11-20-2013 02:50 PM


كنا عندما نجأر بالشكوى من إرتفاع أسعار السلع والخدمات الضرورية كالوقود والخبز والمواصلات كان الرد عند المتعاطفين مع طيب الذكر (المشروع الحضاري) جاهزاً :
- ما كنتو قاعدين تبيتو في الطلمبات .. نسيتو الزحمة والصفوف ؟
وعلى الرغم من أن هذه الإجابة إجابة فطيرة لا تستند إلى أي منطق أو عقل إلا أن محدثك لا يعطيك الفرصة لدحض حجته أو حتى مناقشته فيها بل (يمسك ليك) في حكاية الندرة و(المبيت والصفوف) متناسياً عمداً أن سلعة (الوقود) كمثال قد تضاعف سعرها مئات المرات !
يبدو أن الأمور ذاهبة في إتجاه (الندرة) مع (الغلاء) إذ تشهد اجزاء واسعة من ولاية الخرطوم نذر أزمة حادة في الخبز ، وعادت في معظم الاحياء ظاهرة (الصفوف) ديك (ذاااتا) على الرغم من أن سعر (الرغيفة) قد تضاعف عشرات بل مئات المرات خلال الأربعة وعشرين عاماً الماضية !
العبدلله يرى أن المشكلة ليست مشكلة خبز أو وقود أو خلافه .. المشكلة هي مشكلة فشل في إدارة الدولة فبينما لا تستطيع الدولة توفير النقد الأجنبي لإستيراد القمح فإنه لا يمر أسبوع أو أسبوعين إلا و(تستضيف ليها) عاصمتها مؤتمراً دولياً (يكلفها الشئ الفلاني) ولك عزيزي القارئ ان تعلم أن (الدولة) قد إستضافت مؤخراً مؤتمراً لمنبر النساء الأقليمي لنساء البحيرات العظمى (إسمو كده) .. وعلى الرغم من أن العبد لله لا يعلم (نحنا تبع ياتو بحيرة) لكنه يعلم علم اليقين باننا في أشد الحوجة لـ(النقد الأجنبي ) الذي صرف في تذاكر السفر والطيران والإقامة لأعضاء هذا المؤتمر (الغريب) !
لأننا ما عندنا نقد أجنبي يكفي لإستيراد (القمح) من الخارج فلازم نستتورد (التقاوي) ونزرع أرضنا .. هذا ما سبق أن صرح به وزير الزراعة (عبد الحليم المتعافي) في يونيو/حزيران الماضي إذ قال بأن البلاد تستورد 1.5 مليون طن من القمح سنويا وقد أشار حينها إلى وجود سعي لتقليص هذه الكمية من خلال منح المزارعين المحليين أسعارا أفضل لشراء محاصيلهم لتحفيزهم على زيادة إنتاجهم !
وتم إستيراد (تقاوى تركية) – تركية ليه ما تعرفش- وبيعها للمزارعين بواسطة البنك الزراعي بعد أن تم إستكتابهم تعهداً بالسداد وقاموا بزراعة (التقاوى) غير انها لم تنبت ، (فاسدة وكده) ! .. (سوف يذهب مستوردها إلى ماليزيا مستثمراً وعريساً بينما يذهب المزارع إلى السجن حبيسا) !
وإنهار الموسم الزراعي لهذا العام وبدأت كل الجهات ذات الصلة بهذه التقاوى (تتنصل) من المسؤولية وتم تكوين العديد من لجان التقصى والتحقيق (والشنو ما عارف) والتي سوف تميط اللثام بإذن الله عن كل العناصر المشاركة في (العملية) ما عدا الجهة (الفاسدة) التي قامت بإستيرادها !
والمضحك المبكي (حقيقة) تصريحاً قرأته بالأمس للسيد رئيس قطاع البنك الزراعي بولاية الجزيرة يقول فيه بأن اللجان الفنية التي قام البنك فرع الولاية بتكوينها لفحص تقوى القمح التركية ستفرغ من أعمالها غد الثلاثاء (يعني اليوم) !
المضحك المبكي في الأمر أن البنك قد قام بشراء وإستلام (البضاعة) ثم باعها للمزارعين دون أن يقوم بإجراء الفحوصات اللازمة ليتحقق من سلامتها ومعرفة إن كانت صالحة أم لا .. يعني البنك يشترى (بقروش هذا الشعب المكلوم) بضاعة وما يكلف نفسو يشوفا ضاربة؟ صالحة؟مغشوشة .. بالله ده إسمو كلام ؟ .. لا وأيه .. بعدما ثبت (بيان بالزرع) إنها فاسدة يقوم البنك بعملية الفحص كما صرح مسؤول البنك … (هات الحبوب يا ولد) !
العبد لله بحث في كل قواميس اللغة ليجد له كلمة تقال في هذا الموضع فلم يجد .. إنظر رعاك الله كيف يتم التلاعب (بدم باااارد) بقوت وأموال إنسان هذا البلد المحروم البائس الفقير الما عارف يلاقيها من وين وللا من وين ..
ختاماً العبدلله لا يطالب بكشف ومحاكمة المتورطين في إستيراد هذه التقاوى الفاسدة فلنا في كشف ومحاكمة المتورطين في بيع (خط هيثرو) عظة وعبرة (وواوات وكده) .. فأصحاب المشروع الحضاري (الفيهم إتعرفت) والقصة بقت هايصة والفساد بقى شئ عااادي.. صحيح والله (من أمن العقوبة ساء الأدب) ده لو فضل فيها أدب !!
كسرة :
يقولون أن التقاوى فاسدة … برضو هي الفاسدة !! بالمناسبة العارف ليهو فساد يجيب (الوثائق) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟

كسرة ثابتة (جديدة) :

تعليقات 41 | إهداء 0 | زيارات 9152

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#835013 [saleh]
1.00/5 (1 صوت)

11-22-2013 07:01 PM
الظاهر عليك يا أستاذ بقيت طابور خامس ، لأنو حكاية العارف ليهو فساد يجيب المستندات دي قلوبيه بتاعة الجماعه ، ولا الاربعه سنوات بتاعة الود الضابط بتاع الداخليه ما مرت من هنا .


#834806 [بت ام الحسن]
1.00/5 (1 صوت)

11-22-2013 01:27 PM
عليكى الله ياامى خلى الكلام وارحكى نشوف لينا صف عيش نقيف فيهو حسى الهوت دوق الحمرناهو ده ناكلو بشنو بقراصة وللا كسرة


#834585 [عبدالمولي]
3.00/5 (2 صوت)

11-22-2013 09:23 AM
جبار الكسور حيرتنا بي ذكاء السخرية وثاقب الفكرة. واذدادت حيرتي . كيف لم يتمكن اهل التمكين ديل من اسكاتك بمستشارية او سلفية من بنك ام درمان الوطني القريب من بيتكم بلاش ماليزيا البعيده ديك.
اشهد انك من كتاب عصر النهضة.لك الود


#834533 [ام الحسن]
1.00/5 (1 صوت)

11-22-2013 08:15 AM
انتو ماقلتو جاييين عشان تنقذونا من الصفوف والمبيت فيها 000اذا رجعنا للصفوف تانى معاناها 24 سنه بتحاولو تنقذونا وفشلتو 0000خلاص رجعتو لنقطة الصفر فكو الكنكشة وادو فرصة لذول تانى يجى يحاول ويجرب انقاذنا يمكن تظبط معاهو وينقذنا0000ده الرد على المتعاطفيين والمستفيدين من المشروع الحرامى


ردود على ام الحسن
United States [ناصر المظلومين بالقلب] 11-22-2013 10:57 PM
والله ي بت ام الحسن جبت الموضوع من اخرو ما قدرو ينقذونا في اربعة وعشرين سنة ده براهو م فشل ؟


#834444 [إبن السودان البار ***]
3.00/5 (3 صوت)

11-22-2013 12:45 AM
معقول بذور فاسدة ؟؟؟ طيب الناس دي هايجة ليه ؟؟؟ ما يزرعوا غيرها ؟؟؟ الثوار الفرنسين عندما هتفوا مطالبين بالخبز طلعت عليهم الأميرة ماري أنطونيت وقالت الناس دي هايجة ليه ؟؟؟ ما ياكلوا جاتوه ( كيك ) ؟؟؟ وياأستاذ جبرة خلي خط هيثرو سودانير ست الخط ذاته وينا ؟؟؟


#834174 [أبو محمد]
1.00/5 (1 صوت)

11-21-2013 04:39 PM
والله يا جبرا ديل حيرونا عديل كدا.. وبعد دا كلوا إذا تحدث أحدهم استدل بالآيات والأحاديث وقال الله وقال الرسول .. وهو عارف نفسوا يكذب على الناس وعلى نفسه.. حسبنا الله ونعم الوكيل؟؟؟!!


#834153 [أنور النور عبدالرحمن]
1.00/5 (1 صوت)

11-21-2013 04:18 PM
طالما النظام فاسد ماذا تتوقع منه غير الفساد ولكن وعد الله لن يخيب أبدا ( الذين طغوا في البلاد فأكثروا فيها الفساد فصب عليهم ربك سوط عذاب إن ربك لبالمرصاد ) صدق الله العظيم. جاءوا باسم الدين وكذبوا بإسم الدين ( ويل يومئذ للمكذبين).


#834067 [أحمد سليمان]
1.00/5 (1 صوت)

11-21-2013 02:50 PM
المشكلة واضحة وضوح النهار فحكومة الانقاذ هذه ليست لديها أي معرفة أو خطط لادارة هذه الدولة و بالرغم من ذلك لا ينوون التنازل ربما خوفا من المحكمة الدولية التي أصبحت قراراتها ضد الشعب السوداني حيث أخافت رجال الانقاذ عن أي تنازل عن الحكم.
الحل لمشاكل البلد هي أن تتنازل حكومة الانقاذ طواعية و تبدأ بنفسها في اجراء انتخابات شاملة بدوائر جغرافية لكل السودان لانتخاب ممثلي الشعب الذين بدورهم يقومون بتكوين الحكومة المتخصصة في اصلاح البلد و تنميته


#834026 [الحاوي النقرابي]
1.00/5 (1 صوت)

11-21-2013 02:13 PM
ياجبرا التقاوي جابوها من تركبا اكييييد التقاوي بتحكي تركي عشان هيك ما فهمت نضم جماعتنا وعنادا فينا ابت تنبت .. اها يا المتعافن قصرنا معاك هاك التبرير دا ومرروه على البرطمان


#833916 [ودالماحى]
1.00/5 (1 صوت)

11-21-2013 12:46 PM
ياسيدى الرئيس هذا الشعب كما تعلم قد عانى الكثير ومازال يعانى ولا ندرى الى متى ؟ كل يوم مصيبه وتحمل النظام مسئولينها ، وسيستمر هذا المسلسل الى ان توقفه بقرار صارم ينفذ فيه حكم شرع الله في هولاء الذين كنذوا اموال الشعب المغلوب على امره بالباطل - الفساد قد عم القرى والحضر وهو وليد نظامكم ولن يتوقف هذا الاستنزاف لمال الشعب المغلوب على امره الا بتطبيق حكم الصين في مسئوليها الذين نهبوا اموال الشعب وليتك تبدا بتقاوى القمح - ولو طبق هذا القانون فالموكد بان هولاء الابالسه الذين نهبوا واكلوا اموال الشعب بالباطل سيعيدونها لو تاكدوا ان العقاب سيطبق وان لم يفعلوا وطبقت عليهم قانون الصين فان من المؤكد ان 99% مسئوليك سيكونوا في عداد المرحومين - تاكد سيدى الرئيس وانت متاكد بانك تعلم بانك مسئول امام الله عن هذا الشعب ومايعانيه - اتمنى لك التوفيق ولا اعتقد ذلك مادام امثال نافع على يمينك والحاج ادم على يساركووالى سنار ووزير الماليه والزراعه وامثالهم يديرون امور الانقاذ


#833908 [كمبوكل]
1.00/5 (1 صوت)

11-21-2013 12:43 PM
اقطع دراعى لو الراجل ما بيضرب ليه سجارة قبل الكلام دة شوف ( البيان بالزرع ) دا كيف !!!!!


#833716 [mohd]
3.00/5 (3 صوت)

11-21-2013 10:44 AM
يا جبرة

قرات قبل فترة ورقة مكتوب عليها تنازل المزارع عن حواشته في حال فشل زراعته

والناس ديل اصلهم ناوين على مشروع الجزيرة دا من زمان والا لما فكوا اصوله وباعوها (سكة حديد ، محالج ، مغازل ، مكاتب) باعوها زماااان والحرامي الباعة الزبير قاعد طليق بل يتقلد في المناصب من منصب الى منصب زي ام قيردون ، وبتاع العندو دليل على الفساد دا ما شايف انه تفكيك اصول المشروع وبيعها خردة دا دليل ، يعني حاميها حراميها لو هو اصلا ما فاسد وداير يحكم بما يرضي الله كان وقفهم وحاكمهم لكن هو ذاته تلقى واحد من اخوانه العباس او عبد الله او علي سمسمار في الموضوع دا ولاقيي حاجة.

ياخي ديل حيروا ابليس ذاته

والدليل على انهم ناوين ينتزعوا الحواشات انهم ضامنين انه الزراعة فاشلة لانهم حيجيبوا تقاوي ضاربة ومش كدا وبس كمان لاهفين فيها ملايين الدولارات
وبعد ما تفشل الزراعة يسجن المزارع او تصادر حواشته وتتلم الحواشات مع بعض ووتتباع لواحد عربي او اسرائيلي او مصري ، ودي صفقة كدا تمت ويشوفوا البعدها شنو وهكذا لحدي في النهاية ما نلاقي سفن واقفة في البحر ويشيلوا في الناس ويودوا فيهم لامريكا واوروبا عبيد مرة ثانية

وتتلفت تلقى السودان دا اتملى حلب ومصريين وعرب واتقسموه ورحنا في ستين داهية


#833471 [الزول الكان سمح]
3.00/5 (3 صوت)

11-21-2013 07:40 AM
يا أستاذ

القمح فى عهد نميرى فى بداية السبعينات إبتُعثت لزراعته البعثات من خبراء مشروع الجزيرة لشتى الدول..وجاءوا يحملون الخبرات وتمت زراعنه وبالأحص فى مشروع الجزيرة وأنبت وأعطى إنتاجاً مذهلاً
وأستفاد منه المزارعين والبلد.

جاءت الإنقاذ بكل مساوئها وفوضت الحكومة سئ الذكر الطيب سيخه لتنفيذ بند الصالح العام وقام بتجفيف التفاتيش من خيرة الخبراء الزراعيين أمثال حسن عطية وعبد المنعم خراسانى والكثيرين.
وجئ بالمتمكنين الذين لا يعرفون سوى إمتلاك الأراضى وجمع المال ..ومن ضمنهم الجزار المتعافى الذى دمر المشاريع الزراعية تدميراًومن ضمنها أرض الرهد (البلقع) وذهب شعار نأكل مما نزرع من غير رجعة وإستبدل بشعار نحكم بمانقلع


#833381 [تقاوي فاسدة وبت كلب كمان]
3.00/5 (2 صوت)

11-21-2013 12:52 AM
تقاوي فاسدة وقليلة ادب وحياة كمان المتعافي ما غلطان التقاوي هي الغلطانة

نحن في زمن قلبت فيه الحقائق يحكم الجاهل والعنيد والسخيف والغالاط

وغيره يقبلون غصبا عن اهاليهم ويرضخوا ويقتنعوا


#833343 [ود الضهبان]
3.00/5 (5 صوت)

11-20-2013 11:31 PM
في حد بيفهم أكتر من الحيكومة يا الفاتح أخوي ؟ ؟ سعادة المشير قال بأن مشروعهم الحضاري هو مشروع ( ثقافي ) ليس الا ... و ان البعض قد أساء تطبيقه .. مثلما تزرع تقاوي قطن محور يطلع ليك برسيم .. و تزرع تقاوي بطيخ يطلع شمام .. و تزرع تقاوي قمح مضروب يطلع قنقر .. فالعبرة بالخواتيم و أهو كلو أكل متعافي .. و ما فرقت حضاري و للا ثقافي .. و هي لله من قبل و من بعد ..


#833342 [Nader]
2.50/5 (2 صوت)

11-20-2013 11:31 PM
التعبير بتاع اذهب للقصر رئيسا وساذهب للسجن حبيسا ده انت لاطشه يا شيخ جبرا وراصنى يا جدع


#833308 [ابوياسر]
3.00/5 (3 صوت)

11-20-2013 10:38 PM
مش دم بااارد يا استاذ ولكن عين قوييييييييييييييه. في برنامج حتي تكتمل الصوره اشار الصحفي عثمان ميرغني الي وجود فساد حتي في عمليه الشراء وعندما قالوا ليهو قول علي الهواء كبا الزوغه وهو يعني لوقال حيعملوا ليهم شنو ماهم قاعدين ومعروفييين. حسبنا الله ونعم الوكيل


#833290 [ابيره]
3.00/5 (3 صوت)

11-20-2013 09:58 PM
والله ياجبره نحن الفاسدين ...شعب السوداني الحقيقي الكنا نتفخاربيه ..ما انقرضوا من زمان ...والا عمر كشامه ما كان حاكمنا 25 عام ..والمصيبه ما زلنا نتكلم عن الفساد ؟؟؟ مفروض نتكلم عن الحصاد ..حصاد المشروع الحضاري ...الذي حصد كل شي في الوطن ....ولم يبق شي الا ...حصد رؤسهم انشا الله .ألا.....تبا لهم .


#833216 [دا عفن المتعافي]
3.00/5 (3 صوت)

11-20-2013 08:20 PM
يا استاذ جبرة،، فساد المتعافن دا ما بجيبو ليهو وثائق،، دا فساد بشمو شم... ريحتو نتنة قذرة... طاااااقة فوق السماء. عفن سااااااااااي يالمتعافي.


#833178 [quickly]
3.00/5 (4 صوت)

11-20-2013 07:36 PM
اذا كانت الحكومة فاسدة من رئيسا لي غفيرها كمان اي زول عرف الكلام دا وساكت برضوا فـــــاسد ,,,,,,,,,,, من سكت عن الحق شيطان اخرس
ومن رآى منكراً فليغيره بيده فأن لم يستطع فابلسانه ... الى آخر الحديث
يبقى الناس الساكتين وخاملين ديل,,,, جزء كبير من المشكلة يا استاذنا جبرة


#833174 [أخــوك : محمد أحمد]
3.00/5 (4 صوت)

11-20-2013 07:33 PM
اليوم سمعت خبر في الراديو ان الامارات العربية المتحدة منحت مصر قرض بملغ 4 مليار دولار لبناء 25 صومعة قمح. لاحظ هذا العرض خارج مؤتمر الدول العربية والافريقية المنعقد في الكويت اليوم. من غير رفع شهار ناكل مما نزع ورقص.


#833168 [ودالباشا]
3.00/5 (2 صوت)

11-20-2013 07:30 PM
يا بتاع المبرجه انت قاصدنى عديييل


#833165 [ممكون وصابر]
3.00/5 (4 صوت)

11-20-2013 07:28 PM
اخر استغراش مهدي ابراهيم بقول الحكومة صابرة على الشعب السوداني الفاسد والحرامي بعد ان متعوهم 11سنة مضت


#833140 [البعير]
3.00/5 (4 صوت)

11-20-2013 06:57 PM
الله يعطيك العافية استاذ الفاتح جبرة - وبين القوسين دى احلي شي في المقال (سوف يذهب مستوردها إلى ماليزيا مستثمراً وعريساً بينما يذهب المزارع إلى السجن حبيسا) !


#833129 [الفارس]
2.94/5 (5 صوت)

11-20-2013 06:46 PM
رد المتعافى حيكون التقاوى ما فاسدة ولكن المزارع ماحضر الارض بالطريقة السليمة ويعنى السبب فى عدم الانبات هو عدم تحضير الارض كويس ويعنى المزارع هو السبب وعليه يقوم بنزع الارض من المزارع ويتم بيعها للمصريين


#833128 [ابو سارة]
3.00/5 (4 صوت)

11-20-2013 06:40 PM
لا فض فوك اقصد جف قلمك وجبتها في السطر الاخير( يقولون أن التقاوى فاسدة … برضو هي الفاسدة !! بالمناسبة العارف ليهو فساد يجيب (الوثائق) !!


#833103 [tarik soltan]
3.00/5 (6 صوت)

11-20-2013 06:13 PM
ايوة الحبوب هي الفاسده و قليلة أدب كمان !
يعني قصدك اخوانا هم الفاسدين؟! حاشا و كلا!! ياخي نحنا من سنة 89 ما شفنا لينا زول expired كلهم ما شاء الله ناس حلوين و نايرين و التقوى و الفلاح في وشوشهم باينين، و برضو تقول عليهم فاسدين؟! والله نحنا البقينا فاسدين ﻷننا لغايت الآن ناس ساذجين و مغفلين و متوقعين من الشياطين يكونو ناس كوسين!!!!!!!!!!!!


#833085 [ود بحــــر ابيض]
3.00/5 (3 صوت)

11-20-2013 05:53 PM
أنا من ولاية النيل الابيض وادرك حق اليقين الطفرة التى مرت بمشروع ومنطقة الجزيرة والمناقل في السبعينات والثمانينات ، تلك الطفرة لها اثر كبير من الناحية الاقتصادية والتعليمية . وبلغة الارقام اصلاح حال مشروع الجزيزة وامتداد المناقل ينعكس على التعليم وتحصيل الطلاب وهذا يعنى الغلبة " لاهـــل العوض " في الدخول للجامعات وهذا يعنى ان زمام امر هذا البلد يوما ما سوف يكون في يد "اهل العوض " وامثالهم لانهم الاكثر تعليما والاكثر عددا من الـ العباس وسدنتهم. لو تذكر في ما قبل الانقاذ كانت المدارس العشرة الاوائل وكذلك الطلاب الأوائل من الاقليم الاوسط. ( حنتوب ، كوستي القوز، مدني السني حتى الدمازين دخلت في العشرة الاوائل) . كذلك عدم الاستقرار مقصود في دار فور وكردفان لان بها اكثر من 10 مليون وهؤلاء بعبع إذا استقروا وتعلموا. لذلك تجد الانقاذ رقم الظروف شيدت طريقين شرق وغرب النيل شمال الخرطوم ولم تكمل طريق الانقاذ الغربي رقم انه مدفوع الثمن من ايام " الحسيني". قل لي ما جدوى انشاء سبعــة مصانع اسمنت شمال الخرطوم مع انه من منطلق تكلفة الترحيل المفروض توزع هذه المصانع على جميع اقاليم السودان ، وكذا يا اخي الفاضل اشياء كثيرة سوف ياتي يوم الحساب.


ردود على ود بحــــر ابيض
European Union [ABU SHAWARIB] 11-21-2013 11:50 AM
يكفى انك من بحر ك.... أم

United States [دا كلام ما صاااااح] 11-21-2013 12:29 AM
يا ود بحر ابيض فى فرق بين معارضة الحكومة والجهوية البتعمل فيها دى
ما كل اهل الشمال مبسوطين من الحكومة ..المؤتمر الوطنى والنفعيين من كل جهات السودان
ومافى داعى نحسب الناس باسمائهم

بعدين الطرق القامت فى الشمال دى قامت بالعون الذاتى واسأل مؤسسة شريان الشمال
اما المصانع يا سيدى اتركزت فى الشمال لوجود المادة الخام فى منطقة غرب عطبرة
يعنى ما ممكن يشيدوا مصنع فى بورتسودان وينقلوا ليهو المواد الخام من عطبرة يا سيد الفهم انت

بعدين اسمها "رغم الظروف" وليست "رقم الظروف" يا متعلمين يا بتوع المدارس


#833078 [حمزة محمد]
3.00/5 (3 صوت)

11-20-2013 05:37 PM
العارف ليهو فساد يجب الدليل..يعني المزارعين المساكين يايجيبوا الدليل ياروحوا السجن اكلوا قروشم ودخلهم السجن وحتي كان جابوا الوثائق والادله يدوه منه مادي عصابة كل واحد ماسك لي غير ه..والمتعافي قالها في التلفزيون انا ماني هين اليشوفلهم كبش غيري ياستاذ المقصود هو مشروع الجزيرة في عضمه اما المزارعين زرعوا ما زرعوا الشعب جاع مات هذا مامهم المهم هو سباق نحو الثروة والمال.. والشكيه لغير الله مزلة


#833044 [حسن الامام حسن]
2.63/5 (4 صوت)

11-20-2013 05:03 PM
حسبي الله ونعم الوكيل


#833025 [شهاب]
3.00/5 (4 صوت)

11-20-2013 04:40 PM
فاسد المزارع مابيعرف يزرع القمح التركى ولم يتبع طريقة الزراعة المرفقة مع التقاوى


#833022 [صادميم]
3.00/5 (3 صوت)

11-20-2013 04:38 PM
يا جبرا حبوب شنو البناولوك ليها قول يا ولد ناولني الكلاشنكوف و يا ولية ناوليني القنابل و الراجمات و خدوا ساتر لانه اذا لم يكن من الموت بد فمن العجز ان تموت جباناًً و ما ضاع حق وراه مطالب


#833021 [ودالباشا]
3.00/5 (3 صوت)

11-20-2013 04:37 PM
عارف ياجبرا انا قتحت صفحة مقالك دا قبل ما ابدا اتصل فينى خالنا كان هناك وله 8سنه المهم سألته وكنت حريص اعرف انطباعه عن البلد قالى قايتو مابتقدر تعرف الحلال من الحرام تقولى فساد نحنا مرحاة الفساد اتجاوزناها زمااااان


#833010 [kanzman]
3.00/5 (3 صوت)

11-20-2013 04:24 PM
والله مقالك دا الذ من وجبة الهوت دوق والبتزا حقت الجماعة


#833002 [دا كلام ما صاااااح]
3.00/5 (6 صوت)

11-20-2013 04:19 PM
يا اخوى فاسدين نحنا ديل (الشعب الفضل)


#832990 [الباحث عن الحق]
3.00/5 (2 صوت)

11-20-2013 04:12 PM
وزير عمل فرنسي يتسقيل من منصب أمين خزانة الحزب بسبب فضيحة هزت ثقة الناس ،
تتثمل في تبرعات سياسية غير مشروعة .
لما لا يقدم كل من تورط في قضية فساد استقالته عن العمل ويكون بالتالي قد دخل التاريخ من بابه الواسع .
اقترح بعد تغيير نظام الخرطوم انشاء وزارة لمكافحة الفساد في السودان حتى يتم معاقبة كل المتورطين في هذه القضايا


#832954 [بايع اجازتو]
3.00/5 (2 صوت)

11-20-2013 03:36 PM
كسرة :
يقولون أن التقاوى فاسدة … برضو هي الفاسدة !! بالمناسبة العارف ليهو فساد يجيب (الوثائق) !!

أبيت ( دى اتخيلونى قلتها بلآمة شديدة وأنا صارى وشى ومكرفسو )

و ( اعقبتها ) بقولى : أنا خلينى ... انت شايف شنو يا السموك أهلك

يخسى عليكم كلكم

هسع الزول لى مين يبدل فى اجازتو الناس ديل شكلهم ما بيمشوا ونحن ما بنجى عشان ما يكاورونا على بيوت الاشباح ... والفراق طال


#832935 [Omer]
2.75/5 (5 صوت)

11-20-2013 03:21 PM
Your topics always excellent but this one deserves nobel award


#832929 [Prof]
3.00/5 (3 صوت)

11-20-2013 03:19 PM
سلمك اللة عمنا جبرا
لاشى يقال اكثر من هذا
من اين اتى هؤلاء
بل من هؤلاء


#832928 [بت أمدرمان]
3.00/5 (5 صوت)

11-20-2013 03:18 PM
غايتو يا أستاذ جبرة خلى شنطتك مستفة جنب الباب بالجهة اليمين عشان تخطفها و انت مكرور، ههههههههههههه


ردود على بت أمدرمان
United States [النســـــــاي] 11-21-2013 08:29 AM
لا لا لا الفاتح جبرة حــيقتلوه ناس " المشروع الحضاري " بمادة توضع له في الاكل او الشرب او مسدس كاتم صوت او يصلطــوا عليه معتــوه او شماســي ، وذي ما انتي عارفــة الشعب السوداني طيب ومسامح ونســــاااااي.


#832910 [Ghazy Elbadawey]
2.85/5 (8 صوت)

11-20-2013 03:09 PM
المره دى المسأله محبوكه فبعد ان كنكش مزارعو الجزيره فى حواشاتهم ولم تنطلى عليهم احابيل الكيزان جلبوا هذه التقاوى بعد ان استكتبوا المزارعين تعهدات بنزع حواشاتهم ان لم تنتج السقف المحدد من الجهة المانحه وحتى يضمنوا عدم تحقيق هذا السقف بل واستحالته استجلبوا هذه التقاوى وباى باى مشروع الجزيره


الفاتح جبرا
الفاتح جبرا

مساحة اعلانية
تقييم
5.36/10 (10 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة