زي بهنس
12-29-2013 08:11 PM


وانا ماني حزبي وماني سوداني ؟
هيكل عظم الهم من ضلوع وجداني
واحزاب الورثة الكايسة عبادة زيف
تكون يساري تكون علماني ماركة خوف
تكون سوداني تدبير القصة كفيلم شوف
شطور البقرة ترضِع مشبوه اسلام حكاية قِف
يقيف الوطن عريان في صقيعة الله يكون كهف
ميلاد الزول يكون سوداني معناها حكاية موت
يعيش الزول في ود أحد الوطن مخنوق صوت
الناس الداقشة العايشة ضُل الزول يسيبو يفوت
احزان الأمة في حفلة عِرس اولاد الجن صنوف
سوداني تعيش ممكون مهموم ملبوس مركوب
مركوب الدِين من جِلد الزول نحاس لحروب
كُفار الحزب النار الوقدت حقارة جوة جحور الضب
جالوص النفس الساهلة سواقة لباب القبر ذنوب
معطون في جهل الفتنة مُحرات للزول جوة الجوف
النار القايدة في فاضي المعنى يبسانة جروف
كلاب الحِزب الفاجر جاضات هو.. هو.. عضيض
في جسد الوطن الماهل ضُواقة حُكم طعم حميض
تُف تُف سنون الحكم الماسخ شبعانة يود بدم الحيض
حاض الوطن ونشف الرحم زول نضيف لزوم مرفوض
حكاية الحكم زي نُكت الطشمة ليل سُمار زمان مفروض
سودان الناس صلاة الظلم تكون جنازة ركعاتا وقوف
وقوف في صف العرقِي الديني الناس سكرانة ظروف
يا تكون زول معزول مطرود يا تكون زول ضيف
نعجات الحزب المرعى ترعى مرعى الدين شِفّيف
ناظر الحكم الراقص القاتل ضبان البلد يقول افيف
عولاق الزمن الادمن مص العرق وزاد كنكيش
في حيطت الوطن المايلة قهر انياب الضيب خربيش
تعذيب القالوا كفاية مهانة وجز الرقبة متيق عيش
زي بهنس يهمس عوووك عوووك كفاية نزيف
زي بهنس سهراجة الحمى الناس مُشتهية رغيف
زي بهنس يهتف صامت عابد محرابو رصيف
زي بهنس صفق في وجه الكضبة بدون تسويف
زي بهنس كيمان الجوع المرض سارقها حريف
زي بهنس في شلوفة الحزب تُمباك عماري وكيف
زي بهنس ضلوع الوطن جزارة دين كضب تحريف
زي بهنس قصة فاطمة القصب الاحمر حجاوي الريف
زي بهنس موت الوطن مات العاشق مكتول وولوف
زي بهنس فاهم وناقش بيت العزا دموعو حروف
زي بهنس عشق الوطن تراب الوطن بدون تكليف

البنشرجي

عبد الحليم الخير محمد الحسن
[email protected]





تعليقات 0 | إهداء 0 | زيارات 1143

خدمات المحتوى


عبد الحليم الخير محمد الحسن
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة