شنوبية وجمالية
01-17-2011 05:02 PM

شنوبية وجمالية

استيلا قايتانو

لا بد ان صدمة انقسام الوطن من اعظم الصدمات التي تعرضنا لها على الاطلاق مما تسببت في هزة نفسية وذهنية عنيفة، ادت الى ان تصاب الاسئلة بالخرس والاجوبة بالتأتأة .. هناك اناس كثيرون يقعون في منتصف هذه الاشياء كلها على المستوى الجغرافي، منهم من هم في منتصف الحدود بين الدولتين وهؤلاء بالذات لهم الكلمة والفعل فيما هي اتية من احداث بين الدولتين الشمالية والجنوبية، وهناك من هم في منتصف الشعور وهي تلك الاحاسيس التي تعتمل في دواخل الفرد منا، اعلم هناك من هو فرح فرحة عارمة ولا يشوبه اي شائبة حزن.. وهؤلاء موجودون في الدولة الوليدة وايضاَ هناك من هو حزين حزنا نبيلا على تفتت البلاد حزنا لا تضاهيه اي احزان من قبل، هؤلاء يمكنهم ان يعبروا عن شعورهم دون خوف او جهجهة ولكن هناك من هم في منتصف كل هذا، منتصف الاسئلة ومنتصف الاجوبة ومنتصف الشعور، وايضا في منتصف اللغة، كثيرأ ما يقولون خير الامور اوسطها، الا هذا الوسط، فهو وسط متطرف ويعذب صاحبه، فشعوري انا الشخصي الان بالضبط من مسألة الانفصال هذه هو في الوسط عندما تأتيني مكالمات عبر الاثير ورؤية قومي فرحين لما حققوه من انجاز يعد من اهم الانجازات في تاريخ الانسان الجنوبي، وارى دموع الفرح والتصريحات الملهمة افرح، ولكن سرعان ما تنهض تلك الشخصية في داخلي التي عاشت على انها سودانية، تلك الشخصية التي ربيتها بصرامة على السودانية ليس إلا ويجب ان تعامل الاخرين على اساس انهم سودانيين ليس إلا ومن ظواهر هذه التربية القاسية ألا اسأل احد ابداً عن ما هي قبيلته حتى اترك الانسانية تجرى في مجراها الطبيعي بدون اي اكسسورات عرقية، هذه الشخصية التي تمسخ علي الفرحة مع الاخوة الجنوبيين (حلوة الاخوة) باستقلاهم هذه الشخصية التي تضبطني متلبسة بابتسامة فرحة كبيرة بعد ان يكاويني صديقي الانفصالي دينق قونج بان الوحدة خسرت خسارة فادحة امام الانفصال، وان اصوات الانفصال تكاد تكون مية في المية لو لا بعض اصوات جماعتك الوحدويين، فاقول له : اصوات جماعتي الوحدويين لازم تكون في على الاقل عشان تكف العين انت داير يسحروكم ولا شنو؟.

نعود الى الشخصية السودانية التي تشدني من اذني وتذكرني بما انا فيه من تعقيد في العلاقات الانسانية والاجتماعية، وكل ما لي به صلة في الشمال حزين ومكتئب بالاضافة الى الجرح الوطني العميق فاقع في حزن بعيد القرار وخجلااااانة، حينها تختفي الشخصية السودانية التي اشعرتني بالخيانة الوطنية العظمى من مجرد ابتسامة صغيرة (آآآدي كدا) هو مع جماعة والله حبايبي بهموني دايرين يموتو من الفرح لتظهر لي الشخصية التي تنتمي الى الجنوب وتفلق رأسي بعربي جوبا : بالله شوف بنية دي ات قايل نفسك يعني كلاص فاهم اكتر من ناس تا هناك دي ، انا اسي كان اسالو ات ، ات قي قيني ايني لحدي اسا لسونو، ناس كلو روا وكل جنوبين دايرين انفصال الا ات ياو قال راس تاكي ياو قوي توك توك ذي دليب، اوع تقول سودان ولا سودان كدي روا اناك بكلام تاكي المسيك ذي مويو دي سودان تاكي دي اعملو لي انا سونو؟ ، كدي اينو ناس اناك فرحانيين وقي ارقص تلتين صباح الا ات ياو داير موتو ايني ورا سودان تاك الما معروف قي روا لوين دي، اكير ليك فرح مضمون ولا حزن مجهجه.

فأحاول لملمة بكاي مثل طفل اجبر على السكات بالقوة بعد ان كاد يصرخ بكل قوته فيئن متظاهرا السكوت خانقا عبراته، فأحاول الفرح وافتعل الغبطة فيأتيني تلفون او رسالة من احدى الاخوات شاكية باكية من حال البلد، فأجد نفسي هناك صغيرة مثل السمسة بين شخصيتين عملاقتين احداهما تحرم علي الفرح والاخرى تحلل على الحزن، وعلى غفلة منهما افرح لط بعد العشاء ثم اول ما اصحو في الصباحات الباردة على الواقع وتفك مني الفرحة احزن لدرجة الاهمال، حزنا ابدي لا تفكها حتى المرارة، اقصد مرارة ما تعرض له شعب الجنوب خلال كل الحقب التاريخية ( وليس المرارة بالعتي) والذي جعلهم يختارون الانفصال.

هنا اقف في منتصف الاشياء والناس والبلد، وتصبح كل تلك الاسئلة التي لا تحتمل سوى الاجابة بالا او نعم لتصير اجابتي : لعم.

وعندما اسأل عن جنسيتي غير المعروفة وبدل عن سودانية التي كانت تريحني قد تكون اجابتي : شنوبية او جمالية .

واذا سألتني عن الحزن والفرح قد اكون : فحزانة فحز شديد خلاص.

ولو سألتني هل الحكومة الحالية هي السبب في انفصال الجنوب تكون اجابتي : لاي .

اعذروني فاني مصابة بإنشخاص في الفصمية.

تعليقات 31 | إهداء 1 | زيارات 6346

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#81245 [نورا]
4.07/5 (5 صوت)

01-19-2011 02:51 PM
أت يا أستيلا يا بنية تا قايتانو دي
والله كلام تاكي دي أثورو قلبا تايي سهي سهي
لكن ماليش، أوسلو سبب تا ونوسات دي كللللو كلام تا سياسة الما قي نافا دي
كدي نهنا بآينو أيام الجاي دي شنو قي جا هاسلوا في كلام تا بلد دي
كدي نهنا أسألوا ربنا آفية بس و هاجات الكويس كدي جا لي بلدين كلو شمال و جنوب
لكن ونوسة تاكي دي أجبوا أنا سهي سهي.
شكراً أت بنية دي.
بنية تا قايتانو بي مية رجالين، كدي أنا أسأل ربنا كدي هافسو أت من أيون تا ناس الكأبين.


#81065 [أبوالحسن]
4.10/5 (9 صوت)

01-19-2011 10:36 AM
يا إستيلا الله يجازيك .. بالوحدة ولم الشمل ( شمال وجنوب) تعرفي أنا كملت صندوق مناديل لقاية ما كملت قراية مقالك - ولعلمك حكاية ترسيم الحدود حيكون حبر على ورق لأن الجماعة ( حكومة الشمال وحكومة الحنوب) ما حيقدروا يعملوا جدار في الحدود زي جدار برلين .. بس ده المطمنا أنو حنشوفكم وحتشوفونا .. بالمناسبة إنتي حتمشي الجنوب ليه أنتي مش وحدوية ونحن وحدويين يعني الحال من بعضه ، ومافي طريقه تفرقنا يعملوا إنفصال ولا يعملوا غيروا - ونحن حنعمل إنفصال مع الحكومات يعني نبقى ( إنفصال شعب السودان عن حكومات الشمال والجنوب) وسيبك خليهم يشربوا من البحر ، ولو ما عاجبهم يضربوا رأسهم بالحيطة - تحياتي الخالصة لك يا أميرة الوحدة.


#81050 [فرح الغلابة]
4.13/5 (11 صوت)

01-19-2011 10:25 AM
لكي مني صليل العشق رقرقة استحالاتي ترانيم الملائك وترجيع المحبين الصغار.ولو ان خيطاً من شعاع النور جاء لنسجت منه عباءة طرزتها فخرا لسيدة النساء .نعم سيدة النساء انتي يا بت ملوك النيل لكي اختي استيلا. واقول لكي عبارات مقتبسة قرائتها منذ زمن . نعم هكذا كنا كاغصان ابنوس تتمايل تحت إيقاع المطر وقوس قزح كان يربط بين قلوبنا والشمس تدنو بشعاع بلوري وفي اعيننا مكامن التحديق بالشموس ولكن اذا دخلنا في مساحات الختام البرق اشارات الظلام والوعد ان نلتقي عند المصب في باحه الجرح الوطن


#81017 [ابو مريم]
4.13/5 (9 صوت)

01-19-2011 09:43 AM
اعتقد ان ناس المؤتمر مشددين شوية في جنسية الشمال
معليش يااستيلا
ولكن لايمكن ان يمنعوك كاتبة من صحف الشمال
هذا طبعا بعد ان يؤول المال
صحفية مثلك تملك زخيرة فائقة بالكتابة بالعربي في صحف شمال النيل
وتملك زخيرة ايضا فائقة بالانجليزي لصحف جنوب النيل
اذا جاز ان ان اسمي الدولتين كذلك.
شمال النيل ؟
جنوب النيل؟
والله فكرة نخليهم متقاربين في الاسماء لعل وعسى وهل وبل وكيف وربما نعود تاني من تاني بلد واحد فيه استيلا ومنقو قل معى لا عاش من يفصلنا قل معي لا عاش من يفصلنا


#80651 [m.yousif]
4.11/5 (7 صوت)

01-18-2011 05:55 PM
تانى بقوليك خساره انتى تبقى اجنبيه واااااااااااااااخساره


#80645 [اشرف علي ]
4.11/5 (9 صوت)

01-18-2011 05:38 PM
الاخت ستيلا
تحياتي
والله انت خسارة كبيرة للشمال لو ناس الحكومة ديل بيفهموا ومكسب كبير للجنوب عشان كدا لا تزعلي ولا تفرحي عسى الله نقدر نغير اوضاعنا في الشمال وما اظن بعد داك لو قلنا ليكم ارح نتلم كلو سوا انتو بتقولو لينا لا معليش هسا دا حكم القوي على الضعيف لكن ان شاء الله الضعيف ببقى قوي والتونسية قاعدة راجيا الناس ديل


#80413 [FARIS]
4.14/5 (11 صوت)

01-18-2011 11:21 AM
يا سلام علي انت استيلا سودان دي لو فقد انت دي بس دي خسارة كبير خلااااس برضو بنجيبك صحفية محترفة ونجنسك ب شمال وطني


#80410 [الوطني الحبيب]
4.19/5 (7 صوت)

01-18-2011 11:20 AM
محمد عبد الجليل جعفر
ياراحلين الي جوبا بغيابي هيجتم يوم الرحيل فؤادي

ما سارت الايام تمضي مثلما نبغي ولكن الزمان الباغي
الله يعلم ماسلونا ساعة الم الفراق وجرحه المتنادي
هل كان قلبينا سوي قلب ثوي يدوي بصدر واحد الابعاد
حتي دعا داعي الفراق وشؤمه غربان قفر في امحال وهاد
قالوا انتبهنا ويالها من غفلة فقات بمرودها عيون رشادي
ماذا نقول اذا التقينا يومها بابن الشفيع وصحبة الامجاد
قالوا حذاري ان يضام وضيمه قصص سرت تحكي بهن نوادي.
قالوا حذاري حذاري ثم حذاري ان يصبح حطام وذاا لحطام بدا لي
قلتم وصية ناصح ومحادب ضموا الجنوب فلن يئوب ركابي
ويحي وويح الجيل هذا كسبنا ضاع الجنوب ولم يبن لسعاد
ياراحلين الي جوبا بغيابي هبجتم يوم الرحيل فؤادي
تبقي القلوب بها اشتياق مزمن ولدي الصدور امانة القصاد
الله يعلم لم يكن هو جرحكم بل جرح شعب مثخن الاوجاع
دهت الدواهي عزمها فتشتتوا شرقا وغربا وا لجنوب يباع
ثمن السلام هو اتحاد شعوبنا لا ياس من عدل بعزم زراع..
(تثري الشعوب اذا اجتمعن ثقافة واذا افترقن هزمن بالادقاع).
حسبي وحسبك طفلة منسية بين النزاع الام والاباء
حسبي وحسبك قصة مروية وشراكة في الدم والاولاد
عبد الفضيل هنا دم يعوي فاين جنوبه وشمال
عبد اللطيف هوي وعشق واحد في القلب وسده الشمال سهاد
وهناك مقبرة العبيد حاج الامين مجاورا اسد الاماتونج الشهيد الباقي
قرنق الحبيب اثكلت شعبك كله وهنا اباك يجدد الامجاد
فمن الذي منح المليك له الثوي ليقسم الاعضاء يالاضداد
(العين لا تسدي لاذن سمعه والاذن لا يهدي كعين الهادي)
هذا اليمين يشد عند يساره كف ويجمع في الشتات الوادي
قدمي لا ينسجن خيطا واحدا ويداي تنسج للبلاد مهاد
ايه فديتك ياعروس محبتي (ملكال)في (عبري) وكوش بلادي



#80309 [hanfoli]
4.12/5 (11 صوت)

01-18-2011 09:32 AM
المشكلة أنه جميع أهل السودان بلا أستثاء ( شمالي أو جنوبي) عندهم خلل في الموازين، نتيجة للاعلام المضلل الذي يرسم ويجمل الوعود الكاذبة من الجانبين و في الآخر حكومة البشير و حكومة سيلفا يأكلون الحصرم و الانسان السوداني يضرس...
(آخر الزمان يتولى أموركم سفهائكم)....


#80258 [عمر]
4.13/5 (9 صوت)

01-18-2011 08:53 AM
اتركوا التاريخ يكتب ذلك لابنائنا ليعرفوا ان السودان كان واحد ولكن بفضل السياسين والقادة العسكرين اتت هزه ارضيه او زلازل وانشطر الى قسمين او اكثر الله اعلم فهم انشاءالله اقدر على جمعه مرة اخرى ويبقى سوال هل سوف يمجد الابناء هؤلاء القوم


#80217 [عبدالمنعم ]
4.14/5 (12 صوت)

01-18-2011 08:29 AM
الظاهر عليك انت الجنوبية الوحيدة الحزينة على الانفصال.


#80149 [ابو مريم]
4.13/5 (8 صوت)

01-18-2011 07:42 AM
كما كانت اجابتك لاي
فان حالتنا كمن ضربه شئ في عظم الشيطان لا يعرف يبكي ولا يعرف يضحك


#80137 [ابو الهاء]
4.15/5 (7 صوت)

01-18-2011 07:28 AM
بسم الله
والله يا استيلا ما عارف اوقل ليك شنو ؟؟؟
قبل فترة كنت فاكرك من اشد المؤيدين للانفصال لدرجة اننى تركت القراءه لك ولكن شدنى العنوان فمررت سريعا على المقال لاجد النقيض تماما فها انتى تتباكين على ما دعوت له ..... عجبى


#80097 [كمال حامد]
4.13/5 (7 صوت)

01-18-2011 06:23 AM
كتابات ستيلا قايتانو متميزة وروعة
أنا فرحان للجنوبيين يا ستيلا عشان فرحهم
لكن حزين في نفس الوقت عشان البشوفو وبسمعو من تزييف للتاريخ
شكرا على مشاعرك الإنسانية النبيلة


#80052 [محمد عمر]
4.16/5 (6 صوت)

01-18-2011 12:16 AM
الجنوب مفروض يخلوهو يفش غبينتو ويقول كلامو ويوصل صوتو زي ما فرقع رايو بالسلاح لكين برضو يراعو مصالح الغلابة منهم رايهم اكيد غير اللي الطلع في النتايج والمراقبين عارفين كده كويس الوطن بشيلنا كلنا نحن عارفين الدم عمرو مايطلع مية واكيد بعدين حا تروح السكرة ونرحع احلى من الاول


#80049 [الأسد]
4.14/5 (8 صوت)

01-18-2011 12:09 AM
تقريبا شعورك ده نسبة كبيره من السودانيين يشاطروك فيه وان جاز التعبير يمكن

القول انها المبكيات المضحكات اوعكسها حسب الشخص والمسافة الت يقف عليها

والمتابع للمشهد االعام للسودانيين جنوبا يلاحظ ان الكل لا يحب تقسيم السودان

وان اختار الأنفصال مجبورا هذا ما صرح به معظم القيادات الجنوبيه وأخرها ما قاله

السيد جوزيف لاقو فى الحفل الذى اقامته حكومة الجنوب للاعلاميين فى ختام الأستفتاء

ماذا قال لاقو (اوصى الشباب الذين يمسكون بزمام الأمور فى حكومة الجنوب ان يتركوا

الباب مفتوحا نحو الشمال فربما تأتى حكومة تتفق معكم فتتوحد البلاد مرة اخرى وعندما

يأتى الشماليين لنا لزيارة الجنوب سنقابلهم بالأحضان لأنهم اخوا ننا ) كلمات جميلة من

من رجل كبير والماعندوا كبير يشترى ليهو كبير .الىالقاء يا جنالية


#80046 [المفتى]
4.15/5 (7 صوت)

01-17-2011 11:53 PM
الاخت استيلا
مازلنا سودانين وسنظل سودانين. سينفصل السودانى جغرافيا وسياسيا ولكن لااظن ان هناك قوة فى الارض تستطيع ان تفصلة اجتماعيا. سيأتى اليوم الذى ننسى فية احقاد الماضى المرير سياتى اليوم الذى يتعلم فية (المندوكورو) سماحة هذا الوطن هى عدم الاستعلا على الاخرين هى التعايش السلمى هى الحرية هى العمل جميعا يد ا واحدة من اجل وطن موحد يعيش فية (السودانى) وتكفى هذة الكلمة وحدها لتكون جواز العبور للمحبة والرباط الاجتماعى لكل افراده.
لاى الحكومة الحالية لم تكن السبب وحدها ولكن كل الحكومات. لاانها لم تربي فينا عدم الاستعلا والتكبر على الاخرين بل شجعت الجهوية والنزعات القبلية والشنوبى والجمالى والمهسى والدنقلاوى. سياتى اليوم اختى العزيزة الذى نشعرفية باالراحة والفخر عندما تكون اجبتنا سسسسسسسسسودانى .
لك التحية


#80044 [الشاويش]
4.07/5 (7 صوت)

01-17-2011 11:48 PM
الأخت/ أستيلا أنت مابيسوف أول يوم بتاع تصويت بت دا بعد يرمى سوت بتاعو هو كيف فرحان بمشى سكل ماهو عاوز يتير من فرح سديد !!1
والله ياخت الواحد ما كان عارف يمسك دمعتو الما كانت معروغة أهى فرحة ولاحزينة صدقا الله يجازى الكان السبب !!!.


#80043 [بلاع كبدة الاسد]
4.15/5 (9 صوت)

01-17-2011 11:45 PM
ماذا نقول حتي الفرحانين بالانفصال نشعر بحزن يغلف فرحهم أهة ثم اهة واهاااااااااااااات نحن النيل ابونا والجنس سوداني لو كنت مكان الحاكمين في الجانبين لاستقلت حتي لايرتبط اسمي بانفصال هذه القارة مرارة ثم مرارة ومرررررارررات في تاريخ الاسلام صاحت امراءة وامعتصماه فحركت الجيوش وانت الان يااستيلا بح صوتك بالصياح و لكن لامعتصم في هذا الزمان واصبحت لا اطيق قراءة مقالاتك لانها تحرك الدمع السخين وهواجس الوطن الذبيح واشواق الوحدة في القلب الجريح والله رغم اني بلاع لكبدة الاسد ومن قوم يأكلون النار ولكنك يا زرقاء هذا الزمان تنظرين الي شجر يسير وكم حزرت منه العشيرة لكنهم لايفقهون وسيصحون صباحا علي سنابك خيول الاعداء لن يجدوا ملاذ ولكن ملاذنا سيكون مقالاتك المشبعة بعبق السودان الاصيل


#80018 [سيك سيك]
4.11/5 (8 صوت)

01-17-2011 09:50 PM
الرائعة إستيلا \\\\\"الإخوة الجنوبيين\\\\\" ...... فعلا حلوة ومعبرة عن عمق سودانيتك لأن الجنوبيين هم أصل السودان ونحن على الرغم من حزننا لما حدث إلا أننا لا نملك إلا أن نفرح لفرحهم.


#80016 [أبورماز ]
4.10/5 (6 صوت)

01-17-2011 09:43 PM
إستيلا ..يابنت السودان ..ياعاشقة الجنوب .. يا مفتونة الشمال.. أنا أعرف أن القلم التى تكتبين به يدمع هو الآخر .. أعرف أنه رغم الدعابه والسخرية التى تكتبين بها إلا أن قلبك ينزف لما حدث وسيحدث لوطننا ..ربما لا نعرف المصائر لكن قد نظنها وليس كل الظن إثم ..أطمئنك إن الحدود التى بيننا سوف لن تفصلنا لن تكون هى الحدود التى بيننا وبين الشمال والغرب والشرق سنكون على أصلنا وأصلنا السودان ..وسيعود السودان سيرته الأولى بإرادتينا نحن الوحدويون.. لاتحزنى على ما يفعله الساسه دعيهم وشأنهم ولنكن كما كنا وما سنكون إنشاء الله ..................


#80015 [wdmousa]
4.13/5 (9 صوت)

01-17-2011 09:43 PM
الاخت استيلا نجمة كل السودان
نبك على فراق وطن عزيز ضمانا باشكالنا والوانا
كما نبكى على فراق اخوه واخوات تربينا معهم
لكن نامل ان يتعجل بنا جيل الغد اليوم كى يجمع هذا الشمل
فلا تحزنى الجيل لقادم ودموسى


#80013 [ابوبكر سيداحمد]
4.13/5 (10 صوت)

01-17-2011 09:38 PM
عبقرية الزمان و المكان اليس كذلك :D ;( ( ) (؟) ;) :o


#79997 [رد للكيزان]
4.16/5 (10 صوت)

01-17-2011 09:08 PM
iههههههههههههه
( افرح لط بعد العشاء ثم اول ما اصحو في الصباحات الباردة على الواقع وتفك مني الفرحة )

ريحتني ليك راحه شديده العباره دي
ههههههههه


#79989 [ماهر]
4.15/5 (8 صوت)

01-17-2011 08:48 PM
اسمع استيلا
انت ما ياهو براو تابان انيهنا برضوا تابانين شديد شديد والجماعة ديل كن بكرة ركبوا التونسية او في حاجة اسمو نهاية العمر الافتراضي(expiry date )فرصة في عشان نرجعوا اخوان اخوان والحصل دا كان ممكن يحصل من زمان وياريت ما كان لقينا زمن التجربة الصعب دا.
وبرضو بنقول يمكن يكون في خير في الموضوع بتاع الانفصال طالما حيوقف الحرب والموت بين الاخوان.
ولو بقت في حكمة بعد كل زول حقق مراده علينا ان نحافظ علي العلاقات الجميلة الي ما ممكن تعطلها المسافات وبالجد كلنا حزنانين وربنا يكون في العون


#79968 [مواطنة]
4.12/5 (10 صوت)

01-17-2011 07:58 PM
كلنا مسكونين بالحزن وجرح غاير في القلب زي ام سافر احد ابنائها بعيدا وما عارفة حتشوفو تاني ولا لا لكن الامل في الله وبالله


#79950 [mazin]
4.14/5 (8 صوت)

01-17-2011 07:27 PM
هذه والله حالى انا من الشمال انا فرح اشد الفرح ليس لانى اتفصالى عنصرى مدعى العروبة !! لا والف لا !! لكن لانى متعاطف مع الاخوه الجنوبيون !! فهم مظلومون اشد الظلم منا كلنا فى الشمال !! نعم معظم الشمالين اوا هكزا يهيا لى لا يد لهم فى هذا الظلم لكن هم مظلومين وفى حالة الظلم لا يسأل المظلوم الظالم ولا يهنم اذا كان لهو يد او لا زنب لهو


#79948 [ود الجزيرة]
4.16/5 (11 صوت)

01-17-2011 07:24 PM
ونحن ايتها الأبنوسة السامقة.. نشعر باحساسك الدافق الممزوج ( فرحا .. وحزنا ) وجعلك في حالة فصام .. لان قلبك أكبر بكثير من المسافة الفاصلة بين وطنيين ببخط وهمي..فأبقي في القلوب طيفا لأمل العودة ان ساقتك الخطي جنوبا.. فلن ينقطع رحم ولدك .. عن ظهر انجب جلاء الأزهري واخواتكن في كلا الطرفين .. نحبك كثيرا مثلما عشقت فينا حتي قسوتنا عليكم.. فعذرا ان رحلتم .. وأهلا اب بقيتم..


#79935 [نبيل سعد]
4.17/5 (11 صوت)

01-17-2011 07:05 PM
بحبك ايوه بحبك يا استيلا قايتانو ما عشان انت انثي اوشنوبية او جمالية لا بل لأنك سودانية و السودان يجري في دمائنا رغبنا ذلك ام لم نرغب ( لقيتيني كيف ؟)


#79924 [محمد احمد يحيى ]
4.16/5 (12 صوت)

01-17-2011 06:42 PM
الغالية ستيلا
قيل ان حادث حركة وقع في طريق مدني الخرطوم ونتج عنه حريق في بص سياحي و لما عمت النيران كل البص كانت هناك امرأة لها طفل رضيع وعندما ايقنت بالهلاك قذفت بأبنها من النافذة وكان الناجي الوحيد . اذن ما دام هناك أغلبية في الجنوب فرحت بالإنفصال وشمرت سواعدنا لتبني يجب ان يفرح الكل شماليون وجنوبيون لا يجب ان يفتح بيت عزاء في الجزء الأخر من السودان ويجب ان تحجزي لنا مقعد متقدم في كرنفال الفرح الجنوبي إن سمحوا لنا وسامحوا كما طلب سلفا لا داعي لهذا الحزن النبيل رب ضارة نافعة.


#79884 [hill]
4.11/5 (10 صوت)

01-17-2011 05:40 PM
وهذا حالنا نبكح والله نبكح اذ كل الوطن الكبير هذا لم يسعنا ماذا نفعل عشقنا التنوع وراهنا على بناء امه نموذج سرقنا الزمن والمرارات اخذتنا بعيدا عن حلمنا عزاؤنا ان الجنوب لن يرحل بعيدا وحا نكون جيران هيته بالهيته عسى ولعل مقبل الدهر يجمعنا


استيلا قايتانو
استيلا قايتانو

مساحة اعلانية
تقييم
2.63/10 (71 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة