12-29-2013 02:55 PM


عند كشك الجرائد قابلني جاري (عبدالحميد) وبعد التحية إنتحي بي جانباً والدهشة تعلو قسمات وجهه وسالني :
- قريت كلام الوزير؟
- ياتو وزير ما كووولهم غير الكلام ما عندهم حاجة
- وزير الصحة
- قال شنو؟
- وزير الصحة د. حميدة يا أستاذ قال إنهم قاموا برصد ولقو إنو في 3 أطفال مجهولي الأبوين بيتم ألقائهم في الشوارع يومياً
- ده في الخرطوم بس !
- أيوه والله .. يعني لو في كل ولاية 3 يكون عندنا أكتر من خمسين طفل يومياً .. يعني 18 ألف طفل سنوياً .. ودي ما المشكلة يا أستاذ
- المشكلة شنو؟
- المشكلة إنو ديل البيلقوهم .. غير القاعدين يدفنوهم ويرموهم في السيفونات و…
- معني كده العدد أكبر من كده ! .. تفتكر يا حاج السبب يكون شنو؟
- شوف يا استاذ الكارثه دي كووولها عملتا ثورة التعليم القالوها دي
- كيف ؟
- أقول ليك .. هسه البت تجي من (القرية) الكانت فيها للعاصمة تصرف على نفسها من وين؟ أبوها يكون دخلو الشهري ألف جنيه .. لو أكلت ليها وجبتين بس فول بي عشرة جنيه في الشهر عاوزه ليها 300 جنيه .. أها وين طباعة المذكرات ووين الحاجة البارده ووين (الكريمات) ووين العبايات ووين المواصلات ووين الصابون ووين معجون الأسنان و
- ويا ريت تكون بتقرأ ليها (علوم ذرة) وللا (فيزيا حيوية) تلاقيها بتقرأ في دبلوم حاسوب !
- والله يا حاج السودان بقى كووولو دبلوم حاسوب التقول عندنا (مايكروسوفت)
- أها يا أستاذ زي البنية دي مش مشروع أنحراف ؟
- صاح يا حاج .. عرس ذااتو مافي
- عرس شنو يا استاذ .. الأولاد ديل يعرسوا بي شنو ؟ وقول عرسو يعيشوا بى شنو؟
- وتفتكر الحل شنو يا حاج عبدالحميد !
- حل ؟ والله يا استاذ الحالة الوصلنا ليها دي إلا بس (العناية الإلهية) لكن زول (بني أدم) كده يقدر يصلح الحصل ده مافي .. جنس (اللبع) و(الهبر) الحصل ده (لبع نصاح)؟!
- ليه التشاؤم ده يا حاج
- لا تشاؤم وللا حاجة .. عشان المسألة تتصلح والشباب ده كان يتزوج ويبعد عن الحرام كان مفروض الدوله تعمل مشاريع تنموية عشان تكون في فرص عمل والشباب ديل يشتغلو ويكون عندهم مصدر دخل ويكونو عندهم المقدرة على الزواج !
- والحصل شنو؟
- الحصل إنو المسؤولين عملوا المشاريع (لى روحهم) وبقوا هم يتزوجو مثنى وثلاث ورباع ، ده غير (فك التسجيلات) !
- مش ممكن يا حاج الأمور تنعدل شوية .. والحالة الأنحنا فيها دي تتغير .. ويجي رخاء والأولاد ديل يلاقو وظائف .. ويكون عندهم دخل محترم .. والغلاء ده يقيف ويقدرو يعرسو؟
- والله يا أستاذ دي عاوزه ليها معجزه ولحدت الكلام البتقول فيهو ده يا استاذ يحصل نحنا عاوزين لينا (دار مايقوما) قدر (المدينة الرياضية) قبل ما يشلحوها وكده !

كسرة :
بالمناسبة (الغير سعيدة دي) أخبار المدينة الرياضية شنووووووو؟ هي متل العمايل دي ما الياها خلت ده يحصل .. وللا شنوووووو؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟





تعليقات 31 | إهداء 0 | زيارات 7659

خدمات المحتوى


التعليقات
#871793 [بت ام الحسن]
0.00/5 (0 صوت)

12-30-2013 01:09 PM
ههههههههادبلوم حاسوب ومايكروسفت والله يااونكل دى قلبت فيها الهوبة


#871684 [عشنا وشفنا]
0.00/5 (0 صوت)

12-30-2013 11:18 AM
المشكلة الآن فى مستقبل هؤلاء الاطفال ؟

ماذا سيكون مصيرهم ؟؟ كيف سيدرسون واين سيتجهون ؟؟

فكروا فى هذا اولا .....

الجفلن خلهن اقرع الواقفات .............


#871592 [Imad]
5.00/5 (1 صوت)

12-30-2013 10:13 AM
السلام عليكم
المسئوليه اولا واخيرا تقع على عاتق اولياء الامور
اولا الثقه الزائده عن الحد, الواحد يقول لك انا بنتى واثق منها, هو الشيطان اصلا بيبحث عن امثال هؤلاء ليغويهن عشان كدا الواحد ما يعتمد على الثقه
ثانيا إذا كان الاب غير قادر على توفير المال الازم لابنته للدراسه فلا داعى لذلك اتركها تتعلم اى عمل يدوى الى ان تجد ابن الحلال ودا افضل لها مليون مره من القرايه
ثالثا ياريت الآباء يهتموا بتزويج ابناءهم كما اهتموا بتربيتهم بأن يوفروا لهم حجره فى البيت ويعينونهم فى تكاليف الزواج ويجعلوها مبسطه بقدر الامكان والاسره لمن تسكن مع بعض بيكون هنالك توفير كثير من ناحية مستلزمات البيت واثاثاته
رابعا نتمنى من المسئولين ان يهتموا بالطالبات اكثر وان يوفروا لهم الوجبات الثلاثه والسكن والترحيل بالمجان


ردود على Imad
United States [ود فارس] 12-30-2013 02:12 PM
ياريت الآباء يهتموا بتزويج ابناءهم كما اهتموا بتربيتهم بأن يوفروا لهم حجره فى البيت
عليك الله انت ماخيالي هو كان عنده حق الغرفة البتقولة ده مشكلته ماكان اتحلت


#871470 [ام الحسن]
0.00/5 (0 صوت)

12-30-2013 09:11 AM
بتاعة دبلوم الحاسوب دى ماتملى جيوبها فول حاجات وتسوى ليها كفتيرة بالهيتر فى الداخلية وتقرقش السودانى فى الخمسينة الا تاكل ليها سندوتشين فول مش واحد كمان فى اليوم

والله سمعت ببنات محترمات برغم فقر اهلهم تلقاهن عايشات الشهر كلو بالشاى الاحمر مش بالبن كمان والتسالى وقراصة النبق وشوية بلحات وتلقاها فى الجامعة حايمة بكباية المك وتشرب يها من الكولر ويادنيا مافيك الا انا

كوزة من البرلمان


#871394 [هبوب]
5.00/5 (2 صوت)

12-30-2013 08:23 AM
تموت الحرة ولا تأكل من ثديها .. !!!


#871152 [jahman]
0.00/5 (0 صوت)

12-30-2013 12:32 AM
الاخ جبرة بعد التحية : بس في دي انت عايز اجازة يمكن تكون مرهق


ردود على jahman
European Union [ذولة نصيحة] 12-31-2013 05:18 AM
ياخوى ده قلب الهوبة فى دبلوم الحاسوب والسوفتوير والهارد وير والميكروسوفت

مرهق انت ياخوى وتركيزك مضهلل امشى نوم وتعال اقرا الكلام ده تانى ح تكتشف انك كنت floating


#871096 [ساب البلد]
3.00/5 (5 صوت)

12-29-2013 10:52 PM
******* يا جماعة ظهر الفساد في البر و البحر ******** القري ****** الاقاليم ******* العاصمة ****** الاحياء الراقية ******* الاحياء الشعبية ****** الاحياء العشوائية ******** بنات الاساس **** بنات الثانوي ****** بنات الجامعة ******* الموظفات ******* المتزوجات ******* المطلقات ******* الارامل ****** ( الا من رحم ربي )******** الشي الحاصل ما عندو اسباب معينة ***** منهن منجبرتهن الظروف المادية ******** اخريات بدافع الحب ******* و منهن بدافع المتعة ... الخ ***

***** جارك غبدالحميد كغيره من سكان العاصمة غير موفق ******* دي مشكلة ناس الخرتوم بيحاولوا ينسبوا الاجرام و العادات الكعبة لناس الاقاليم **** كأن الخرتوم هي المدينة الفاضلة *****


#871087 [القروى]
3.00/5 (2 صوت)

12-29-2013 10:42 PM
كلام صحيح و اللى ما مصدق يذهب الى جوار اى داخلية لمدة يومين و يراقب سوف يرى العجب . كل بنات الداخليات من الولايات و القرى .


#871058 [الاصم]
3.00/5 (2 صوت)

12-29-2013 10:12 PM
ردود على كل الزين جرحهم الفاتح جبرة الشهوة هى الشهوة فى اى انثى والبنت السودانية اصيلة مهما خدعت وكل ابن ادم خطاء وخير الخطاؤن التوابين ولكن بعض البنات قد يمارسن بحرفنة حبوب منع وكدة..............الفرق فقط فى الثقافة الجنسية التى تجعل هزه تحمل وهزة لاتحمل والمصيبة كبيرة لان الحل فى الزواج والزواج مكلف جدا العادات التقليدية والاعراف علت على المنهج الحنيف الزى يجعل الزواج ايسر شىء ومع زلك المتهم برىء حتى تثبت ادانته


#871052 [Khalid]
3.00/5 (3 صوت)

12-29-2013 10:04 PM
الفاتج جبرا - حسين خوجلي وفاطمة الصادق وكل من هب ودب زي بعض ساقطي الاقالام اين حميد له الرحمة اين القدال اطال الله في عمره لم يسبوا او يشتمو احد


ردود على Khalid
United States [بوشي] 12-30-2013 07:59 PM
شكلو السوط هبشك
جبرا انسان نضيف وأنت مستنفع من الشغل دة لكن أعرف انو الزنا دين

[ابونصر] 12-30-2013 01:33 PM
كلام الاستاذ هو الواقع المر لماذا ندفن روؤسنا في الرمال والحقيقة دائما مره


#870982 [الحقاني]
3.00/5 (3 صوت)

12-29-2013 08:38 PM
يا الشبكتونا بنات قرى وبنات مدينة هناك الاف الحبشيات سكانات في معظم احياء العاصمة واطرافها الاطفال ديل قطع شك سودانين لكن معظمهم من حهة الاب


#870929 [شمال و جنوب فى محنة]
3.00/5 (3 صوت)

12-29-2013 07:47 PM
لقد فجرت يا جبرة و رميتنا بوصمة ليست فينا نحن و نعرف البطلعن و البلعبن في المكاتب موظفات من جزع الحكومة و كادر اما بناتنا الما بنقدر نوفر ليها المصروف بنقعدها في البيت و ما فينا مسطول و لا سكران بدور على الحريم في زقاقات المدن النتنة خانك التعبير اذ افترضت ان اهل المدن قادرين و فيهم من لا يجد حتى حق المواصلات و الفقر ما عيب ان كان من عند الله و لكنه زل حينما يكون بقصد


ردود على شمال و جنوب فى محنة
United States [شمال و جنوب فى محنة] 12-30-2013 03:59 PM
اخى سمحان عليك الله قول كلامك ده لعم جبرة ما اظنو قايل بنتاتو زي بناتنا

United States [سجمان] 12-29-2013 11:29 PM
يا اخي ما تبقي ذي النعامة تدفن راسك الاستاذ كلامه صح لان بنت الخرطوم عند نهاية اليوم الدراسي ترجع الي بيتها والرقابه الاسريه دائما عليها اما من تسافر وتسكن في داخليات السجم تكون بعيدة من الرقابه الاسريه حتي بنت الخرطوم لو كانت الجامعه في احدي القري ربما تقع في نفس المستنقع البنت هي بنت لو في الخرطوم او الاقليم


#870926 [محتار]
5.00/5 (1 صوت)

12-29-2013 07:43 PM
عليك الله يا استاذ جبرا بعد القنابل البرميها عثمان ميرغنى كل صباح خط هيثرو دا ما بقى نقطه فى محيط الفساد؟؟


#870916 [القرفان]
5.00/5 (1 صوت)

12-29-2013 07:31 PM
هههههه ما تشتتو الكورة يا كيزان جاوبو على سؤال حاج عبدالحميد جار الأستاذ كلامه واضح


#870903 [وضح... أبن.. أفصح]
5.00/5 (4 صوت)

12-29-2013 07:22 PM
هوي يا القاعدين تهاجموا في جزئية وتتركوا الفيل... كلامك في جانب منو كلام صحيح... لكن جد كلام أخونا الفاتح جبرا في محلو (بننسب الكلام ليهو بحكم المقال... ما عارفين غايتو عضم الكلام حقو وألا بالجد حق عبد الحميد).
بنات المدينة ما بنقول إنهن ملائكة... لكن البنقولو إنهن بنات مفتحات "ومع ده برضو بيدقس جزء منهن"... لكن في الغالب الأعم بنات القرى الجن المدينة بيكون التركيز عليهن من جانب الذئاب البشرية... لأنهن على السجية والعفوية... وساهل خداعهن... والكلام القالو الفاتح جبرا هو السبب الرئيس للسقوط... وطبعاً الأساس لو البنت ما عايزة تغلط ما بتغلط... مهما دعتها الدوافع والمغريات... لكن في ظل ضوائق مالية بتعاني منها أسر بتطمح في تعليم اولادها ومفتكرا الزمن لسع بي خيرو "على حسب فهمه للتعليم زمن كان بي خيرو"... أها بترسل بناتها لي جيهة الوضع اختلف فيها عن زمان من كل النواحي... مسلحاهم بي حبة مليلينات مفتكرا ح تكفي الضروريات والباقي البنت تربط الحزام فيهو... فالبنت تجي الخرطوم تلقى مليليناتها دي ما بتجيب ليها ترمس خليك من إنها تقضي ليها ضرورياتها... وهنا بيدخل دور (بنات الحرام... واولاد الحرام برضو)... وخاصة لو البنت فيها شوية (فنيات).
فما بعرف... في وضع زي ده... بشوف لو أبو البنت مقتدر... من الأفضل بنتو ما تقرأ بعيد من البيت... يعني تطلع من البيت في الصباح للجامعة... نهاية المحاضرات تتوجه للبيت... ومع ده ربنا يغطي عليها... وكمان على حسب اعتقادي إنو الأسر الما بتقدر إنها تكفي بنتها مغريات (وضروريات) ممكن عدمها يمثل عليها تهديد أحسن ما ترسل بناتها للقراية في جامعات اليومين ديل... كفاية الأولاد يواصلو... أما قراية فوق فلس... لا.


#870878 [الدوغري]
5.00/5 (1 صوت)

12-29-2013 07:00 PM
والله يا أستاذنا كلامك صاح .. يعني البت جايبا ليها كم وخمسين تسافر وتتغرب من أهلها وتقرأ ليها شيتن لا ينفع لا يشفع ولا بيوفر ليها وظيفة .. خسارة زمن وخسارة قروش وإحتمال خسارة شرف .. مليون داخلية بنات في العاصمة الله يعلم البحصل فيها شنو ..الله لا كسبكم يا كيزان .


#870872 [ود الحاجة]
5.00/5 (2 صوت)

12-29-2013 06:55 PM
الفساد والله حاصل يا أستاذ وأهو قالو 3 أطفال كل يوم .. نحن لا ننكر أن هنالك بنات أقاليم يحافظن على شرفهن كما لا ننكر أن هنالك من بنات العاصمة نا يضيعن شرفهن ولعلك يا أستاذنا الفاضل تساءلت تساؤلاً مشروعاً عن ماذا تفعل معظم بنات الأقاليم عندما يأتين إلى العاصمة ويرون بريق العاصميات والأزياء والأكل الفاخر والمساحيق والكريمات إلخ .. نعم يا أستاذ إنها دعوة للفساد ومشروع للتحلل من القيم وهذه من إفرازات ثورة التعليم الواطي .. تزدحم العاصمة بمئات الآلاف من الطالبات ومئات الداخليات .. لقد تم القبض قبل سنوات على مسؤولة عن داخليه عاملة ليها ولا مؤاخذه (حفرة دخان) داخل الداخلية وتسلم الزبون قائلة (حار من نارو) .. المسألة أستاذنا الفاضل لا يمكن التصدي لها بدفن الرؤوس في الرمال يجب مواجهتها بقوة وصراحة وحكاية التغطية والتعمية دي ما بتنفع .. وشكراً لمقالك الذي وضع الملح على الجرح وأكيد أنك أستاذنا الفضل ما كان قصدك الإنتقاص من بنات الأقاليم ولكن يبقى التساؤل مشروعاً .. حفظك الله أستاذنا


#870865 [دا كلام ما صاااااح]
5.00/5 (4 صوت)

12-29-2013 06:51 PM
واحد عنده بص كحيااان ومهلهل . شغال باسبيرات كلها مستعملة .. وعمره ما شاف ليهو عمرة
صاحبنا كاتب فى القزاز الخلفى "دايرة صبر" ..
يوم وهو طالع من أحدى قرى الجزيرة للخرطوم
اتعطل البص اكتر من مرة فى الطريق ..كل مرة ضارب لستك .. ماكلها سكند هاند ومنتهية
فى واحد زهج ومع الغبار الفى القزاز الخلفى كتب ليهو "دايرة لساتك" ..

اسع يا الفاتح يا اخوى .. بدل "عاوزة ليها معجزة" بتاعتك دى .. نحن نقلب ليك العنوان
عشان يبقى "عاوزة ليها ثورة" .. عشان الحال يتعدل كلو مرة واحدة


#870853 [الطاهر]
0.00/5 (0 صوت)

12-29-2013 06:31 PM
سلام للجميع

يا استاذ الفاتح والله المرة دي الكورة صرجّت منك انت وجارك عبد الحميد كمان، اسع يجوك أهلنا من القرى والأقاليم يوروك المكشن بي بصل وبلا بصل، ياخي حرام عليك بنات القرى لاينقصهن الأخلاق والعفاف والتربية،ولو في شواذ فالشاذ لا حكم له.

قراؤك المحبين لايرضون لك ذلك، فطوالي تجي جاري بأسرع ما يمكن وتعتذر اعتذار حار جداً صيفاً وشتاءً وبدون دغمسة وخلاص،وأي محاولة لللف والدوران وتحسين الشين حيكون أقبح من الذنب. (نصيحة من قارئ محب)


#870844 [Adam Ibrahim]
0.00/5 (0 صوت)

12-29-2013 06:20 PM
رأيكم شنو فى ناس اثرياء ومقتدرين ومع ذلك عاملينها متعة.. لو كان بسبب الحوجة تقع المسؤولية على عاتق الرجال البيدفعوا نقود مقابل الجنس.. والمسؤولية الكبرى تتحملها الدولة عشان ما وفرت حياة كريمة للشعب..


#870810 [حامد عابدين]
3.00/5 (2 صوت)

12-29-2013 05:24 PM
اصابتك عدوى التنميط يا استاذ جبرا ولقد زل قلمك وقدمك هذه المرة ، فبنات الاقاليم ليس السبب في ما يحدث وتجاهل اساس المشكلة وكأني بك تبرئ بنات العاصمة وترمي باللوم في كل ما يحدث على بنات الاقاليم، ليس صحيحا ما جاء في مقالك اليوم ونرجو ان تعتذر حتى لا تفقد قراءاك
المشكلة الاساسية هي في هذا النظام الذي افقر كل السودانيين في اي مكان حتى في العاصمة بل الاثرياء في العاصمة هم من الفاسدين واللصوص
الفقر اصبح في كل مكان بسبب الفساد والسرقات وتدمير المشاريع وانهيار الاقتصاد


#870793 [ديك العدة]
5.00/5 (1 صوت)

12-29-2013 05:05 PM
لك التحية دوما أستاذ الفاتح

بالرغم من أن القضية تكاد تعلو فوق كل القضايا...ولكن لأول مرة أري انك استعملت ذات الفرشة
التي تستعملها فاطمة الصادق لصبغ هذا المجتمع (من طرف)
طريقتك في سرد القضايا دائما تجعل الواحد ينحني إحتراما لك ولقلمك
ولكن في هذا السيناريو...جعلت اللائمة كلها علي بنت القرية
فقط لأنها لا تأتي بما يكفي معيشتها وهذا يجعلها مشروع إنحراف جاهز
وليس هذا فقط ..ولكنها ترمي بثلاثه أطفال يوميا كحد أدني
ونزهت بت المدينة ... التي تملك أكثر من الذي يكفيها للدراسة وشراء الصابون

حتي وإن سلمنا إلي ان بنت القرية التي ينقطع مصروفها في العشرة الأوائل
من الشهر..تنحرف... فهذا لا يعني أن كل امهات المايقوما من القرية

فليس كل طالبه من القرية مشروع إنحراف كما أن ليس كل طالبه من المدينه معصومة من الخطيئة

ولك كل الود والإحترام


ردود على ديك العدة
United States [وضح... أبن.. أفصح] 12-29-2013 08:22 PM
والله يا رابعة (ده في حالة إنك بنت) كلامك كلام رجال... ما عايز أكون متطرف وأقول قراية بنات من ألفها لي (ياءها) ما حبابها... مع إني مؤمن بي إنو المرة المتعلمة بتربي أولادها تربية صحيحة... لكن كمان البنشوفو في بنات وأولاد اليومين ديل بنقول يا الله السلامة... جهجهة شديدة.

European Union [رابعة العدوية] 12-29-2013 07:10 PM
يا أستاذنا الفاضل لقد وضعت يدك على الجرح .. والله الواقع مرير للغاية وما خفي اعظم وربنا يكون في العون ويا ناس الأقاليم أهو الأستاذ بيحذركم العندو بت جابت ليها محموع ميت وقالت قبلوها دبلوم حاسوب ولا ترجمة ولا خياطة في العاصمة اليخليها قاعده في بيتها لمن يجيها ودالحلال .. دبلوم شنو هسع العندهم ماجستير ما لاقين شغل بلا كلام فارغ


#870782 [ابراهيم1£2]
2.50/5 (4 صوت)

12-29-2013 04:45 PM
هذا كلام مؤلم جدا ،، اتهام بنات القري بألفجور والزنا .. هذا اخطر ما قاله جبرة .. لا يضاهيه الا كلام فاطمة شاش .. هل كل ناس القري فقراء .. ياخ جبرة ؟ الخرطوم تعيش من عرق أهل القري هؤلاء . انتاج السودان كله من القري .. حتى هذا البترول يستخرج من القري .. ما دهى السودانين فى إطلاق الكلام جزافا .. الم تكفينا سبا فاطمة شاش ؟؟ من الصحفيين ؟
نحن نحب الفاتح جبرة كثيرا .. ولكن هذه هفوة لسان لا تغتفر .. نرجو من الأخ الفاتح الاعتذار لكل أهل القري وبناتهم الشريفات .. وإلا ......


ردود على ابراهيم1£2
European Union [المهجوم] 12-29-2013 07:15 PM
ياااخ برد نفسك .. الأستاذ ما قال بنات العاصمة كووولهن غفيفات .. وكمان ما قال بنات الأقليم كولهن كعبات والمثل الجابو في مقاله ده فعلا عاوز ليه إجابة ..الأستاذ ده مشكلتو بجيب من الآخر


#870750 [الصوت]
5.00/5 (2 صوت)

12-29-2013 03:59 PM
الذي لا تعلموه انت يا جبرا .. وجارك .. ان الذي تجأرون بالشكوى منه ، هو هدف اساسي من اهداف المشروع الحضاري .... والا من اين يأتون بدماء ترفد في مليشيات الامن و جيوش الطبالين والمزمرين
والهتيفه من جماعة هي لله هي لله لا للسلطة ولا للجاه ؟؟؟؟؟؟
انهم يتقصدون الكادحات - الائي يفترشن (( البنابر )) كل النهار وجزء من الليل ينشدن
حياة كريمة يتربى عليها ابناؤهم الطلاب في المراحل المختلفة - فيجرّوهن من الشارع الى (( المشروع ))
جراً يضمن لهم بقاء (( الفقاسات )) منتجة (( لكتاكيت ))مليشيات الانقاذ الواطي....
وكذلك الامر(( منسوخ )) و (( ملصوق )) على طالبات جامعات (( الاندروس )) وغيرهن من ذوات الثدي
(( لتأكلنّ بهن طوعاً او كرهاً )) ... الا من رحم ربك ....
وان الذين يجدونهم في براميل الزبالة ما هم الا فاقد انتاج يتحسرون عليه طويلاً ولا يقفون عنده...


#870747 [ممكون وصابر]
5.00/5 (3 صوت)

12-29-2013 03:58 PM
بنات الاقاليم كلهم بنات بناس ومربيات بيجو الخرطوم عشان يتعلمن بلقن بنات ماكويسات معاهن في الداخليات والجامعات بيغرنهن ويجرهن الى الفساد عشان المسكينات يقدرن ياكلهن ويعسيشن ويلبسن زيهن لانه مصاريفهن زي ماقلت بسون ليهن شي يقعن في طريق الانحراف من زنا ومخدرات وما شابه ذلك الا من رحم ولاحول ولا قوة الا بالله صحيح ثورة التعليم علمت الناس وفتحت فرص للطلاب كبيرة ولكن صندوق طلاب الدعم اقصد صندوق دعم الطلاب ما قايم بدوره حتى بياخد بايديهن ويفكهن عكس الهواء ولا حول ولا قوة الا بالله ذنبهن في اعناق المسئوليين اخبار البكاي شنووووووووو


#870715 [زهجان جدا]
3.00/5 (2 صوت)

12-29-2013 03:30 PM
- أقول ليك .. هسه البت تجي من (القرية) الكانت فيها للعاصمة تصرف على نفسها من وين؟ أبوها يكون دخلو الشهري ألف جنيه .. لو أكلت ليها وجبتين بس فول بي عشرة جنيه في الشهر عاوزه ليها 300 جنيه .. أها وين طباعة المذكرات ووين الحاجة البارده ووين (الكريمات)


الأستاذ الفاتح

مع احترامنا ليك إلا إنو هنا جافاك الحكم السليم .. قول لي كيف ؟؟ طيب ليه بتفترض أن بنات القري هن الوحيدات المتهمات بأنو يعتبرن مشرع أنحراف؟؟
وما دخل القري في الانحراف ؟؟ وهل بنات المدن صحابيات ؟؟؟

لا ننكر ان هنالك مشكلة اخلاقية وكبيرة في المجتمع لكنني ضد أن يتهم أبناء القري في ذلك


ردود على زهجان جدا
United States [ابونازك البطحاني المغترب جبر] 12-29-2013 05:39 PM
طول بالك يازهجان الرجل بقصد ببنات الولايات عشان هم وحيدات في العاصمة ولا يوجد رقيب عليهن كبنات العاصمة اللاتي يسكن مع اخوانهن وابائهن ، لذا تجد بنت الاقاليم هي الاكثر اضطرارا لفعل ذلك وطبعا ليس كلهن بل الاقلية منهن والبقية من بنات العاصمة الفاسدات ، ولا تنسى انو بنات الاقاليم ديل برضو بناتنا وعرضنا ولهن كل الاحترام وربنا يستر على كل بنات السودان .

United States [ابراهيم1£2] 12-29-2013 04:33 PM
والله كلامك .. صحيح.. هذا خطا فادح من الاستاذ جبرة لا يضاهيه الا خطا فاطمة شاش


#870710 [ودالتوم]
0.00/5 (0 صوت)

12-29-2013 03:27 PM
ليه حصرت السبب في بنات الولايات ..؟ اولاد وبنات العاصمة هم اكثر إمكانية ومقدرة على الفارغة , الواحد أو الواحدة عندها عربية وشقة فاااااضية يعسكرو فيها ايام الإمتحانات أولاد وبنات ... ولك ان تتخيل ما تشاء


#870702 [sara]
0.00/5 (0 صوت)

12-29-2013 03:23 PM
الاستاذجبرا بقدر ما احترم كتاباتك لم يعجبني ما كتبت اليوم كانك ترمي اللوم علي البنت فقط اين هم الرجال الذين تسببوا في الحمل كان كل واحد يدق صدره ويقوم يستر البت
كما ان هذا الموضوع لا يمكن ان تكتب عنه بسخرية وكانما هو اي موضع لديك
عموما الاستاذ جبرا ارجو ان تطرحه بشكل جدي ولا اكثر


#870692 [هيثم الحلاوي]
0.00/5 (0 صوت)

12-29-2013 03:12 PM
مقال سقطه للاستاذ الفاتح جبره و كأن كل المشاكل في بنات القري و الفقراء !!! حقا استاذي الفاتح لم يحالفك الصواب دعك من بنات الولايات كما اشرت هل كل بنت فقيره يمكن ان تبيع نفسها للعبايت و الصابون و الكريمات و .....
و الله الكلام غلبني .


ردود على هيثم الحلاوي
United States [ابراهيم1£2] 12-29-2013 04:39 PM
هذا كلام مؤلم جدا ،، اتهام بنات القري ..كان كل ناس القري فقراء .. ياخ جبرة .. الخرطوم تعيش من عرق أهل القري هؤلاء . انتاج السودان كله من القري .. حتى هذا البترول يستخرج من القري .. ما دهى السودانين فى إطلاق الكلام جزافا .. الم تكفينا سبا فاطمة شاش ؟؟ من الصحفيين ؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة