01-17-2014 02:05 PM


حديث لآخر الرسل والأنبياء سيدنا محمد عليه أفضل الصلاة والتسليم مكون من سبعة عشر حرفاً يحل مشكلات الكون أجمعها .. (حب لأخيك ما تحب لنفسك) .. لو ده حصل يا جماعة الخير كنا سوف نقوم بإلغاء الشرطة وأقسام الشرطة والسجون ووزارة العدل (لو فضل فيها عدل) ! ونستغني عن السلاح ونوفر (حق الملاح) ونقضي على الفساد ويرتاح العباد ومش ح يكون عندنا مفصولين صالح عام ولا محسوبية ولا (تمكين) لأننا بنمشي بكلام (الدين) !
وبما أنه مطلوب منا كما جاء في الحديث (أن نحب لإخواننا ما نحبه لأنفسنا) فإننا لا نرضي لإخواننا من الدول المجاورة والذين لم يجدوا العيش الكريم في أوطانهم ورجوه لدينا أن نعاملهم بقسوة وبعدين الدنيا دي ذاااتا ما دواره وأهو ملايين من الشعب السوداني الفضل منتشرين في كل أصقاع الدنيا يبتغون كريم العيش بعد ان سدت كل المنافذ في وجوههم (والمسألة نسبية وكده) !
أيه لزوم المقدمة دي .. أقول ليكم :
جاء في الصحف مؤخراً خبراً يقول أن البرلمان قد أجاز قانون اللجوء لعام 2013 والذي قضى بإيقاع عقوبة السجن لمدة لا تتجاوز سنتين أو الغرامة أو العقوبتين معاً في حال علم الشخص الذي يؤوي اللاجئ بعدم امتلاكه إذنا للعمل في البلاد من وزارة العمل .
التصريحات التي تفقع المرارة عرفناها .. لكن يبدو اننا في مرحلة القوانين التي تمزق عضلات القلب .. هسه زي الخبر ده الزول يتعامل معاهو كيف؟ بالأقراص المسكنة وللا القاتلة للألم وللا بالصبغة وينتهي من الموضوع ؟ كل المسؤولين قاطبة وكل سوداني وسودانية وأجنبي واجنبية يعلم تمام العلم بان مسألة دخول غير السودانيين للبلاد والإقامة والعمل بها (السلطات ما شغالة بيها شغلة) ولو هسه سالنا لينا مسؤول عن عدد الأجانب بالبلاد فلن يستطيع أن يحدد الرقم (ولو بالتقريب) حتى وإن إستعان بالتومة الوداعية !
القصة سايبة .. والسلطات (عاملة نايمة) لا يعنيها توفيق أوضاع هؤلاء (اللاجئين) من الدول المجاورة .. الاسواق مزدحمة بهم .. المطاعم .. الكافتيريات .. وسائل المواصلات .. محطات الوقود .. الشوارع .. المنتزهات .. لم نسمع أو نشاهد (شرطياً) يستوقف أحدهم ليسأله عن (الإقامة) أو الهوية كما يفعل إخوة عرب لنا في (بلدان إسلامية) لا يريدون لبلادهم أن تكون (وكالة من غير بواب) .. فكيف بعد كل هذا يقوم المجلس الوطني وأعضائه الميامين (الميامين مش النايمين أقرأ كويس بالله) بإجازة قانون كهذا ؟ يعني السلطات شايفه شغلا وبقت على المواطنين؟
من يقرأ هذا (القانون) والعقوبة (القاسية) التي تنتظر من لا يعمل به يظن أن عدد الأجانب الذين يسرحون ويمرحون بالبلاد لا يتجاوز الدستة دستتين (مش المليون مليونين) بل أنه من فرط تواجد هؤلاء الجيران بكثافة فقد طالب العبدلله المسؤولين أكثر من مرة بإنشاء سفارة للجالية السودانية بالخرطوم ..
نحن ضد قطع أرزاق الناس أياً كانوا (ما نحنا برضو ناس) ولكن لا يمكن لدولة في العالم أن تستباح عيني عينك كما يحدث الآن .. نحن نطالب بحصرهم ومعرفة أماكن تواجدهم وكيفية تحويل مدخراتهم بل نفرض عليهم رسوم إقامة تساعد في مصروفات هذا الحصر (بس ما يقوموا يجنبوها وكده) !
بمناسبة كثرة أعداد هؤلاء (الجيران) قيل ان أحدهم ويسكن في الصحافات تم سؤاله عما إذا كان هنالك شئ يضايقه فرد :
- كل شئ تمام بس سودانيين كتار !
كسرة :
- أقطع دراعي ان معظم المسؤولين لديهم شغالات غير مسجلات ولا يحملن إذن عمل .. إذن عمل مين وبتاع ايه .. القصة هااااايصة يا وزير الداخلية وما عايزه ليها (دليل) !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

تعليقات 19 | إهداء 0 | زيارات 7389

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#889610 [AbuIslam]
0.00/5 (0 صوت)

01-19-2014 12:01 PM
السلام
الاخ الفاتح
تحية طيبة
القصة هايصة مرة
ياخي الحيكومة بتاعتكم دي عامل زي تور الساقية لا تعرف اي شئ سواء من يعارض يعتقلاتحدى اي واحد يديني احصائية دقيقة لاي احد من الاشياء الاتية :
1- كم عدد السودانييين خارج السودان ؟
2- كم عدد العاطلين عن العمل حسب المستوي التعليمي ؟
3 - ماهو مستوى الامية لدي الشباب تحت سن 18 سنهة


#889281 [احمد]
3.00/5 (3 صوت)

01-19-2014 07:33 AM
البرلمان قد أجاز قانون اللجوء لعام 2013 والذي قضى بإيقاع عقوبة السجن لمدة لا تتجاوز سنتين أو الغرامة أو العقوبتين معاً
المسأله كده واضحه يا أستاذ الحكومه بصدد فتح باب جديد للاسترزاق كعادتها عندك شغاله نحن حنصهين عن مسالة دخولها وحنخليك تشغلها بس ادفع الغرامه يعنى من الاخر ذى حافلات الكريز نحن ندخلها وما نرخصها والمواطن يدفع الايصال ويبقى شغال


#889178 [الراصد]
3.00/5 (1 صوت)

01-19-2014 12:46 AM
الاستاذ جبرة تأمل معي (( مشروع الجزيرة.. موسسة الاقطان.. الزكاة.. السكة الحديد.. تدهور التعليم العالي وسياسة التعريب.. تدمير التعليم العام والسلم التعليمي ..هجرة الاطباء والكوادر..الهجرة العشوائية وتدمير المجتمع بالامراض المنقولة.....الخ الخ)) مايحدث في السودان تدمير ممنهج... رفعت الاقلام وجفت الصحف...


#889021 [الفارس]
3.00/5 (2 صوت)

01-18-2014 08:00 PM
استاذ/ جبرة سلامى وتحياتى اولا عشان المسؤولين ديل يهتمو بالموضوع دا لازم يكون ايرادات وماكلة عشان كده أنا أقترح اولا لازم اى وافد يعمل فحص ايدز بشى الفلانى ويكون سنوى
ثانيا بعد احضار شهادة لياقة طبية يتم التسجيل فى وزارة الداخلية واستخراج بطاقة بشى الفلانى
وتجدد سنويا
ثالثا استحراج شهادة مزاولة عمل بشى الفلانى وتجدد سنويا
رابعا استخراج بطاقة تامين صحى طبعا بشى الفلانى وتجدد سنويا
خامسا عمل اقامة للعمل بشى الفلانى تجدد سنويا .
سادسا دفع ضرائب سنويا
سابعا لازم اي وافد يكون عنده كفيل وطبعا الكفيل لازم ياخذ فى النصيب عشان رفع مستوى الدخل للمواطن
السودانى الى 1800 دولار


#888947 [aboaddafi]
5.00/5 (2 صوت)

01-18-2014 05:06 PM
في مصر القريبة دي لا يجوز لاي شخص ايواء اي اجنبي مالم يتم تسجيله اولا في اقرب مركز شرطة ويسرى ذلك على سكان الشقق والفنادق وحتى لو رحل الشخص لمكان آخر يتم تسجيله مرة أخرى في اقرب مركز شرطة والا تعرض من يأويه للعقوبة القانونية يعني دي جاجة صعبة دي واللا دايرة ليها قانون بعد داك لقطوا البيانات من اقسام الشرطة في يوم واحد تقدروا تحصروا اي اجنبي لافي في الخرطوم ياخي الناس ما دايرة تعمل لانهم مستقيدين من الفوضى دي . بعدين ياخي الدنيا دي نحن ما بديناها بس نحن الطيش فيها . لاي حاجة ممكن نتلفت يمين واللا شمال و نعرف زي المشاكل دي بيحلوها كيف بدل ما نحاول اختراع العجلة من جديد ولسوء الحظ فنحن لسنا موفقين في اختراع اي شيىءجديد للبشرية حتى مشاريعنا الخلوها لينا الانجليز زي مشروع الجزيرة و سودانير وغيرها لما حاولنا نضع بصمتنا فيها دمرناها ياخي عليك الله خليهم يشوفوا العالم من حولهم شغال كيف قول ليهم بس ذاكروا شوية حتنجحوا الدنيا دي بادية من زماااااان ما حتبدوها لينا هسع.


#888929 [ود الشيخ]
0.00/5 (0 صوت)

01-18-2014 04:35 PM
ياجماعة الخير هسي عليكم الله جبرا ده اشار للوافدين ديل بكلمة حبشي ولا جنوبي ولا ارتري خليكم ظريفين ومافي داعي تزكرو الجنسيه مالكم فضائح انتو كده الراجل بتكلم وبيقول كلام اخر حلاوه زي ماقال عادل امام ...


#888645 [سوداني أصيل]
5.00/5 (1 صوت)

01-18-2014 11:06 AM
مع كامل الاحترام لك ككاتب وصحفي, أحب أن ألفت الانتباه إلى بعض الكلمات التي تستخدمونها أحيانا في كتاباتكم مستجلبة من ثقافات أخرى كالمصريةعلى سبيل المثال لاالحصر(اقطع دراعي). فثقافتنا السودانية الدارجة نستطيع أن نصل عبرها إلى مبتغاناالذي نريد. بارك الله فيكم....


#888583 [teto]
5.00/5 (4 صوت)

01-18-2014 09:47 AM
قال ليك يا جبرة بعد انفصال الجنوب .... الحبشي راكب في الحافلة في الخرطوم والكمساري بكورك بحري ..بحري ..... جا جنوبي ركب في الحافلة الحبشي قال ليهو انتو لهسة قاعدين ما مشيتوا . والله يا اخوانا الاثيوبين ديل اخير لينا من العواليق المصريين ...... عاشرناهم في الغربه وثبت بما يدعو للشك انهم زبالة الشعوب .... وكل الجنسيات متفقة علي كراهيتهم .... امرقوا لينا اي مصري في السودان


#888534 [كمبوكل]
3.50/5 (3 صوت)

01-18-2014 08:13 AM
هو من الليلة منذ استقلال السودان والبلد وكالة بدون بواب جاءوا من غرب افريقيا من سيراليون ولييبريا وغينيا وغانا ومالى والنيجر ونيجيريا وتشاد والكاميرون قبائل بشيوخها واطفالها وبناتها وسكنوا بلد السجم وفى طريق الحج وهم راجعين قبائل كاملة تجنست بامر الامام ان الامام لدواعى الانتخابات انظروا الى الاسم منى اركو مناوى وكل حركات التمرد بدار فور اغلبهم من الدول المجاورة بلد ما عندها سيد ولا وجيع وما ضيعنا غير الدورشة السودانية والهبالة خلوا الفات من الآن والرقم الوطنى وقفوا هذه الهجرات وخاصة التى انبهلت من اثيوبيا فى الآونة الاخيرة ولا سوف تجدون انفسكم اقلية فى السنوات القليلة القادمة خلو الدروشة والطيبة الزائدة


ردود على كمبوكل
European Union [قوز دونقو] 01-18-2014 06:13 PM
يا كمبوكل لو دي نظرتك للسودانيين و أصولهم تكون ظلمت ناس كثير ؟؟؟لولا الهجرات لما تعمرت الديار و البلدان ؟؟؟و السودان كمثال قد جاءه الناس من كل حدب و صزب من السعودية و من اليمن و من الهند و من تركيا و من الأرمن و من مصر و من ليبيا و من أوروبا و من كل البلدان التي تحيط بالسودان كأحاطة السوار بالمعصم.. و السودان هذت الوضع هو قارة تجمع كل أصناف البشر و بك جنسياتهم التي إنصهرت في بوتقة إسمها السودان و الذي كان ينتد من تشادا غربا حتي أثيوبيا شرقايا أخي دعك منها فإنها نتنة ؟؟؟؟
و خليك سوداني و بس ؟؟؟؟ل،ك إن حاولت ترجع كل واحد لأصله لن تجد سوداني واحد 100% كلهم خليط و من (سقط لقط) و ما تغرك الكريمات التي تفتح البشرة مطرة واحدة و كريم يرجع لرفه؟؟؟؟ أرحم نفسك شوية ؟؟؟؟

[حلفا الجديدة] 01-18-2014 05:34 PM
هسع إنت سوداني 100% الجايين من غرب افريقيا ديل يعتبروا السودان أرض افريقية 100% وليهم حق الاقامةوالسكن والعمل والاستيطان لكن انت شوف نفسك انت جاي من وين عامل فيها عربي يا وهم يا موهوم يا فاقد هوية لا قبلوك العرب واصبحت منهم ولا عايزنك الافارقة وما متشرفين بيك أصلا لأنك ما معروف من أي منتج ، وهسع انت زعلان من الحبش ديل ليه ما هم عيال أعمامك ، بالمناسبة ، الزغاوة والفور والنوبة رجال الثورة الأشاوش هم أصل السودان الحقيقيين وحكموك قبل كدا نسيت علي دينار ولا شنو ولا نسيت عبد الله التعايشي ولا سلطان مساليت تاج الدين والزغاوة ديل فوق راسك وديل لمان ينفصلوا ذي الجنوبيين ما حيخلوا ليك ولا قطعة أرض صالحة للسكن ولا للزراعة لأن كل الأراضي السمحة سوف تكون ضمن دولتهم الجديدة ، وحيخلوا ليك الشمالية علشان تدفنك الرمال .


#888342 [ودالباشا]
3.50/5 (2 صوت)

01-17-2014 10:33 PM
الشر البليه ما يضحك ديل يكتلوا الجنازة ويمشوا يدفنوها ياخى بلاويهم كلها يرموها على المواطنيين المساكين اذن دخول شنو وزيارة شنو ياجبر جوازات عديل قعد تطلع للاجانب وفى ناس ما شافوا البلد الجوازات جات لى عندهم اها رايك شنووووووو


#888312 [هندسه]
4.00/5 (3 صوت)

01-17-2014 09:18 PM
(فقد طالب العبدلله المسؤولين أكثر من مرة بإنشاء سفارة للجالية السودانية بالخرطوم)

وانا اقترح ان تكون جاليتنا بالخرطوم بالديم

يا جبرا انا برضو بقترح انو خط هيثرو دا نطلع ليهو اغنيه هابطه زي اغنية الدقو منو يا ناس تتذكرا؟ لما غنوها للدقو في لندن هناي داك.. وانا ببدا ليكم اغنية خط هيثرو

الخط وينو ورا ورا ورا ورا
السرقو منو ورا ورا ورا ورا
الشالو منو ورا ورا ورا ورا
الباعو منو ورا ورا ورا ورا
الخط وين راح ورا ورا ورا ورا
اكلو التمساح ورا ورا ورا ورا

ناس اللجان .. والنائب العام
ريسنا الجبان .. يا اهلنا

والنص مفتوح للجمهور لتطويره وتعديله حسب ما ترونه مناسبا


#888238 [الفاتح]
4.50/5 (3 صوت)

01-17-2014 07:20 PM
قبل أشهر حضرت السودان في إجازه وفي مشوار بالحافله خط الإمتداد إفتكرت نفسي إني أحطأت الطريق الى السودان و ذهبت بالخطأ الى دولة أخرى لأن كل ركاب الحافله كانوا من تلك الدوله وهذا في عطلة نهاية الأسبوع وعرفت إن هذا اليوم هو عطلتهن الأسبوعية


ردود على الفاتح
United States [محمد شرف] 01-18-2014 07:29 AM
يا الفاتح ويا الفاتح جبرا منو القال ليكم انو في اجانب في بلدنا ؟؟؟ يا جماعة العندو دليل يجيبو ما تقولوا الكلام ساكت وتقوموا ماشين !!! (طبعن الكلام ده ديباجة مطبوع علي شفاه المسؤولين ) .


#888210 [اقمة بتاع شنو قول تابعيه عديل!!]
0.00/5 (0 صوت)

01-17-2014 06:28 PM
بالمناسبة هيثرو بتاع ايه!!!ماقريت مقالات عثمان ديل باعوا الخطوط كلها!!!!!!!!!!!بي تياراته!!!!(مش تيار عصمان بتاع الورق)!!!بعدين ات شفت الاقامات ليهم عملوها كيف!!!!واحد بتاع قسم شغال يصور في ايصالات ويبيعه للجماعة علي اساس انها اقامة واذن عمل شفته كيف تقول لي رسوم!!!لي منو والجماعه كلو داخل الجيب!!بعدين يقموا يغلطوا ويفرضوا الرسوم علينا!!يقولو والله جبره اقترح الموضوع!!!!ويقلو نحنه تابعين لجماعة الحوش!!!!!!!!!!مش اسلسيين وكده!!!!ماجداد الخلا!!!!!!!!!!!!


#888194 [ابو نصر الشمالي]
5.00/5 (2 صوت)

01-17-2014 05:44 PM
وانا اقطع ايده لو وزير الداخلية ماعندو تلاتة بدون اوراق في بيتة


#888187 [مرتضى الحاج]
1.00/5 (1 صوت)

01-17-2014 05:18 PM
من يستطيع ان يفهم حكومتنا الموقرة بان الضرائب والزكاة وكل الجبايات المالية تأخذ في الاصل من المواطن كي تعود عليهم على شكل خدمات عامة من صحة وتعليم وامن وطرق وجسور وفرص عمل..الخ؟؟

من يقنع حكومتنا اننا ﻻ ندفع تلكم الاموال حبآ فيهم و كي يبنو منها الناطحات تلو الناطحات ويشتروا الفارهات تلو الفارهات بل حتى الزوجات تلو الزوجات؟؟

الحكومة تتنصل من كل مهامها ياجبرة كعادتها وتريد ان توكل المهمة للشعب وطالما ان الشعب بات يتعلم و ياكل و يتعالج ويصحح البيئة وشايل مطوته في جيبه (نظام توفير الامن) ويخلق فرصة العمل بنفسه كل ذلك ومن حر ماله ماذا يضير لو اضفنا لهذه المنظومة بند (ومراقبة العمالة المخالفة)؟؟

رجاءآ لاتشغلوا الحكومة بسفاسف الامور ياجبرة دعوها تسرق بسﻻم فبعضهم ﻻيملك من حطام الدنيا فقط إﻻ قصرين او ثﻻث وثلة قليلة من نساء !! ايعقل ؟؟ اهكذا نكرم رموزنا الوطنية ؟؟ اهكذا يكون الجزاء لمن افنوا زهرة شبابهم في خدمتنا؟؟ اهكذا يكون الوفاء لمن ارادوا ان يمكنوا لكم الدين الذي ارتضيناه ؟ تبآ لنا من شعب لايطيق رد الجميل


#888183 [سوداني]
3.75/5 (4 صوت)

01-17-2014 05:01 PM
يا جبرة ما عذبتناااااااااا ياخي أمشي ابقى عضو في لجنة تحقيق خط هيثرو او امشي لندن واسألهم بدل تسألنا ونحن ذاتو لو لقيناه بنبيعه هو في طائرات


#888164 [ود ابو زهانة]
2.00/5 (2 صوت)

01-17-2014 04:16 PM
انت ياجبرة باود ابوروف بننكلم عن ديل الشغالين فى البيوت والكافتريات والمطاعم والمواصلات...الخ بالعاصمة . وينك من الجماعة الجونا من النيجر وشمال الكميرون (مهجرين ومطرودين من هناك) وتم التسهيل لهم واستولوا على اراضى بعض القبائل بدار فور بعد ان طردوا أهلها بقوة السلاح وتحت رعاية مايسمى بالجنجويد الذين هم صناعة حكومتنا الرشيدة؟؟ بس الشكية لى اب ايدا قوية
بعدين ياخى كسراتك دى الجماعة ديل ما شغالين بيها وعادينها كلام جرايد ساكت وبالرغم من انه عثمان ميرغنى أدى (الكسرة الاولى سنتين وشهرين والكسرة التانية عشرة شهور) كوزين ولا حياة لمن تنادى. ( لقد اسمعت لو ناديت حيا ولكن لا حياة لمن تنادى) .لذلك اقترح عليك رفع الفراش الاول لقلة حيلة من وجهت اليه الكسرة( بتجيب ليهو هواء شديد) . أما الكسرة التانية دى فأمرها عند سيد القلم ورغم قومان نفسك عشرة شهور لا هو ولا من حوله ما جايبين خبرك . فأقول ليك قول حبوبتى : سيد الحق راضى شن نخس القاضى؟؟؟ ما جنبكم ست شاى تمشى تشرب ليك قهوة عندها ؟ ولا أقول ليك أمشى البحر تحت عند معتصم الحلاب واقعد معاهو وخليهو يطلب ليك قهوة واقعد اتفرج على شارع ابوروف الجديد وياحبذا اذا كان ذلك بعد المغرب . حتلقى كسرات بت كلب عذبت ناس ابوروف كلها .. لك تحياتى


#888128 [سام]
4.66/5 (6 صوت)

01-17-2014 03:15 PM
في ارتريا القريبة هذه يسالونك عن الاقامة في اي شئ تود عمله او بيت تود استئجاره ونفس الكلام في اثيوبيا وتشاد وغيرها من الدول الافريقية..ولكن الذي حدث الان ان الكيزان تنعدم عندهم ادني اشكال الوطنية بل يعملون بسياستهم علي اخلاء البلاد من سكانه حتي يخلو لهم الجو ويستمتعون بغنيمتهم،دعونا من هذه السذاجة والسبهللية ولو كان الامر في يدي لحليت ناديي المريخ والهلال لمنحهم اي لاعب اجنبي الجنسية في خمسة دقائق،انحطاط مريع..اكثر الناس كرها للوطن اكثرهم تشدقا بالدين،الي متي هذا الهوان،الوطنيون في الجيش ذهبوا وتنم فصلهم للصالح العام..اذكر ايام المعارضة في الجبهة الشرقية كنت اتحدث مع عقيد مفصول للصالح العام وكان قائد كتيبتنا،قلت له ان الحرب ستنتهي مع سقوط الكيزان،نظر الي وقال لا تنس هناك الفشقة اتعتقد اننا سنستردها دون حرب؟هذا العقيد وضمن تصنيفاتنا السودانية ،حلبي،،واليوم اتسائل الم يعد هناك بطل ما في الجيش؟


ردود على سام
United States [sahar] 01-19-2014 02:49 PM
صدقت ياسام


#888127 [جنرال زمان]
4.77/5 (7 صوت)

01-17-2014 03:12 PM
هو يا باشمهندس جبرا (حلال عليك والله، إذا كان كل من هب ودب صار دكتور ويا حليلك يا يور والله يرحم الدكتور عبدالله الطيب)، تتوقع شنو في بلد كان وزييييييييير داااااخلللليييتها من مواطني دولة مجاورة!! بعدين حسب علمي كان دخول الرأس الواحد يكلف 2 مليون بالقديم ودا قبل الزيادات الأخيرة، يعني في واحدين مستفيدين وكدا، وإلا كيف نفسر دخول تلك الكمية الهائلة من الخمور حتي تم القبض عليها في الخرطوم!! يعني صاحبنا قام بالواجب من المنشأ لحدي الخرطوم بس حصل شنو بعد داك، الله تعلم. ويا باشمهندس الله يكون في عونك وعوننا جميعا مع هذه العصابة التي لا تخاف الله، وأما نوام مجلس الشعب فديل المهم عندهم أنه يقبضوا المعلوم آخر الشهر ويصفقوا ويزغردن وقال حسب الله قال (تصور هو برضه يسبقه لقب دكتور زي جمال الوالي هاهاهاها). يديك العافية يا هندسة ويطول عمرك ويقصر عمرهم آل كوز. آآآآآمين يا رب.


الفاتح جبرا
الفاتح جبرا

مساحة اعلانية
تقييم
8.88/10 (6 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة