11-23-2013 10:40 AM


العبدلله لديه يقين راسخ بأن البلاد لم تمر عبر تاريخها الطويل بمرحلة أسوأ مما هي عليه الآن في كافة مناحي الحياة حسبكم أن الدولار قد وصل سعره نهار الأمس ثمانية جنيهات وعشرون قرشاً (يعني تمنية ألف وشوية) !
تعالوا معاً نقف على أوضاع (الصحة) في بلادنا كمثال لهذا التردي الذي نعيشه ، ففي مؤتمر صحفي ضم وزير الصحة (مأمون حميدة) ومديري إدارات وزارته تم التصريح بهذه المخالفات :
• ضبط أشخاص ينتحلون صفة طبيب !
• يعني تاني الزول قبل ما الطبيب يكشف غليهو يطلب منو يوريهو مستنداتو (البرضو ح تكون مزورة)
• تسرب الإشعاع من أقسام الأشعة في 16 مستشفى !
• يعني المستشفيات بدل ما تعالج السرطان تجيب ليك سرطان
• الأطباء خلف تعطيل الأجهزة الطبية في المستشفيات العامة
• أهو دي عاوزه ليها فهامة (هم قاصدين يعني وللا عدم معرفة بالتشغيل وللا الفهم شنو بالضبط)؟
• وجود أدوية ومستهلكات طبية منتهية الصلاحية بالمستوصفات
• بالله ده إسمو كلام .. عشان كده الزول يدخل ماشي بي كرعينو ويطلع في (عنقريب) !!
• إستعانة المستوصفات بكوادر أجنبية
• بالطبع الوزارة بتقصد كوادر أجنبية (غير مسجلة) يعني ناس دخلت (الزريبة) دي سااااكت وكمان إشتغلت في الحقل الطبي (شفتو الكلام ده كيف؟) … بلد سايبه !
• أغلاق مستشفيات خاصة ومستوصفات بسبب إخفاقها في حفظ الدم
• سبحان الله المستوصفات الخاصة التي تطالب أهل المريض بدفع الأمنيات المليونية تخفق في (حفظ الدم) .. ناس ما عندها دم فعلاً
• وجود مؤسسات خاصة غير مرخصة تقوم بإجراء عمليات تحصين !
• (ونحنا نقول ليه بقينا زى الحصين) اليوم كوووولو جارين !!
• وجدود عيادات تجري عمليات جراحية دون تصريح رسمي
• العجب كمان لو العمليات دي بيقوم بيها الأطباء المزورين الفوق ديل تكون المسألة فل الفل
• ضبط مجموعة تضم 34 إختصاصياً يهربون أثناء ساعات العمل الرسمية إلى عياداتهم
• طبعن .. أكيد يمشوا يحصلو (النقاطة) وإن شاء الله المواطن يحصل (أمات طه) !
• وجود 17 معمل فحص تعمل دون ترخيص !
• يعني (كيري) سااااكت .. تجيب ليك كم جهاز (ضارب) .. وبتاع معمل (مزور) ومحاليل فحص (منتهية الصلاحية) وتعمل ليك لافتة مضيئة وأهو لقيت ليك شغل بدل ما تقعد (عاطل) ساكت شايل شهادة (التدريب المهني) وحايم !
• عدم السيطرة على الدخول للمستشفيات العامة مما أضر ببنية الصرف الصحي بالمستشفيات !
• يعني بالعربي كده الناس بتدخل المستشفيات عشان تقضي حاجتها ! طيب الزول (مزنوق) وقدامو مستشفي (يعملا وين) .. طبعن أكيد يقطع تذكرة ويفك زنقتو .. هو لو (الحكومة) وفرت دورات مياه عامة كان ده بيحصل ؟

هذا عزيزي القارئ الكريم بعض مما جاء من مخالفات تم رصدها من قبل وزارة الصحة الولائية للمؤسسات العلاجية الخاصة بولاية الخرطوم .. يعني (العاصمة) .. فتأمل كيف يكون حال الولايات الأخرى يا رعاك الله !

المعادلة عزيزي القارئ تقول أنه بعد رفع الدعم وإرتفاع أسعار اللحوم والفواكه والخضر سوف يتجه (الشعب) إلى البقول وما شابه وسوف تختفي من (جسده) النحيل العناصر الهامة كالبروتين الحيواني والفايتمينات مما يجعله عرضة لكثير من الأمراض تجعله يتجه نحو المستشفيات ليجد أن (الدم) منتهي الصلاحية وأن المعمل يعمل دون ترخيص وأن الأجهزة قد قام بتعطيلها الأطباء وسوف تخترق عظامه الأشعاعات الصادرة من غرف الأشعة وسوف يصرف له دواء (فاسد) وسوف تجرى له عملية جراحية في مكان غير معقم وللا مرخص يجريها له طبيب (مزور) وعندما تسؤ حالته ويسأل ذويه عن مكان تواجد الإختصاصي تأتي الإجابة :
- الإختصاصي ده قبيل طلع من المستشفى ومشي عيادتو !! (ده لو ما كان الإختصاصي ذات نفسو مزور) !!

كسرة :
قال أيه .. من أراد أن تثكله أمه .. شنو كده ما عارف … يا راجل نحنا كنا فين وبقينا (معاكم) وين ؟ يا عمي رووووح منكم لله !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

تعليقات 27 | إهداء 0 | زيارات 9302

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#837738 [hassan]
1.00/5 (1 صوت)

11-25-2013 01:10 PM
عندما تسود العقليه الماديه وتنعدم المؤسسيه لذوم الفساد هكذا يكون الحال هناك حديث عن الرسول ص ما معناه ياتى اناس فىى زمان همهم بطونهم قبلتهم نساؤهم دينهم دراهمهم ودنانيرهم فان حضرت هذا الزمان فالزم خاصه نفسك


#837361 [سلام من الرجين مليون!!]
1.00/5 (1 صوت)

11-25-2013 08:25 AM
ياجبرة حيرتو الناس ديل!!! يودوكم وين ويجيو ليكم من وين!!! لازم مستشفيات كسر وادوية مزورة عشان يلحقوكم امات طه!!! يعني لازم يكتلوكم في المظاهرات!! ما شوية بعوض وذباب وموية مدودة ويقلليلو نسبة العالم الكتيرة دي!!!
بس النكتة ياجبرة انو السيد الوزير ابو جضوم ده نفس مشفاهو عامل كولللللللل الحكاية دي!! قبل مايفرو جاب اخصائيين اجانب بدون ترخيص من المجلس الطبي وشغلم!! بس لانهم سودانيين لعب علي المجلس!!!!!!!!لانو لازم اي اخصائي يتسجل ختي لو كان سوداني!!! الجراح بتاعو كان موقوف من المجلس وكتل الزينة!!!!!!! ويورينا الزيد عن جامعتو التي فرغ من اجلها طب الخرطوم من اساتذته وخوف البعض بالقوة ليدرسو في جامعتو ونقل البعض الرافض عندما اصبح وزيرا انتقاما من رفضهم التدريس!!!!!! ويورينا قروشو دي جابه من وين النزيه الامين!!!!!!!!! يعني الزول بيطير في الفضائح عشان يقول ما انا براي الفاسد ولاجامعتي ولامشفاي!!!!!!!!! مش قاصد الشعب المسكين الذي يريده ميتا ومريضا وهاربا من مشافي الحكومة لجيبه!!!!!!!!!!
ياود جبره زولك ده وصولييييييييييييي بما تعنيه الكلمة وليس اصوليييي!! وليته كان!!!!!!


#837358 [أبو طلال]
1.00/5 (1 صوت)

11-25-2013 08:22 AM
الأخ جبرا سلام , أول مرة أحس أنك متشائم رغم تفاؤلك الذى جعل واواتك تزيد عن 24 واوا لكن معليش لكل جواد كبوة ,,
أسمح لي أفك ليك الشفرة دى مع الإعتذار مرة أخري .
طبعا اللحكومة دى أمنا .. وأي أم في الدنيا أ ول حاجة بتعملها , ترضع المولود وتطعمو عشان تديهو مناعتين ضد الإمراض واحدة من اللباء والتانية من اللقاحات زي الدرن والحصبة وشلل الأطفال ...إلخ واللقاحات دى هى عبارة عن جراثيم أو منتوجاتها مضعفة أو معالجة عشان تحفز لجسم لإنتاج المناعة وده بالطبظ البتسوى فيهو أمنا الحكومة من يوم ولدتناإلي أن كبرنا وبقينا فى عمر الزهور -ما كم وعشرين سنة -
الحمد لله هسع بقيتو حصين الواحد فيكم يكشف عند طبيب مزور , ونتائج فحص مزور , وياخد علاج منتهى الصلاحية , وتجرى له عملية فى أى غرفة غير غرفة العمليات , وللتأكيد من حصانيته يعطى جرعة إشعاعات متنوعة يعنى كوكتيل وكدة .,
ولزوم التطور و العولمة أمنا الحكومة عاوزة تنقلنا نقلة نوعية وكدة من مرحلة المناغة ضد المرض بشقيه العضوى والنفسى - زى بتاع الكسرات - إلي المناعة ضد الموت , عن طريق لقاحى الرغيف - كما ونوعا - والرصاص - الما مطاطى- زى مافى تجربة الإحتجاجات الإخيرة - دى ما ياها الخطة (ب) ذاتها -
حتقول لى طيب أمنا الحكومة ليه بتصرح بالكلام ده هسع أقول ليك أيوه ولازم هسع عشان معروف علمباأنو الإطراء - يعنى التشجبع - برفع درجة الإحساس بالألم- لبقى الإنسان أكثرتحملا للألم - ويقوى المناعة وكدة تكون أمنا الحكومة عملت تلاتة فى واحد( 3*1) قوت مناعتنا , وتخنت جلدنا , وبقت هى شفافة - فى دى بس -
إيه رأيك فى الفهامة بتاعتى ؟؟؟


#837155 [عكرمة عمر]
3.00/5 (2 صوت)

11-25-2013 12:15 AM
الاخ جبرة خلى الفات والحقنا بسرعة فى الجاى تزلت من قبل المملكة السعودية تاشيرات للخادمات المنزليات والكارثة الهنا انو المواطن يعامل الشغالة على وزن ما ملكت ايمانكم اللى نزلت زمان فى القران وبنفس الفهم والمعنى حصل الفس قبل تقع فى الراس وانت اذكى من اشرح ليك بالتفصيل الممل


#837030 [احمد]
1.00/5 (1 صوت)

11-24-2013 09:04 PM
حكاية اﻻطباء بيمشوا عياداتهم ب بالصباح دي حكاية قديمة بل ومصرح بها من الدولة بطريفة خفية ومنذ زمن بعيد. يعني الناس دي تعيش من وين . المهم يمروا علي المرضي وبعد داك يشوفوا معايشهم. يعني الحكومة بتديهم كم . حقو دا ما يكون موضوع


#836396 [عزالدين]
2.00/5 (3 صوت)

11-24-2013 09:23 AM
الاخ جبرا..لك التحية..موضوع الصحة فى السودان يحتاج منك الى مقالات ومقالات...اولا هنالك توجه عالمى لما يسمى بجودة الخدمات الصحية,,وهى معايير عالمية تسعى المستشفيات لتحقيقها حتى تضمن سلامة المرضى الذين يتلقون الخدمات بها..هذه المعايير تبدأ من البنية التحتية وتصاميم المستشفى وتنتهى بكيفية التخلص من مخرجات الخدمة الصحية.(طبعا مرورا بالخدة ومتلقى الخدمة)..نحن وبكل اسف لا نملك ولا مستشفى واحدا تنطبق عليه كلمة مستشفى..والله ما اقوله حقيقة علمية..لا يوجد لدينا اى مبنى يمكن ان نسميه مستشفى من حيث المواصفات مرورا بمقدمى الخدمة وكيفية تقديم الخدمة...طيب شنو الحل!!! الحل يبدا باعتماد ميزانية للصحة لا تقل عن 25% من ميزانية الدولة...اتباع المعايير العالمية للمستشفيات...اعادة تسجيل كل العاملين فى المهن الصحية بالمجلس الطبى..التاكد من صحة الشهادات من المصدر(الجامعة-المستشفى_البلد)..الاهتمام بتدريب الكوادر الطبية..يعنى نهدم ما يسمى مستشفيات حاليا ونقيم مستشفيات مطابقة للمعايير العالمية.....بخصوص الاشعاع فى المستشفيات ..من المعروف ان هنالك وحدة تتبع لوزارة الصحة بكل الدول مهمتها التاكد من مواصفات اقسام الاشعة فى القطاع العام والخاص واجراء القياس الدورى لمستوى الاشعاع...عندنا!!!ما اظن!!!هنالك عيادات خاصة بالسودان بها اقسام اشعة ولا توجد بها غرف مرصصة(تحتوى جدرانها وابوابها على طبقة من الرصاص لمنع تسرب الاشعاعات)...باختصار لا بد ان نعمل بمواصفات......هنالك العديد من الاطباء خارج السودان يمكنهم المساهمة فى الجانب العلمى للمعايير ويتبقى على وزارة الصحة التنفيذ...لك خالص تحياتى...واتمنى ان ينعم الشعب السودانى بخدمات صحية تليق بانسانيته....د.عزالدين- السعودية


#836201 [سكسك]
1.00/5 (1 صوت)

11-24-2013 02:21 AM
عليكم الله خافو علينا عندنا سكري والعمر دق الخمسين ارحمونا خلوها مستورة عشان صحتنا يااخونا جبرة


#836147 [صالة المغادرة]
1.00/5 (1 صوت)

11-23-2013 11:22 PM
واحد فى حلتنا مشى يتبرع بالدم لواحد قريبه عنده عملية الراجل المتبرع حلف وقسم ناس بنك الدم قالوا ليهو تدفع رسوم خمسة جنيه ياجماعة اديكم دمى وادفع قروش كمان ضبح وسلخ قالو ليه دى رسوم دعم قال ليهم يخسى عليكم يا ماعندكم دم والله المريض كان ما قريبى كان عملت معاكم عملية انتو زاتكم كان دخلوكم عملية وما تلقوا البتبرع ليكم بالدم يا.................الباقى تمو خيال .


#836136 [ام احمد]
1.00/5 (1 صوت)

11-23-2013 10:58 PM
يا استاذ نسيت الحبوب احسن نبقي نكوس ليك في الدكأتره والمستشفيات بعدين الله لأ حوجنا لذلك لذ عليك بالحبوووب


#836128 [ودالباشا]
1.00/5 (1 صوت)

11-23-2013 10:48 PM
بت تمدرمان دى ياجبرا كلامها حقيقة الناس دى قاصدين عشان نبقى زى الزباب فى الشتاء حيلنا مهدود ودايخين وما حاسين بالحاصل حولنا


#836072 [عصمتووف]
1.00/5 (1 صوت)

11-23-2013 09:09 PM
ما انا من زمااااااان بنبح وبهوهوو هوو هوو هوو قلنا ليكم دي ما بلد زي البلدان الاخري دي مربط حمير ومرابط الحمير افضل قلت لا انت وانا وغيري ماشين وقاعدين ام فكو مفتكرين نفسنا لابسين هدوم


#835917 [متخلف]
1.00/5 (1 صوت)

11-23-2013 06:11 PM
في زول شاف شهادة وزير الصحة ممك يكون جايبها من الكلاكلة سمنعا في شهادات هناك رخيصة


#835914 [زول سمح]
1.00/5 (1 صوت)

11-23-2013 05:56 PM
اذا ماتت الضمائر وعما الفساد فقول للعباد عليكم السلام؟!!


#835868 [حد بيعرف احسن م الحكومه!!]
1.00/5 (1 صوت)

11-23-2013 04:30 PM
سؤال بريء جدا: انتو يا جماعة الخير اللى بيحصل دا كووولللو الرئيس عمر البشير ما بسمع بيهو ياربى؟ ولآ شنو المعنى!!! موش قالو انو بيقرا الجرائد بنفسو .. ما فى زول بيلخّص ليهو البينكتب اذا ما حصّل قراهو (موش برقبتوّّّ) بعيونو!!! موش الناس بتقول "السكات رضا" هل نفهم انو البشير رضيان وموافق على اللى بيحصل دا..
هل ابدا ما سمع ب "اب عاج" الما كان بيعجبو الحال المايل .. هل فى اى زول عنقالى ساكت بيقيل يقولو ليه حال بيتك مايل؟ هل البشير قبلان يكون رئيس لبلد يحصل فيها جنس البيقولوهو ناسو المسؤولين عن الصحه انو حاصل قدامن.. البشير دا ابدا ما طرش اصانو الكان بيسويهو اب عاج .. رحمة الله عليه.. فى ايتها مسؤول يحوم حولو تقصير او خطا خلى الفساد (لأنو السودانيين ما عرفو الفساد ولا سمعوبو الا فى الزمن دا) المرحوم نميرى معروف عنو قبل ما يرفت اشقياء الحال البيغلتو ويقعو فى ايدو كان كفّت البكفتو وشلّت البيستحق الشلّيت وامر برمى الآخرين بالشباك .. اها ات يالبشير مالك ما ليك حس وتكنّو البيحصل دا كووللو اما حاصل فى بلادا ما معروفه وين او ات ماك معروف ليك مكان ياربى!!! (لو كانن حيشانك اربعه لعذرناك لكنهن بس اتنين) اها الليله المكتوب دا كلاما قالو وزيرا ليك وفى اجتماعا كبير.. والوزير دا قالوا ات كنت بتحنّس فيهو مده عشان يقبل يبقى وزير (حسبما جاء على لسان الوالى "المابنظلم عندو زول" كما وصفه عصمان ود الميرغنى ... قبال ما تيارو يقيف وكل ارضا تشرب ماها..


#835856 [ابراهيم الحسين]
3.00/5 (2 صوت)

11-23-2013 04:07 PM
انا متأكد الحاصل على الشعي السودانى ده مش من حكومة السجم والرماد ولا مننافع المانافع ولا من المتعافى المريض ولا من الجاز اليحق كلهم ومعاهم ابو ريالة بلدينا........ الحل لمشاكلنا انو نحفظ مابين الرحلين ( الفخذين ) وشرب المسكر والدخاخين الصدق ووافق بيها الوزير الاجنبى( الداخلية ) واكل الطيب من الاكل وطاعة الله فى ما أمر ونهى علشلن يتوب علينا ويشيل جنوده ( الانقاذ والمؤتمر )ونعيش فى امن وامان


ردود على ابراهيم الحسين
United States [لا بسف صعوط ولابسجر] 11-24-2013 07:30 PM
ناس روسيا وامريكا واسرائيل واوروبا والصين ( كفار عديييييييل كدة ) وبيشربوا المسكر جهارا نهارا وناس الامارات بيسكروا نص النهار والبارات مفتوحةوبيوت الدعارة على قفا من يشيل وهم عايشين اخر نغنغة وراحة ..؟؟؟ ايه رايك يا هداك الله ؟؟


#835842 [ام الحسن]
3.00/5 (4 صوت)

11-23-2013 03:48 PM
ياخوى ديل مما مسكو البلد نوا على خرابها وبدو بالصحة 0000اتصدمنا بحكاية القبول الخاص فى كلية طب الخرطوم وقبل مانفوق لقينا تانى يوم شالو اللوحة العلى الباب وختو بدلها واحدة مضيئة وبغماز كمان000مشينا جطنا مع العميد قال فعلا ده ما كازينو دى كلية لزوم اللفتات المضيئة شنوووووو 000اها ومن يومها الصحة فى تدهور هو احنا خلينا البلد من شوية000 اسكت ساى الوجع كتير


ردود على ام الحسن
[sahar] 11-24-2013 08:02 PM
ياختي كلامك مليــــــــــــــــــــــــــــــــــــــون %

United States [طبيبةخريجة جامعة (كشا مشا)] 11-24-2013 07:36 PM
المشكلة فى تدهور حالة الطب والتطبيب فى البلد هم الاطباء خرجين جامعات الفكة ( الكشا مشا) فى الاقاليم ....


#835836 [بت الخرطوم]
3.00/5 (3 صوت)

11-23-2013 03:42 PM
ومستشفيات خاصة متخصصة فى بيع الاعضاءالبشريةوغرفة العمليات غير مطابقة للمواصفات الطبية لاجراء عمليات زراعة الكلى واجهزتها انتهت مدة صلاحيته والادوية والمحاليل المعملية نتهت مدة صلاحيتها دى الوزير خجلان ما يقولها لشنو اذا عرف السبب بطل العجب (يديك العافية استاذنا جبرا)


#835805 [الممكون]
2.75/5 (3 صوت)

11-23-2013 03:04 PM
عشان كدة السادة الحاكمين البلد كلهم بروحو بره للعلاج هم واسرهم مالوم والممرمطة دى لكم الله يا الشعب السودانى الفضل


ردود على الممكون
United States [sahar] 11-24-2013 08:07 PM
معقولة بس السادة الحاكمين البلد يمشو يدخلو في مستشفيات ( الداخل فيها مفقود والطالع منها مولود)!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!


#835785 [أبوالكجص]
3.00/5 (2 صوت)

11-23-2013 02:38 PM
من أراد أن تثكله أمه ... هههههههههههههههههههههههههههههههها حلوة دي ياجبرا.


#835779 [ودالبطانه العربي]
1.00/5 (1 صوت)

11-23-2013 02:31 PM
وهذا ان دل انما يدل على اننا غير موجودين اي = صفر . #


#835725 [الجاتك في صحتك ما سامحتك]
1.00/5 (1 صوت)

11-23-2013 01:26 PM
هو العندوقروش امشي مستشفي منو خليناها زمان بقي القرض مسوح وبخور وزيت السمسم والحرجل وكده حاجات مضمونة اما كان بقت حاجة تقيلة فنحن الحمد للة مومنين بقضاء الله والجاية من السما بتلقاها الواطة
لكن كدي شوفو الحاصل علي التعليم في البلد الحاصل عليهو شنو واستاذ الجا معة الما بفرق بين الواو الضكر


#835713 [زول كدا]
1.00/5 (1 صوت)

11-23-2013 01:23 PM
نكبر ونشوف اقصد نحي ونشوق يا عمي روح .................


#835692 [شهاب]
3.00/5 (2 صوت)

11-23-2013 01:03 PM
هذا عزيزي القارئ الكريم بعض مما جاء من مخالفات تم رصدها من قبل وزارة الصحة الولائية للمؤسسات العلاجية الخاصة بولاية الخرطوم .. يعني (العاصمة) .. فتأمل كيف يكون حال الولايات الأخرى يا رعاك الله

الولايات حالها يغنى عن السؤال تدخل ماشى على رجليك تطلع بنقالة تستأجر اسعاف تموت فى نص الطريق


#835689 [الباحث عن الحق]
2.75/5 (3 صوت)

11-23-2013 12:58 PM
لك التحية استاذ جبرا وانت تتحفنا بقالاتك .
تجسيد حي لفساد السلطة الحاكمة في السودان .
من المسئول الذي يهمه أمر المواطن الكل مشغول بتأمين مستقبله ومستقبل ابناءه من دم الشعب السوداني .
واحد يهدي قصر لأبنته ب4,6مليار جنيه ( خمسة أضعاف قيمة قصر باكنجهام ).
وزوجة مسئول تشتري مزرعة بثلاثة مليار ( هل امطرت لها السماء ذهبا ) .
وآخر يهدم مسجد لانشاء مدرسة اجنبية للنخبة ويزعم أنه فقيه السلطة .
ورئيس يمتلك مزرعة فخمة لانتاج عنب رئاسي ذي طعم اكثر حلاوة ؛ واخرى قريبا لتربية ابقار ذات مواصفات خاصة تساهم في انتاج هوت دوج محلي للطبقة الحاكمة .
وما خفي اعظم ،،،،،،،،،،،،،،،،،،،،،،،،،،،،، .


#835671 [دا كلام ما صاااااح]
3.00/5 (3 صوت)

11-23-2013 12:40 PM
اقتباس
"تجيب ليك كم جهاز (ضارب) .. وبتاع معمل (مزور) ومحاليل فحص (منتهية الصلاحية) وتعمل ليك لافتة مضيئة وأهو لقيت ليك شغل بدل ما تقعد (عاطل) ساكت شايل شهادة (التدريب المهني) وحايم !"




ما اللافتة طلعت مضيئة.. تانى دايرين شنو ؟؟


ردود على دا كلام ما صاااااح
United States [لا بسف صعوط ولابسجر] 11-24-2013 07:45 PM
تجيب ليك كم جهاز (ضارب) .. وبتاع معمل (مزور) ومحاليل فحص (منتهية الصلاحية) وتعمل ليك لافتة مضيئة وأهو لقيت ليك شغل بدل ما تقعد (عاطل) ساكت شايل شهادة (التدريب المهني) وحايم !"

وكمان تجيب ليك خرتمية طبيب من خريجين جامعات الفكة من( سوق الناقة) .... يسمعوا الكلام و ما يعملوا اضراب وكدة .0..

ما اللافتة مضيئة وكدة !!!!!!!!!


#835655 [الحردان]
3.00/5 (4 صوت)

11-23-2013 12:26 PM
السادة القراء والمعلقين والمشاهدين والمستمعين ... الاخ جبرا ... نزف اليكم اليوم الذكري التانية لوجود ملف خط هيثرو مع النائب العام وكده الملف بكون يااما اتشمع ولا الارضه اكلتو يعني الملف المنكوب ده الاتكل كم مره قبل كده وهسي دي التالته والتالته ثابته ... ونحن اذ نهنئ السيد جبرا ... علي حمل تلك الامانه التي اصبحت ملك كل السودانيين ... ونطلب منه الثبات والصبر والواوات كان كترت بنعمل ليها طريقة جديدة مثلا :

أخبار ملف خط هيثرو العند النائب العام شنو ( سنة اولي + سنة تانية + و ) ...

وبالله شوف لينا حكاية تقاوي القمح الحصل فيها شنو و و و و +


وكل سنتين تلاته وانتم طيبين ..


اخوكم الحردان ..


#835588 [بت أمدرمان]
2.94/5 (9 صوت)

11-23-2013 11:19 AM
عزيزنا جبرة . بالرغم من الأسلوب الكوميدى الجميل بتاعك دة ، إلا أنها اليوم كوميديا سوداء أصابتنا بالنكد و الهم بزيادة على الهم الراكبنا و مدلدل رجلينه من 25 سنة.
أنا بستغرب من جرأة الناس دى ، من وين بتجيب الشجاعة البتكلموا بيها بصراحة كدة؟ لكن هم (طبعن) ، يا قولك، آمنين مطمئنين إنه أجسادنا الهلكهتها الأشعة المتسربة و الأدوية الضاربة و التقاوى الفاسدةو الرصاصات الموجهه، غير قادرة على انها تقول بغم. الحمدلله على ما اراد الله و يحلها من عنده، قادر على كل شئ


الفاتح جبرا
الفاتح جبرا

مساحة اعلانية
تقييم
5.50/10 (8 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة