10-25-2013 11:07 AM




أما العم النهبو جنينتو.. عيلتو النسمة المكاوية.. وحسب التاريخ بديك خلفية.. هبت يازول مع التركية وبى خمسين عام قبل المهدية.. وقصة طويلة من الصوفية ..وحكاية الريدة الكانت كية مع الإتنين الهجمو سويا .. بس داكا حساب أنساه شوية ..!
خلينا قريب ..ديك فترة قصية ..!
ويوم جات الكبسة الإنقاذية .. عمك كان بالجلابية أو قول يادوب ختة الطاقية .. وماخلوه ف ديك الساعة يمد إيدو على الشماعة ..يتناول منها ساهي عبايتو أو يشرح ليهم باقي حكايتو.. ركب البكسي اللاف صينية على كوبر .. ودخل الضبطية !
ولما لقوه مسالم وناعم قالو اليطلع ويصبح فاهم أنو خلافته خلاص منفية .. وحكاية حكمو بقت منسية !
بكرة يبارك ويمكن إشارك .. عارفنو سكوت ما شكل معارك !
عمك عامل فيها حريف.. وطبعا أصلو الغالي شريف.. عمّر وحجه ..وفتح الضجة .. وجانا كلام من تال الريف.. قالو اتلملم وبدأ يتكلم .. قال للسارق سلّم ..تسلم !
وأصبح إعارض ..مرة يحالف و نوبة يخالف .. ومرات يلبد زي متمارض !
أيام مصري و سنة في مكة يجاور حصري.. ساعة أريتري ويوم أثيوبي .. ويوم في الحركة يساري جنوبي !
وفجأة هنود السينما إتلمو ..معاهم مخرج قال ودعمو..وشيخنا الورق إتشتت منه..والأتباع إتوزعو عنو. ورفرفو غردو زى الطير ..إما نفوت إما التغيير ..واتقسمو قول كيمان كيمان..الأصلي صبح رمز الديوان ..وعليك يا سيدي أمانة الخير .. فروع ..أسماها التانية كتير..ضكير ونكير .. ومساعد فرتق وحضن الزير حارس الكيزان.. ومعاهو كمان ست النسوان..والشايب داك بقوه وزير !
عمك فكر في القصة كويس.. وقابل داك الإسمو الريس..!
رجع ليهو بواقي جنيتو بعدما نهبو المنقة الفيها .. أودوهو سرايتو القال بانيها من تمرالسافل وكان ساقيها من عرق الناس القاعدين فيها ..إستلم الفكة والورق ..إنشكة.. بعدما إندكة وقام الركيب مسك الكوشتينة ..وزع لى ناسو ورق تمكينا ..و خلى البرتيتة في أيدي امينة..!
وناس حمبرة الداخلين زينة .. قاعدين ديك يا القعدة الشينة ..!
سحب الجوكر من إيدينا.. وقال خليكم لاعبين لينا .. والقايل بفتح يبقى إضينة !
وعمك قام قال لى أولادو منو الفيكم عاجباهو بلادو .. وداير يتعلم بالجد تاريخا ..لا يقولو الناس أولادك خيخة والعمة تكون بس فوق بطيخة !
القصري بنادي وانا رغم عنادي داير أولادي اشوفهم جوة.. وأنا والأخوان بتربطنا أخوة..فيها الإيمان وطول حرمان بره الأوطان وبجمعنا آذان وفي الدين أركان وشريعة الواحد الديان !
وطوالي أخد أصغر أشبالو .. !
السارقين ضحكو ووقفوا حيالو دنقرو أخدو شفيف شبالو ..قالو تمام .. قد ينفع .. ومالو !
الشبل اتنفخ.. وظبّط حالو .. الخلفاء يمينو .. وحرسين في شمالو وقام بشويش يتكلم يصرح !
بس الفيس بوك أبداً مابريّح .. راصد حركاتو وسلام بركاتو ..وكيف في لندن بتكون أوكاتو !
الود مالو ومال الكتاحة ..ده زول مولود في ظروف مرتاحة .. و ليه يهتم بمعالم الساحة.. كان تبقي رفاعة شمال أم جر أو أمدر جنوب طوكر..!
بالكاد قد يعرف في الدولية.. إنو جنوب أفريقيا هناك .. تتبع للدول الإسلامية.. وناس الصين إنقسمو زمان .. صين شايقية وصين جعلية..
وإنو تشاد في عهد إدريس إمتلكت قنبلة جنجويدية !
خليك ياود بالجو مسحور ..تركب طيارة وما مافي بلاد ما شفتا مطارا.. ومرات تسبح بالعبّارة .. أوتتفسح في ارقى قُطارة أو يوم مضطر تركب سيارة ..وحكاية المال ما بتبقى عبارة .. من علي محمود حتلاقي دبارة !
نرجع لى عمو شريف وحكايتو.. شريك الريد في باقي ولايتو ..!
بس يوم شبّ حريق بى جاي .. وإتفقش فينا جنا الباباي.. عمك قال للناس باي باي..!
إتعكز وقام عامل عيان ..ولفه عدد من البلدان..!
ولما خلاص سكن الدخان.. عمك جاء وفتح الدكان !
قال يا أمة بلاش تخريب..خلونا نعيش زمن التجريب ..كيف نطوى سباتة طويلة عريضة..لو طارت عاد كيفن بنصيدا.. ونحن مشاركين لحماية الناس..لو شلنا الفاتحة ورحنا خلاص .. خوفي الخرطوم تصبح تكساس !


ودي حكاية .. عمك حاجي شريف.. الداير ياكل تاني خريف.. في البلد العدمت.. زيت ورغيف..!
وباكر يازول إن شاء الله نقيف..عند الشيخ النشلو فنيلتو .. وعرقان ..زهجان.. من طول الصيف !

[email protected]

تعليقات 4 | إهداء 0 | زيارات 1738

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#809776 [صدقي البخيت]
0.00/5 (0 صوت)

10-25-2013 09:37 PM
العزيز الغالي برقاوي
نعجز تماما عن وصف هذه الروعة
لك منا كل التحايا وكفي
صدقي


#809495 [smith]
0.00/5 (0 صوت)

10-25-2013 03:03 PM
ي سلاااااام والله سرد شعري زي الموسيقي .فيه التاريخ و السياسة والاقتصاد فيهو سرد لكل ازماتنا الابت تنفك مننا.تسلم انت وتسلم سنة قلمك سنين فيهو مواجع فيهو فواجع حاسين بيها بس عاد نحكيها لمين.


#809429 [ربش]
0.00/5 (0 صوت)

10-25-2013 01:34 PM
مافي كلام روعة و جمال ... و جمعة مباركة علي الجميع .....


محمد عبد الله برقاوي
محمد عبد الله برقاوي

مساحة اعلانية
تقييم
10.00/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة