في



المقالات
مكتبة كتاب المقالات والأعمدة
د. علي حمد ابراهيم
ياجماعة حصلوا الزول ده قبال ما يركبوه التونسية !ا
ياجماعة حصلوا الزول ده قبال ما يركبوه التونسية !ا
01-16-2011 07:33 AM

ياجماعة حصلوا الزول ده قبال ما يركبوه التونسية !

د.على حمد ابراهيم - واشنطن
alihamad45@hotmail.com

فى الوقت الذى ترتجف فيه الانظمة الدكتاتورية فى المنطقة يخرج السيد البشير ويقول للشعب السودان المحاصر بالآلة الامنية والغلاء - يقول ليه حكومة مدنية مافى وحكومة علمانية مافى وتعدد ثقافى ودينى وتعدد هوية مافى .- سعادة المشير يبدو انه يقضى اجازة سنوية فى جزر فيجى وما جايبل خبر الدنيا المقلوبة . ويبدو ان لم ير زين العابدين بن على الباطش الاعظم وهو يرتجف ويقول للشعب انا فهمت والرسالة وصلت ولكن متأخرة عن الميعاد ثلاثة وعشرون عاما مثل رسالة شاوسسكو الرومانى الذى صار مثلا يضرب لحالة التيه كما كانت مارى انطوانيت التى طالبت شعبها بأن ياكل الجاتو اذا لم يجد الخبز الحافى وكانت تلك الكلمة هى التى فجرت اعنف ثورة فى تاريخ البشرية وقادت الامبراطور والامبراطورة الى المقصلة . هسع الناس فى شنو وزولنا الحسانى فى شنو ( مع الااعتذار لنسابتى الحسانية ) الهبانية خصوصا العزيز الثائر الضكرات التكاسى البطل هشام هبانى .- منو القال ليك نحن عاوزين الآن دولة مدنية او علمانية . نحن عاووزين سلامة ارواحنا وشوية لقيمات صار الحصول عليها عزيزا بسبب اسعار وزير ماليتك الذى يبدو هو الآخر ما ناقش الحالة التونسية . اوعى يقول لينا بكرة اكلو موص مثلما قال لينا النميرى قبل رحيله الذى كان صورة طبق الاصل من رحيل بن على . اصلو الجماعة ديل بشبهو بعض فى الحياة والممات . يعيشو بزخ تمام ! وينتهوا بسرعة تمام ! يأخى اعملها دولة عسكرية من طق لطق - ما فارقة معانا . اصلو الرصاص يقتل والجوع يقتل وبوعزيزى التونسى حرق نفسه بسبب الجوع . تقول لى دولة مدنية مافى ودولة علمانية مافى . - دى دايرة ليها برهان . ما نحن واحد وعشرين عايشين فى العك ده وعارفين انه الحاصل ده لا دولة شريعة لا دولة مدنية لا دولة علمانية . دى دولة خاصة وعينها قوية .ينطبق عليها وصف الخليفة عبد الله التعايشى

لاميره النور عنقرة اللذى ارهقه بعدم طاعته للاوامر فقال فيه انه لا يخاف منى ولا يخاف من الله .. انت برضو راكبنا عنقرة وامرك نافذ فينا وقابلين الى ان يغيض الله لنا مخرجا . ما طالبين علمانية ولا دولة مدنية بس طالبين السماح ياسيد السماح وحاتك . بس نطلب منك ان تتمعن فى وجه زميلك زين العابدين برهة وهو يتحدث الى الشعب الذى قهره ثلاثة وعشرين سنة وهو ي اخيرا . انا ذكرى والذكرى تنفع المؤمنين . المثل يقول مضارفىة المؤمن على نفسه حسنة وانت ا سان مؤمن كنت عاوز تأكلنا مما نزرع و تلبسنا مما نصنع لكى نفوق العالم اجمع كما قال شاعركم الصنديد الذى سكت اخيرا من خجل وحياء لا فض الله له فوها . نعم كنت تريد لنا ذلك ولكنها صرجت وطلعت اوت سايد لعبة قون كما كان يقول
المرحوم المذيع الرياضى الالمعى طه حمدتو . يازول ولا يهمك اصلو الجايات اكثر من الرايحات . ما اصلنا حقل تجارب عتيد جرب علينا كل العسكريتاريا كل هواياتهم المتعددة فوجدونا صامدين وصابريبن وكمان عندنا مقدرة على تعاطى الفكاهة والشماتة , واللداحة والبجاحة ونقول لك هل من مزيد . بس قالوا الدين الوصية . ووصيتنا لكم أن تعمل حسابك من التونسية . اصلها قالوا اليومين ديل بتبحث عن ركاب جدد وعندها مقاعد خالية كثيرة . هل بلغت . اللهم فاشهد .

دكتور على حمد ابراهيم - واشنطن
واشنطن
مدنية





تعليقات 16 | إهداء 6 | زيارات 3706

خدمات المحتوى


التعليقات
#79265 [ahmed]
1.00/5 (1 صوت)

01-17-2011 03:00 AM
يا أخ عبدالله الطشاش في بلد العمي شوف في كوبري واحد هنا في امريكا
معمول في خليج علي المحيط الاطلسي(bay bridge) في ولاية ميرلاند لو فرتقو بعمليهو 25 كوبري من كباري البشير بتاعتكم دي ,ولا مش كدا يا د.علي حمد اما الشوارع والله ما عارف كيف بقعودو في مكاتبهم لما يرجعو السودان بعد زياره لامريكا ولو كنت مكناهم والله لما رضيت لبلدي ان تكون اقل من دلك آل كباري وشوارع آل .
نتمني ان نتلقيك في القريب العاجل يا د.علي واميلك لوامكن.


#79216 [م.ب.الصديق]
0.00/5 (0 صوت)

01-16-2011 11:43 PM
فى ديناصورات كتير فى المنطقة فى إنتظار التونسية.....بس نحنا بهمنا أب جاعورة.
بتودى وين يا ربى!


#79214 [على جمد ابراهيم ]
0.00/5 (0 صوت)

01-16-2011 11:41 PM
لا غيابى ما طال . انا ما انقطعت من السودان يأخ الطيب . كل ما اذهبالسودان القى الاناس الكانو ساس ورأس القاهم يشحدوا . وياكلو بوش الفول وملابسهم ممزقة وشايلين روشتات الدواء العاجزين على الحصول عليه لااتفاع سعره ة. وقد كانوا فى زمنالديمقراطية يتلقوا علاجهم وتعليم اولادهم بالمجان . انا ذاتى قريت من الاولية الى جامعة الخرطوم مجانا وكمان كانوا بدونى مصريف جيب اسمها البيرسرى . وعندما اسافر فى اجازتى الستوية باخد حق ترحيل لبلدى الرلاسمى مركز الرنك اعلى النيل مدينة القيقر هسع تانى اروح وين بعد ما وديتو الجنوب فى داهية . الاعربات الواقفة قدام البيوت دى لازم تكون عربياتكم او عربيبات المحاسيب والمنتفعين والكوزنجية بالانتساب . منو الموظف الماهيتو تجيب ليه كسرة لااولاده دلوقت خليك من ثمن العربية . انت الماجايب خبر لانك من المحاسيب المستفيدين . صحيح الالى اختشوا ماتو . بعدين ياللخو مسعول من الخير الدولار سعره بقى كم جنيه اليوم . ده سؤال مهم لأتكم عملتو الانقلاب عشان ثمنة الدولار ما يصل عشرين جنيه على رواية صلاحرار - آسف اقصد صلاح دولار . غايتو خشمكم مانع ومستعدين تغالطو رب العالمين .


#79048 [ابو سامي]
0.00/5 (0 صوت)

01-16-2011 06:35 PM
الميمى الطيب عبد الله لو كنت فعلا طيب وعبدا لله كان شفت حال عباد الله صحيح في ناس ما كان قدام بيوتهم ولا كارو الآن واقفة سيارات أخر موديل لم\\كن من هم ؟؟؟؟ وفي ناس كانوا ساكنين مرزوق قبل التخطيط والان في العمارات الشاهقة أما الجامعات فيكفي أنها تخرج جهلة وأميين بشهادة أهل الحوش مش حوش بانقا لا حوش التعليم وقديما قالوا عين الرضا عن كل عيب كليلة وعين السخط تبدي المساويا وأنت عينك عين رضا شكر البشير زي ما تشكر لكن الشعب السوداني حزم أمره وعلى الشارع عديييييييييييييييل وكان ما عجبك أركب التونسية وصاحبكم حجز مكان سكنوا قبل شهرين وللناس العارفين ببواطن الامور الراجل مهمته انتهت وباقي يبصم على دولة الجنوب وبعدها المضللين باسم الشريعة والمنتفعين لا مكان لهم إلا بعد ما يرجعوا زي الشعب السوداني الموجود في دارفور والنيل الابيض وتلال البحر الاحمر عندما نتساوى والمال العام يرجع الخزينة عندها لكل حادث حديث


#79020 [مامون]
0.00/5 (0 صوت)

01-16-2011 05:19 PM
انتا من زمن كارلوس البعتوه للمخابرات الفرنسية ياالطيب عبدالله--------قال عربيات كارلو قال-------------مهزلة واول البيعات, ومرورا ببيع وشراء الذمم وانتهائا ببيع الاراضي الزراعية ثم تفتيت الوطن وبيعه وقبض الثمن-------وكل هذه الشوارع والكباري والمباني بما فيهم القصر الجديد الذي تطبلون له وسد مروي انما شيدت بقروض وهبات خارجية من جهات معلومة وقبض حرامية الانقاذ عمولتهم بالمليم من تلك الاموال------واغلب الشركات والبنوك ملك لافراد العصابة الحاكمة الا ما ندر--------ناهيك عن الغلاء الفاحش الذي يستفيد منه تجار النظام------وانهيار كل المرافق العامة من تعليم ورعاية صحية-------والبقية في حياتك-------وتصبح على وطن بحجم جزيرة توتي بعد ما اكلتوا الجزر الامريكي.:D ;( ;( ;) ;) ;)


#78962 [عباس]
0.00/5 (0 صوت)

01-16-2011 03:30 PM
الغريبه ان هناك معلقين باسم الكيزان ( حمانا الله ) يدافعون عن البشير وكل حجتهم شوار الظلط والعمارات و------- و------- ثم يذكر بانه مش مؤتمر وطني ولا كوز --- وبانه وطني محايد بالرغم من انه سب الاحزاب ورموزها وبان ليس هناك رجعه لهم --------- واقول لهم الاتي ----وقد تلاحظ كثره هؤلاء هذه الايام وانا اصفهم بالغباء ----- القارى للراكوبه ما ناس قريعتي راحت---- وهو يميز من اول الرد بين الخبيث والطىب ----- وانت ايها البليد بذكرك انا ما مؤتمر وطني معناها وطني ----والسياسه بعد انفصال الجنوب يا ابيض يا اسود -----فا اشرف ليك تكون وطني ملعون -- بدل مخاطبتنا بكل هذا الغباء -----تم قتل شقيق ليلي الطرابلسي ---- واصحاب الغبائن في بلدي الحبيب بالالاف ----غايتو الدفن الا في خلا امدرمان


#78877 [سودانية]
0.00/5 (0 صوت)

01-16-2011 01:51 PM
وانت يا الطيب ما شايف الديون الاربعين مليار دولار وما شايف الطلبة النسو حاجة اسمها وجبة فطور وما شايف الشفع البرضعو الشاي الاحمر في البزازة وما شايف الناس البقت تاكل وجبة واحدة في اليوم وتكون سخينة بدون سلطة وما شايف كيس الرغيف البقي اربعة رغيفات بس وما شايف المواصلات البقت بضعف الثمن وما شايف الطلاب البقعدو في الواطة عشان ما في كراسي ولا ما شفت الطلاب الاهلن مرقوهن من المدرسة عسان ما عندهم حق المصاريف ولا ما شفت العيان والمكسور البمشي البصير عشان ما عندو حق العلاج ولا ما شفت الشباب القاعدين في الضللة من العطالة ولا ما شايف البلد البتتقطع حتة حتة ولا تكون ما لابس النضارة اظنك


#78876 [maha]
0.00/5 (0 صوت)

01-16-2011 01:50 PM
انتو فارات عشا البيتات دا (اخوي الطيب) شكلوا من الذين رضيت عنهم الانقاذ يالطييب الطيب (انت دفعوا ليك كم )دا بعيدا عن اعين الضرائب اقول ليك الحمير ماتوا من الجوع والعربات دي استسمارات ناس الانقاذ وواقفة في بيوت السواقيين المساكين وبرضو الراضية عنهم الانقاذ؟) (؟) (؟) (؟) (؟) (؟) (؟) (؟) (؟) (؟) (؟) (؟) (؟) (؟) (؟)


#78871 [كمال]
0.00/5 (0 صوت)

01-16-2011 01:48 PM
الزول يكذب ويكذب حتى كتب عند الله كذابه واعوز بالله من الكذابيين فمابالك بانسان يكذب واحد وعشرين سنة


#78813 [موجوع شديييييييييد]
0.00/5 (0 صوت)

01-16-2011 12:15 PM
التونسية زولنا ده زاااااااتو ما بستاهلا يربطوا في عجلاتا ويمسحوبوا المدرج هو وعايلتو .....


#78806 [عادل]
0.00/5 (0 صوت)

01-16-2011 12:11 PM
المشكلة مش يركب تونسية ولا سودانير المشكلة البركبها دي حتمشي بيهو وين؟ الراجل اده مطارد من الجنائية ومافي دولة ختقول ليها اتفضل عندنا خوفا من اخراج الجنائية وخوفا من اجباراها علي تسليمه الي لاهاي. يعني حيلف في السماء ويهبط في حوش بانقا ونحن نتولي الباقي.


#78797 [حسن ابراهيم]
0.00/5 (0 صوت)

01-16-2011 12:03 PM
لمن تكتبون؟ من تخاطبون؟ توحي كثير من كتابات السودانيين ومواقفهم المكتوبة، وكذلك من خلال معايشاتي الشخصية أنهم يكتبون من وحي الشللية والقعدات،، فكم من مواقف اتخذها فلان وعلان ممن يشنفون آذاننا هنا مسايرة لتيار أو كلام يصادف هوى فلان وفلان وعلان وعلان من رفقة المجالس.


#78734 [لقمان]
0.00/5 (0 صوت)

01-16-2011 11:01 AM
والله ياعبد الله الطيب خلاص زمن كلامك دة راح.. اتقى الله ياخى


#78701 [ابو النصر]
0.00/5 (0 صوت)

01-16-2011 10:35 AM
الاخ الطيب عبدالله الي يتحدث عن التنمية وتناسى ازلال الشعب والقهر والجوع والفقر والفساد الاداري والاخلاقي والمالي وتناسى والتشهير بالناس وتشطر الدولة جهل الشعب ودجل الحاكم


#78688 [Mahir]
0.00/5 (0 صوت)

01-16-2011 10:19 AM
يا زول اقول ليك صحيح كلامك. اصلها تاني ما فارقه سودانير ولا تونسية المهم راحة البال يا عيشة كريمة او موت عديل والبقية عند بن علي.


#78546 [الطيب عبد الله]
0.00/5 (0 صوت)

01-16-2011 08:42 AM
الفرق كبير يادكتور بين البشير وأحسن حاكم عربي وأظن غيابك طال ولم تر السودان قريباً الناس يادكتور شايفة الطرق وشايفة السدود وشايفة الجامعات وشايفة المصانع وشايفة الذهب وشايفة البترول والبيوت الكان واقفة قداماا عربات كارلو
بقت واقفة قداماا أحدث موديلات السيارات--- الجنون منو ده يادكتور الذي ينتفض عشان يجي الصادق او نقد أو الميرغني -- البشير سيد الناس دي كلها نزاهة وخلقاً واخلاصاً ورجولة -- واللع أن ما انقاذي لكن الحق يجب أن يقال--


ردود على الطيب عبد الله
Saudi Arabia [أفتيموس يوناني] 01-17-2011 11:32 AM
بسم الله والصلاة والسلام علي النبي المبعوث رحمة للكافة



كلامك صحيح 100% وناس قاعدة في أمريكا وتنظر لتلك الدول وبغير البشير


لن نرضي بديلاً إلا أن تغمده الله برحمته هنالك ندعو الله أن يولي علينا من يصلح...

United Arab Emirates [gogo] 01-16-2011 10:29 AM
يا الطيب الظاهر عليك طيب اكتر من اللزوم
جبت الكلام دا من وين في السودان دا زاتو البنعرفو نحن
طيب زولك دا لو نزيه امشي اسألو عن ثروة اخوانو ومرتو التانية بس مجرد سؤال


على حمد ابراهيم
على حمد ابراهيم

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة