التطنيش عشان تعيش (أرشيف)
11-13-2013 12:49 PM

التطنيش عشان تعيش (أرشيف)

الحياة بقت صعبة خلاص ولا تحتمل.. اليوم كلو الزول جاري بلا فائدة .. حاجات كتيرة كل يوم تعكنن عليك وتكرهك العيشة.. لازم تعمل ليك (إستراتيجية) عشان شوية الحياة تكون مقبولة وأسهل حبتين.. دى غايتو عشرة نصائح تطنيش.. لو عاوز حياتك تتحسن شوية أسمع كلامى وأعمل بيهم!!
الطناش الاول
طنش إنك كل سنة تسمع حكاية (الخريف فاجأنا) دى .. وحكاية قمنا بتكوين لجنة لدرء (الكوارث) والكلام المقدد القاعد تسمع فيهو ليك (عشرين خريف) ده لأنو لو عاوز تتكلم فى الموضوع ده وتقول للمسئولين إنو الحكاية دى كترتوها ومسختوها وإنو المسألة بقت ما مبلوعة ما ح يسمعو ليك وح يسووا فى القاعدين يسووا فيهو ده وما ح يشتغلو بيك شغلة وح تقوم (تفقع مرارتك) ساكت فأحسن ما تتعب نفسك لأنو السنة الجاية ح يحصل نفس الشىء والخريف ح يفاجىء المسئولين والمطرة ح توقع البيوت والسيل ح يكتل الناس .. صدقنى دى حكاية ما عندها نهاية عشان كده طنش الموضوع ده وما تشغل بيهو دماغك واضرب منو طناش عشان بالك يرتاح!!
الطناش التاني
طنش وما تدفع أى جباية يعنى ح يعملو ليك شنو؟ إعدام مثلاً؟ ح يجرجروك كم (جرجيرة) كده ويحبسوك شويتين وبعدين ح يفكوك يعنى ح يودوك السجن عشان يشربوك ويأكلوك؟ طبعا لا!! هم المسئولين ديل قاعدين يأكلوا ليهم زول!! ما قاعدين ياكلو براهم وكده ..طنش يا زول وأسمع كلامى وما تدفع أى جباية!!
الطناش التالت
طنش أى زول عاوز منك قروش.. مش إنت ذاتك ما عندك ولسة قاعد تتدين؟ طيب ح تجيب ليهم قروش من وين يعنى؟ هل ح تهبط عليك ثروة من السماء عشان تسدد ليهم؟ طبعا لا.. عشان كده طنش الناس الإنت مستلف منهم ديل كلهم وشيلهم من راسك كلو كلو.. وبعدين لو إفترضنا فى واحد فيهم زهج منك وعاوز يمشى المحكمة عشان يشتكيك الحكومة ح تدفعوا رسوم ودمغات وشنو ما بعرف داك أكتر من القروش العاوزا منك ذاتا.. يعنى مش ح يمشى.. عشان كده (طنش) واسمع كلامى!!
الطناش الرابع
طنش إنك تستمع لتصريحات المسؤولين عشان ما يجيك شلل رباعي أو إنسداد في الشريان التاجي المسؤولين ديل أصلو عايشين في كوكب تاني .. غايتو لو ما عملتا بنصيحتي دي أنا ما مسؤول !
الطناش الخامس
طنش الجرايد و الأخبار لأنها كلها كلام يوجع الدماغ!! الإتحاد الأوروبي يرتب لحوار بين الحكومة والمعارضة … قرب إعلان التشكيل الوزاري المرتقب .. (تشكيل مين يا عم) .. الإتحادي لم ينسحب من الحكومة (ينسحب ؟ في زول يرفض النعمة؟) .. الخطوط الألمانية توقف رحلاتها (المطار الجديد لزومو شنو؟) والعجب الجرائد الإجتماعية.. الفنانه ديك (طلقوها) والمطربة ديك (ضبطوها) .. وقصص وحكاوى إنت فى غنى عنها.. عشان كده (طنش) حكاية الجرائد عشان بالك يهدأ وتروق وكده!!
الطناش السادس
طنش كلام أي مسؤول يقول ليك .. العارف ليهو فساد يجيب مستنداتو .. طنش يا عم ما هم قاعدين يطنشوا في كسراتنا دي سنين وكمان يقولوا ليك (جيب مستندات) !!
الطناش السابع
طنش اي حاجة ح تنكد عليك عيشتك يعني زي مشاهدة التلفزيون والمذيع الكل كلمة والتانية يقعد يقهى ليك فى (سقف الأستديو) ويكتل ليك فى عينو و(يغرودهم) ليك وإلا مقدم البرنامج القاعد يسأل الضيف ويجاوب قبالو.. ولازم تطنش كمان مشاهدة الإعلانات او الإستماع إليها.. طنش عشان ما يجيك ضغط أو ينفجر فيك عرق .. طنش السخافات دى عشان تعيش!
الطناش التامن
لو كنت ما متزوج طنش أسطوانة أهلك بتاعت (ما تعرس إنت منتظر شنو) ؟ أو (فكر فى موضوع العرس وخليهو فى بالك) !! لأنو هم ما عارفين الفى بالك!! ولو كانو عرفو الفى بالك ما كانو جابو ليك السيرة دى من أساسو .. طنش يا عم هو ناس مثنى وثلاث ورباع ديل خلو ليكم حاجة تعرسوها؟ ما عزلوا (النوار)
كلو !! .. وكمان ما خلو ليكم حاجة تعرسو بيها ما شالو (الضحاكات) كووووولها !!
الطناش التاسع
لو كنت متزوج طنش النقة بتاعت (المرا) وما تشتغل بيها شغلة عشان ثبت علميا إنو (النقة) بتعمل إلتهاب فى صمام (العصب القولونى المترالى) وأنها تورث الفقر وإنت ما ناقص (فقر) وكفاية الفقر العليك كمان تقوم تجيب ليك معاهو (نقة) !! أسمع الكلام وطنش (نقة المرا) وأضرب (طناش) عشان ما تمشى (الإنعاش) !
الطناش العاشر
طنش الطناشات الفوق دى كلها وما تشتغل بيها شغلة لأنى إتلفت كده وكده وحكيت رأسى عشان ألاقى ليا موضوع أكتب فيهو قمت ما لقيت والوكت زنقنى وناس الجريدة كل دقيقة يتصلو فينى ويسألونى: يا أستاذ ما رسلت المادة مالك؟ فقمت (نجرت) موضوع (الطناش) ده .. فطنش الطناشات الفوق دى كلها وما تشتغل بيها.. احسن ليك!!

كسرة :
هو الواحد بالله يطنش شنو؟ وللا شنوو؟ وللا شنوووووووووووو !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

تعليقات 27 | إهداء 1 | زيارات 8531

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#827207 [ابو نصر الشمالي]
1.77/5 (7 صوت)

11-15-2013 07:10 AM
الخقيقة يا استاذ بجد هم بيفجعو ا بالحريف هم كل سنة بيعملو ترتبتهم انهم ح يطيرو قبل الحريف ويلقو نفسهم جاتوم الحريف وهنا المفاجأة


#827057 [طنوشى]
1.77/5 (7 صوت)

11-14-2013 10:28 PM
انتو ليه هومايعملو ليهو وزاره عديل كدافى التعديل الحاى دا وزارة التطنيش


#826827 [كافونجا]
1.77/5 (7 صوت)

11-14-2013 05:17 PM
الله ينصر دينك يالفاتح
اتمغي فيهم ،ياخ ديل باعو الخط وباعو الأسمنت مع القطن،انا عاوزك تترشح و اكد ليك ح تفوز وتقدر تجيب لينا الخط و بس ترجع لكل كتاباتك وتبدأ في التنظيف والحساب واسترداد أموالنا وبالله برضو ركز لينا في قصه جهاز المغتربين دي كمان وح تجد العجب العجاب


#826806 [اسير الشوق]
1.77/5 (7 صوت)

11-14-2013 04:38 PM
يا جبره والله انا غايتو ما بقدر اطنش وعارفين انو الناس ديل جايين من كوكب تاني لكن يا جبره في حاجات كده والله لا تقدر تسكت لا تقدر تتكلم لا تقدر تتطنش لا تقدر تكح غايتو بس عندك خيار واحد تمشي المقابر وتحفر قبرك بي ايديك وترتاح وتريح لكن يا جبره بالله عليك قبلي ما امشي احفر قبري رايك شنو في الكلام ده بس ما ما تمشي تحفر قبرك شوف ليك ميته تانيه (قال وزير الخارجيه كرتي الاكرت انو الحكومه حاتعمل محطه للطاقه النوويه) انتهي الخبر واترك لك التعليق


#826594 [أبو أواب]
4.07/5 (5 صوت)

11-14-2013 01:07 PM
يعني تقصد أنو ده حالتو مقال من غير وضو


#826585 [د.علي الادهم]
4.07/5 (5 صوت)

11-14-2013 01:03 PM
الحكومة ابو الطناش .مطنشة الكلام عن الفساد.مطنشة معاناة الشعب الغلبان.مطنشة دعوات ومذكرات الاصلاح.وواكيد حتطنش واوااات الفاتح جبرة ولو بلغت الممليوووون


#826082 [أبو هشام]
4.07/5 (5 صوت)

11-13-2013 10:47 PM
مفروض يا اخوي الفاتح جبرة فى التعديل الوزاري المرتقب يعينونك وزير لا تطنيش


#826075 [Adam Ibrahim]
4.07/5 (5 صوت)

11-13-2013 10:28 PM
حاجة واحده ما قادر اطنشها.. اغنية الاطفال طيري يا طيارة طيري قول لي ابويا فى بلد الغربة بنتك مشت المدرسة تقرأ...
لانها حتذكرنى بسودانير وهيثرو واللوفتاهنزا الحيذكرونى بمشروع الجزيرة والسكك الحديدية والبحرية والصمغ العربى الحيذكرونى بشباب يونيو العام الفات وسبتمبر العام الحالى الحيذكرونى بمأساة ضحايا الحروب البذكرونى بالبؤساء فى اطراف ووسط وعاصمة بلادى...


#825993 [nasereddin]
4.07/5 (5 صوت)

11-13-2013 07:58 PM
الناس ديل باعوا خط الأستواء ، طبعا ح يقولو وين مستنداكم، كما لاتوجد مستندات لبيع خط هيثرو-هو خط وهمي!!!!الحرامي يستطيع تحويل الباطل الي حق!!!


#825955 [ودالباشا]
4.07/5 (5 صوت)

11-13-2013 06:51 PM
ماهو دا الوجع ذااااااتو يا دو جبرا الجاحات الزمان كان بعض الناس تطنش بيها اوجاعا بقت برضو ماتخليك منطنش وبقى الشعب كللللو وكمان طلاب الجامعات والمدارس مخدرين بس وماقادرين يطنشوا


#825883 [ممكون وصابر]
4.07/5 (5 صوت)

11-13-2013 04:45 PM
لو بتتسدة تسد دي بي طينة ودي بي عجينةوطنش تعش تنتعش


#825876 [لبنى سويسرا]
4.19/5 (6 صوت)

11-13-2013 04:35 PM
كل هذا سليم ولكن موضوع اللآلمانية هذا لا يجب الطناش هنالك احساس غريب يحسه الشخص الكبير فبل الصغير عندما تكوم فى احدى المطارات الاوربية الراقية وانت تسمع اسم الخروطوم يتردد معلنا قيام او وصول الطائرة من او الى الخرطوم او فى لوحة قيام ووصول الطائرات احساس بالفرحة والفخر بان عاصمة السودان موجودة ضمن العواصم العلمية الاخرى اما صغارنا فيتمنون ان يشاهدوا الركاب ليبلغوهم التحايا للأهل او ليسألوهم عن الاهل احساس تقشعر له أللابدان (وشعرالجلد يكلب وتنزل دمعه خجولة ساخنه) فاين حق العوشره هل تهون عليكم هكذا والله حرام فايقافها فاضرر اكبر والنفع اكبر فلآتكون نظرتكم للآمور محلية واقليمية فقط انظروا للعالمية وضعوا الخرطوم فى مكانها الصحيح بين عواصو العالم المتحضر


#825840 [اسلام علي حسن هوت دوق]
4.07/5 (5 صوت)

11-13-2013 03:39 PM
طنش حكاية انو اتحاد العمال قال زيادة الرواتب من الشهر القادم للقرن القادم في الزمن القادم!! تنفيذا لتعليمات الريس!!!!!
وطنش حكاية انو الولاية حتعمل حكاية ورواية لتخفيف معاناة الفقراء وتأثير الزيادات!!!
طنش حكاية انو الزيادات دي لدعم الخزينة وليس لدعم جيوب اولاد الذين وامهم الزينة!!!!
طنش حكاية امين وانو الشريعة جدا بديعة وانو الفساد مجرد حكايات وانو المدارس بتاعت الخال وكده!!!
طنش وماتخليك عوير تفتش دليل للفساد وكل الجداد الحوليك عمل بروج وركب فور ويل وكل الحيلة مرتب بنك ودقن جك!!!!!!!!!! وذي ماقال المصري الداخل البار مش رايح يشتري لبن عشان نجيب دليل علي سكرو!!!!!
وطنش حكاية انو البلد تنفع تاني والدولار يرجع تاني وقول للزمان ارجع يازمان!!!!


#825823 [صادميم]
4.16/5 (6 صوت)

11-13-2013 03:21 PM
يا جبرا الجماعة خمشوك ولا شنو ده تاني مقال ولا توجد كسرة الترحم على الشهداء في آخره


#825816 [فهيمه]
4.07/5 (5 صوت)

11-13-2013 03:10 PM
اها سمعوا كلامك التحت بتاع الكسرات القديمة والجديدة وطنشششششووووووووووككككككك


#825808 [تينا]
4.07/5 (5 صوت)

11-13-2013 02:59 PM
أستاذنا جبرا أقول ليك حاجة طنش موضوع كسرات خط هيثرو دا وريح نفسك .


ردود على تينا
United States [حسين] 11-13-2013 08:33 PM
لو كان الكيزان ما عاجباهم كسرات خط هيثرو كان الاستاذ جبرا من زمان ضرب طناش عنها وفك سيرتها..


#825788 [ابو عمر]
4.19/5 (6 صوت)

11-13-2013 02:37 PM
كان يا استاذ تطنش ناس الجريده زاتهم وما رد عليهم


#825781 [شمال و جنوب فى محنة]
4.19/5 (6 صوت)

11-13-2013 02:25 PM
الطناش في بلد البكم طشاش


#825780 [الحوري]
4.19/5 (6 صوت)

11-13-2013 02:24 PM
الله يجازي اللي كانوا السبب و كملوا فهمك .. لدرجة نبش الارشيف و التطنيش .


#825773 [دا كلام ما صاااااح]
4.19/5 (6 صوت)

11-13-2013 02:18 PM
يعنى كنت ماسك بينا زمن ساكت؟
الفيك اتعرفت لكن


انت زاتك طنش تعليقى دا


#825768 [WADALTOM]
4.07/5 (5 صوت)

11-13-2013 02:13 PM
والله غير تستنو رحمة قاعد الما بتواعد ما عندكم حل


#825762 [mutasim]
4.19/5 (6 صوت)

11-13-2013 02:07 PM
الطناش التالت
طنش أى زول عاوز منك قروش.. مش إنت ذاتك ما عندك ولسة قاعد تتدين ........
بعد دا يا جبرا انت طنش تلقا ليك زول يسلفككككك


#825758 [جادو]
4.07/5 (5 صوت)

11-13-2013 02:03 PM
بس ده أحسن موضوع تكتبو منذ سنين ، ما نحن أصلنا مطنشين لينا سنين و نايمين تحت الشدرة و خالين (القطيع) يرعى ما خلا قشة خدرة واحدة في الواطة


#825748 [المظلوم السوداني]
4.07/5 (5 صوت)

11-13-2013 01:57 PM
و الله يا استاذ واواتك كترت ...و ناس الحيكومة مطنشنها و مطنشنك .... احسن ليك تطنش موضوع الواوات ده لانو واضح انو مافي فايدة ...


#825724 [الجديد]
4.13/5 (7 صوت)

11-13-2013 01:36 PM
اهم حاجة محتاجة طناش الكورة و الصحف الرياضية و الصحفين ,لانك ماناقص مزمل يشتم الهندي و مازدا لحدي اسي ما اتأهل لي اي بطولة رغم انوا مدرب للفريق القومي من اكثر من 10 سنين و مافي مسؤل يسألوا عن انجازوا,و الاعبين تشوف طريقة المشي و الدعاية ليه تستغرب في طريقة لعبه.


#825710 [أبوفاطمة]
4.07/5 (5 صوت)

11-13-2013 01:19 PM
الاستاذ الراقي / الفاتح جبرة

لماذا هذا الاحباط .... في كثير من المواضيع التي تنتظر قلمكم الناقد اللطيف .

بعدين تعال هنا ياخي ده شنو الانت كاتبوا ( لأنو السنة الجاية ح يحصل نفس الشىء والخريف ح يفاجىء المسئولين والمطرة ح توقع البيوت والسيل ح يكتل الناس .. صدقنى دى حكاية ما عندها نهاية عشان كده طنش الموضوع ده وما تشغل بيهو دماغك واضرب منو طناش عشان بالك يرتاح!!

انت ياجبرة عايز تقعدهم لينا لحدي الخريف الجاي ... ياخي فال الله ولا فالك .
الناس ديل قطرهم صفر وخلصة الحدوته ... باي باي وطني
ووطن جديد وحلم فريد وعاش وعاش


#825688 [AHMEDJALAL]
4.07/5 (5 صوت)

11-13-2013 12:57 PM
ياسلام يارائع


ردود على AHMEDJALAL
United States [أبو عمر] 11-14-2013 06:26 AM
كتاباتك بتقول إنك إنسان نظيف و إنك سودانى أصيل وود بلد و حقانى وبتكره الظلم والإستهبال و أكل أموال الناس بالباطل و أتمنى يا جبرة أشوفك والى للخرطوم ، ونحن لو ما مرقنا من حكاية كوتات الأحزاب ووضع الرجل المناسب فى المكان المناسب ما حانتقدم خطوة واحدة لى قدام والدليل القاطع لكلامى هذا الفشل الذريع البنعيشه اليوم


الفاتح جبرا
الفاتح جبرا

مساحة اعلانية
تقييم
5.50/10 (4 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة