693 [عصمتووف]
0.00/5 (0 صوت)

10-06-2013 10:37 PM
اطلعت علي المقال علي خرطوم الباقر يبدو ان مقص الرقيب مره عليها لااسم لهاوي العملات قطبي عاوز تجيب بلوه لبتاع الخرطوم وجرو المؤتمر الجديد الاغرب تلك الصحيفة بائره من اين تمول ودي كسره علي سوالك


#792690 [المندكورو وقع في براسن الفشل!]
5.00/5 (1 صوت)

10-06-2013 10:34 PM
الشعب يؤيد مشفي ذوي الاحتياجات الخاصة لمثل قطبي والمستشار ابوكف واللمبي!!وعلي حسن هوت دوق!!!


#792648 [nasr]
5.00/5 (2 صوت)

10-06-2013 10:00 PM
اثنين لما أشوفهم أصاب بحالة من الامتعاض المعوى والتشرزم الليمفاوى وتجينى على الفور حسكنة فى البلورة هما قطبى المهدى وحيوان اخر يدعى ربيع عبد العاطى ....................


ردود على nasr
United States [واحد قرفان جدا] 10-07-2013 08:57 AM
و العبيط البشكير


#792564 [ابو خنساء]
0.00/5 (0 صوت)

10-06-2013 09:06 PM
يا جبرا انت ما سمعت تصريح ربيع عبد العاطي كان استغرشت لا بل اغمي عليك ربيع رفع معدل دخل الفرد السوداني من 1800 الى 2000 وذلك في رده علي الاعلامي علي الصراف على قناة اي ان ان اسمع التصريح موجود على اليوتيوب (الاولى كانت على قناة الجزيرة الاتجاه المعاكس)


#792532 [واحد]
1.00/5 (2 صوت)

10-06-2013 08:50 PM
ياجبرة بالله خليك من كلامك الهايف ده,ورينا ولو لمرّة واحدة بس ,رأيك شنو فى قتل المتظاهرين الذين يُطالبون بالحرية ؟ ما شُفناك يوم كتبت فى الموضوع ده؟. أم سعر البرسيم عِندك أغلى من دم الإنسان؟.


ردود على واحد
United States [ود الحاجة] 10-06-2013 10:56 PM
أستاذ جبرا كلامو هايف يا أمنجي يا وسخ .. أستاذ جبرا الصحفي الوحيد القال بالواضح عاوزين نكنس الكيزان .. بالله شوفو جنس الرمة ده


#792496 [الجنرال السيسى]
0.00/5 (0 صوت)

10-06-2013 08:17 PM
هههههههههههههههههههههههههههههههه
ماقالوا دوق هوت وبيتزا
انا الى الان ماعارف الهوت دوق ده شنو؟


#792465 [بهرام البوشي]
4.75/5 (4 صوت)

10-06-2013 07:35 PM
قطبي _ نافع _ قوش _ عطا

تأمل هداك الله في قادة جهاز امن الانقاذ ..ثلة من المعتوهين المصابين بعقدة الدونية و الجشع .. مع آفة الكذب الضار ..

و لذلك تجد منسوبيهم من الشبيحة يطلقون النار علي المتظاهرين بدم بارد خوفآ علي زوال ولي نعمتهم .. ليأتي وزير الداخلية الارتري كي يقنعنا بانها سيارات مدنية جاءت من كوكب آخر علي اطباق فضائية ..


#792429 [hatem]
5.00/5 (2 صوت)

10-06-2013 06:57 PM
(91) ألف جنيه سوداني و(13.140) يورو و(11.360) فرنك سويسري و(645) ألف ليرة لبنانية و(420) ألف ليرة سورية و(20) ألف جنيه مصري و(9) آلاف ريال سعودي و(5) آلاف جنيه استرليني و(26) ألف دولار !!!


شوف الحرامي ابن الكل ده عنده العملات الصعبة دي هبطرش كيف
وقول اما الراي العام ويبرر انها ملك اهله وجماعته المغتربين بالخليج قاتله الله وهل الخليج فيهو جنية مصري وليرة لبنانية وسورية شوفوا الكذب العبيط ده
ده ليهو حق يصرح بان الشعب السوداني كلو يركب الدواب لانه هو نفسه دابه وسياتي يوم ركوبه وحيركبه كل الشعب السوداني
ياجبره الناس دي تجبرت علينا فكيف نشيلهم بره و نقتص منهم قل لي ابلله عليك
ففي القلب غصه


#792426 [ابو كريم]
0.00/5 (0 صوت)

10-06-2013 06:55 PM
شكرا لجمعية مستغرشون
في حالة استغراش انتو ناسنها
وبصفتك رئيس الجمعية ياجبرا نطالبك بمناقشة حالة الاستغراش الذي اطلقها وزير الداخلية في المؤتمر الصحفي عن صور قتلى المظاهرات الجابوها من مصر بميدان رابعة العدوية وادعاء المندسين انو المظاهرات الاخيرة كان فيها قتل بالرصاص الحي


#792398 [ود نيالا]
5.00/5 (2 صوت)

10-06-2013 06:25 PM
يا هو بعد 24سنة من الفشل عايز يقول نحن ما قدرنا نرتقي بالانسان السوداني لسع عايش عهد التخلف والفقر فتريتة اكل البهائم ومواصلات من لبهائم


#792380 [سكسك]
0.00/5 (0 صوت)

10-06-2013 06:04 PM
شفتو ذي كلام والي الخرطوم ونافع وقضبي الدابه
وعمر الكذاب ديل هم سبب وجع مرارتنا


#792355 [ياسر عبد الوهاب]
5.00/5 (1 صوت)

10-06-2013 05:36 PM
اكتفي بتعليق الاخ المتجهجه بسبب الانفصال.....بدون تعليق

أساسا الانقاذ قائمة على فكرة العنف واقصاء الآخرين لذا لم استغرب من اتخاذها قرار رفع الدعم ولو رجعنا لتصريحات العديد منهم ممن يحملون الدكتوراة وجوازات وعملة اجنبية مثل قطبي المهدي نجد ان تصريحاتهم لا تعتبر الشعب السوداني في خانة البشر في المقام الأول ، فقطبي هذا صرح قبل يومين قائلاً (( الزيادات لن تؤثر على الشعب السوداني لأنه أصلاً يركب الدواب والحمير ويمشي مشاويره على رجليه)) تصريح مثل هذا سيكون مستغربا من رجل مؤهل اذا كان في نظام غير الانقاذ ولكنني لم استغربه وذلك أن أحد المتابعين أخبرني أنه في المحكمة التي عقدت للمتهمين الذين اتهموا بسرقة العملات الاجنبية التي اكتنزها هذا الافاك سأل القاضي أحدهم ما هي علاقتكم بالمدعي (قطبي المهدي) فأفاد أحدهم بافادات شعر القاضي انه يراوغ ولا يريد قول الحقيقة فكرر له القاضي السؤال وأمره باجابة مباشرة فقال له المتهم اذا اردتني ان اخبرك اطلب من الحضور في قاعة المحكمة الخروج ....... ) واللبيب بالاشارة يفهم ،،،،


#792354 [ودالشريف]
0.00/5 (0 صوت)

10-06-2013 05:36 PM
والله كلنا نتسال الوزراء والمسعولييين ديل قاعدين يجيبو البنقو ده من وين ؟
هولاء الفاسدين مساطيل وسكارى لايعلمون مايدور حولهم فقد شغلتهم الاستثمارات عن معرفة حال اهل السودان حقيقة عالم وهم تفقع المرارة


ردود على ودالشريف
[الزول الكان سمح] 10-06-2013 08:01 PM
من أثيوبيا...ديل عندهم مزارع هناك...يبيعوا ويجبدوا


#792340 [شقى ومجنون]
0.00/5 (0 صوت)

10-06-2013 05:20 PM
خليهو يجهز لى نفسو بامبرز مقاس xxxxxxl للقادمات من الأيام


#792323 [Fato]
5.00/5 (2 صوت)

10-06-2013 05:01 PM
صدقت الحبوب/ جبرة.والله لم يخلوا لينا غير الكتاحة والغباش الظاهر فى وجوهنا والجوع والمرض وكمان معاها أستفزاز(طبعن)الجلد تخين لو أدوه أبرة مابحس بوخزها وعشان كده هم شايفننا بنركب الدواب وبنأكل الفتريته وهو زاتو وينها الفتريتة وكمان جابت ليها بيتزا وهوت دوق.أنت عارف أخوى/جبرة الناس أمكن عندها منظار بتنظر بيه لشعبها وغالبا مايكون منظار وزير الدفاع بالنظر وعدساته مجلية وكل ما ينظروا للشعب العدسات تجيب ليهم دبى وماليزيا وشايفين الناس بهذه العدسات رايقة ومروقه ومنغنغة وعشان كده التصريحات الملونة بالوان النعم والنعنشة وما نظلمهم.أما صاحب الصرافة فياأخى/ جبرة فالراجل ده قصده شريف ومجنب العملات دى لما تنشف خزينة بنك السودان داخرها لليوم السود لنا وسوف يخرجها لدعم الفتريته أو البرسيم السوبر والعايدى ويجب علينا أن لانظلمه ونقول حرامممممممممممممممممممى.


#792297 [ابو محمد]
5.00/5 (1 صوت)

10-06-2013 04:43 PM
خلوا ليناالهم ووجع القلب.............يا عم عبدالرحيم يا حر وماكا حر
بلدا تتمني يطول ليلهاعشان الليل يخف الهم وتتدثر فيه دمعات الوجع....
ارحل عشان نرجع نحب فاطنه تاني.............كفايه حرام يازمن وياريت رصاصه سنهوري انشطرت وشالت معاها قلبا نسي كيف فطومه بتنحب.........................


#792262 [نادر]
0.00/5 (0 صوت)

10-06-2013 04:09 PM
جبرة وبرهام وساتى أخيار من اخيار,,,


#792259 [خالد حسن]
5.00/5 (3 صوت)

10-06-2013 04:07 PM
والله ياسمبل اقصد ياجبرا ضحكتني بحكاية البمبرز دي
غايتو حكومه فيها عدد من الاغبياء زي دي ماحصلت في تاريخ البشريه
كل مسئول فيها اغبي من التاني واغباهم رئيسهم العره بهيمة الانعام البشير بني حمير
واحد يقول نحن بناكل هوت دوق وواحد يقول فتريته


#792257 [ابوزول]
5.00/5 (2 صوت)

10-06-2013 04:03 PM
بفي أن نعلم ان هذا (القطبي) الذي يقول بأن معظم أهل السودان فقراء يمتطون الدواب ويأكلون الفتريتا قد سبق وتمت سرقة المبالغ التالية من منزله :
(91) ألف جنيه سوداني و(13.140) يورو و(11.360) فرنك سويسري و(645) ألف ليرة لبنانية و(420) ألف ليرة سورية و(20) ألف جنيه مصري و(9) آلاف ريال سعودي و(5) آلاف جنيه استرليني و(26) ألف دولار !!!


دا في درج مكتبته في البيت .....يعني شوية فكه .....عرفتم لمادا يستميت المنافق في الدفاع عن الانقاد


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة