12-18-2013 03:19 PM


سألنى كثير من القراء عن توقعاتي للعام الجديد .. هاكم بعضها وسوف تلاحظون أن بعضها كان توقعات لأعوام مضت لكنها لم تحدث

أن يتم إنشاء سفارة للجالية السودانية بالخرطوم
أن تختفي أرتال (الجنادب) وتحل بدلاً عنها (الخنافس) .. ما لازم تهاجمنا حاجة وكده
أن تتم زيادة المرتبات بنسبة تصل إلى .00002
أن تكثر أمراض نقص الفايتمينات لخلو أجساد المواطنين منها .. (يجيبوها من وين مع الغلاء ده)
أن يتم التزايد في أعداد الفنانين والمطربين لنصل مرحلة الإكتفاء الذاتي (فنان لكل مواطن فنان)
أن تزداد نسبة البطالة في البلاد بحيث يصل متوسطها إلى 3 (أبطال) لكل أسرة !
أن تختفي جميع الوجبات من المنازل ويأكل المواطن وهو ماشي (ح يكون شية؟ ما طعمية وفول حاجات)
أن يتم ارتفاع معدل صادراتنا من طائرات (صافات 2) وصافات 3 وذلك بعد إشتداد الطلب (عالمياً) عليها .
أن تقوم الدولة بتوفير 24 فرصة عمل للخريجين
أن تختفي من تقرير المراجع العام كل حالات التعدي على المال العام وذلك بسبب الخوف من العقاب (الأخروى طبع)
أن ينتقل عدد مقدر من المواطنين إلى الرفيق الأعلي جراء تصريحات بعض المسؤولين (فقعان مرارة وكده)
أن تنخفض أسعار السلع الغذائية .. (طبعن عشان مافي زول قادر يشتريها)
أن يتم إستيراد تقاوى فاسدة (جزئياً) للموسم الشتوي القادم (ما لازم يكون في فساد ولو جزئي)
أن تنتشر عيادات الأعشاب والتداوى بالقرآن (البيقدر على ملايين المستوصفات دي منو؟)
أن يأتي الخريف فجأتن زي كل مرة (يعني الجديد شنوووو؟)
أن يتم القضاء على أزمة المواصلات بالعاصمة بعد أن تقعد الناس تماما في بيوتا (المارقا ليها شنوووو)
أن تتزايد نسبة أعداد جرائم القتل (الناس بقت روحا محرقاها)
أن تتحول الحيوانات الأليفة (كلاب وكدايس) حيوانات نباتية … (نحنا لاقين لحوم؟)
أن يتم تسليم المتضررين من سيول وفيضانات الخريف القادم الإغاثة كاملة (الخيم أم جنريترات دي يعمينا ما شفناها)
أن توقف بقية شركات الطيران رحلاتها للخرطوم وتلحق باللوتهانزا ويصبح المطار فاااضي (فرصة لبيعو)
أن يتم تولي (شاب) لقيادة حزب سوداني … (طبعن بعد ما رئيسو مات وكده)
أن يبدأ العمل بالمدينة الرياضية وكل زول يبني القطعة بتاعتو (بس يخلو لينا ميدان سلة واااااحد)
أن يحدث تحسن في مياه الشرب حيث يتم القضاء على البكتريا و(تفضل الطحالب) بس !
أن تتفاقم حمى الأغنيات (الحربية) وتحطم أغنية (قطعنى بي سكينك وبيعني للجزار) الأرقام القياسية في المبيعات .
أن يحرز فريقنا القومي كأس الأخلاق الحميده في بطولة أفريقيا
أن يصبح (التمباك) أحد أعمدة الإقتصاد السوداني ( 13 مليون مستخدم حسب آخر إحصائية .. أها شوفو كم سفة في اليوم وضربوها)
أن يحصل الممثل السوداني (حسن داندرمة) على لقب أفضل ممثل عن عن أداء دوره كـ(ميت) في الفلم السوداني (غلطان المرحوم)
أن ندخل موسوعة جنيس للأرقام القياسية بإنتاجنا لأصغر عيشة في العالم (لا ترى بالعين المجردة)
أن تنتشر المخدرات بين طلاب المدارس بحيث يتم تطبيق شعار : (دفتر) لكل تلميذ !
أن يكثر (الطيارون) – الناس البتجي ساكت- في بيوت الأفراح حتى يلجأ اصحاب الفرح لدخول المعازيم إلى الصالة عن طريق الدخول بـ(البصمة)!
أن يتم شراء لعيبة محترفين بما يعادل عدد 5000 ماكينة غسيل كلي
أن تنحسر ظاهرة نسيان الأطباء للشاش داخل بطون المرضى بفعل تنامي ظاهرة نسيان الموبايلات !
أن نحرز المركز الأول في الشفافية بعد أن يتم إرتفاع البث في قضايا الفساد إلى خمسة حالات من أصل ألف وخمسمية !
أن يرتاح معظم المعاشيين بفضل رحمة الله وتبديله لهم بدار أحسن من دارهم ومعاش (أحسن من معاش الحكومة)
أن يتزايد إهتمام السودانيين بالزمن والإلتزام بالمواعيد وتنحسر أطول مدة للتأخير إلى ساعة ونصف
أن تتناقص حالات جرائم الإغتصاب نسبة لتفهم الحكومة بأن (العطالة) وراء هذه الظاهرة (مش قامت بتوظيف الـ 24 الفوق ديلك)
أن يتم إنشاء مفوضية (عليا) للفساد وذلك لمراقبة أداء المفوضية (العامة) للفساد والتى بدورها سوف تقوم بمراقبة المفوضية الخاصة بالفساد .
أن تزداد نسبة المتسولين بحيث يكون هنالك (شحاد) مقابل كل مواطن (شحاد)
أن تنخفض أسعار اللحوم بشكل ملحوظ بسبب منافسة بعض اللحوم (الأخري) لها ….. ح تكون عجااااالي يعني

كسرة :

من توقعات العبدلله لعام 2014 أن ننال جائزة السعفة الذهبية في مهرجان (كان) عن فيلم أبي فوق الشجرة .. ( شانق نفسو طبعن)
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟





تعليقات 20 | إهداء 0 | زيارات 8178

خدمات المحتوى


التعليقات
#862004 [كمال]
0.00/5 (0 صوت)

12-20-2013 06:58 AM
ارجوا اضافة كسرة جديدة

اخبار ملف المسكيت فى كسلا العند النيابة شنو..........؟؟؟؟


#861660 [نائل]
0.00/5 (0 صوت)

12-19-2013 04:39 PM
يتم محاكمة الأجانب كأنهم مواطنون في القضايا الجنائية التي يرتكبونها بالسجن والغرامة والجلد........ لم أقرأ في صفحات الجريمة عن عقوبة الإبعاد وهي في كثير من الدول تطبق على الأجانب الذين يرتكبون جرائم الأذى الجسيم ولديهم إقامة نظامية فما بالك بالمتسلل بدون إقامة نظامية فهذه عندهم الجريمة الكبرى أولا ثم بعد ذلك له الويل على ما أقترف في هذه الدولة المضيفة ........أقترح إقامة قنصلية وليس سفارة في الخرطوم للسودانيين المقيمين بها .


#861560 [مراد حماد]
0.00/5 (0 صوت)

12-19-2013 02:42 PM
الأخ الفاتح الكسرة عملت سنتين و شهر .
لسه بدري . هو الكبري عايز تلات سنوات للصيانة يبقى خط هيثرو عايز تلاتين سنة . قول خمسة و عشرين سنة تاني؟؟؟؟؟؟؟


#861505 [رمضان كريم]
0.00/5 (0 صوت)

12-19-2013 01:37 PM
غنت السيدة ام كلثوم من قول احد الشعراء كلام جميلا
قالت
العيب فيهم يا في حبايبهم ام الحب فياروحي عليه
انا اقول ام السودان فياروحي اليه


#861429 [كفاية]
0.00/5 (0 صوت)

12-19-2013 12:05 PM
+ اتوقع فوز المريخ علي بايرن ميونخ في الدوحة
+ اتوقع تدريس اللغة الامهرية والتقراي في المدارس ليتمكن المواطن من التفاهم مع الاغلبية العظمى من سكان المدن


#861335 [الزول الكان سمح]
0.00/5 (0 صوت)

12-19-2013 10:39 AM
أن يتم ترشيح الولاة عبر صناديق الإقتراع من أبناءالولايات( دوائر إنتخابية وكدا) مابالتعيين بالقرابة ونهج التمكين (مش تجيب مثلا لى كسلا والى من غواتيمالا).


#861152 [fattah]
0.00/5 (0 صوت)

12-19-2013 08:19 AM
بعد انشاء السفاره السودانيه بالخرطوم وتنصيب الاخ الفاتح جبره سفيرا نرجو نحن مواطنى السجانه والديم والحله الجديده وماحولهما بفتح عدد من القنصليات بكل من سوق الديم وشيطه والكلاكله وذلك لتسهبل اجراءات الجماعه ان فكرو يوما بالرحيل


ردود على fattah
European Union [الباحث عن الحق] 12-19-2013 11:09 AM
مين البيرحل أخ فتاح .
دا لو سمعك اللمبي يقول انت منتظر مننا الرحيل .. يبقى قابلني ....


#861014 [خالد الجاك]
5.00/5 (2 صوت)

12-19-2013 02:38 AM
أن يتم شراء لعيبة محترفين بما يعادل عدد 5000 ماكينة غسيل كلي>

دي وجعتني شديد لانها بدل علي اننا حكومه وراسماليه سودانيه تافهين
وين رجال الاعمال وين اغنياء البلد من كيزان وغيرهم لو كل مليونير اتبرع باله واحده فقط


#860900 [صرخة شعب]
4.50/5 (2 صوت)

12-18-2013 08:45 PM
والله يا جبرا انت قديم جدا انت من زمن المخدر عاوز دفتر برنسيس حس الطلبه بكبوه فى الشيشه والنوع الثانى بشمهو


#860895 [quickly]
0.00/5 (0 صوت)

12-18-2013 08:38 PM
دي توقعات العام الجديد ياجبرة ؟؟ طممت بطنا
هههههه,,,الله يجازي محنك
بس اللحوم الأخرى دي ماعرفناها اوع تكون تقصد لحوم حمير وكدايس وفطايس


ردود على quickly
European Union [خالد الجاك] 12-19-2013 02:25 AM
اللحوم المنافسه القاصدها جبرا ياعمناكوكلي هي اللحوم الحيه بالعربي الدعاره حاتكتر مع الفقر


#860866 [بعشوم]
0.00/5 (0 صوت)

12-18-2013 07:56 PM
أن تعرض صورة وداد بابكر بشكل يومي وفي كل القنوات وهي مرتدية فستان وطرحة لتذكير الناس بأيام اللحمة والعيشة الفخمة ...


#860820 [الباحث عن الحق]
5.00/5 (2 صوت)

12-18-2013 06:34 PM
وبمناسبة منافسة اللحوم الأخرى أحب أضيف :
* أن يتم إعادة تصدير هوت دوغ محسن إلى بعض بلدان الجوار بدلا من النفط وذلك استكمالاً للمشروع الحضاري. لك التحية أستاذ جبرا لقد اتحفتنا.


#860804 [abu khaled]
5.00/5 (2 صوت)

12-18-2013 06:14 PM
وان يرتفع اسطول سودانير ليصبح طائرتين وسرقة خط جوبا يا عمك حضر كسرتك


ردود على abu khaled
United States [تمساح الدميرة] 12-19-2013 08:24 AM
والله حلوة دى يا أبو خالد ( يا عمك حضر كسرتك) دى ما دايرة كسرة وبس دى دايرة الكسرة تنقلب عديل,


#860775 [مجنون ليلى]
5.00/5 (3 صوت)

12-18-2013 05:38 PM
أن تزداد نسبة البطالة في البلاد بحيث يصل متوسطها إلى 3 (أبطال) لكل أسرة !

يا استاذ بيتنا براهو متخب البرازيل ، تقول شنو .......


#860771 [الطيب عثمان]
5.00/5 (1 صوت)

12-18-2013 05:30 PM
توقعاتك كوووووولها يا استاذ جبره دى قلتها فى مقالتك القديمه ولم يتم النظر لاى موضوع حتى خط هيثرو الذى يتزيل كل اعمدتك الموضوعيه لكن يا جبره السودان حق المؤتمر اللاوطنى بس ، مش لو كوركت وبلبعت مافى حد بجيب ليك خبر ياخى ديل عديمى ضمير وبقولوا ليك يا جبره نحن متعناكم فى السنين اللفات ما عاوزين تصبروا علينا فى السنين العجاف دى والله مهدى القال الكلام ده رقبتوا السيف ما يدليها غير كروش عجائز المؤتمر الوثنى يا جبره نرجو ان تركز فى مواضيعك القادمه على الدعاء والدعوة عليهم ليغروا فى ستين داهيه والله تعم المجيب آمين وووواخبار خط الترماى شنو اقصد خط حديد ترماى الجزيره البنقل القطن اخباروا شنو ؟؟؟؟؟؟؟؟؟ والمحالج والسرايات والبحوث الزراعيه ومكاتب المشروع وووووووووووووووووووووووووووووووووووو والله لو عديت ليك لاعد الف واو حتى اصل واو النقصلت مع جنون السودان .


#860741 [زول مية مية]
0.00/5 (0 صوت)

12-18-2013 04:52 PM
انا معاك انو التوقعات دى حاصلة اكيد.


#860732 [المحسي المهاجر]
5.00/5 (2 صوت)

12-18-2013 04:29 PM
حقيقة هذا المتوقع ان يحدث في وطن رئيسه يرقص ليل نهار ...


#860722 [حيرتونا]
0.00/5 (0 صوت)

12-18-2013 04:16 PM
شانق نفسو ولا شانق سفه


#860721 [جحا]
5.00/5 (1 صوت)

12-18-2013 04:15 PM
ان يتم صرف مبلغ 50 الف بدل مواطنةلاى موظف
ان يتم صرف مبلغ 500 الف لكل طفل مولود حديثاحتى عمر 18 عاما
صرف مبلغ 50 مبلغ لكل صاحب شجرة مزروعة
صرف مبلغ 50 مليون لكل زول مقدم على الزواج
مع امنياتنا لكم بمحاربة العنوسة وتفريخ اكبر عدد من العيال


#860697 [دا كلام ما صاااااح]
5.00/5 (2 صوت)

12-18-2013 03:47 PM
يعنى ما متوقع اى حاجة عن خط هيثرو ؟؟
طيب الكسرة لزومها شنو ؟؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة