01-21-2011 11:34 AM

حبوكانة

استيلا قايتانو

الحب هو كلمة سحرية من حرفين ولكنه يعمل عمايل ومن عمايلو الكتيرة استحق ان يقيم له الناس عيدا . في احيان كثيرة احس كأنه انسان خفي تلاشى ذات يوم ليسهل لنفسه مهمة الدخول في قلوب وعقول الناس ويثير تلك البلبلة والكبكبة ،
صفة التخفي هي الصفة الوحيدة التي تميزه عن الانسان اما بقية الصفات يتشاركون فيها . فهو معقد كما الانسان في احايين كثيرة يحتاج الى الكثير من التجارب والكبوات لينضج ويكبر ، احيانا او غالبا يكون معاقا فهو اعمى ، واحيانا تتعدد اسمائه مثل البشر والحب واحد ، اقدسها حب الله ورسله ، اسماها هو الحب العذري ، واقصاها حب من طرف واحد ، واسرعها حب من اول لحظة ، وانبلها حب الاصدقاء ، واصدقها حب الابناء ، واكثرها إثارة للجدل حب الاقارب ، ابيخ ميزة في الحب انه يفضح صاحبه ويعريه رغم محاولاته المستميتة في النكران والذوغان وحالته تبقى بس ذي العريان ولابس سديري.

ايضا هناك الحب الذي يقع في العبودية والتهميش والقتل عديل كدا هو الحب المكبل بأطر اجتماعية واقتصادية وعرقية ودينية دا بقى حب بودي التونج ، إذ على المصابين به اذا اختارو الاستمرار عليهم ان يخمو ويصرو اذ لا توجد منطقة وسطى ما بين الجنة والنار ، مرات الحب كضاب وبتاع حركات يعني حب ودوران وممكن يغشك ولكن في اول مواجهه يخليك واقف ويقوم صوف او يذوب ذي حلاوة قطن لمن تحتار وما تعرف هل الكنت فيه دا حالة حب ولا اعجاب ولا انا مالي يا الله ؟ .

الحب ايضا ذي الطاقة بتحول من شكل لي شكل ومرات ما بدينا فرصة عشان نستوعب مراحل تحولاتو يعني حب البنشات وفترات الخطوبة يمكن يكون في شكل ضوء مشع كدا ومفهرد وواااضح ، بعد يخش البيوت يمكن يتحول الى صوت ويتمثل في النقة الكتيرة والكلام البايخ والواجبات والالتزامات لغاية تشك في روحك ومرات تصارح نفسك وتقول فلان دا والله بقيت اكجنو كجين رغم دا تكون ما قادر تخلي بيتك وترمي بكل الاشياء الجميلة والغير جميلة بعرض الحائط عارف المقعدك شنو هو الحب ، يا ابن الكاااالب .

مرات الحب بتعرض لامراض نفسية ممكن يجن عديل كدا ويحجز صينية جنب التجاني الماحي وممكن تجيهو حالة انفصام يعني تكجن الزول الصباح وتحبو بالليل تصحى الصباح تاني تكجنو وهكذا ، اطرف انواع الحب، الحب السكران لط ، تلقاه واقف لمبة يخلي سيدو يشحن اسكراتش ويدور المسجل ويضرب للمحبوب ويسمعو غنية تعبر عنه مثلا يشغل ليها \" سال من شعرها الذهب وتدلى وما انسكب\" وهو عارف انو شعرها قرقدي ما محصل الاضان لكن بحبها ، لان الحب شفاف وما بهتم في كتير من الاحوال بالفريم الخارجي للناس . اليوميين ديل ظهر الحب العندو كرامة وممكن يحرد ومهما يحصل اصلوا ما يقبل ورا ولو سيدو دا يتمردق في الواطة مرديق على شاكلة لو قلبي اتقطع وراك اصلي ما بنذلا ليك ( بس عنيد عنادة ) .
في الايام دي ظهر الحب \" الشفت \" وغير اسمو لحبوكانة وطايح في خلق الله شواكيش وممكن يخلي القلب استاد يحب فريق في كل كابتن يحب حاجة في دي العيون وفي دي الطول ودي الخضرة ، الخضرة الكملت كسرتنا وفي ديك الطيبة وفي ديك الحنية وتطول اللستة ، لان بكل بساطة داير ليهو زول كامل ومافي طريقة الا يعملو في جزارة الغراميات ، رغم كل دا الحب ضروري لكل كائن لانه هو الوقود البخلي الكائنات ديل تستمر في الحياة والعطاء اتخيل انو مافي زول بحبك اصلو ما تقدر تقول على كيفهم وانا ذاتي ما حاحبهم ، حتتحول لي وحش .

ونقول لكل البحبو في عيد الحب القادم وعصر الحبوكانة هابي فلنتاين داي وخلو الحب حقيقي بيناتكم وهو ذاتو داير يحبو ومحتاج للرعاية والسقاية ومحتاج لزول يفهمو لمن يتحول من صورة لصورة وزهجان جدا من الشفوت والشفتات البحاولو يبتزلو معانيه السمحة في جزارة الغراميات .

حوار خاتمي مابين شفت وبتاع الهدايا ـ

قال: لو سمحت عندك بطاقات معايدة .
بتاع المكتبة : ايوة انت ديرو لياتو مناسبة .
قال : عيد الحب . ياحبذا لو مكتوب عليها الى حبيبي الوحيد .
بتاع المكتبة : ايوه موجود مش المكتوب عليها الى حبيبي الوحيد ؟
قال وهو يتلفت : ينصر دينك اديني منهم خمستاشر





تعليقات 17 | إهداء 1 | زيارات 6724

خدمات المحتوى


التعليقات
#89396 [عمر]
4.07/5 (6 صوت)

02-02-2011 10:59 AM
ميز الله سبحان وتعالى الانسان عن الحيوان بالعقل فمنا من وظفه فى محبة الناس وكتب الكثير واراح الخلق بكتابته وخطابته فاحبوه فكانت استيلا منهم وهم كثيرين
ومنهم من وظفه فى الكراهية كتب وخطب ونادى بالكراهية واشعال النار وهدم القيم والاخلاق نسال الله لهم الهداية


#83266 [hamidebbedelnas]
4.13/5 (9 صوت)

01-23-2011 11:43 AM
اللة غالب على أمره يا إستيلا .تفارق كيف تخلينا شوقنا وذكرى ماضينا كيف بعدك إكون الحال .أكيد حنفقد كتاباتك .لكن ستظل إستيلا فى وجدان الكثيرين من الجماهير المحبة لكتاباتك الجميلة ودى اللأقدار هى يا بت يا قرنفل بس أتركى لينا عنوان تواصل ولو إختلفت كتاباتك فى المرحلة الجاية على الرغم من فراقك لنا الحزين إلا أن ذكراك حتبقى فينا مدفونة (أكيد حنلتقى وتتشابك الأيدى من جديد ولو طال الزمن


ردود على hamidebbedelnas
United Arab Emirates [الديابي] 02-11-2011 11:00 AM
ياهذه البنت التي تمـــــــــــــــــــــــــــتد سهلا وربوعا وبقـــــــــــــــــــــــاع اولا التحية للرائعة دوما عبر كتابتها استيلا ولكن يحزنني جدا وداع الناس لها ؟؟؟؟؟؟؟؟؟؟؟؟ فهل ياترى هي سوف تتوقف عن كتاباتها او ماشابه ذلك ؟؟؟؟؟؟ ابدا اعزائي فالقلم الحّر يظل حرا في اي مكان وفي اي جزء من السودان هنا او هناك فكما هنا مفسدين هناك ايضا مفسدين >>>>>>> وبعدين بالبلدي كدا السماء دا ماحق زول ولا بقبل القسمة على اثنين


#83009 [lابو محمد]
4.11/5 (9 صوت)

01-23-2011 07:17 AM
رائعة انت يااستيلا ورائعة كتاباتك السحرية التى اشاعت فينافرحا بعد حزنا تملكنا لى ما ال اليه حال السودان دومتى لنا وحفظك الله


#82901 [حسن عجب الدور]
4.13/5 (7 صوت)

01-22-2011 10:33 PM
مابقدر أقول اكتر التعليقات الشايفه دى لكن فى ملاحظه صغيرهكده
الزول الاسمو ابو عبد المجيد القال ليه منو انتى مسافره الجنوب
هو اى جنوبى قلو ليكم ماشى
مشتاقين كتير والله


#82654 [كريم عبدالله]
4.15/5 (12 صوت)

01-22-2011 01:31 PM
الله عليكي يا استيلا يا رائعة...لكم أحببت قلمك الفياض وذوقك السلس في الكتابة...يوماً بعد يوم تأتينا بكتاباتك التي تفرح الخاطر وتلمس فينا احساساً نبيل وسامي...لكي مني المودة وخاص الإحترام أيتها الملكة والنصر لمناضلات وطني السودان.


#82640 [Mahir]
4.16/5 (9 صوت)

01-22-2011 01:05 PM
استيلا
سوري نسيتي حاجة في حب قرقوش بس كدة لميته كله ولما خلاص رحلت تقول لينا فلنتاين؟ حاجة عجيبة.
... اخوانا هنا قالوا مافي فلنتاين بس في فلانتينو....
مع تقديري لك يا رائعة


#82616 [moh_alnour]
4.16/5 (9 صوت)

01-22-2011 12:38 PM
يعني يا إستيلا خلصتي مواضيع الإنفصال و قبلتي على الحب و الفلنتاين ؟
على العموم و الله أسلوبك جميل في الكتابة في كل الموضوعات التي تتناوليها عبر هذه الصحيفة
و أكبر دليل هذه المشاركات الكثيرة و التي تُعبر عن إرتياح الناس لقلمك
أمنياتي لك ِ بالتوفيق سواء سارت مراكب ريدك جنوبا ً أو رست شمالا ً في أرض المليون ميل



#82373 [الدرمبل]
4.17/5 (8 صوت)

01-22-2011 06:26 AM
اليك يا صاحبة الكتابات السكرية يا عسل ابنوسي مصفي يا معطرة راكوبتنا برائحة البن الابداعي ..... بقليبنا نقول ليك تعالي و بعيونا نقول لا تغادرينا و انا ارشف من فنجان الحبكانة في الراكوبة و الهمبريب يقول يا ليليخطر ببالي ان يكون هذا الموضوع وداع مبكر في موسم الهجرة الي الجنوب و عليك الله تمشي و تسيب حب ناس الراكوبة ليك مع الامل ان يستمر التواصل جنوبا و شمالا فليس للابداع حدود و نقول ليك هابي فلنتاين دي اليوم و غدا و يوم 14 قبراير فايامنا في الراكوبة و معكم كلها حبكانات علي الرغم من وجود ناس ابو العفين


#82365 [ودموسى ]
4.14/5 (10 صوت)

01-22-2011 02:52 AM
ياناس الراكوبه معقوله كده جريت كتير والله وتعبت كتير بس داير لى معاكم
حبه سطرين سااااااكت وبس ووالله ما تخافوا منى انا زول بسييييط جدا
وما عندى اى اتجاه لكن حاملاكم كلام لزيييييييز ومحترم
بس عايز باب الراكوبه دى بيوين عارف ممكن تقولوا لى
الراكوبه ما بتخشها باى اتجاه صاح
لكن راكوبتكم دى الا بالباب عديل حاولت افجها لكن ابت عشان كده دلونى


#82320 [alczekky]
4.19/5 (6 صوت)

01-21-2011 09:47 PM
عليك الله يااستيلاء اجمعي مقالاتك دي كلها في كتاب او اكتبي كتاب ووالله لو تمنو مليون دولار برضو ماتمنو انتي خليفه الطيب صالح عديل كدا ولك الحب والود


#82305 [المؤتمن غايا شيخو]
4.13/5 (10 صوت)

01-21-2011 09:02 PM
الله يابت قايتانو عليكى دوما تشعينى نورا وقلمك يكتب دررا الا ان الحسرة لازالت في ىنفوسنا اذا القدر الذى اصبح واقعا لا محالة فانا لنا بك بعد الانفصال


#82259 [حامدابوعبدالمجيد]
4.11/5 (8 صوت)

01-21-2011 05:59 PM
مساء الحب والسعاده
هسع حبنا ليك وناس الراكوبه ديل كلهم حتخلينا تمشى يااستيلا وين وراك وراك محل تقبلى فى سوق سته دار السلام بانتيو ياي مريدى قلبنا حشيهو زي مادايره قطعيهو كمونيه وجقاجق ولا القطر قام مابنفكك
حبى الجامعى لمن سافر وركب الطياره وخلانى يعلم الله حسى انقرش وصوتى راح ومسكنى اسهال عديل والحمد لله
تصبحوا على وطن


#82234 [بابكر الطاهر ]
4.17/5 (10 صوت)

01-21-2011 04:36 PM
بنحبك حب ما اعتيادى يا الجمالك ديمة بادى


#82233 [الكاشف]
4.15/5 (7 صوت)

01-21-2011 04:22 PM
الله يجازيك استيلا .... كل ده بس اتمنى ما تكونى مشوكشه ع فكره بعزك جدا


#82206 [قرفان مهاجر قرفان]
4.12/5 (8 صوت)

01-21-2011 02:35 PM
أيتها الرائعه السودانية الأبية السمراء قلت في مقالك بأن اصدق انواع الحب هو حب الأبناء و كنت أنا قد أحببتك صادقاً من خلال سرد كتاباتك و اسلوبك المميز و شكلك البنوسي المتسلط على الوجدان لذا فقد وجدت ضالتي من خلال موضوعك السمح (فقد أحببتك مثل أبنائي!) لك كل الحب و الود و التقدير و عاش السودان موحداً حراً مستقلا مهما تكن الظروف و الأهول . ;)


#82181 [خالد المبارك]
4.19/5 (6 صوت)

01-21-2011 01:06 PM
وانا بقراء في عمودك ضحكت بصوت عالي مرتي قالت لي مالك قلت ليها مع استيلا قالت استيلا دي منو كمان قلت ليها واحده حبها مطلع دينا عديل كده
شفتي يا بت جون


#82179 [الأسد]
4.16/5 (7 صوت)

01-21-2011 12:54 PM
كثيرا ما سمعت وانا صغير لو فى زول عايز ينفى شعورك بالحب له يقول ليك :حباك

دقونه ؛ لغاية الان لم اجد تفسير لدقونه هذه .افيدينا يا أستيلا


ردود على الأسد
Saudi Arabia [جيلو جابري] 01-21-2011 10:51 PM
يا رايعة ربنا ما يحرمنا من روائعك ودرر ها الزمان

مغرم للطيشْ بأسلوبك الفريد


استيلا قايتانو
استيلا قايتانو

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة