01-30-2014 11:41 AM


لو أن صمويل بيكيت رائد مسرح العبث واللا معقول الأيرلندى الأصل (1906-1989) يعيش بين ظهرانينا الآن لأحنى هامته لنا من فرط العروض المسرحية العبثية واللامعقولة التى أصبحنا نشاهدها على مسرح حياتنا البائس !
كانت هذه مقدمة مقال بعنوان (أهو كلو تعاون) كتبناه عندما قامت الأستاذة إشراقة سيد محمود بتعيين شقيقها (مجدي) مديراً لمكتبها حينما تم تنصيبها وزيراً للتعاون الدولي علماً بأنه ظل يتنقل معها مع كل منصب فقد كان معها عند توليها منصب وزارة الرعاية الاجتماعية بالولاية الشمالية ثم إنتقل معها حينماأصبحت وزيرة في الحكومة ثم إنتقل معها حينما أختيرت معتمداً للرئاسة بولاية الخرطوم ثم بوزارة التعاون الدولي وأخيراً حط الرحال معها بوزارة العمل !
لقد قلنا في ذلك المقال أن ما حدث من تعيين يعد سابقة خطيرة لم تعرفها الأمم السابقة ولن تعرفها الأمم اللاحقة فمسألة التعيين في مرفق حكومي عام تحكمه قوانين العمل و(التنافس) إلا أن الست الوزيرة وهي مستضافة قبل أيام في برنامج الأخ عادل سيدأحمد (نادي الإعترافات) بفضائية أم درمان وفي سؤال لها حول هذا الأمر أجابت بأن القانون يسمح لها أن تقوم بتعيين من تشاء !! وأضافت (وأنا بقول ليكم الكلام ده وأنا وزير عمل) !
ثم طفقت (سيادتها) تردد بان هذه الوظائف وظائف مؤقتة وأن أصحابها يذهبون بذهاب الوزير وأنهم ليسوا في كشف المرتبات وحينها قام الأستاذ عادل سيدأحمد بسؤالها (طيب أخوك ده بيصرف مرتبو من وين؟) وهنا أخبرته (الأستاذة) بأن شقيقها لا يصرف من (الفصل الأول) في الميزانية (بند المرتبات والأجور) لكنه يصرف مرتبو من بند مخصصات الوزير (شفتو كيف)؟
العبد لله (بعد أن تناول الحبوب) طفق يسأل نفسه (معقول يكون في قانون زي ده؟) ! يعينوك وزير تقوم تجيب أخوك مدير لمكتبك وأختك (سكرتيرة) وخالك (سواق) وعمك (جنايني) وجارك (كهربجي) وكووولهم يصرفو مرتباتهم من مال (الشعب الغلبان ده) ؟
طيب دى وظائف تتبع للحكومة (مش قطاع خاص) مش ممكن يكون في ناس أكثر خبرة وكفاءة من الناس ديل؟ ألا يندرج هذا الفعل تحت المحاباة والمحسوبية؟ لماذا يستأثر شقيق (الست الوزيرة) بهذه الوظيفة دون غيره؟ ويبقى فيها ما بقيت ويحط الرحال معها أينما حلت ؟ هل يمكن لقانون في الدنيا أن يجيز هذا الفعل ؟ هل يمكن أن تكون صلة القرابة بالوزير هي كل ما يحتاجه المرء ليتم توظيفه (حكومياً) ومن ثم يتمتع براتب ومخصصات تستقطع من المواطن الغلبان؟
وهل فات على الست (الوزيرة) أن الأجور والمرتبات التي يتم إدراجها في (الفصل الأول) للميزانية ومخصصات الوزير كلاهما (مال عام؟) ، إن الست (الوزيرة) إن كانت تري بأن مخصصات الوزير (ليست مالا عاما) بل تخص الوزير يصرفها أنى شاء فهذه وأيم الله كارثة !
دعونا نسلم بأن هنالك قانونا كهذا يمنح الوزير صلاحية أن يعين ما يشاء من أقربائه وجيرانه وبني جلدته في وظائف حكومية .. طيب الألف وعشرومية وزير إتحادي وولائي ديل لمن كل واحد يعين ليهو خمسة القصة ح يكون شكلها كيف؟

إن حديث الست الوزيرة بان القانون يجيز لها تعيين شقيقها في هذه الوظيفة (كلام ما بيدخل الراس) ولأن (العبدلله) لا يفهم في القانون كثيراً لذلك من هذا المنبر نناشد الست (الوزيرة) أن تمدنا بصورة من مواد ذلك القانون الذي يجيز هذا الفعل للإطلاع عليه حتى نقوم برفع دعوى بعدم دستوريته لتعرضة مع مبدأ المساواة بين المواطنين … ومنها كمان الزول (يثقف نفسو وكده) .

كسرة :

القانون ده يا ربي عندنا برااانا وللا الناس دي كووولها عندها ! يعني مثلاً وزيرة العمل الألمانية (أندريا ناليز) ممكن تعين أخوها (شارل ناليز) مدير لمكتبا وللا الكلام ده في (فرنسا) ما بمشي؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

تعليقات 41 | إهداء 0 | زيارات 7787

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#903232 [waddafi]
0.00/5 (0 صوت)

02-01-2014 01:07 PM
القانون في اي بلد يتيح للحاكم اختيار طاقمه في الحكم ويتيح للوزير اختيار طاقم وزارته وفق مؤهلات ومعايير مهنية يحددها هو وحيث ان كلاهما مساءل امام الشعب والمجالس التشريعية فلا يمكن ان تساءله عن انجازاته او اخفاقاته وانت تفرض عليه من يعاونه. لذلك لا يسأل عن انه عين اخاه او إبنه ولكنه يسأل عن انجازاته واخفاقاته اذ لا يستقيم عقلا ان تأتي به وزيرا وتحدد له طاقمه ثم تسأله عن اي اخفاقات وهذا ما يسمى بوضع العصى في الدواليب او كمن القاه في اليم مكتوفا وقال له اياك اياك ان تبتل بالماء فالوزراء هم من يسمون خارج الهياةو لا تنطبق عليهم قوانين الخدمة المدنية لان مسؤليتهم شخصية هذه النقطة تجاوزتها كل قوانين الدنيا لكن حساسية السودان الشديدة للمحسوبية و relative bias (المقبول في مثل هذه الحالات والتي يقتضيه مبدأ المساءلة هذا ) جعلنا نخلط بين الخدمة المدنية وعمل الوزير.فارجو ان نتصدى لعمل الوزير بالنقد وفضح اخفاقاته يشفع لنا حينها اننا اتحنا له قانون فرصة اختيار معاونية لتنا نفعل ذلك .


#902764 [وجع ضرس]
3.00/5 (1 صوت)

01-31-2014 08:17 PM
اها يا جماعة لو الوزيرة دي توفاها الله برضو بتسوق اخوها معاها القبر ......


#902595 [تينا]
2.50/5 (2 صوت)

01-31-2014 02:13 PM
ما قلت الا الحق اخوى الفاضل ((( ودالباشا ))) تسلم كثير ... فعلا الله المستعان بس ... تحياتى ...


#902426 [somebody]
0.00/5 (0 صوت)

01-31-2014 08:28 AM
شكرا استاذ جبرا يامبدع 0انت ماعندك رئيس علشان يتابع ملف خط هيثرو انت ياعزيزى عندك همبوك والمعنى واضح 0وشكرا


#902415 [ام الحسن]
4.00/5 (1 صوت)

01-31-2014 08:11 AM
قانون شنو 000الوزيرة كانت متوترة جدا وتطوطح وتتلولح فى الكرسى القاء كلو لامن وترتنى انازاتى بالطوطيح بتاعها ده

هى فاضية لمهامها الوظيفية المخصصات كلها صارفاها فى محلات التجميل والسوانا وتجميل وتلميع وتبيض البشرة ونقش الحنن والله دى واخوها قادين ميزانية اى حاجة يمسكوها

وزى ماقال زميلا ليك دى وزيرة شوفونى انا شغالة


#902282 [سودانى ساكت]
1.00/5 (1 صوت)

01-31-2014 12:11 AM
استاذنا الفاتح عليك الله اول خدمة اطلبها منك اتأكد لى انشاءالله الست دى ماكملت نص دينها..ودا عمل خير وماتشاورنى فى اى شئ.بطوعى واختيارى وانا فى كامل حالتى الصحية والعقلية قد اوكلتك توكيلا شاملا لتنوب عنى حتى فى دفع الصداق وانا اعاهدك باننى ساقوم بسداده من اول مرتب.العطالة قتلتنى والله يا استاذى العزيز.بس المؤسف سوف ينقطع التواصل مع ابداعاتك وروائعك التى تتحفنا بها.لانك طبعا عارف ظروف ومشاغل ومتاعب العمل. بس عليك الله ماتكتب فينى كمان تقول شغلت راحلها تقوم تحيب لينا هوا ساكت.من القلب لك حبى واحترامى استاذى.


#902254 [علي طه]
0.00/5 (0 صوت)

01-30-2014 11:13 PM
بسم الله الرحمن الرحيم
يالفاتح انت ماش المانيا وفرنسا ليه الكلام دا ما في ولا في جنوب السودان ولا تشاد القريبة دي لكن اعتقد ممكن في الصومال لأنها ما فيها لا حكومة ولا وزارات ولا يحزنون


#902223 [mak]
3.50/5 (2 صوت)

01-30-2014 10:08 PM
والله ياجبرا انا محتار جدا٠ وعلي وزن الوزيرة دي٠كدى شوف موقعى في الاعراب السوداني
لي ٢٨ سنه بدفع ضرائب وحتي الورشة زحلقونا منها بعد دفع كل الرسوم والضرائب حتي الخرطة واذن البناء بطرفي
ودافع رسمو كمان ٠ تم تسليم تلك الورش للضباط في الحارة ٢٨ بالثورة٠لوجودي خارج السودان لمدة ثلاثة سنوات
متتالة٠ يعني اكلو حقي حمرة عين واستهبال ٠شنو يعني الوزيرة تعين اخوها ٠منطقية ومافي مستحيل في السودان
بلد اصبح شعارها كف نف ٠ وبكل صراحة لو لقيت اي فرصة مابضيعها بس مالاقي فرصه شوف الرئيس عنده كم بيت وناس المهدي ماخدين نص امدرمان لو احقية وكمان اقدميه ٠لي الحق قبل الرئيس والصادق المهدي جدي الرابع مدفون قبل مقابر حمد النيل ان تسمي بهذا الاسم ٠سنة ١٨٦٥ م ولي ١١٨ فريب مدفون بحمد النيل فقط وجدين استشهدا في كرري وجدي ابو ابي من بني طابية
امدرمان ابي مولود بالموردة ١٩١٣ اخذت نصيبي من التعليم خريج اقتصاد اسكندرية احقه انا ولاالصادق المهدي
قطعه خمسين متر طيورنا منها والغريب بدفع لي فضائيه ولي اكثر من ٢٠ عام لم اشاهد تلفاز السودان حتي عند وجودي
بالسودان٠واصلا الارسال لايصل هنا وتلك محمدة٠لقد كرهت السودان بسبب تلك الذقون واللحي من كثرة الخداع والغش باسم الدين والعزف علي هذا الوتر لقد باعوا لنا صكوك الغفران لدخول الجنة٠ لقد فقدنا بصلة الحس وفقدنا الشعور بالمكان والزمان وامالنا في حلقات مفرغه من الرجاء ٠وحتي الحلم بخداع النفس عزه علينا في لحظة لاوعي


ردود على mak
European Union [ودالباشا] 01-31-2014 08:58 AM
اخ mak اقدر معاناتك اخى اهل امدرمان وبحرى والخرطوم اصبحوا قرباء يا هاجروا او باعوا بيوتهم الورثة للاغنياء الجدد وتشتتوا فى الاطراف حتى نمط الحياة فى المناطق العريقه تغيير والناس كذالك اذا تجولت فى مسقط راسك تشعر انك كالقريب بسيطه تطيورك من حتة قطعة ديل طيروا الناس من مناطقهم التى ولدوا وترعروا بها وقتلوا زكريات حياتها الدفينه حميمة المكان وربك يهون


#902202 [المستعرب الخلوى]
1.00/5 (1 صوت)

01-30-2014 09:21 PM
ابو ناجى ..يعنى انت بتعرف أحسن م الحكومة ..؟؟
دى لو ختيت ليها مليون واو مش حتوصل لنتيجة ..جبانة هايصة والحشاش يملا شبكته ..
قالت من مخصصات الوزير ..المخصصات دى كم ..؟؟


#902196 [radona]
2.00/5 (1 صوت)

01-30-2014 09:14 PM
مالك مقرضة مع الوزيرة اشراقة كده
خلاص كملت الفساد كله ما باقي الا الوزيرة اشراقة
يااستاذ جبرة خليك في امهات الفساد سودانير سودان لاين التقاوي والمبيدات الفاسدة والاوقاف والحج والعمرة
اها قالوا ليك انتاج الذهب وصل 80 طن منها 58 انبلعت جت بلاعه مالاقينه غير 22 طن التكتح مالقوه
خليك في التماسيح الكبار بتاعين تجنيب القروش والتحصيل البراني خارج اورنيك 15 او بنموذج منه
خلاص مالقيت الا المسكينة دي عشان شغلت اخوها


#902185 [ابو الدرداء]
3.00/5 (1 صوت)

01-30-2014 08:37 PM
يا اخونا وعمنا جبرا انت طبقت المثل ( عينك في الفيل تطعن في ضلو بلاهي انت شايف الناس تعبر ملاين الدولارات من الاقطان والسودانية وغيرها بقيت فالح بس في المرة دي يا خي حل لينا بس الناس البقت وزراء ومعتمدين وفرق وعمداء في عهد الانقاذ ديل وبنو العمارات والفلل والقصور والمزارع جاي بس علشان تضايق الحرمة دي في مخصصاتا طيب كان عملت ليه عقد مستشار كان قلت شنو دي برضو على فكرة موجودة في الوزرات للحبايب والمريدين ودمت


#902159 [حليمه وجزمتا القديمه!!]
4.50/5 (2 صوت)

01-30-2014 07:53 PM
ياجبرا بعد خطاب الريس فى قاعة الصداقه برضك لسه عايش؟!! والله الف سﻻمه ارجوك الكسره الجايه خليها (يا معارضه عملتوا شنو فى خطاب الريس) حيث أن المعاضين طلعوا ساكت ولما وصلوا مأمنهم قالوا قاعدين ندرس وقاعدين نفكر وبعضهم لجاء الى قرية ام حراز حيث تواجد الفقرا الكاربين ليفكوا لهم الطﻻسم الرئاسيه التى دشها البشير وما فهموا اى حاجه منه إذا كان سيادتو قرر يفتح الشباك وﻻ يقفلو !!.


#902146 [برتقال ابو صرة]
2.50/5 (2 صوت)

01-30-2014 07:36 PM
يا سيدى كل شى يجوز
مثلا قبل 12 شهر سعر السراميك
ب24 ج و الحين 70
كيس الاسمنت ب25 الحين58
وووووووووووووووووووووو


#902079 [صلاح نور الدين]
0.00/5 (0 صوت)

01-30-2014 05:33 PM
دا اسمو حافظ الاسرار يا سيدي وهو بالمنطق يعمل بقانون العمل


#902072 [نائل]
3.50/5 (2 صوت)

01-30-2014 05:24 PM
عشان كده لما يقولوا ليك نحن مستعدين نحاكم أي زول مهما علا شأنه بالقانون لازم تصدقهم يا أخ جبرا ....... ياهو ده القانون مفصل وجاهز ومضبوطة نغمته وهم ما خايفين من أجعص جعيص عايز يعزف على أوتاره ..... عايز يفتح بلاغ يفتح .... عايز محاكمات أيوه ممكن إجراء محاكمات والنهاية براءة أطفال وكمان براءة إختراع .


#902007 [تختخ]
0.00/5 (0 صوت)

01-30-2014 04:09 PM
لالا الكلام دا في فرنسا مابمشي.لكن الوزيرة الالمانيه دي كان مشت (الاتحاد الافريقي)ممكن يمشي


#901992 [Komi kuku]
4.50/5 (2 صوت)

01-30-2014 03:38 PM
كل شيء وارد في بلدنا دي، امكن الوزير بيكون بيجيب المخصصات من بيتهم وكدا يعني


#901985 [أمير أبوقنايه]
4.00/5 (1 صوت)

01-30-2014 03:28 PM
الاستاذ الفاتح جبره
لك مني خاص التحيه والود والاحترام

والله كلامك كلو كلام معقول واسئلتك كلهامشروعه و ما فيها اي شئ من وجهة نظري أيام كان عندي نظر لكن ليه يا أستاذ ما سألت عن الراتب اللي كان بيستلمو مدير المكتب بتاعها دا، يعني مليون مليونين خمستاشر عشرين تلتين اربعين خمسين وهلم جر لأنو برضو يا أخونا الموضوع بيفرق وعليه لازم الست الوزيره تجاوب علي هذا السؤال بالاضافه لما ورد في عمودك .

من ناحيه اخري لو سمحت لي انا برضو ولازم ومصر وملح باعتباري سوداني وأحد قراء هذا العمود اللذيذ لازم لازم اعرف إذا ممكن بند مخصصات الوزير دا كم يعني ولو بالتقدير وهل هو رقم شهري ثابت ولا متحرك ولا شنو وممكن كمان نضيف سؤال برئ كدي يعني الاموال الشهريه الخاصه بمخصصات الوزراء كم وهل يقوم الوزير بصرفها بالكامل ام بالكاد وإذا لا يقوم بصرفها كامله أين يذهب الجزء الغير مصروف.

أرجو مخلصا أن أجد إجابه علي أسئلتي هذه ولا إذا مافي حد رد علي لازمتنو وبالتأكيد أقوم أشرب من البحر وما في حد يسألني أي بحر لأني وقتها سأكون حر للشرب ولو من البحر الاسود.
لك مني كل الود والاحترام


#901981 [الحقاني]
3.00/5 (2 صوت)

01-30-2014 03:23 PM
عليك الله يا استاذ خيرا لها ولدينها ان تكون برفقت اخوها الذي هو من محصينيها وتصرف له مرتب معقول ولا تهبر هبرة وتفتح له شؤكة في دبي ولا ماليزيا كما ......
يا استاذ جبرة لكل والي او وزير اتحادي او ولائي حاشية اكرر حاشية إلأ من رحم ربي لذا انا مع اشراقة واخوها مجدي في هذه النقطة تحديدًا ولا تلوموها اما مغارنتها بالغربين في هذه الجزئية فقد جانبكم الصواب فليس للغربيين خوف اوحياء ووزيرة العدل الفرنسية المن اصول مغربيه خير شاهد
اما من يقول ان الوزيرات لا يتعرضن لمضايقات اوتحرشات فيكفي الغزل الذي كتبوه في الوزيرة المورتانية التي زارت البلاد دا طبعا قيد من فيض


#901977 [رمضان كريم]
3.00/5 (1 صوت)

01-30-2014 03:21 PM
اللهم ارفع مقتك وغضبك عنا ولا تسلط علينا من لا يخافك ولا يرحمنا

الشطة قادمة


#901973 [العمرابي]
5.00/5 (1 صوت)

01-30-2014 03:18 PM
حتي تتقي الرضعهالمشبعه كما افتي السلفي المصري


#901963 [habbani]
4.00/5 (2 صوت)

01-30-2014 03:07 PM
طيب معنى الكلام دا أى وزير ممكن إعين مرته سكرتيرة أو مديرة مكتبه .. عشان عينه ماتزوغ ..لأنه عندنا مستشفى عيون واحد فى السودان وبعنا أرضه وموقعه ومبانيه.


#901926 [ابوالفياض]
0.00/5 (0 صوت)

01-30-2014 02:37 PM
كلامك زي الدهب لكن هي بس عشان حيطة قصيرة اصلو ماسمعت بالوزير الذي امر بصرف اتعاب لبنته ونثرية لمدير مكتبه اللي هو زوج نفس بنته دي وبعدين الجماعة المتواليين ديل ما بعرفو يتخارجو بلهطاتهم دي لانهم لا عندهم منظمة شباب وطن ولا عندهم رابطة مراة ولاعندهم جمعيات يتبرعوا ليها من مال الدولة ويلحقوا بي هناك يعني يلهطوا كيف يعني؟؟؟؟


ردود على ابوالفياض
United States [نائل] 01-30-2014 05:49 PM
الوزير ده أيام الديمقراطية الثالثة ذهب لإيطاليا ومكث أكثر من شهر وصرف ما صرف مع شلة أدعت أنه هناك أموال ضائعة على الخطوط الجوية السودانية وتريد إرجاعها وقامت بعض الصحف بإثارة الموضوع آنذاك ولكن فات الأمر على الصحف عندما برر الأمر بأنه إستطاع أن يعيد للخزينة أكثر من مليون ليرة إيطالية ولكن الدولار الواحد وقتها كان يساوي أكثر من عشرين ألف ليرة إيطالية فكم إستعاد يا تري ما يساوي بالدولار ....... لكن أحيانا نحن غشيمين فهذا حفيد غردون يزورنا وكذلك الأميرة ذات الأصول النوبية زارتنا قبل كده ومرحب بكل فهلوي .


#901920 [وحيد]
0.00/5 (0 صوت)

01-30-2014 02:33 PM
يا استاذ جبرة ما تقوم نفسك .. دا قانون غير مكتوب زي دستور بريطانيا العظمى فقط يحفظه اهل الولاء و الحظوة و يتداول شفاهة ... و هو خاص فقط بالمتمكنين من متنفذي المؤتمر الوثني و المؤلفة جيوبهم من احزاب الفكة المتوالين لينهبوا من مال الشعب الفضل


#901918 [سامي البارودي]
0.00/5 (0 صوت)

01-30-2014 02:32 PM
هذا هو حال بلادي استاذنا جبرة الذي اصبح يدار بهذه المنهجية الأقربون ثم الأقريون هم الأولي في وظائف الدولة وأما اهل الكفاء فما عليهم إلي أن ينتظرو دورهم أو يسعو إلي الهجرة خارج الوطن وبالامس الغريب تم فصل إحدي قريباتي من التعليم بعدما تم تضتيع مستندات تخص طلب إجازة تقدمة به وكل ذلك عن عمد حتي تق


#901903 [ودالماحى]
2.00/5 (1 صوت)

01-30-2014 02:15 PM
الاخ الفاتح قلى المعقول في البلد شنو لو لقيتلك شى معقول يبقى الفيامه قربت تخل الخرطوم عن طريق امدرمان ولما تصل كبرى الفتيحاب مافى زول حايشوفها لانهم عايزين يستدرجوها لمن تدخل الكبرى - قبل كده 300 سباره دخلت لعاية الكبرى والسيد اللواء الجابوه في التلفزيزن قال نحن عارفنهم وتقول في حاجه اسمها معقول- موضوع الوزيره ده بسيط مقارنه بالكوارث البتحصلوالمعقول اكتر لو سمعن والى سنار بالامس في التلفزيون بيستقبل الوزراء والمعتمدين الجدد وبيوصيهم ام الوزراء والمعتمدين القدام قدموا خدمه ممتازه للبلد - بان لهفوا اكثر من نصف ميزانيه الولايه للعام المنصرم - وعائزهم يكونوا احسن منهم بان يلهفوا ميزانية العام باكملها- يشوف المهازل والى عجيب تقول ضاربين وشه بغربالعيش - والمصيبه انه لس قاعد وعائز معقول في بلدا مافيها وجيع - اللهم سلط على هولاء الذين لا يعرفون المعقول مرضا يهرسهم هم واهلهم واخوتهم وعماتهم وخالاتهم واعمامهم واخوانهم وكل من اكل او استغل حق هذا الشعب المغلوب على امره


#901897 [kamuzu]
1.00/5 (1 صوت)

01-30-2014 02:11 PM
ان عجبنا الناس ديل كدا والماعاجبو يشرب من البحر


#901889 [حمدى]
3.50/5 (4 صوت)

01-30-2014 02:06 PM
بالغت لكن
انت عارق القانون اكتر من الوزيرة؟
بعدين هى شغالة فى بيئة انقاذية يعنى بيئة دينية ودى حرمة لازم يكون معاها محرم
وليه هى بس؟ ما وزير التجارة بنتو شغااااااااااالة فى مكتبو وكمان قاعدة تتحدث نيابة عنهوووو
وبتسوى ليهو القهوة وتعوس ليهو الكسرة وتغسل ليهو هدومو
خليك ياخى فى تخصصك بتاع هيثرو دا


#901878 [ساريا]
5.00/5 (1 صوت)

01-30-2014 01:49 PM
الاخ الفاضل / الفاتح

هذا ليس وليد الانقاذ بدا في عهد نميري حيث وافق مجلس الوزراء ايامها للوزير ان يعين مدير مكتبه وسائقه الخاص
وهي كما ذكرت الوزيرة وظائف مؤقتة ليس في هيكل الوزارة الوظيفي تنتهي بنهاية
فترة الوزير في الوزارة واستمر هذا التقليد من حينها الى الان .

وكان السبب في ذلك قصة/ وهي ان ساعي مكتب وزير الاشغال (مصطفى جيش ) اخطاء
فاصدر الوزير قرار بفصله وعندما ارسل القرار لشؤون الموظفين
اعاده الى الوزير بانه ليس من سلطة الوزير فصل الساعي الا بناء على
اجراءات مجلس تحقيق ومن ثم قرار مجلس محاسبة ونصح مدير شؤون العاملين الوزير بانه فقط من حقه طلب نق الساعي من مكتبه وامتثل الرجل الكبير مصطفى جيش الى القرار القانوني. وقد اضيف لفترة تعين ساعي الوزير الى مدير المكتب والسائق
التعين قاصر على هولاء فقط .


#901873 [ساب البلد]
5.00/5 (2 صوت)

01-30-2014 01:44 PM
******** جبرة يا اخوي هذه دولة اللاقانون ****** كيف يحمل عمار عوض الجاز جواز سفر دبلماسي مع العلم انه لا يشغل و ظيفة حكومية ******* كيف يوقع عباس البشير (شقيق) البشير عقود عسكرية بالانابة عن القوات المسلحة و هو رجل (ملكي) ثم ياخذ عمولته بالطبع ****** هذا غيض من فيض **** الله يكتر من الحبوب يا جبرا حبيب الناس (كل الناس) ****************


#901872 [ود الكاملين]
5.00/5 (1 صوت)

01-30-2014 01:44 PM
انت يا جبرا ما سمعت بتعين (دبجو ) وزيراً في حكومة البشير وهو قائد متحرك في حركة العدل والمساوة - شفت كيف الوزارات توزع في حكومة الإنقاذ - وكمان بالله شوف موسى محمد أحمد هل يصلح أن يقود كارو - والله عجائب يا جبرا ...


#901859 [دا كلام ما صاااااح]
4.25/5 (3 صوت)

01-30-2014 01:28 PM
يا استاذ ما تقارنا بألمانيا .. نحن ناس مختلفين

الوزيرة الألمانية استقالت لمن بحثوا ولقوا انها لمن كانت بتعمل فى الدكتوراه
انها كتبت اشياء من غير الأشارة الى مصدرها
شفت ؟؟ يعنى معلومة علمية كتبتها من غير ما تكون دقيقة وامينة علميا وتشير للمصدر
ديل ناس ضعيفين .. نحن ناس رساليين ..
نسرق عينك يا تاجر
ونتمسك بحقوقنا فى مال الشعب ونعين اهلنا فى الوظائف
وفى الآخر هى لله هى لله .. لا للسلطة ولا للجاه


كسرة: طيب هى السلطة دى كيفنها ؟؟ والجاه دا كيفنو؟؟


#901854 [Sudani]
3.50/5 (2 صوت)

01-30-2014 01:24 PM
الله يا عمك الكلام القتو دا في الواق الواق ما بيمشي إلا في الواق الواق القاعدين فيهو انتو ديل


#901840 [عكليت]
3.00/5 (2 صوت)

01-30-2014 01:17 PM
يا جبرة عيب عليك تتدخل في السيرورة النبوية و الاندغام الوظيفي .. فقد قطعت اشراقة قول كل خطيب بأنها مبعوث العناية الالهية لانتشالنا من الظلمات الي النور برفقة شقيقها كما حدثنا القرآن بشآن سيدنا موسي و أخيه هارون عليهم رضوان الله ..


#901827 [ماجدة موسى]
3.75/5 (3 صوت)

01-30-2014 01:05 PM
الأستاذ/ الفاتح جبرا

السلام عليكم ورحمة الله ،،

أنا من الذين يداومون على قراءة مقالاتك أيما وجدتها وذلك لقناعتي بقدرتك على إلقاء الضوء الكاشف على قضايامسكوت عنها - خوفا من النظام!!!

بالنسبة لقضية تعيين الوزيرة لشقيقها ليكون مديرا لمكتبها، أذكر أن هذا الموضوع أثير من قبل عن إحدى الوزيرات - ولا أذكر هل هي نفس الوزيرة أم وزيرة أخرى. المهم في الأمر هو أن الوزيرة كانت غير متزوجة... وقالت بأن طبيعة عملها تستوجب أن تسافر في مهام رسمية ووفود فيهارجال .. وهي لا تريد السفر من غير محرم ... لذلك عينت شقيقها مديرا لمكتبهاأو سائقا لها حتى يستطيع أن يرافقها في سفرياتها الرسمية.

هذا المبرر ليس مقنعابالمرة. فهي كوزيرة مضمونة حراستها في حلها وترحالها داخل وخارج السودان. ولا أظن أن أحدا يجرؤ على التحرش بوزيرة لأنهاغير متزوجة. وهناك الكثير من السودانيات غير المتزوجات سافرن داخل السودان وخارجه في مهام رسمية لم يتعرضن لأي مخاطر أو كان وجود الرجال معهن سبب قلق لأسرهن في هذا الزمن. لكن في رأيي أن الوزيرة أرادت أن تساعد أسرتها بأن يكون لها إثنين من أفرادها يعملون بمرتبات ثابتة من نفس الجهة الحكومية - حتى لو كانوا لفترة بسيطة !!

ولك التحية والتقدير ،،

موظفة غير متزوجة - سافرت لوحدها كثيرا !!


ردود على ماجدة موسى
[سجمان] 01-30-2014 10:32 PM
انتم الحاصل شنو اليومين ديل . وثبه حفرة دخان اخ وزيرة . يا جماعه راسنا ده كلفنا كثير ارجوكم خلونا نستمخ شويه

European Union [ابوكروكرو] 01-30-2014 06:40 PM
ههههههههههههههههههههههههههههه .. ربنا يفك بورتك

[ابوبكر] 01-30-2014 03:17 PM
طريقة ذكية للحصول على عريس مع تقديم الدعم والتشجيع..
الله يسهل..

European Union [شمال و جنوب فى محنة] 01-30-2014 02:48 PM
فكنا ما هو وداد طالعة نازلة من دبى لى لندن وين اخوها


#901820 [ود البطانه]
0.00/5 (0 صوت)

01-30-2014 12:58 PM
هي كان ماعينت اخوها نكون نحن مافي دولة المشروع الحضاري نكون عايشين المانيا ولا جز الكاريبي ولا ماموجودين ......... مشكور يا جبرة علي تعرية الحرامية و واوات خط هثرو دي ما كترت شديد.


#901811 [ود أرض الشفاء]
0.00/5 (0 صوت)

01-30-2014 12:51 PM
الاستاذ جبرة تحية طيبة وبعد
شكرا لتناولك الدائم للمواضيع التي تهم المواطن البسيط, رغم اني من المداومين على قراءة كتاباتك لكني لم اعتد على التعليق والمداخلة لكن ه>ه المرة لم استطع ان امنع نفسي من المداخلة دهشة من عدم سماعك عن هذا القانون الذي يعم الان حتى المحليات حيث ان اي معتمد له الحق في تعيين عشرة أو عشرين وظيفة {لست متأكد من الرقم بالضبط لكن ما بينهما} وهم المعروفين لموظفي المحليات اصطلاحا {باولاد المعتمدين} فما بالك بالوزراء.
على أي حال اضم صوتي لصوتك بالغاء هذا القانون التمكيني الجائر
عاطر التحايا


#901801 [الشافعي]
2.50/5 (2 صوت)

01-30-2014 12:40 PM
تحياتي لك ياستاذ والله بالقوانين البفتله أي مسؤل يجي في مكان خلتني انا شخصياً داخل علي السنة ال15 من بعد التخرج والله والله ماشتغلت في الحكومة ولا يوم الوظيفة الحكومية الماجايبة حقها دي عملنا بكالوريوس قال ماكفاية عملنا ماجستير وبرضو ماجاب حقو لحد مانسيت القراية الان قريته وتجي زي الوزيرة دي وغيره وانا متاكد ماجو بامكانياتم وتخصصاتم لانو الغالبية منهم شهادة سودانية وزمان مادخلتم جامعة والله حاسي بعد شوية الكتابة دي ننساها .
والله المستعان


#901795 [الزول الكان سمح]
0.00/5 (0 صوت)

01-30-2014 12:34 PM
يا أستاذ

مادام إنك مابتفهم فى القانون فأنا أوجهك للإستعانه بوزير العدل للتوضيح...بالمناسبه هو لسه دوسه ولا غيروهو


#901764 [salah El hassan]
4.00/5 (2 صوت)

01-30-2014 12:06 PM
يا استاذ ما اهو البشير عمل وثبة ورفع مرة اخو لى رتبة فريق فى الشرطة .؟
يعنى شنو عامل فى لموضوع البسيط دة توم وشمار .؟؟؟؟؟؟؟؟؟


#901751 [تجاني مصطفي]
4.00/5 (1 صوت)

01-30-2014 12:00 PM
والله ياجبرا اظنك خرفت دا كلام شنو .. ياخي خليك في خط هيثرو وأكيد بتكون شفت صاحبك بدرالله اب ساحوته مصنقر في اجتماع الخبراء لاصلاح سودانير .. ياجبرا دي دولة عبثية (زي ماقلت ) التفاصيل مافي ليها داعي .. ساعدونا يااخوانا نتفكي من الكوارث ديل


ردود على تجاني مصطفي
United States [AburishA] 01-30-2014 04:12 PM
لك التحية جبرا..
(معقول يكون في قانون زي ده؟) ! يعينوك وزير تقوم تجيب أخوك مدير لمكتبك وأختك (سكرتيرة) وخالك (سواق) وعمك (جنايني) وجارك (كهربجي) وكووولهم يصرفو مرتباتهم من مال (الشعب الغلبان ده) ؟

** انت نسيت خفير المبنى وعامل البوفيه!! ولا ما عاجبنك ؟
** لو مشيت اي وزارة تلاقها (نفس الملامح والشبه والمشية زاتها وقدلتو )!!
نمرة اتنين هي بقت على مكتب الوزير بس!!! قول الوزارة كووووولها تلقاها (خشم بيت واحد)
وللتأكد ارجو الاتصال على 999


الفاتح جبرا
الفاتح جبرا

مساحة اعلانية
تقييم
6.75/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة