01-21-2014 09:11 PM

يوم الجمعة اول امبارحة شايف ناس كتار كترة ماشين شرق وقت كنت قاعد في موقف السفريات بتاعت الخرطوم قلت ياجماعة الناس دي ماشين وين والله كتر خلقك ناس راكبين عربات وناس راكبين لاندكدر خ11 قمت من محلي واستعدلت الا طاقيتي الحمراء بتاعت الطمبارة وحتيت مركوبي ومشيت بشارع الملجة لقيت الشارع دي ميلان كلوا ناس شقيت الحي ومشيت وصلت لي سوق ام دفسو لقيت الناس ماشين غرب وقلت يارب الليلة الغاز جابو ولا شنو الناس دي ماشي المستودعات عشان تجيب الغاز لكن ماشايف لي زول عندو امبوبة قلت يمكن يكون في فرن فوقو رغيف محل الناس ديل ماشين قلت كدي امشي اظن نلقي لي رغيف وتاني قلت كدي احسن نهبش سكيني الاسمها فاطر الحكامة عشان الابيض بقت ما ضمان قبل ما يضربون طلقة نسوي لي حاجة عشان ما نموت ساكت حمار سل وتد وتاني قلت انتو البلد دي اليومين ديل في اغتصابات وقتل لكل زولا بدافع عن عرضوا اظن الناس ديل ماشين المستشفي لزول حصدت روحة رصاصات بتاع القوة المدلعينها البقول ليها الاسناد و ياربي اسمها الحقيقي شنو . *** عرفت في النهاية انو الناس دي كلها قاصدين ميدان الخماسيات قالوا في حفلة بجمال فرفور والحكومة بتاعت النفير كلها هناك انا قلت ما اظن يكون رئيس حكومة النفير ومعها حكومة شيكان في الحفلة قلت ديل بكون قاعدين عاصرين الفراش بتاع الهادي جمعة في قرية الهشابة ولا مواسيين ناس قرية ام قرين عشان ديل ما قادرين يخلوا عوينهم يمشو يردوا يجيبوا موية ما امان بقي مافي في قري اهلي ولكن الله يا بنات اعمي مافي زولا جاب خبركن ولا خبرنا كلهم في حفلة جمال فرفور وناس الساكنيين في الابيض العامليين فيها حقتهم جو العميان شايل المكسر ما جايبين لينا خبر والفنان وقت قام غنا جنس رقيص والله ما زعلت الا من رقيص رئيس الاتحاد البرجوازي الخامي اهلنا وباقي عليهم رئيس طوالي وبقو ليه جنقو زي الفي الرواية بتاعت بركة ساكن هم مسامير الارض في فترة الزراعة والحصاد وشايلن محصولهم جايبنو لسوق ومدينهم الفتات وقت ما يموت ليهم زول كان بستفدوا منه بنلقي الجماعة بمشوا حفلة فرفور وبرقصوا وبحتو في النبق ومابمشوا يشيلوا الفاتحة في الزول الشغال بضراعو عشان يجو البرجوازين ديل ويعيشوا في الهجيج في محلية الهجيج وكمان بقحنا القالوا دي مال نفير بتاع لقمة الشافع الصغير وبعد داك يقوم ينادوكم ياناس الابيض ياغنم اسع كان طوالي يقول ليكم تك عج صحي غنم وفي الغنم قرج كمان ما غانم لبانة ما منها اي فائدة لا في لحمها ولا صوفها ولا جلدها وماعندها لبن صدقت يا قلت ناس الابيض غنم بس كدي افرز لينا غنم الاشلاق من بقية الغنم غنم الاشلاق بحبوا الطرب والضرب وكدي مافي غنم زريبة العيش في الناس الكانوا قاعدين في الحفلة . **انتو كان ماصحي غنم الاجانب الشغاليين طلبة الجابوهم ناس بتاعين الصرح الببنو فوق قدام الجامعة داك برقصوا ومعهم زولهم المفتكر نفسواهو سيد الغنم عشان جاي يستثمر فوقهم كان احسن يبني له كر بتاع بهائم وبدل من المبني العايز يسوي دي وشايفوا كدي زي الكانوا اشتري الابيض بناسها برقصوا وسط حرائرنا وكريماتن وبنات بلدنا والله صحي غنم لان الناس ماتوا فوق شيكان وحصلهم الهادي جمعة انتو الناس الاجانب ديل قبل كدي زول من بلدهم في الاستديوا الشهير مشو لقوا بنهك في عرضنا من طالبة جامعية قبل سنين وبصورها كمان غنمي ترعي صحي كدي والله يا ناس الابيض عجبني ليكم وقت قالوا ليكم ياناس الابيض ياغنم وما قمتوا رديت الاعتبار بس كدي شوف لينا التيوس والخرفان وين وتشتاهلوا عشان انتو ما عندكم كرامة ولا اخلاقة.



عمر محمد عمر ود اب كر
[email protected]

تعليقات 7 | إهداء 0 | زيارات 3707

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#892956 [أب احمد]
0.00/5 (0 صوت)

01-22-2014 09:17 PM
سبحان الله اولاد اب كر بقو يكتبو , يعني انادي فلاتة كان ماسكة بلا , الله يرحم العمات حوا جنقي و بنات محمد و بت النيل و حاجة حامدة و الدقة وام سبيلة و كبرى و أختها حليمة حتى أنداية أم الجاك و بريمة و التي كانت لكوندا أولاد اب كر, آكلي رسين الجزار كودي و ودكسلا و فجل الحاجة كريم عطانا و قوانص دجاج محمد الحسن ..!!


#892806 [الفاتح]
0.00/5 (0 صوت)

01-22-2014 05:59 PM
الشماته في شنو يا ود أب كر .. ما ياهو ده واليكم من ناس الأبيض خليه يرد على الناس القالوا ليكم يا ناس الأبيض يا غنم ..... ناس الأبيض ما غنم ... ناس الأبيض ناس فهم وكرم


ردود على الفاتح
United States [ود الابيض] 01-23-2014 01:36 PM
طير ولا غنم !
الفرق بين الطير والغنم الضنب والقرون
في الابيض ضع كل قناعاتك وانسانيتك أرضا
فقد ساد فيها قوم لئام
يجدي معهم الضرب والنبذ
وبمشوا بالاهانة
اكتر مدينة في السودان فيها بصاصين وكدايس وبتاعين مصالح
يا حليل اولاد الابيض الفرتقوا منها وهجوا من الوجيع الفيها
ومبروكة على الرمم الرخيصين رخصة الكول
أنا نسيت
مع الغلاء دا الكول أغلى منهم


#892773 [غارسيلا بولاد]
0.00/5 (0 صوت)

01-22-2014 04:59 PM
ياود اب كر،، كركور مليان قططة سداتو ام قرص، كلام المشاطات وستات الجبنة دا مافي داعي ليهو، ماهو الجديد في موضوعك المهبب دا، حتى الاسلوب الدارجي غير متقن، حفلة في ميدان الخماسيات، ياخوي كل مدن السودان بها ميادين احتفالات وحفلات ورقيص وهجيج وحت نبق والقرد والفقس الفقس، وعمك ديك العدة خيرة شاهد على الهجيج.


#892340 [كبسور]
0.00/5 (0 صوت)

01-22-2014 09:41 AM
ياخى دى اكبر اقليم منتهى ومنتهك
تعرف انه كل العملات الصعبة طالعة من كرفان ( صمغ / ضان / بترول / كركدى / ابل ) وهم افقر ناس فى الخدمات
عجبنى ليهم قالوا كل يوم اعلام الولاية يشيل كمراته ويصور سيخ المسجد الكبير عشان يعكس نفرة تنمية كردفان وقفت وين ؟
ههههههههههههههه
ان شاء الجنجويد يقبلوا على الرجال عديل
انتوا زمان المهدى ما ثار عليكم فى قضية عرس راجل لى راجل ؟ ولا مسرحيه كانت ؟


#892331 [aljamed]
0.00/5 (0 صوت)

01-22-2014 09:35 AM
عليك الله انت كاتب.. عربيك كعب


#892204 [الدندور أبوعوه]
0.00/5 (0 صوت)

01-22-2014 07:58 AM
والله يا ود أبكر كلامك صحي والمثل حق أهلنا اللوقان في الليري قالوا ((البتشتح تلقي البركبوها)) وأظن أهلنا في الابيض فيهم البشتح وكان ما فيهم البشتح مغتصب محلية شيكان وينو هل دخلو السجن هل نفذوا حكم الله فيه؟؟ الكضابين ناس هي لله هي لله وهي في الحقيقه هي لكروشهم وفروجهم أبداً ما لله . وديل ما بعرفوا الله علي الإطلاق ماسونيين وزناه ومغتصبين .
وناس الابيض غنم فوكم شويه جاهم أحمد محمد هارون مطلوب محكمة الجنايات الدوليه وجايب معاهو الجنجويد وزي ما أفسد وإغتصب في دارفور وجنوب كردفان الودع حمدكم يا ناس شمال كردفان ختوا البياض .وبدأ الجنجويد في ممارساتهم اللا أخلاقيه من أول يوم وصلوا قتل وإغتصاب وسرقه لكن يا ود هارون المحكمه الجنائيه وراك وراك لمن تقبض عليك وكل هذه الجرائم مسجله في سفرك المشؤم.


#891940 [ابونديبو]
0.00/5 (0 صوت)

01-21-2014 10:12 PM
هو يا ود أبكر بلش خطرفة في الفاضي ما كان في فرفور في الخماسيات ....ده واحد تاني اسمه ...ودةمنة
البقارية مقلد جديد من الواعدين رغم انو كبير في السن


عمر محمد عمر ود اب كر
مساحة اعلانية
تقييم
1.00/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة