12-05-2013 12:00 PM


لزمان طويل كان العبدلله يعتقد بأن التصريحات (الغريبة) من شاكلة (الدفاع بالنظر) وما شابهها تصريحات قاصرة على المسؤولين (الرجال) فقط إلى أن طالع العبدلله تصريحاً جعله في حالة من الإستغراش الحاد للأستاذة سامية عثمان مديرة الصحة والسكان بمحلية شندي (أوردته صحيفة حكايات مؤخراً) تحت عنوان ( استدراج الجنادب لمباراة فاصلة باستاد شندي) حيث أشارت فيه (الأستاذة) انهم بصدد دعوة المواطنين الي إطفاء المصابيح الكهربائية وتشغيل إنارة استاد شندي بغرض استدراج الجنادب وإبادتها !
تعالوا معي أيها القراء الأفاضل لنشهد ذلك اليوم (معركة ذات الجنادب) :
يعقد المسؤولون بمحلية شندي إجتماعاً لوضع اللمسات النهائية (للمعركة) والتي تشمل تحديد ساعة الصفر لقطع الإمداد الكهربائي عن (العدو) داخل المنازل والمرافق والشوارع وكل أنحاء المحلية ما عدا الإستاد الذي سوف يتم التأكد من صلاحية كل (لمباتو) وإكتمال الإنارة فيهو ، كما تشمل الإستعدادات وضع القوات القتالية التي تحمل قنابل (المبيدات) على خط (التماس) مع تشكيلات قتالية مزودة بأسلحة الرش الفتاكة على (دائرة السنتر) ولم ينس المسؤولون في ذلك الإجتماع تحضير عدد من عربات (النفايات) خارج الإستاد تمهيداً لحمل جثث القتلى والمصابين من بني (جندب) لدفنهم خارج المدينة .
مع غروب الشمس وفي تمام الساعة السابعة تماما تم البدء في تنفيذ الخطة فقطعت الكهرباء عن كل الأحياء والاسواق وأصبحت مدينة شندي تعيش في ظلام دامس وخطر يحدق بالجميع …. تعالت الأصوات في الشوارع والتجمعات والأسواق :
- يا جماعة الختف موبايلي منو؟
- أنا سامعة ليا حركة في الصالون
- شايف الزول الطالع في حيطة الجيران داااك
يبدو ان (ناس المحلية) وهم يخططون لمعركة ذات الجنادب لم يخططو لمعركة ذات الحرامية في ظل ذلك الظلام الدامس الذي شمل كل أصقاع المحلية .
كما أن الاستاذة لم تضع في إعتبارها هذا المشهد في إحدي المستشفيات :
- يا جماعة مريضكم ده ما بنقدر نعمل ليهو العمليه هسه .. إنتو ما عارفين دي ليلة ذات الجنادب؟
- يعني شنووو الزول قاعد ينزف وعاوز يموت
- يعني عاوزننا نموت نحنا؟
- كيف؟
- إنتو ما عارفين لو ولعنا غرفة العمليات دي الجنادب الفي المستشفى دى كوووولها ح تمشى تدخلا وتهاجمنا بدل ما تمشي الإستاد ؟
أضيئت أنوار الإستاد .. وكانت الخطة القتالية التي وضعها المسؤولون تقضي بأن تتجه أرتال العدو من أوكارها متجهة إلى أرض المعركة (الإستاد) إستناداً إلى الظاهرة العلمية التي تقضي بان الحشرات تتجه إلى بؤر الضوء وهذا ما حدث إذ بدأت أفواج الجنادب تتجه نحو الإستاد من أواسط المدينة وأحيائها البعيدة
بعد أن تأخر وصول العدو إلى أرض المعركة بدأت قوات (المحلية) تعيش في قلق :
- يا جماعة (الجنادب) دي تكون كشفت الخطة ؟
- لا لا ح يجوا بس الظاهر تعبانين وما قادرين يمشو
- أيوه يكونوا جعانين وحالتهم صعبه وبيتحركو يا الله يا الله
- ما لازم يكونوا تعبانين هو الشعب ذاااتو تعبان وجعان وحيلو مهدود لمن هم
مضت ساعات لم يتجمع فيها إلا عددا قليلا من الجنادب التي كانت موجودة أساساً بشقوق جدران الإستاد وتحت كراسي المشجعين حيث إتجهت نحو ضوء الكشافات حيث تمت إبادتهم بواسطة قوات المحلية المدججة بأسلحة الرش الفتاكة .. وبقي الجميع في إنتظار حشود الجنادب التي تتجه من أقصي المدينة والأحياء المجاورة نحو الإستاد المضاء غير أن الإنتظار قد طال بعد أن إنتصف الليل ..
وبعد أن بدأت خيوط ضوء الصباح تنعكس على جدران إستاد المعركة التي لم تتم إتضح أن الشئ الوحيد الذي لم يضع له المسؤولون حسابا هو أن سرعة الجندب لا تتعدي في أحسن الأحوال المتر في الدقيقة أي ان أقرب منزل من الإستاد يبعد ألف متر تحتاج فيه الجنادب لقضاء 16 ساعة حتي تصل إلى أرض المعركة .. وتكون حينها الواطة أصبحت وكده !!

كسرة :
أموت وأعرف الناس دي بتجيب الصنف ده من وين ؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟

تعليقات 36 | إهداء 2 | زيارات 10935

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#848834 [abdelrahim]
0.00/5 (0 صوت)

12-06-2013 10:00 PM
للاسف مع احترامي للكاتب إلا أنه اتضح انه يكتب فقط للسخرية وإلهاء الناس عن الموضوع الاساسي وليس لوضع الحلول والمساهمة في حلها كما أنه اتضح انه لا يفرق بين الجندب والصرصور ، كما أنه يكتب كأنه غير عائش في السودان ، من قديم الزمان كان الحل في حالة ظهور الجنادب اطفاء كل الانوار في البيت وجعل لمبة واحدة تعمل بعيدة من وجود أفراد البيت ، وهذا طبقه ناس مدني في اليومين الماضيين من تلقاء انفسهم ، فماذا تفعل مديرة الصحة بشندي مع عدم وجود امكانيات والتي الكاتب ادري بها وكتب عن الفساد كثيرا لهذه اقترحت المديرة هذا الحل علي الاقل يقلل من عدد الجنادب ان لم يقض عليها كلها، وبأي نسبة كانت ، طبعا صياغة الخبر ايضاً كان لها دور في سخرية الناس لأن صحف السودان جلها إن لم يكن كلها تعتبر صحف صفراء ، فيا استاذ ويا معلقين ما هو الحل لمكافحة الجنادب في بقعة من السودان مع عدم وجود امكانيات في المحليات؟ فلو مع سخريتكم وضعتوا الحل كان أفضل ، والآن عرفت لما المؤتمر الوطني حكم السودان 24 عاما وسوف يستمر طالما كان تفكيرنا هكذا مع كل الود والاحترام


#848627 [ودالباشا]
5.00/5 (1 صوت)

12-06-2013 04:26 PM
اسأل المرشح لنائب الرئيس دا الوحيد العارف بس


#848477 [Kumba]
0.00/5 (0 صوت)

12-06-2013 12:43 PM
معلومة علمية: الجنادب الميتة خطرها اكبر من الحية ولذلك نحمد الله ان الخطة لم تنجح والا كانت المصيبة اعظم ،وهذا توفيق من الله !!.
رد مسؤول إبن جندب


#848447 [omer ehjamey]
0.00/5 (0 صوت)

12-06-2013 11:55 AM
والله الزول دة هو كتاب..لكن مرات بكتب لي كلام عوارة بس


#848373 [الزول الكان سمح]
5.00/5 (1 صوت)

12-06-2013 10:32 AM
كسرة :
أموت وأعرف الناس دي بتجيب الصنف ده من وين ؟

من محل قاعد تجيبوا إنتا....هههههه


#848273 [شقله]
5.00/5 (1 صوت)

12-06-2013 07:59 AM
والله تكون واطاتنا نحن اصبحت اذا راجين لينا رجاء في ناس الدفاع بالنظر ديل.والله كل يوم الواحد بتاكد اننا نحكم بواسطه اشخاص من ذوي الاحتياجات الخاصة.


#848272 [الجندوبى]
4.00/5 (1 صوت)

12-06-2013 07:56 AM
أنا اسمى الجندوبى
الما عاجبو يطالعنى استاد شندى


#848128 [نص صديري]
4.00/5 (1 صوت)

12-05-2013 10:31 PM
بدون خرخرة استاذ جبره نؤكد لك ان بشبش حايطلع في مقابلة تلفزيونية ويقول ليك كتلنا عشرة الف بس منهم


#848059 [دا كلام ما صاااااح]
4.50/5 (4 صوت)

12-05-2013 09:06 PM
سمعنا تحت تحت انو الجندب عنده طابور خامس فى الحكومة سرب له الخبر
يكون دا منوووووووووووووو ؟؟


#848057 [سجمان]
0.00/5 (0 صوت)

12-05-2013 09:06 PM
والجنادب ماتت ؟؟؟ ...


#848021 [ابو سكسك]
5.00/5 (8 صوت)

12-05-2013 08:04 PM
دي بسموها نظرية "الاستدراج الي وسط المدن" وقد سبق تطبيقها واثبتت نجاح منقطع النظير، لكن انتو نسايين ساكت. وزير الدفاع عبد الرحيم مش قبل كده استدرج قوات حركة العدل والمساواة الي قلب امدرمان وخطتو نجحت مية المية...اها وتييب.


#848011 [واحد قرفان]
5.00/5 (5 صوت)

12-05-2013 07:45 PM
والله يا استاذ الصنف دة الا من القصر مباشرة


#848006 [Nader]
5.00/5 (5 صوت)

12-05-2013 07:35 PM
التوزيع الحصرى يا ابوناجى للصنف ده عند الزميله العزيزه فاطمه شاش شششششششششششششششششششششش


#847948 [قارسيلا الزعيم بولاد]
5.00/5 (2 صوت)

12-05-2013 06:08 PM
الله لي انا من سامية، سامية الفهم ياسامية، يا عمك جبرة الصنف دا معدل وراثياً وكده يعني..
اهلنا المستغرشين قالوا المرة كانت بقت فاس ما بتكسر الراس، تقول لي الطيارة جات بالمغرب والدنيا كانت ضلام والانوار طافية.. دا صنف اسمو تيرابايت.


#847927 [الكريف احمد الكريف]
5.00/5 (2 صوت)

12-05-2013 05:39 PM
يااستاذ الشعب السوداني من 1989 واطاتوا اصبحت وديكوا عوعا فأصحي للون يااستاذ


#847888 [julgam]
5.00/5 (3 صوت)

12-05-2013 04:54 PM
والله فعلآ ياود جبره الكيزان ديل ...أقصد الجنادب ديل واطاتهم أصبحت..


#847817 [أبوأحمد]
5.00/5 (6 صوت)

12-05-2013 03:41 PM
ياجبرا خليك من صنفهم... أنت صنفك الشديد ده بيجيبو من وين ؟؟؟؟


#847794 [حكومة البصيرة ام حمد فعلا!!]
5.00/5 (2 صوت)

12-05-2013 03:14 PM
ده من مزرعة الترابي!!!!!!!!!!!!!! لو ما مصدق اسال بكوري!!!!!!!!!!


#847773 [كيمو]
3.00/5 (1 صوت)

12-05-2013 03:00 PM
يا توحه انت قادى تارخ دى اسمها معركة بلاط الجنادب بواتيه شندى


#847764 [خليل عــــزة]
5.00/5 (2 صوت)

12-05-2013 02:50 PM
يا جبرا الناس ديل امبارح دكو الورق (دكوها)

وقالوا (العشرة) فاشلة لانو اللاعبين كلهم حرقوا

ح تتوزع من جديد!!!!!!

اها في التوزيعة الجديدة ده

النائب العام (ذاتو) اخبارو شنووووووووووووو؟


#847763 [خالد عثمان]
5.00/5 (3 صوت)

12-05-2013 02:50 PM
تحياتي . افيدونا بالمعركة المقبلة ضد الباعوض ، جماعتك يمكن يردموا النيل!!


#847735 [jangy]
4.00/5 (1 صوت)

12-05-2013 02:21 PM
دا كلام يا ود جبرة ممولكم كشوهو وللا شنو عابز تعرف جخنون جديد مننا دى تلقاها عند الغافل


#847701 [اسمر]
5.00/5 (2 صوت)

12-05-2013 01:53 PM
والله يااستاز انا زاتى محتار من صنف البنقو البدخنو الجماعه ديل


ردود على اسمر
United States [مواطن] 12-05-2013 03:53 PM
يكون البت دي لبعت ليها معاها عرقي بس صنفها شنو؟؟؟؟؟


#847693 [تينا]
5.00/5 (3 صوت)

12-05-2013 01:44 PM
هو يعنى يا أستاذنا جبرا الجنادب ما قضوا عليها فى معركة ذات الجنادب باستاد شندى وطيب كيف أمس مذيع قتاة الشروق لما اتصل بوزير صحة ولاية الجزيرة وسأله عن ماذا هم فاعلون بخصوص الجنادب أخذ الوزير يلف ويدور أخيرا حكى له المذيع باعجاب عن معركة ذات جنادب شندى وقال له لماذا لاتطبقونها فى ولايتكم وقد أتت أكلها فى شندى قال له الوزير سننظر فى الأمر وهنا فرح المذيع وقال له أمر ماذا ستطبقون موضوع فصل الكهرياء وحث الجنادب للاتجاه للاستاد لتقضون غليها تماما ؟؟ قال الوزير لا مش حنطبقا بيحذافيرها لكننا بمعنى سنستفيد منها وضحكت أنا ضحكا شديدا من الحوار لكن المصيبة أتارى بعد هذا كله لم تفز شندى فى معركة ذات الجنادب ؟؟


#847676 [ودالبطانه العربي]
5.00/5 (3 صوت)

12-05-2013 01:26 PM
الصنف ده ياجبرة ماعندو جنا بسموهو الخصي لاكن مابوريك بجيبوهو من وين عشان الرقابة وكده.


ردود على ودالبطانه العربي
[اسمر] 12-05-2013 08:20 PM
ياودالبطانه هعععههعهعهههههععه الله يجازيك بالخير


#847669 [nasereddin]
4.50/5 (2 صوت)

12-05-2013 01:22 PM
يكون دي من أفكار صنف وزراء فك التسجيلات ، المتضامنة مع الوزراء (المكشوشين ) تعسفيا ، وهم ال (لسع ما لحقوا يلهطوا كويس)، رغم هناك وزراء مفصولين والفرحة تملأ جيوبهم (لا حساب ولا محاسبة ولا يحزنون)، بل الرئيس شكرهم علي (لهطهم المتميز)، وقال( عمدا وخوفا منهم )اداؤهم المتميز (مش الكل بيلعب علي الكل).. زول مزرعتو بتنتج بيض من الذهب الخالص!!!الخلاني اتعاطف مع وزير (سابق،كشوهو قبل24 ساعة)،،هو أن زوجته اتصلت عليه بأن الشرطة قبضت علي حمًودي ابنها لقيادته السيارة الفارهة بدون رخصة..طيب هو منذ أعوام يقود بدون رخصة وما في زول كلمموا. ايه الحاصل اليوم.لما اتصل علي الشرطة قالو له ولدك غير نظامي ، طيب أكلم وزير الداخلية ؟ لم يتمكن من الوصول له، (هو ذاتو وزير الداخلية في مشاكل جواز زوجتو للخروج للخارج وما وجد من يعاونو علي استخراجو)... في 24 ساعة بالله الكانو بيجو البيت كلهم أصبحوا يعاينو بي شماتة!!!الله!!


#847659 [ابو جمال]
0.00/5 (0 صوت)

12-05-2013 01:15 PM
يكون وجاب هم من عش الجنادل


#847655 [ام احمد]
3.00/5 (1 صوت)

12-05-2013 01:10 PM
الفهم قسم


#847648 [kamuzu]
4.00/5 (1 صوت)

12-05-2013 01:08 PM
ولماذا لا تنظم حملة لرش المنازل دون اللجوء لمعركة ذات الجنادب دي ..... منتهي الغباء


#847634 [سودانيييييييييييييييييييييييييييييييي]
4.00/5 (1 صوت)

12-05-2013 12:57 PM
وانا كمان افهم الناس دي بتشوفنا هبل ومغفلين لحد وين الي اي مدىىىىىىىىىى


#847625 [سوداني ممكون]
4.00/5 (1 صوت)

12-05-2013 12:49 PM
والله أضحكتنا يا الفاتح جبرا ،،،،،،،،،، إنها خطة عجيبة ،،،،، وأقترح إعداد مرجع لأفكار هؤلاء مثل الدفاع بالنظر وغزوة الجنادب و.......و........


#847619 [زول كدا]
4.00/5 (1 صوت)

12-05-2013 12:45 PM
قال وبرضي ليك المولي الموالي وفيك لازم الصبر الجميل

دا كلام يا عوض دام

كسرة اخيرا

وداعا ابو علي ما رضينا ليك


#847606 [حليمه وجزمتا القديمه!!]
4.50/5 (2 صوت)

12-05-2013 12:38 PM
بالغت يا إنتا!! انت مافهمت إن الوزيره وفى حركه إستباقيه كلفت بأن تفسد على اﻻماراتيين إحتفالهم وإبتهاجهم بترشح بﻻدهم بإقامة مهرجان (إكسبو لعام 2020) ويا عالم لو كنا حنعيش ونحضر اليوم داك وفى ظل مثل هذه اﻻفكار البتودى التوج!! ويا أخوانا إنتو ما مﻻحظين أنو عمك جبره (صواميل زنقلتو إتلخلخت شويه) وبقى ما بركز!! وحقرتو بقي حاصرا فى نساوين المؤتمر الوطنى !! ومن هنا أنا بقول ليه والله تبارى النساوين ديل إﻻ كان بكره يسمعوا خبرك!! وانت فى رأيك النساوين ديل لو كانن نصاح تفتكر كانوا حيباروا الجماعه ديل ؟!!!!.


#847605 [عشنا وشفنا]
5.00/5 (2 صوت)

12-05-2013 12:35 PM
آخر دراسة امريكية ذكرت ان

العراقيين هم اعلى معدل ذكاء فى العرب

ونحن كالعادة كنا فى ذيل القائمة

زعلنا وحزنا وغضبنا لذلك التصنيف

وقللنا من شأن المعايير التى اعتمدت عيها الدراسة

ولكن مسئولين الهناء فى بلادى دايما يعطونهم الاثبات العملى

يا استاذ جبرا .


ردود على عشنا وشفنا
[الكلنكحي] 12-05-2013 03:51 PM
لو الجماعة العملو الدراسة دي اختارو عينة من الشعب السوداني الفضل اكيد ظلمونا اما لو كانت عينتهم من هؤلاء المسئولين فقد ظلموا التانين


#847600 [جلكساوي]
5.00/5 (2 صوت)

12-05-2013 12:30 PM
هههههههههههههههههههههههههههههههههههههههههههههههههههههههههههههههههه
دائماً مبدع أستاذ جبرة ووالله لعمري نحن الإغبياء الذين يسيروننا أمثال هؤلاء
حسبي الله ونعم الوكيل


#847596 [ابو ابراهيم]
5.00/5 (1 صوت)

12-05-2013 12:24 PM
أموت وأعرف الناس دي بتجيب الصنف ده من وين ؟ زي ما قال الطيب صالح رحمه الله ( من ين اتي هؤلاء )


ردود على ابو ابراهيم
[ياسر] 12-05-2013 11:26 PM
علي الطلاق ياجبرا نحنا عندنا وزراء ومسئولين أبو الجندب بيفهم اكترمنهم هسع ساميه دي خليها نحنا عندنا وزراء في ولاية الجزيرة علي الطلاق جزم ابو الجندب بتفهم اكتر منهم .
والمصيبة الوالي البروفيسور الزبير ( أبو جهل )


الفاتح جبرا
الفاتح جبرا

مساحة اعلانية
تقييم
9.44/10 (5 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة