السبب مازن
01-03-2011 12:09 PM

ساخر سبيل

السبب مازن

الفاتح جبرا



رن الموبايل .. نظرت إلى الرقم وجدته غير مسجل لدى ، رددت على المتصل فوجدت صوت فتاة تتحدث من مكان به ضوضا

شديدة وكأنها تتحدث من (سوق سعد قشرة(

الفتاة : آلو

أنا : أيوه نعم

الفتاة : معايا منو؟

أنا : أنا الأسألك إنتى منو؟ مش إنتى المتصله؟

الفتاة : أنا رشا

فى هذه الأثناء كنت إستمع إلى صوت فتاة أخرى تتحدث مع (محدثتى) وتقول ليها :

- قال ليكى شنو؟ ,

ومحدثتى ترد عليها قائلة :

- كدى إستني شوية ..

ثم عادت لتسألنى ذات السؤال مرة أخرى :

- معاى منو؟

هنا إتضح لى أنها مصرة وملحة (إصراراً) على أن تعرف المتحدث معها هو منو؟ وهذا يعنى بأن (بتنا) ما بتعرفنى وما (قاصدانى) لذلك فقد قمت بقفل الخط حتى لا تستغرق المسالة وقتا أطول فتتصل (المدام) فتجد أن الخط مشغوول لأنو بينى وبينكم مسالة (الخط مشغول طوالى دى) بتعمل ليها (حسكنة) وأنحنا ما ناقصين !! بعد ثوان بعد إغلاقى للموبايل وجدته يرن مرة وهذه المرة أعنقد بأن المتحدثة هى صديقة الفتاة التى كانت تقف بقربها :

صديقتها : آلو

أنا : يا (بتى) إنتو عايزين منو ؟؟

صديقتها : نحنا بس عاوزين نعرف مش دى ياها نمرتك )وبدأت فى نطقها) صفر .. واحد .. إتنين .. إتنين واحد ... سته.. صفر تاانى .. إتنين .. ......(وذكرت نمرتي بالفعل(

أنا : أيوا ده رقمى ذااتو . وهي نفس النمرة الصاحبتك الواقفة جنبك دى اتصلت بي فيها من قبل دقيقة واحدة.

صديقتها : طيب إنت مش هيثم ؟؟

أنا : لا والله ما هيثم .. نحنا لمن ولدونا إسم هيثم ده كان ما (نزل) لسه

صديقتها : يعنى شنو؟

أنا (فى ضيق) : يعنى النمرة صاح لكن الزول العاوزاهو غلط

. صاحبتها : هو يعنى إنت ما هيثم القابلت (رشا) فى عرس ناس شيرين الفى (نادى الضباط)

أنا : يا بتى لا .. أنا لا قاعد أمشى نادى ضباط ولا حاجتين الظاهر إنو هيثم ده إداكم نمرتي بدل نمرتو

.صديقنها : طيب نحنا آسفين جداً .. مع السلامة

في نفس اليوم مساء إتصل بى رقم (غريب) وأتانى صوت لشاب يتلعثم فى أضطراب

الشاب : فى الحقيقة .. أصلو .. يعنى .. آآآآآآآآآ .. أنا آسف للإزعاج.. بس .. أصلو

أنا : عاوز منو إنتا ؟؟

الشاب : أنا مازن

أنا : طيب يا إبنى يا مازن .. إنت عاوز منو ؟؟

)الشاب (بتلعثم : أنا الزول النمرتو ظاهرة على شاشة موبايلك هسى !!

أنا (باندهاش) : بالله ؟!!!

الشاب : قلتا ليكا النمرة الظاهرة فى شاشة الموبايل بتاعك هسى دي .. هى النمرة البكلمك منها يعني

أنا : طيب وهو المفروض يعنى تظهر نمرت منو ؟ نمرت جاركم مثلاً ؟؟ مش نمرتك الانت بتتصل منها ولا شنو بالضبط يعنى؟؟

الشاب : ما هو يا استاذ لو دققت في النمرة بتاعتي حتلاقيها نفس نمرتك بالضبط بس الفرق إنو نمرتك (سودانى) ونمرتى (موباتيل(

أنا : وأفرض يعنى ؟ المفروض يعني نبقى أصحاب عشان أرقامنا بتشبه بعض وإلا شنو؟؟؟

(الشاب فى توسل) : عليك الله بس يا أستاذ أدينى من وكتك شويه عشان أشرح ليك الموضوع والله أنا فى ورطه ما ممكن زول غيرك يحلها ليا ويطلعنى منها عليك الله يا أستاذ ما تقفل الخط وإسمعنى للنهاية

أنا : إتفضل .. إتكلم بس بى سرعه عشان أنا مشغول شويه

الشاب : أصلو بى صراحة كده أنا كنت فى السعودية مشيت مع (الحاج) عشان يعمل ليهو عملية بتاعت قلب هناك وبعدين لقيت البت دى راقده فى المستشفى مع والدتها هناك برضو عاوزين يعملو ليها عمليه (قلب) قمت أديتا (جهاز موبايل) تديهو لى حمادة أخوى الصغير لأنو عمليت أرشا إنتهت جات رجعت قبلنا وأديتا رقم الموبايل بتاعى هنا عشان لمن ترجع لو تاهت من البيت تتصل على الشاب : الحصل إني غلطت وكتبت ليها الرقم بدون (التسعه) بتاعت (موباتيل) وعلى كده الرقم بقى (سودانى) اللى هو رقمك يا عمو ودلوقتي هي أكيد حتتصل عليك عشان عاوزة تسلمنى الموبايل الأنا إشتريتو لى حمادة... فياريت يعنى يا عمو لو تتكرم وتديها نمرتي أنا.

توالت إتصالات (مازن) يسأل عن (رشا) يوميا) وبصورة مزعجة .. من الواضح أن مازن قد (نجر) القصة بتاعت أبوهو والعملية والسعودية .. وأن (رشا) وصاحبتها قد (نجرن) قصة عرس شيرين ونادى الضباط .. الحاصل شنو ما معروف لكن الشئ المؤكد إن أولادنا ديل) حيرونا عديل كده )!



كسرة :

إذا قمت بالإتصال على شخصى ووجدت أن هاتفى مغلق فالسبب (مازن)

تعليقات 9 | إهداء 2 | زيارات 3743

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#72120 [أبو الزهراء]
0.00/5 (0 صوت)

01-05-2011 11:36 AM
الله يخليك يا عزيزي لولا إبداعاتك الكتابية لفقدنا صوابنا مع بلاوي السودان. و أرجو من الإخوة القراء التعمق أكثر في موضوعاتك و مضامينها و ليس في قشرتها. إني أري مواضيع الفنان جداً الأستاذ الفتح مثل حبة الكلوركين المحلاة . حلوة من الخارج و مرة من الداخل. أما الكسرات فهي القلب النابض للموضوع إي إنها الخلاصة. ربنا يمد في عمرك مع العافية.


#71314 [ابوراس كفر]
0.00/5 (0 صوت)

01-04-2011 09:46 AM
الفاتح جبر مثال حى لقمة الانصرافية
كتاباتك زى الكيزان اخوان السؤ لمن يحاولو يعملو فيها ظرفاء
ولاده نموذج للترفيه الاسلاموى بيزنس؟


#71212 [ود محجوب]
0.00/5 (0 صوت)

01-04-2011 02:15 AM



ههههه موبالغة الجاتك في رقمك سامحتك يا استاذنا !!
اها تتخيل انا غيرت رقمي بي سبب الناس البايخة الزي دي .. كللل مرة
ضاربين .. لو سمحت ممكن اكلم مني ؟!! مني منو ما عرفتها ..

و مرة واحدة ضربت و سلاااام تقيل و انا مندهش و لما لاحظت الاندهاشة قالت
لي يا ولد قول بسم الله انا امك خجيجة .. !!
خجيجة ؟!!
قلت ليها النمرة غلت
قالت بي زعل : بسسسم الله يا ولد ما بتعرف امك ؟!
قولت ليها و الله باااالغت يا حاجة غيرت اسمك متين .. !! ( ) ( )

احترامي علي ابداااعك الدائم ..


#71185 [عوض سعيد]
0.00/5 (0 صوت)

01-04-2011 12:29 AM
الاخ الفاتح جبرك الله فى الدنيا والاخرة الا اننى بعد ان قرأت مقالك لم افهم الهدف منه وصرت اردد فى نفسى اعوذ بك من علم لا ينفع وكمان اقول الناس فى شنهو والحسانية فى شنو يا سيدى البلد فى حافة الهاوية وانت تخوض فيما لا ينفع المؤمنين البلد الان محتاج لقلمك فى معركة الوجود والعدم ولو بالكتابة الساخرة التى تجيدها وما اكثر المضحكات المبكيات فى البلد هذه الايام ويجب عدم النوم كما:
نامت نواطير مصر عن ثعالبها وقد بشمن وما تفنى العناقيد
وهل هناك نواطير اكبر من الصحافيين


#71087 [أبو علامة]
0.00/5 (0 صوت)

01-03-2011 09:08 PM
واللة يا جبرا لقيتك غتيييييييييييييييييييييييييييت

ياخ ما تدي النمرة للولد يمكن يكون قصدو شريف



#71066 [ابو الهول]
0.00/5 (0 صوت)

01-03-2011 08:41 PM
والله يا هاشم
اكان نرسلها ليهو من فرنسا ... بس هو يكتب ويتحفنا بالروائع دي
الله يديك العافية يا استاذ ويخليك للجنوب والشمال .


#70979 [هاشم عبد الماجد خالد]
0.00/5 (0 صوت)

01-03-2011 04:59 PM
اها يااستاذ جبرة الجنوب انفصل يالله ورينا حاتشترى الكواميت من وين


#70855 [أبورماز]
0.00/5 (0 صوت)

01-03-2011 02:12 PM
يا جبرا ( جبر ) الله كسرتك .. فقذ ذهبت بنا إلى أيام مضت والراحل المقيم أحمد المصطفى يتغنى ويقول ( وده الجنن عبدالقادر ) .. وعلى فكره بالله عليك طالما عرفنا الجننك ورينا الجنن عبدالقادر شنو .... أوع يكونو كيزان !!!!!!!!!!!!!!!!!!!!!!!


#70756 [الزول السمح]
0.00/5 (0 صوت)

01-03-2011 12:21 PM
لأ ياأستاذ الكسرة بتاعتك دى ماتمام.. أنا يادوبك سجلت سبعة أرقام من موبايلك هى ؟؟؟0122102
وعايزك تكمل لى الباقى.. تتذكروا يا أخانا السبوع الفات فى الكلمات التقاطعة. أنا أضفت تعليق بقول ( يستخدمه جبرا لما يكتب بى مزاج ( غير الشاى)؟
الليلة إتيقنت تماماً إنها ( الشاشبندة)!!!


الفاتح جبرا
مساحة اعلانية
تقييم
1.24/10 (50 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة