(الهناي)..!!
01-30-2014 11:43 AM


*ما يُؤثر عن الفيلسوف الألماني كانط شهير قوله: شيئان يثيران في نفسي الإعجاب؛ السماء المرصعة بالنجوم، والقانون الخلقي في نفسي..
* و (يُؤثِّر) - من التأثير - في كاتب هذه السطور شيئان يثيران في نفسه (الإستغراب)، مفردة (عمك) التي يناديك بها من هو أكبر منك سناً، ومفردة (هناي!!) التي يُستعاض بها عن تذكُّر شيء ما..
* والمفردتان هاتان هما (صناعة سودانية خالصة) يمكن أن تشكل (بصمَّة كلامية!!) تميزنا عن الناطقين بلغة الضاد أجمعين..
* ومفردة (هناي) هذه زاد إهتمامي بها منذ أن أضحيت أنا نفسي (هنايا!!) خلال مؤتمر صحفي ومعي (هناي) آخر من الزملاء..
* فأثناء بحث أحد منظمي المؤتمر المذكور - كما ذكرت من قبل - عن مكان يضع فيه إحدى (المزهريات) صاح فيه صوت آمر (متمكِّن!!): (ياخي ما تخت البتاعة دي جنب الهنايين ديل وخلِّصنا)..
* ولم يكن (الهنايان!!) هذان سوى أنا وزميلي غير المرضيِّ عنهما (سياسياً)..
* فقلت لزميلي هذا (متهنهناً): (لو كان قال له ضع الهناية دي جنب البتاعين ديل لكان أفضل لنا، أما أن نكون هنايين فدي صعبة شوية)..
* وحين قلت كلامي ذاك كان في ذهني تفسير نُسب للعلامة عبد الله الطيب - لا أدري مدى صحته - عن (الهناي) له صلة بـ (هناي!!) ما لدى التمساح..
* والآن يكثر زميلنا حسين خوجلي من ترديد مفردة (هناي) هذه في برنامجه التلفزيوني اليومي حتى ليكاد يستحق أن يُسمى (مع هناي خوجلي!!) عوضاً عن (مع حسين خوجلي)..
* أما المفردة السودانوية الأخرى (الحداثوية!!) التي تدعو إلى التعجُّب فهي مفردة (عمك!!)..
* والأكثر إثارة للحيرة أنك قد تجد شاباً (أربعينياً) يناديه آخر (ستيني!!) بمفردة (يا عمك) هذه دون أن تهتز له (شيبة) في (ما بقي!!) من شعر رأسه..
* ومأخذنا على المفردتين هاتين أنهما ينأيان عن (الذوق المجتمعي) الذي تشتهر به بعض الشعوب من حولنا تحاشياً لجرح مشاعر الآخر؛ رجلاً كان أو إمرأة..
* فالمصري - على سبيل المثال - لا يناديك إلا بمفردة (باشا) أو (بيه) أو (أستاذ) أو (بلدينا) إن كنت رجلاً..
* ولا ينادي المرأة إلا بمفردة (ست) أو(هانم) أو (آنسة) أو (مدموزيل)..
* أما الرجل فهو عندنا في السودان - وإن كان شاباً - فهو إما (عمك) أو (حاج) أو (خال) أو (شيخ)..
* والمرأة إما (حاجة) أو (عمة) أو (خالة) ولو كانت (في عمر الزهور!!).
* وللسبب هذا تضج في سماوات أسواقنا ومناسباتنا ومواقف مواصلاتنا العبارة التي صارت من مألوف ما تسمع الأذن يومياً (يخلخل ضروسك!!)..
* وما أردت من (هناي) هذا اليوم إلا أن ألقي حجراً في بركة (الهناي!!!!!).

الصحافة

تعليقات 29 | إهداء 0 | زيارات 6754

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#902732 [أبو الحسن الشاعر]
0.00/5 (0 صوت)

01-31-2014 07:12 PM
: الهناي التي يستخدمها أهل السودان من " هنُ " وأصلها " هنو " ولذلك فهي من الأسماء الستة وإنما تم إسقاطها لندرة استخدامها فقالوا الأسماء الخمسة وفي مختار الصحاح معنى " الهن " هو الشيء ،؟ تقول هذا هنك أي شيئك وتعرب إعراب الأسماء الخمسة ولعلماء اللغة حولها كلام كثير وفي ألفية ابن مالك فهي من الأسماء الستة : أبوك ، أخوك ، حموك ، فوك ، ، ذو ...، وهنوك حيث قال:
أبٌ ، أخٌ ، حمٌ ، فمٌ ، وهنُ ... والنقصُ في هذا الأخير أحسنُ
ويعني بالنقص حذف الواو من كلمة ( هنو ) لتكون " هن " وتعرب بالحركات .
وهن أيضا عند علماء اللغة " يكنّى بها عما يستقبح ذكر اسمه مثل عورة الرجل والمرأة " .. وذكر ابن عباد في المحيط في اللغة أن كلمة هن ، يكنى بها عن اسم الإنسان ( لاحظ أن هذا استخدام أهل السودان في قولهم يا هناي بدلا عن اسمه ) ..وقال ابن عباد أيضا ويكنّى بها عن " الذكَر " .. وهذا المعنى موجود لدى العامة من السوقة لمن أراد أن يحمل الكلمة المبهمة على ذلك الشيء مثل قولهم " البتاع " ويعنون العورة .. وبعض قبائل السعودية تستخدمها كاستخدام أهل السودان لها.
أما استخدام حسين خوجلي لها فهو مما يستقبح ولا يليق استخدامها بالعارفين ويسمى مثل حسين العيي أي الذي لا يبين ويضيع عليه المعنى والكلمة فلا يجد سوى " الهناي " .. ومشكلة حسين ليست في ذلك وحسب إنما في سوء قراءته خاصة فيما يقتطف من أقوال القدماء من النصوص الفصيحة فوالله الذي لا إله إلا هو لو قرأ ما يقرأ أمام أساتذتنا ونحن صغار لذهب لبيته و " جضومه منفخات " من الصفع .. ولم أر قط أسوأ منه قراءة للنصوص الفصيحة ومصيبة حسين أنه بلغ حدا من الجهالة تجعله ينصب ويرفع ما يقع بعد حلاوف الجر فما بالك بغيرها .. ومع ذلك يجعل من نفسه عالما ويعتقد الناس أنه من علماء اللغة " اللهم اغفر لقومي إنهم لا يعلمون " .


ردود على أبو الحسن الشاعر
European Union [ابو محمد] 01-31-2014 11:11 PM
صدقت والله عن جهل حسين خوجلي اللغوي فهو فعلا فاقد تربوي..فهو ينصب اي اسم او فعل غض النظر عن موقعه من الاعراب..زمان علمونا "سكن تسلم" بس خوجلي شغال نصب لأي كلمة يقرأها مع نطق الطاء تاء والغين قاف...ربنا يرحم السودان في زمن تطاول الاقزام


#902677 [الهندى عز الدين]
5.00/5 (1 صوت)

01-31-2014 05:11 PM
طيب لو شفت الهناى العند اسحق فضل كنت قلت شنو؟


#902659 [الهندى عز الدين]
5.00/5 (1 صوت)

01-31-2014 04:24 PM
دايرين الهناى الجد ؟؟؟
بتلقوا عند اسحق فضل


#902375 [العريبية]
0.00/5 (0 صوت)

01-31-2014 06:32 AM
المصرين عندهم ذوق مجتمعى

امال (البتاع )وشيل البتاع ده وحطو من اودام البتاع ده والبتاعة دى

ياخى كل افلام عادل امام ومسرحياتو ملانة بتاعات

الذوق المجتمعى عن ناس لبنان ناس اليسا ونانسى

ناس هون وهونيك واذا بتريد(ودى زى عليك الله عندنا نحنا)

بياعين المناديل والباعة المتجولين فى بيروت بقول ليك باردون

وياخرررابى على الكريزما اللبنانية

ياعووضة انت فيك عرق مصارنة وللا شنو

على العموم يسلمو الديات على الكلام المهضوم بتاع هناى اليوم


#902182 [ابو محمد]
0.00/5 (0 صوت)

01-30-2014 08:31 PM
اذكر ان احد جدودنا في القرية (عليه رحمة الله)كان لا يستطيع ان يعبر عن شيء الا ب(الهناي)و(الهناية)
فقام احدالاخوة الشباب وكان كثير التمتمة(غفر الله لي وله)يخاطب الجمع فقال له الجد(ياولدي الهناي دة كان كان قريتو او درسو ليك ما عندك هنايا يقلبو ليك)


#902174 [هناي داك]
5.00/5 (2 صوت)

01-30-2014 08:18 PM
حكايتك الليلة شنو يا هناي ؟ ؟ الناس كل الناس في وثبة هناي !! وانت سارح مع الهناي بتاع هناي !!!!!


#902111 [نورة النور نورين أبو نورة]
3.75/5 (3 صوت)

01-30-2014 06:19 PM
لما كنا في المدارس العامة كانوا في مادة النحو درسونا الأسماء الخمسة

وفي الجامعة درسنا أنو الاسماء دي ستة ما خمسة وكان سادسها يا هو الهنو او (هنوك) على ما اذكر

والله أعلم


واسه قته بالهنو!


#902036 [MAHMOUDJADEED]
5.00/5 (2 صوت)

01-30-2014 04:46 PM
قبل سنين عددا واحد من جماعتنا كان طباخ عند الملك سعود وخروجاً عن الروتين قام ظبط حلّة ويكة ناشفة بالدمعة طلعت حاجة جميلة جداً . الملك اتكيّف جداً ونادى زولنا قال ليهو وش اسم الادام ده وزولنا بالخلعة قال ليهو ده ما هناي وقبل ما يكمّل الملك قال والله هناياً زين . أفتكر انو فعلاً اسمو هناي .
وبعد داك بقا يطلب الهناي من هناي .


#902028 [علي]
4.75/5 (3 صوت)

01-30-2014 04:29 PM
الأخ الأستاد عووضة

الهناي اصلها فصيح و هي من الهناء بكسر الهاء و هو القطران
قال البحتري:

وإني لأستبقي الصديق إذا نبا *** علي وأهنوا من خلائقه الجرب

يعني أتجاوز عنه عندما يخطئ في حقي و أداوي سقيم طباعه بأن أهنوها بالقطران مشبها تلك الطباع بالأبل الجرباء ... ِشايف الصداقة هنا كيف؟

و هناك في بعض الدول العربية قبيلة تسمي الهنائي و كانت قد اشتهرت قديما بصناعة القطران من نبات الحنظل

و تستخدم المفردة في كثير من أقاليم السودان للتقليل من الشأن و تأتي كصفة متبوعة بأسم يؤكد معناها كقولك : آآآ الهناي التيزرة دا.

و قد تقابلها في المدن مفردة زفت. هدا و سامحونا على هدا الهناي and ... have a nice weekend


#902024 [اسامة على]
2.00/5 (1 صوت)

01-30-2014 04:27 PM
اول مرة نعرف انو التمساح عندو هناى!!!
(( وقل رب زدنى علما))


#902019 [ابو خنساء]
5.00/5 (1 صوت)

01-30-2014 04:20 PM
يا صلاح هناي انت تهنهن من هنا وهناك مالك لو عندك هناي ما تهنهنه عديل كده وتذكر معاه اسم هناي صاحب الهناي القال لي حامل الهناي خت الهناي جنب الهنايين ديل وتريحنا بدل ما مقالك كله هنايات ما ليها نهايات .. يعني شايفنا ناقصين تهوين وتوهين .. كفاية خطاب كبير الهنايين الما طلعنا منه باي امر ولا نهي ولا هناي .. اللهم الا هنهنه غريبة وعجيبة زادتنا وهن على وهن
وزي ما قالك واحد من الهنايين التحت ديل انت البخليك تهن عليك نفسك وتختها وسط الهنايين ديل شنو ما عارفهم كيف شايلين هنايم من هنايك ؟
صحي ما عندك هناي


ردود على ابو خنساء
European Union [ابو احمد] 01-30-2014 10:09 PM
والله كلامك عين العقل يا ابو خنساء دا المفترض اتطرق ليه الكاتب صلاح عوووضه الله اعوضنا فاذا بلغت من العمر عتيه الليله جاى تقولى هناى وهناى كدى انت رايك فى خطاب الريس شنو بدل هناى وهناى وانا عارف خطاب الريس زاتو هناى بس افضل من هنايك دا اقصدموضوعك دا.


#902014 [المجافي ضجيعو]
5.00/5 (1 صوت)

01-30-2014 04:17 PM
والله ياود عوضة ضحكتنا كتييييييييييير يجازي محنك؟؟؟؟؟؟؟؟؟؟؟؟؟؟؟


#901983 [أزرق]
1.00/5 (1 صوت)

01-30-2014 03:24 PM
كلمة يا شيخ دى تقال احترما وتوقيرا , وهى ليست كما الاخريات


#901979 [القعقاع الفي القاع]
5.00/5 (1 صوت)

01-30-2014 03:21 PM
الله ﻻ كسبك يالكرونكي إنتهيت من جريدة الصحافة و بقيت تجيب فيها كل " فيلسوف" و بقدرتك تدجنو و تحولو إلى " هناي" في شكل مسخ


#901956 [الحقاني]
0.00/5 (0 صوت)

01-30-2014 03:04 PM
عمك هناي غرد خارج الهناي !!!!!!!


#901954 [السارق مالنا ودمنا]
4.25/5 (3 صوت)

01-30-2014 03:00 PM
عارف الكيزان كلهم هناي
يمين ما كذاب حشاي
وده ماقولي براي
أسال القدامي والبي وراي
والبعيد واللسه ما غشاي
ديل مجربين ماخبره ساي
من كبيرهم ماخدنها قراي


#901942 [عبدالرازق]
0.00/5 (0 صوت)

01-30-2014 02:52 PM
استحي من وعلي نفسك يا رجل "" ايه العبط والسخف الحاصل هنا


#901900 [سامي البارودي]
0.00/5 (0 صوت)

01-30-2014 02:13 PM
ياهذا مالك وهناي هنا اليوم ام أن ناس هناي أسرو عليك من الهناي حقهم


#901885 [الحاوي النقرابي]
5.00/5 (1 صوت)

01-30-2014 02:04 PM
ياخ عملت لينا وجع هنياية اقصد فقعتنا بالضحك لكن عجنبني للمرقود انت البوديك مكان المتمكنين شنو لامن ينعتوك انت وصحبك بالهنيايات


#901867 [اميروز]
0.00/5 (0 صوت)

01-30-2014 01:38 PM
والله انت ذاتك .. ماعندك هناي .


#901846 [فواد]
0.00/5 (0 صوت)

01-30-2014 01:21 PM
الناس في شنو وصلاح عووضه في شنو ياخي انا بحب كتاباتك لكن بقيت تكتب في وادي والأحداث في وادي


#901822 [ود المجذوب]
5.00/5 (1 صوت)

01-30-2014 01:00 PM
مالك يا عمو بقيت في الصحافة زي جماعة ناس هناي بتاع السيرورة و الاندغام !!!


#901817 [عطوى]
5.00/5 (1 صوت)

01-30-2014 12:56 PM
هو الهناى دى القالو الريس هناى دا يفهمو كيف يا هناى هههههههههههههه


#901815 [ام مريم]
4.00/5 (1 صوت)

01-30-2014 12:53 PM
البيوجع اكثر ان تناديك امرأه فى عمر امك و كمان مشلخه ب يا خاله


#901808 [شيمس]
3.00/5 (2 صوت)

01-30-2014 12:48 PM
اقول شنو يا هناى


#901788 [الزول الكان سمح]
5.00/5 (2 صوت)

01-30-2014 12:28 PM
* والآن يكثر زميلنا حسين خوجلي من ترديد مفردة (هناي) هذه في برنامجه التلفزيوني اليومي حتى ليكاد يستحق أن يُسمى (مع هناي خوجلي!!) عوضاً عن (مع حسين خوجلي).

ولد...ددده........والفهم فهم..والمافهم يكون هناى


ردود على الزول الكان سمح
[ود ابو زهانة] 01-30-2014 04:53 PM
برافو عليك نقشتها تمام .. عشرة من عشرة


#901784 [برعي]
5.00/5 (1 صوت)

01-30-2014 12:25 PM
زمان في مدني الهناي ده معناهو هناي واخيرا تعددت الاسماء
ولكن لكل جيل الفاظ يتم تداولها وانا من المعحبين بلغة الرندوك اي لغة اولاد الشارع فهي تعكس حال المجتمع وما يمر به من شد وجذب لكن عموما موضوع جميل منعش في لحظات محبطة زي كباية شاي بنعناع في وقت ضنك وبؤس
شكرا يا هناي


ردود على برعي
[الجنجويدي الضكر] 01-30-2014 11:12 PM
يا برعي الهناي والبتاع اذكرهم جيدا


#901782 [جميل ماسألناه]
5.00/5 (1 صوت)

01-30-2014 12:21 PM
شكراً ياهناى .


#901763 [rt]
0.00/5 (0 صوت)

01-30-2014 12:06 PM
ما عندك موضوع اليوم ياهينآآى.اسمح لى يعنى


ردود على rt
United States [AburishA] 01-30-2014 04:25 PM
غايتو (عمك) دي بقت لي ماركة مسجلة و(ياحاج) copyright


صلاح الدين عووضة
صلاح الدين عووضة

مساحة اعلانية
تقييم
9.72/10 (6 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة