01-16-2011 07:19 AM

ركب التونسي التونسية

عبد اللطيف البوني
[email protected]

ركب التونسي التونسية
(1 )
ليه كدا ياتونس ؟
في اغنية صدقني ما بقدر اعيد لترباس جاء (من عمري اديتك كتير/ اخلصت ليك وانت بتغير/ والغيرة كم فرقت قلوب طريقها كان مخضر نضير) ولكننا اليوم بصدد غيرة ثانية . غيرة سياسية فنحن في السودان بعد ان كنا (طالعين في الكفر) ومتصدرين كل نشرات الاخبار هاك يا, استفتاء .. واخرتقرير مصير .. واليوم قبل الاخير... وما ادراك ما اليوم الاخير ,, لابل ان زيارة البروف محمد ابراهيم خليل لجوبا رئيس مفوضة الاستفتاء اصبحت في مطلع نشرات السي ان ان والجزيرة والعربية والبي بي سي وجميع فضائيات الدنيا وكنا في انتظار تغطية يوم السبت يوم اغلاق الصناديق فاذا بالدنيا كلها بما فيها نحن اسياد (الجلد والراس) نتحول الي تونس ونتابعها ثانية بثانية وسهرة حتى الصباح لابل اصبحنا مثل طير صلاح المهاجر المهاجر (نواصل الليل بالنهار) لقد اصبح حسن جمول واستديوه المنصوب في جوبا وشبكة مراسلي الجزيرة لتغطية استفتاء جنوب السودان عاطلين عن العمل بنسبة مائة المية وكذا بقية مراسلي القنوات والاذاعات ليست هذة اول مرة تعملها تونس معنا فمن قبل اخرج الترجي المريخ من الكونفدرالية واخرج الافريقي الهلال من بطولة الرابطةالافريقية وفي هذا العام اخرج الصفاقصي الهلال من الكونفدرالية وهاهو العالم اليوم كله يلهج بثورة تونس الشعبية ويقول انها اول ثورة شعبية في العالمين الافريقي والعربي وينسى اننا فعلناها في اكتوبر 1964 وفي ابريل 1985 ومع ذلك ما يحدث الان في تونس الان يستحق(هسه في زول جاب سيرة البحر؟)
(2 )
كله من الكشة
الشاب التونسي محمد البوعزيزي 26 سنة خريج جامعة عاطل عن العمل الوظيفي صنع لنفسه عربة يجرها بيدية يبيع عليها الخضر والفواكه تعرض لكشة من السلطات محلية سيدي بوزيد فقامت بتحطيم عربته وصفعة الشرطي . تقدم البوعزيزي بشكوى لرئاسة المحلية فلم ينصفه احد فوقف امام مكاتب المحلية واشعل النار في نفسه في يوم الجمعة 17 ديسمبر 2010 فاخذ الي المستشفى وصعدت روحه الي بارئها في الرابع من يناير 2011 فقام اهله بمظاهرة احتجاجية ثم اتسعت دائرة الاحتجاج وعمت كل المحافظة ثم كل تونس فكانت ثورة نهايتها ما يعرفه الجميع البوعزيزي لم يحرق نفسه نتيجة انفعال مفاجي بدليل انه بعد تحطيم عربته وصفعه ذهب الي منزله وكتب في مفكرته رسالة الي امه يقول لها فيها انه خارج ولن يعود ويطلب منها ان تسامحه ولاتلومه بل تلوم زمانه الردئ ثم حمل شكواه وذهب للمحلية وكان ما كان اذ لم يشعل النار في نفسه فحسب بل اشعلها في كل تونس وفي خارج تونس لقد ابتدر مدرسة( التونسة) (هسة في زول جاب سيرة البحر؟)
(3)
مراعاة فروق الوقت
بعد اندلاع المظاهرات اثراحتراق البوعزيزي اول بيان اصدره بن علي ادان فيه المتظاهرين ووصفهم بالمتطرفين الاسلاميين لم يجدي هذا فقلب الصفحة فزار البوعزيزي في مشفاه ثم اعلن تعديلا وزاريا اخرج فيه بعض المغضوب عليهم شعبيا ثم اعلن عن ثلاثمائةالف وظيفة للخريجين ثم اعلن انه لن يكون رئيسا مدى الحياة ثم اعلن عن انتخابات بعد ستة اشهر ثم اعلن انه لن يترشح ثم اعلن عن حرية الاعلام ثم اقال كامل الحكومة واوقف ضرب المتظاهرين ولم يجدي كل هذا ولم تتوقف المظاهرات وازداد عدد الموتى واخيرا توكل على الله وركب التونسية قاصدا فرنسا ولما رفضت توجه الي جزيرة ساردينيا الايطالية فلم يرحب به واخيرا هبط في جدة لو قام الرجل بكل الخطوات التي اعلنها اعلاه قبل 16 ديسمبر 2010 لما كان ما كان ولكن الرجل لم يراعي فروق الوقت(هسه في زول جاب سيرة البحر؟)
(4 )
فوزي بشرى
من لم يسمع تقرير فوزي بشرى في قناة الجزيرة عن احداث تونس فقد فاتته اجمل قطعة اعلامية متعلقة بهذا الامر لقد اعاد فوزي الي الاذهان تقريره يوم تنصيب اوباما رئيسا للولايات المتحدة هكذا فوزي دوما لايتفوق عليه الا فوزي فيابشراك يالجزيرة بابن بشرى فهو (فهو يؤنس ويلهم) وتاني جاب سيرة البحر.

تعليقات 18 | إهداء 2 | زيارات 4304

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#79562 [بني عامراوي]
0.00/5 (0 صوت)

01-17-2011 12:41 PM
والله زولنا دا الا يجري علي المتمة الحبشية لانه بقول جعلي وجده المك برضه بقولو جري علي الحبشة وارحم ليه من المجازفة في الطيران اما نافع يقبضوه في حفرة ذهب في شندي وو زير الداخليه هو زولنا لكن متبرئين منه يقبضوه في تسني والواحد تلو الاخر .... واخير التحية للملك عبد الله والله صحيح هي ارض الرسالات الزول دا بعد الدنيا كلها رفضتو استقبلوه اهل الحرمين والله ما قصرو نهائي


#79219 [ابو عماد]
0.00/5 (0 صوت)

01-16-2011 11:56 PM
احبك في الله اخي عبداللطيف ....... بسخريتك وتحفظك .......... بسحر وحلاوة حديثك


#79107 [عبدالقادر محمد احمد]
0.00/5 (0 صوت)

01-16-2011 08:00 PM

يا بروف الأعلام العربي لم ينس بل تصرف علي السجية
they were cought off gard
الي أن صححهم المصححون، وصفهم كان صادقا مع الواقع الشاهد
أن في تعاملهم اليومي أن السودانيين غير عرب بل مفروضين عليهم فرضا.
زينه أفتيموس في مقابلتها ذكرت أن الأيقاع الأفريقي هزها في أغاني
الكاشف، وعاصم البنا جازف ليهو أغنية تعب نفسو والعازفين قال ايه يجب أن نبرز السلم السباعي في مكوننا الثقافي.
يعلم الله بقول شنو ما عرفت، لأني ما حسيت نغمتو.
\" أجي يا السباعي\"


#79087 [ام محمد]
0.00/5 (0 صوت)

01-16-2011 07:30 PM
انا بجيب سيرة البحر...بن على ما فتت تونس ...ومامطلوب من الجنا ئية ...لكن زولنا ده بعدين مافى فجة بترحب بيهو غير الجنائية...او يكون عندو شوية دم و يسوى زى هتلر


#78954 [واحد مستغرب]
0.00/5 (0 صوت)

01-16-2011 03:12 PM
عزيزى د/البونى سلامات ارجو ان تسمح لى بممارسة بعض الديمقراطية تجاهك وبعض الكتاب الذين (انبثقوا) من رحم الانقاذ وتحاولون جاهدين (التحلل) من ابوته لكم 0 وكما تعلم بأن الديمقراطية رأس رمحها هى (الشفافية)00ألبونى:تفضل وخلى كلامك خفيف علينا!!00أنا: ما تخاف0 البونى:طيب أدخل فى موضوعك0 أنا:والله ياشيخ البونى انا فى راى تخليك من السياسة وضرب الامثال بكلمات الاغانى و احسن ليك تتفرغ لزراعتك وخاصة ان العالم موعود بمجاعة رهيبة والمجاعة الجاية حسب كلام ناس منظمة الاغذية والزراعة ما حتخلى للديدان حاجة خليك من البنى آدمين!! ويكون احسن إذا اخدت معاك فى (اللورى)فلان ابن فلان وعلان بو علان وهم اولاد العاصمة نعم لكن بشوية تدريبات ممكن تجيب راسهم البونى مقاطعا: حيلك 00حيلك منو فلان وعلان الذكرتهم ديل ما تقول إسمهم عديل00 دى شنو الالغاز دى ؟ ماكنت بتقول ديمقراطية وشفافية هسع دى؟ أنا: جيب اضانك00أنا خايف من ناس الراكوبة00القاعدين لينا بالمرصاد وبيعملوا ليكم حبة خاطر طبعا انت بتعرف طبيعة السودانيين يختلفوا معاك لكن ما بيقصروا فى المجاملات00طبعا انا مابقصد الجبهجية ديل انت بتعرفهم اكتر منى ومعروف عنهم (بياكلوا مال النبى)00أها 00رايك شنو؟0 البونى: خلينى أفكر وارد عليك00باى00باى!! أنا: خربتها بباى باى 00 دى أظنك ما ناوى؟ البونى:ترررتكم00عايزين تدخلونا فى الحواشات وتنعموا بالمسلسلات التركية؟ياشيخ البونى ترجعنا تااانى لبداية الحديث؟ انت مصدق لسع فى هناء ولا نعيم ولا حتى ترطيب مع الانقاذ؟ خليتك عافية0


#78953 [سودانية]
0.00/5 (0 صوت)

01-16-2011 03:10 PM
الغريب بنى على بقول لهم بالنص انا يادوب فهمتكم بعد 23 فهم الشعب ونحن باقى لنا خمسه شهور حتى يفهمنا البشير اظهر الحكام مابهمون الابعد السنه الثلاثه وعشرون
وبنى على ركب التونسيه بنمرة اربع طوالى وفللى وياربى نحن ناسنا على السعوديه ام قطر عشان كده التخطيط واجب والرجيم والجكه واجبه وعمل حساب اليوم ده واجب وياروح مابعدك روح


#78932 [انس]
0.00/5 (0 صوت)

01-16-2011 02:45 PM
يوم اعلان الانفصال يوم الاستقلال الحقيقى للسودان الشمالى فل يعش خليل فرح وعلى عبدالطيف والطيب مصطفى وصحيفه الانتباه وارجو ان يعد الاخ فوزى بشر التقرير التاريخى


#78847 [awad hussain]
0.00/5 (0 صوت)

01-16-2011 01:09 PM
ارجو يا دكتور البونى مشكورا كتابة ملخص لتقرير الاستاذ فوزى بشرىالخاص باحداث تونس و لك شكرى


#78809 [زول]
0.00/5 (0 صوت)

01-16-2011 12:13 PM
الرقاص لوهرب لازم ياخذ دلوكة معاه لزوم الرقيص وكده لانو مد من رقيص وماخذ فيه دكتوراه !!!!!!!!!!!!!!!!!!!!!!!


#78727 [عمر دغمسة]
0.00/5 (0 صوت)

01-16-2011 10:55 AM
طبعا في بعض القراء ماعارفين قصة (ركب التونسية) دي.

وارجو التصحيح اذا كنت مخطئ.

قالو في التمانينات كانت هناك رحلة للخطوط الجوية التونسية (اظنها غادرت من الخرطوم) ويقال انو من ضمن ركابها عدد من الطلاب السودانيين . غادرت الطائرة , وللأسف لم تصل لانها فقدت في الصحراء الكبرى .

ويعني الركب تلك التونسية لم ولن يعود . عشان كده يقولو ليك (ركب التونسية)

اكرر ارجو التصحيح او التفصيل من (العارفين)


#78724 [ما منعونا وكدا]
0.00/5 (0 صوت)

01-16-2011 10:54 AM
سبحان الله حارب الاسلام والمسلين .... وحظر الحجاب

وفي النهاية لم يجد من يحتضنه غير المسلمين .. التحية

لحكومة المملكة العربية ( ما كسير ثلج ) دي الحقيقة..


#78712 [محمد كسلا ]
0.00/5 (0 صوت)

01-16-2011 10:41 AM
ؤبتين السوداني يركب السود.....؟ (اها نسيت انو لم يتبقي لنا سودانية ) الجنائية


#78706 [عادل]
0.00/5 (0 صوت)

01-16-2011 10:37 AM
واخيرا توكل على الله وركب التونسية قاصدا فرنسا ولما رفضت توجه الي جزيرة ساردينيا الايطالية فلم يرحب به واخيرا هبط في جدة

بن علي ما عندو مشكلة يدخل أي دولة لكن زولنا دة مع الجنائية دة يمشي وين والله مسكين


#78700 [ما منعونا وكدا]
0.00/5 (0 صوت)

01-16-2011 10:34 AM
ليت التابعين من حكام ومعارضة للغرب يتعظوا

من ما جري لبن علي ..... بعد تنفيذ الادوار المنوطة به .

أكله لحم ورموه عظم .... حتي مأوي مسكين لم يوفروه له.


#78681 [anass atta]
0.00/5 (0 صوت)

01-16-2011 10:09 AM
بن علي فرنسا لم ترحب به وكذلك جزيرة ساردينا واخيرا قبلت بيه السعودية والله يا البوني اخوي زولنا ده الا( لاهاي) او .........................(في زول جاب سيرة البحر)


#78628 [بدر الحاج مصطفى]
0.00/5 (0 صوت)

01-16-2011 09:26 AM
غايتو يادكتور كنا متوقعين فى النهاية التونسية دى تنزل فى اللعوتة وهاك ياطلاقات وعزومات لاسرة بن على


#78566 [محمد احمد]
0.00/5 (0 صوت)

01-16-2011 08:58 AM
البحر ده هو الرقاص مفتت البلاد مفرق النخب والاحزاب والنقابات .. لا يرضى بالنصح والشورى والمشاورات .. منتهجاً شراء الذمم لمشاركتهم السلطة كديكورات... متزلفاً للشريعة وأقوال الثقات .. فانتشر في البلاد التطرف والتشيع والوهابيات .. مميت اليافعين في الجنوب جالد الفتيات ... مشرد مزارعي الجزيرة والأطباء والكفاءات ... قاتل الأنفس في الاشهر المحرمات ... ناشر الجوع سالخ الجلود قبل الممات ... مدمر الصحة ومياه الشرب والجامعات ... حامي اللصوص سارقي اللقيمات ... من أفواه الفقراء ومحالي الصالح العام والحبوبات .. منشف ريق بائعات التسالي وناس المعاشات ... كبار السن من قضى نحبه في انتظار صرف المتأخرات ... يحابي زمرته من عليهم سوابق وملاحظات .. من نزعوا الأراضي والبيوت وأمتلكوا الساحات ... وتزوجوا ثلاث ورباع وامتطوا الفارهات ... فهو الذي لا يرحم كبار أو صغار ولا يتيمات .. بجمع الضرائب والرسوم والعتب والجبايات .. فلم يثـنيـه تقرير المراجع العام والتوسلات ... لبناء القصور بكافوري والعمارات .. وامتلاك الشاليهات في ماليزيا والامارات .. بارع في الرقص والجعير في المهرجانات .. الى أن صارت ارجله متقوسات متعوجات .. ناثراَ فيها السباب والشتيمات .. مرة بالمراكيب والكيعان ومرة بالجزيمات ...مستعرضاَ بالكباري والشوارع والمشروعات .. المشيدة بغرض البهرجة بلا دراسة ولا مواصفات .. أو بغرض لم الرسوم والمخالفات ... او لتشغيل شركات المعارف والأقرباء والقريبات ... رغم أنها لم تكلف سوى بضع مليونات ... ليتم تضخيمها بمضاعفات المليارات .. لعمولة المتعافي والحرمتين الملهوفات .... نسأل المولى أن يكفينا شر الجايات .. من استبدادهم ونشرهم للعصبيات ..فينقسم الوطن الى كنابي ومخيمات ومعسكرات


#78519 [خالد فارس]
0.00/5 (0 صوت)

01-16-2011 07:55 AM
الاخ الدكتور البوني بس نحن عندنا سودانير دايماً متأخرة كيف يكون الحل وله نقول الخيل الحره بتجي في اللفه0


عبد اللطيف البوني
عبد اللطيف البوني

مساحة اعلانية
تقييم
7.93/10 (8 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة