المقالات
السياسة
قالولنا انتو مخربين!!
قالولنا انتو مخربين!!
10-09-2013 10:55 PM

قالولنا انتو مخربين!!
image

نحن مانا مخربين ...
يا ساكنين غادي و كافوري
يا عايشين بعرق الشعب
ورونا الناس بتعيش بي كم؟
اولادكم في الجامعات ببلاش
و هدومكم من مانشستر جات
و غذاكم بالطيارات
ناس أمحمد قلبو الحلة
عشان يلقولم حتى فتات
جات بالليل دورية العسكر
و ضحك اب كرشه على اب نعلات
و قال للعسكر ديل قاذورات
أضرب .. أقتل .. أحرق .. فطِّس
قالو الفقراء لصوص
و ناس كافوري بعرسو اتنينات

*************
نحن مانا مخربين ...
بيت الطين الهدمو السيل
ما بستاهل وجه الخرطوم
اقطع منهم التيار
ولّع ليهم جمرة نار
سيبهم يبكوا ليل ونهار
ناس طالعين في الشارع قال
ناس عاوزين الموت بالنار
و جات عربية العسكر ثاني
ما خلت طفلة أو ود ناس
شباب حلوين
بي لبس المدرسة مقتولين
دموع أماتهم زي السيل
************
نحن مانا مخربين ...
حرقوا حشا الامات
و غاب الليلة عشا البايتات
من كم شارع !!
من كم بيت !!
من كم حي !!
قتلو فلان .. ود الجيران .. صرخن نسوان
و فلانة عروس قتلوها كمان
و مافي حساب
و قالو نحن ليوم الدين باقيين ..باقيين
يانعلمكم لحس الكوع
يا بتكونو الليلة دروع
ما في مشاكل وينو الجوع
و مرق الشارع زي السيل
و مرق العسكر و ضرب النار
تابعِنو دقون فدا التضليل
و أمحمد واقع من كم يوم
ما في لصوص بشدو الحيل
ياهو دليلك عكازك
يا تتوسد حزن انفاسك
و لا حمالتك حيطة طين
ناس عمار و أخوات نسيبة
بيوتهم فارهة و سيراميك
عربات .. طايرات .. وجبات
من شرق الدنيا و غرب الدنيا
من ماليزيا و من بوسطن
يا مسكين ..
الخالق قادر يجيبلك تارك
و انت عليك تتوسد نارك
و صبر الليل
لما يجيك الفرج الواسع


**************
نحن مانا مخربين ...
ياتو دقون عدلت و انعدلت
و هم غاويين , ظالمين , كاذبين
و المشروع هجروه خلاص
سيبك من أرضك و ماروق
و سيبك من لوبا و سفروق
هلل و اركب زي الناس
شوف الناس ركبوا التوسان
و باقي الحلة تهلل للكيزان
ركبوا سراب ما ليه أمان
و عرف الحاكم طيبة الشعب
و قام اتفرعن و قال : اتحداكم كما كن طير
قبلنا كنتو بتاكلو الكسرة الموص
و نحن العلمناكم
اكل البيتزا و الهوت دوغ
طلع الشارع يهتف
يسقط .. يسقط حكم العسكر
حكم العسكر ما بتشكر
و جوهم عسكر بالدانات

************
نحن مانا مخربين ...
و شبعت أرضك من دم الشهداء
و رجال الدين المأجورين
حكموا عليهم بالتخريب
و كلاب الأمن الضالين
أهون ليهم قتل النفس
و يخضبو بيها دقون الدين
و يسترزقوا من عرق المسكين
و ليكم يوم تجار الدين
و ليكم يوم يا نخاسين
انتو بتعرفو مين خالقكم؟
ما ظنيت !
و لا بتعشقو عرش ابليس؟
و انتو حلفتو تحرقو الشعب
و تحكمو روما
و باقي رماد الشعب و الطين
و الله انتو مخربين.

الاربعاء 9/10/2013

أحمد يوسف حمد النيل
[email protected]

تعليقات 2 | إهداء 1 | زيارات 1890

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#797570 [Fato]
0.00/5 (0 صوت)

10-10-2013 08:51 PM
رائع أخى حمدالنيل وقصيدة فى الصميم وينصر دينك مش دين الجماعة.


#796746 [IBRAHIM]
0.00/5 (0 صوت)

10-10-2013 05:44 AM
لا فض فوك .. تسلم ياحبيبنا ود القيد


أحمد يوسف حمد النيل
أحمد يوسف حمد النيل

مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة