في



المقالات
السياسة
ما بدري يا خُلفاء
ما بدري يا خُلفاء
12-15-2013 06:09 AM


كما تدينُ تدان
والقصة ماها مِزاح
والدنيا لافة تدور
ما بين غُدُو و رَوَاح
والبزرع الألغام
ما بحصد التفاح
وكان القلب مقفول
شِن فايدة المفتاح
وبعد القيامة تقوم
هل بنفع الإصلاح؟
وين كنتوا يا خُلفاء
وين كنتوا يا صُلاح
يوم قلتوا ديننا غلط
وإنتوا البراكم صاح
وجعجعتوا بالإسلام
ورَوَّعْتوا للأرواح
وكممتوا صوت الحق
وصادرتوا للأفراح
وبخستوا حق الناس
والدين مليتوا جراح
وظلمتوا للمسكين
ويا ما الظلم سفاح
هل شعبنا العملاق
فاكرينوا إنتوا مُرَاح؟
صامتين دهور ودهور
وهسع بقيتوا فُصَاح؟
جنيتوا بالطاغوت
ويا دوب بقيتوا نُصَاح؟
ما بدري يا خُلفاء
يا ما الكذب رَوَّاح
وين كنتوا يا نُجباء
وين كنتوا يا سُوَّاح
يوم جيتوا بالسلطان
وبقيتوا ليو مُدَّاح
وطففتوا كيل الناس
وكم وكم كسرتوا جناح
هل شعبنا الممكون
في صدرو لسه بَرَاح
يغفر سنين الذل
وزهرة شبابو الراح
ويتناسي كل ظلام
في دولة الاشباح
هل تبتوا من الفات
هلا اعتذرتوا صَرَاح
ما شعبنا المكلوم
دعواتوا أقوي سلاح
وباكر بجيهو مدد
من فالِق الإصبَاح
ومهما يطول الليل
لا بد يزورو صباح
وقبل القيامة تقوم
لا بد ينوم مرتاح
وما تنسوا يا خُلفاء
الحِكمة ماها صِياح
والغدر ديمة مشين
والمكر ما هو فلاح
وما بدري يا خُلفاء
ما بدري يا صُلاح


ragabdidi@yahoo.de

..






تعليقات 0 | إهداء 0 | زيارات 1117

خدمات المحتوى


ضياء الدين مدثر رجب
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة