02-27-2014 02:45 PM


حتى السعوديون الذين سمعوا كلام حسين خوجلى إستهجنوه وقالوا لايمكن أن يكون هذا الكلام صادر من شخص سودانى
فالسودانى لايسىء للسودان والسودانى لا يحقر السودان
وقررت أن أفتح بلاغ جنائى فى مواجهة حسين خوجلى وقناة أمدرمان لتحقيره وإساءته للسودان
لم يكتفوا بتقسيمه لدولتين وإشعال الحروب فى أطرافه كلها فسعوا الى تحقيره وتنصيب دولة شقيقة وجاره وصيا عليه وولى لأمره
يا حسين خوجلى السودان هو مايزال سودان خرطوم اللات الثلاث سودان الأزهرى والمحجوب بس إنتو إتخارجوا وألحقوا بأخوان مصر تنشرون الإرهاب والرعب فى المنطقة
السودان هو سودان الرجال الذين جمعوا بين فيصل آل سعود وهو فى قمة مجده وجمال عبد الناصر وهو يلقب بالزعيم العربى ، جمعوهم وأصلحوا بين ملك السعودية وزعيم مصر والعرب بعد نكسة حزيران 1967م ليبدأ التخطيط من الخرطوم لإعادة مجد الأمة العربية والإسلامية برجال مصر وجيشها ومال السعودية ودول الخليج وقرارات الفيصل الشجاعة وتهديده للغرب بأنه عربى بدوى يعنز بدينه وعروبته حديث عهد بالصحراء سيحرق ابار البترول ويعود لحياة أجداده فى البادية ، فصنعت السعودية مع مصر والسودان نصر إكتوبر 73م الذى بدأ من الخرطوم ، لتأتى أنت يا حسين خوجلى وتقول السعودية هى ولى أمرنا – تباً لك – متى كانت الدول ولية أمر دولة أخرى – فالسودان برجاله لم بستطع المستعمر البريطانى وهو فى قمة مجده من لجمه فدخل رجاله القصر وخرجوا برأس الحاكم البريطانى غردون باشا الذى دوخ شعب الصين مع كل عدده وعدته وجبروته - ونحن نعمل بفضل الله فى السعودية تحت كفالة سعودى ولكن ضمن علاقة ينظمها قانون العمل والعمال السعودى ، والكفيل السعودى صاحب عمل له حقوق وعليه واجبات ونحن مكفوليه علينا واجبات ولنا حقوقنا لو أخل أى طرف بهذه الحقوق ورفع الأمر لمحكمة العمل ردت للمظلوم مظلمته سعوديا كان أم مقيما اجنبيا ولم ولن يصل الأمر بين الكفيل والمكفول لدرجة ولى الأمر ، فهذه سقطه ما بعدها سقطه يا حسين ولو كان البشير يهمه السودان وامر السودان لامر بوقف هذا المدعو كذبا بالحسين من الحديث
نحن يا حسين خوجلى فى السعودية خاصة نشكل غالبية السودانيين خارج وطنهم نتدرج من الأستاذ الجامعى والطبيب والمهندس الإستشارى الى مستوى راعى الأغنام الشهير الطيب ، نعامل اهل البلد من سعوديين ومقيمين اجانب بالحسنى ويبادلونا الحب نفسه بل أكثر ، نتمتع بسمعة عالية خارج السودان وقد تحدث عن الجالية السودانية المغفور له بإذن الله صاحب السمو الملكى الأمير نايف بن عبد العزيز حين قال تعتبر الجالية السودانية الأولى من ناحية الإنضباط الأمنى والسلوك ومن خلال حملة الأشهر المنصرمة واجه الأمن السعودى مشاكل مع مقيمين غير نظامين من إثيوبيا ودول اخرى عديدة فكانت الجالية السودانية الأكثر إنضباطا حيث خرج كل من لم يتمكن من توفيق أوضاعه بصورة سلمية وفى الفترة الزمنية التى حددتها الدولة ، نحن محترمين محبوبين ومطلوبين للعمل فى السعودية والعديد من دول العالم ولكننا للأسف الشديد فى عهدكم الميمون هذا يا أستاذ حسين خوجلى أصبحنا سلعة رخيصة ولنا أولياء أمر كمان . لم اصادف خلال قرابة مايزيد عن ثلاثة عقود أمضيتها فى السعودية سعودى طبيب مهندس أو أى صاحب مهنة أخرى وعرف أنى سودانى إلا وسألنى هل تعرف الأستاذ فلان وبدأ يتحدث لى عن أساتذته السودانيين وتميزه عن بقية المدرسين الوافدين من دول أخرى حتى من مصر فى المستوى الأخلاقى والأكاديمى كان آخرهم الأستاذ محمد بن خشيم مدير عام مكتب معالى وزير المياه والكهرباء الذى درس بمدارس محافظة وادى الدواسر جنوب الرياض على عدد من خيرة المدرسين السودانيين ليأتى حسين خوجلى ويقول السعودية دى ما ولى امرنا – هكذا امة بكاملها يمسحها حسين خوجلى من الخارطة السياسة قبحك الله ، فالسعوديون بنفسهم لن يقبلوا أن يقال عن سودان الأزهرى والمحجوب هكذا ، لكن هذه هى نهاية كل من يحكمه الأخوان .
حسين خوجلى ومن خلال برنامجه ( مع حسين ) يخوض فى مواضيع كثيرة ويعلق وينظر فى الأمر الذى يعلمه والذى لايعلمه ونحن نعرف أن الإمكانيات الحقيقية تبان فى المناظرات والأحاديث الغير مكتوبة فتظهر سوءته وضعفه.
حسين خوجلى شأنه شأن غالبية أهل السودان يتحدث عن الذى يعرفه والذى لايعرفه ، الذى يجهله والذى لا يجهله ، حتى زل لسانه زله كبيرة وسقط سقطته كبيرة أطاحت وببرنامجه ( مع حسين خوجلى ) وذلك حين تطرق لخبر أوردته بعض الصحف السودانية حول قرار سلطات البنوك السعودية وبالطبع ليس الحكومة السعودية لأن السعودية دولة مؤسسات والموضوع يتعلق بقرار مقاطعة التحويلات المالية بين البنوك العودية والبنوك السودانية كما حدث للسودان من دول أخرى .
كنت أتمنى على الصحف السودانية التى نشرت الخبر أن تتوجه بسؤال لمعالى محافظ بنك السودان وتسأل عن السبب وراء هذا القرار الذى لم يكن سعوديا فقط بل صدر من عدة دول . أنا لست إقتصادى ولا مختص فى البنوك ولكن أعلم أنى لو تقدمت بطلب للبنك المركزى السودانى لفتح بنك يسمى ( بنك سلمان ) سيطلب منى تحديد رأس المال بالمكون الأجنبى وراس المال بالمكون المحلى والودائع التى تكون تحت تصرف البنك من ذهب وخلافه والمستندات التى تثبت ذلك ، مش زى لمان مشيت البلدية لفتح كافتيريا البريستديج لم أسأل عن رأسمال الكافتيريا .
كلنا بمن فينا حسين خوجلى نصمت ولا نتحدث ولا نخطىء فى حق جار عزيز علينا كلنا هى السعودية وننتظر الإجابة من معالى محافظ بنك السودان . ماذا حدث للسودان حتى تتوقف تحويلات العملة الأجنبية مع العديد من دول العالم ؟
لا نخطىء ونقول السعودية هى ولى أمرنا ودى سقطه كبيرة ، فنحن دولتين مسلمتين ، السعوديون عرب خلص مسلمين بنسبة 100% بينما نحن فى السودان خليط بين العرب والنوبة والزنج وخليط بين المسلمين كغالبية ثم مسيحين ولا دينين ( وثنينن حتى بعد فصل جنوب السودان لدينا مناطق فى جبال النوبة وجنوب النيل الأزرق لا تدين بأى ديانة –المملكة العربية السعودية تتفوق علينا بقدراتها الإقتصادية ونظام حكم مستقر منذ تأسيس المملكة العربية السعودية على يد المغفور له الملك عبد العزيز بن عبد الرحمن آل سعود فى 1930م ، أى نظام حكم ملكى إسلامى مستقر قرابة 84 عام هذه الفترة الزمنية الكبيرة تناوب خلالها على السودان قرابة 10 الى 12 حكومة مابين وطنية وإنتقالية وعسكرية بالإضافة سنوات حكم الإستعمار البريطانى ، ولكن مع هذا الإستقرار السياسى التى تعيشه المملكة والإضطراب السياسى الذى يعيشه السودان ، فإن المملكة ليست بولى أمرنا ولكننا دولتان شقيقتان ند لند كاملتي العضوية فى الأمم المتحدة ، كنا نفوقها مساحة قبل أن يتم فصل الجنوب على أيدكم يا حسين ، نفوقها فى عدد السكان وبعد فصل الجنوب تساوى عدد سكان السودان الشمالى مع عدد سكان المملكة إلا أن عدد السكان السعودين لا يتجاوز 21 مليون والأجانب حوالى 9 مليون ، حسين خوجلى قال كلام لايدرك عواقبه حين قال ( وانا أعتبر هذا الموقف لا يشبه المملكة مستنكرا قرار مقاطعة السودان اجرائيا فى التحويلات المالية ) وكنت أتمنى من حسين خوجلى أن يستقل ألة إعلامة ثلاثية الأبعاد ( قناة أمدرمان الفضائية – إذاعة المساء أف أم – صحيفة ألوان ) وأن يتصل بمعالى محافظ بنك السودان ويوضح لنا الأسباب التى دعت دول عديدة من بينها السعودية لهذه المقاطعة ، فأنا لا علم لى ولكنى ومن خلال معرفتى بالسعودية والسعوديين أنهم لا يتخذون قراراتهم عشوائيا ولا يتأثرون بمؤثرات أو ضغوط خارجية ، وعلينا أن نتذكر أن السعودية لم تفعل مثل هذا الإجراء فى أسوأ لحظات تاريخ علاقتنا بها حين خرجت حكومة الإنقاذ تهتف لصدام بدخول الكويت وضرب الخفجى السعودية وحسين ذكر ذلك قبل إسبوع تقريبا وشكر للكويت والسعودية الصفح والنسيان الجميل ، وحديثك يا حسين يصب الزيت على النار فألجم لسانك وتأدب فى حضرة الكبار وقد وردت عبارات خطيرة فى حديثك حين بدأت تتحدث عن حق السودانين المسلمين فى الدخول للديار السعودية لغرض أداء فريضة الحج أو العمرة وهنا حسين يريد أن يحرك الشارع السودانى فى مظاهرات عدائية ضد السعودية كتلك التى تحدث فى مصر حين يرتكب مصرى مقيم فى السعودية جريمة ويلقى العقاب ، ولكن اقول لحسين أن شعب السودان لا تحركه اقلامكم يا حسين ولا خطبكم فهو شعب صابر محتسب مقتدر يعرف مصلحته ، وهل سمعت بأن سودانى أو سودانية تقدم للحج أو العمرة ومنع لأسباب تتعلق بتحويلات مالية – لا أظن ذلك – فى حالة الحج والعمرة يا حسين بك العملة الصعبة تخرج من السودان وتتجه للسعودية وهذا غير ممنوع – المحظور هى تحويلات مالية من خارج السودان لداخل السودان وقد تكون قله من الناس ترسل المال لدعم المتطرفين الإسلاميين لزعزعة نظام الحكم فى مصر عبر السودان والله أعلم – لكن يا حسين هسع لو عندك مليار دولار عاوز ترسلها للسعودية مرحب حبابك بس تكون قروش بيضاء ما محتاجه لتبييض ..
أعود واؤكد أن لدى محافظ بنك السودان الإجابة على الاسباب الحقيقية التى جعلت هذه الدول توقف التعاملات فى التحويلات البنكية وحديث حسين خوجلى لا داعى له فأنتم يا حسين لم تسقطوا إقتصاديا ولكن سقطتم سياسيا والسقوط السياسى يقود لمثل ماحصل
أنتم يا حسين سياسيا مازلتم تدافعون عن مرسى وشرعيته المزعومة والدول العربية من السعودية للكويت للإمارات مع التغيير فى مصر ومازلتم تتقربون من إيران وهى تحتل جزر الإمارت طمب الكبرى والوسطى والصغرى تغردون خارج السرب العربى وعاوزين تصلوا لبر الأمان – أنا يخيل لى السودان دا فى مافيا بتديره وتتحكم فيه وأن الموضوع خرج من يد البشير وفريقه بالقصر وإلا لكانت هنالك قرارات سريعة أتخذت لإسعاف السودان ولكن الأمر خطير جدا ...
قناة حسين خوجلى ( أمدرمان الفضائية قناة الحق والخير والجمال ( وي ) ووي حرف نفى لإمتناع كنارى المولد والنشأة والكنارة هم أبناء قرية كنور شمال عطبرة أهل عمنا إبراهيم طلب عليه الرحمة أحد أعمدة الرأسمالية الوطنية الشريفية التى قتلت فى هذا العهد مع عشرات الرجال لتنو محلها الرأسمالية الكيزانية الطفيلية – فجأة يجيك ناطى بالزانة – الملياردير فلان وعلان وبكره رئيس لنادى فلان – الكناةر هم أهل طبيب العيون العالمى هاشم قمر الدين وحين يقال لك الكنارى ( أنت كريم وي ) فأعلم أنه لمس منك بخلاً شديدا وتقتير ، ولو قالوا فلان ( شجاع وي) فأعرف أنه رجل جبان ، هذه ثقافة كنارية ننشرها لكم على الراكوبة مجانا لتتعرفوا على قناة الحق والخير والجمال وي ، فحين تورد قناة أمدرمان فى عرضها الصامت ( عناوين ) عنوان بتعافى الدكتورة مريم الصادق المهدى من جروح أصيبت بها أثناء التزحلق على الجليد فى أمريكا لا تعنى بهذا الخبر بث حادثة أو نقل تهانى وأمنيات بالشفاء للدكتورة ولكنه خبر خبيث يقصد منه أن يرسل رسالة للشعب السودانى عن نوعية الحكام الذين تريدونهم بديلا عن حكومة الكيزان ويخص هنا الطعن فى حزب الأمة القومى
ياحسين الدكتورة مريم سافرت لأمريكا بحر مالها وأنتم تسافرون بمال الشعب
وياحسين مريم تزحلقت على الجليد بحر مالها وإنتو إتزحلقتم بمال الشعب حتى خرجتم خارج صالة التزلج لسوء تقديركم
المليارات بدل ماتحولوها لمشاريع زراعية ناجحه حولتموها لقصور وفلل وحريم وسيارات وقنوات وهسع بتتباكوا عشان البنوك منعت عنكم تحويلات المغتربين
حسين خوجلى يبث سموم تقتل فى حديثه مع حسين
قال نحن شعب مطحون من أيام التركية السابقة
نحن يا حسين مش مطحونين من التركية السابقة والطحن والفساد والظلم والفقر وتدمير الخدمة المدنية وكل هذه المآسي بدأت فى يوم 30 يونيو 1989م ولكن أنت وبخبث موجه تريد أن تقنع السودانين أن هذا الحال المائل والكلي المضروبة والعيون المضروبة ليس من أفعال الأنقاذ ولكنه شأنكم منذ أن خلقكم الله
خاف ربك يارجل الطيب الراعى قال للسعودى بكره لمان يختونى فى الشبر أقول شنو
حسين قال أن هذا الوطن لم يتم إكتشافه - الوطن ياتوا السلمكم ليهو الأزهرى أم الوطن اللى قسمتوه ومعارفين تتخارجوا منه كيفن
يا حسين أنت من خلال كلامك اليومى دا تريد أن تبث للناس السم فى الدسم
الكونسورتيم الطبى بتاعك دا مرفوض مش لأنه عمل بطال لأنه شأن دولة ووزارات ولأن صاحب الفكره حسين خوجلى الكوز ونحن بنحاول نخارجكم منها وأنت بتحاول تتدخل مش براك كما نصبت أخوك مولاك عبد الله خوجلى ومش مولانا نحن ، نحن مولانا أحمد هارون ومولانا دوسة قاطعه قلبنا كمان عاوز تضيف ليهم مولانا ثالث – نحن الله مولانا وأنت عبد الله ودوسه وهارون مولاك
قال الفقية العلامة حسين خوجلى
أتصل بى عدد من السيادين بوزارة الصحة إستمعوا لكلامى عن موت ناس لأنهم لم يجدوا العناية واعربوا اسفهم عن ذلك النبأ - وتحرك مامون حميده وتحرك الناطق باسمه دكتور المعز ابن عم الرئيس – يا للعجب يعنى مامون حميده ما كان عارف ان الشعب بيموت لفقره ولايملك حق العلاج – ياخى دى قديمة قبل 12 سنة البشير فى خطاب رسمى قال الشعب فقير – قديمه يا حسين - كل هؤلاء ماعارفين انه فى ناس فقراء بيموتوا عشان مابيملكوا حق العملية -
يعنى يا السودانين الغلابة اى شخص يصل مستشفيات الحكومة عن طريق عبد الله خوجلى وبرنامج حسين خوجلى ومولانا عبد الله خوجلى يعالج مجانا لكن المابيجى عن طريق مولانا عبد الله خوجلى ماحيعالج – يعنى يمكن أن نسميها مؤسسة أولاد خوجلى لعلاج فقراء السودان – طيب يا مامون حميده انت وابن عم الريس ماتمشوا بيوتك ما خلاص سلمتوها لأولاد عمك خوجلى خلوا بيع القماش وبقوا يتاجروا فى علاج الناس
دا بذكرنى مسلسل لى ناس محمد نعيم سعد الدكتور يكشف على المريض ويقول ليهو امشى صيدلية حسن سعيد فيرد المريض ليه صيدلية حسن سعيد مابمشى المريض جاء عاوز اذن عشان يفطر رمضان
يا مامون حميدة ويا الناطق باسمه ابن عم الرئيس المعز حسن بخيت - ليه صيدلية حسن سعيد - ليه امشى لمولانا عبد الله خوجلى ما أمشى كمواطن عادى وادخل استقبال المستشفى ويتم تحويلى لقسم العتاية الأولية ولو وجدت حالتى تستحق الدخول للعيادات الداخلية - حقيقة أن يتم تحويل المرضى بقرار من وزير الصحة الولائى لمولانا عبد الله خوجلى فى جريدة ألوان سقطه كبيرة تحكى عن سقوط دولة بكاملها ويا البشير ويا الخضر أقول ليكم نصيحة سلموها أولاد عمكم خوجلى وأمشوا كل واحد يقعد فى مزرعته والخضر عنده مزرعه فى سوبا جابها لينا فى التلفزيون مليانه عجول وفراخ وقال من بكره كل شىء حيكون متوفر ورخيص – الخضر لمان قال الكلام دا البشير كان واقف جنبه وردد تهليل تكبير ورفعوا الأصبع داك ومن يومها ما شفنه لا لحم عجول رخص لا فراخ رخص لا بيض رخص ووزير صحتهم سلم المسئولية وعلاج الشعب لأولاد عمك خوجلى – يلا كله تترون
اسأل الله العلى العظيم أن يتحرك يوم غد ثلاثة مليون الى اربعة مليون مريض لمقر صحيفة ألوان وخلى مولاكم أنتم عبد الله خوجلى يستقبلهم كيف ، وبما أوتى من قدرات يوزعهم على مستشفيات مامون حميده الحديثة
يا جماعة الكونسورتيم اللى بيحدثكم عنه حسين خوجلى دا إنتبهوا له كل اضلاعه الاربعة كيزان - كبيرهم الذى علمهم السحر حسين خوجلى كوز - مولاكم أنتم عبدالله كوز - مأمون حميده كوز - المعز ابن عم الريس كوز والمستشفيات دى مش حقت الشعب لأنها لو حقت الشعب كان الشعب توجه اليها مباشرة لكن الكيزان عاوزين يقولوا ليكم دى بلدنا ودى مستشفياتنا ومن اراد العلاج يدخل لهذه المستشفيات من خلالنا نحن ولا أى احد سوانا
قرار خاطىء يا مامون حميده يخصم من رصيدك الكثير
ويا دكتور المعز انت ما كل كلام يقولوه لك تنقله بدون ما تعيد تقييمه ومامون دقس دقسه كبيرة
اما حسين خوجلى فهو اعلامى انتهازى وصولى بإمتياز عاوز يصل لى قلب الرئيس ورجاله ويقول لهم ان قناة امدرمان الفضائية سوف تحمل عنكم معاناة ومشاكل الشعب والغلابة الفقراء والمرضى لذا خصصت هذا البرنامج لفش الخلق بينما الطبيعى أن يذهب كل مريض فقير معدم أو مقتدر للمستشفى التى تقع ضمن مطقة سكنه – يقابل طبيب العناية الأولية – طبيب العناية الأولية يقدر حالته الصحية لو إستدعى الأمر يحول ملفه للأخصائى صاحب الإختصاص مع ملف فحوصات للبول والبراز والدم وصور الأشعة لو إستدعى الأمر – الأخصائى يشخص الحالة ولو رأى ضرورة تدخل جراحى يحول للطبيب الجراح المختص – يحدد موعد الجراحة وتجرى – لو عنده فلوس أو ماعنده فلوس يعالج بمال الضمان الصحى إبنتى بالأمس قابلت طبيب إستشارى كبير فى النساء والتوليد بمستشفى عبيد بالرياض – الطبيب سودانى علم ومعروف لكل الناس ( الإستشارى كمال الرضى ) الكشف بثلاثمائة ريال دفعت 11 ريال بس كتب ليها حبوب حديد فى الصيدلية طلب منها أن تدفع 1 ريال نعم واحد ريال وهى أستاذة جامعية والحمد لله ، الفحص الشهرى لمتابعة حملها مقابل 11 ريال بس وحبوب FOLIC ACID بريال بس – دا السعودية – نظام وأدب وإحترام وكل شىء مرتب – لكن مع كل ذلك مش ولى أمرنا يا حسين – ما نكتسبه لا يأتينا صدقة ولكنه يجدنا وإجتهادنا – لا ترخصنا فنحن عزاز وأنا عارفكم عشان تحكموا وتتمكنوا ممكن تعملوا حاجات كثيرة مش كويسه ونحن مع السعودية فى وقف التحويلات المالية من السعودية للسودان لو كان ولو جزء بسيط من هذه الأموال بيذهب لزعزعة الأمن فى مصر ودعم الإرهاب وأنت عارف يا حسين خوجلى السعوديون فعالون لا قوالون – ولو لم يثبت للإخوة السعوديون بالدليل القاطع أن ضررا ما قد حدث لمصر أو للسعودية نفسها فهى تعيش حرب منذ مايزيد عن عقد من الزمان مع الأرهاب - لما أوقفت التحويلات – لكن حديثك المتسرع عن تحويلات الحجيج والمعتمرين لم يجانبك فيه الصواب – فمرحبا بكل دولارات السودان للسعودية ولازم تفهم أن المقصود دولارات دول الخليج للمتطرفين الذين للأسف الشديد إتخذوا من السودان مقرا وملاذا لهم بعد طردهم من مصر والإمارات ويا حسين خوجلى كلم البشير قول ليهو السودان عنده مايكفيه من مشاكل فلا تحولوه لأفغانستان جديدة
فالإرهاب لايهدد مصر العروبة ولكن مهدد خطير لو ترك دون مراقبة وتجفيف لمصادر موارده المالية لهدد السعودية والحرمين الشريفين وهدد الإمارات كما تابعنا فى المحاكمات الأخيرة ولمكن إيران من بقية دول الخليج فأتقوا الله يا حسين وقولوا قولا سديدا أو فأصمتوا
[email protected]

تعليقات 14 | إهداء 0 | زيارات 4523

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#930104 [ود الجزيرة]
0.00/5 (0 صوت)

03-02-2014 03:00 AM
بالله الأتراك هم الرسلوكم عشان تعلمونا (الزراعة والتجارة الصناعة) ياخ كتر خيرهم الأتراك، عشان كده كل الاسر بتحب مسلسلاتهم اتاري! ما قصرو.. طيب أنتو العلمكم منو؟ طيب أنتو كنتو بتطيعوا المستعمر للدرجة دي؟ ليكم الحق بيض كده!! أها ناس الدفتردار قالواكم شنو؟ طيب وكت اتعلمنا نحن مالكم ما رجعتو ليه بلدكم؟ وله خايفيننا تاني نرجع لمسيح البعر؟ والله ما شاء الله بتك حامل؟ الله بحلها بالسلامة؟ بالله مديها منو الكلس ده؟ انشاء الله ما بكون من بتوع البعر؟ عشان الولادة ما تكون قيصرية وكده؟ سوق امدرمان خرب ولدنا حسين ونبزكم؟ يا حسين عيب؟ ديل علمونا الدوبيت والشعر وسنن الوضؤ، ما تغلط تاني معاهم سامع؟ داير شنو بيه قطرهم ولا اسكريمهم ولا خزانهم؟ ما كفايه كلمو لينا الانجليز وسوولنا مشروع الجزيرة! تقعد تكتر يقومو يدمرو لينا ساي، تاني الا نرجع رعاء في السعودية ونبيع نعاج السعوديين ب٢٠٠ ريال!! انت شكلك يا حسين عشان عوضو الناس ديل قروش كتير ناس الخزان حاسدهم، بعدين اوعك تكسر تلج للسعوديين تاني انت داير بت الباشمهندس الحامل والراجلها جاب ليهو عقد عمل للسعودية وهسه شغال بعرقو ما صدقة وساكن في الرياض يبيعو ليها (الفولك اسد) ذي السودان يا حاقد؟ عشان عندك قناة.وبعدين مالك ومال قطرهم؟ بدل الواطه ما عملو ليك شارع الموت؟ تقعد تتسوا يقومو ما يصينو تاني لامن تعمل حادث وتكسر يدك.
تاني أبقى راحل زعل منك الباشمهندس ده! معليش يا باشا، كيه ليهو لو البت جابت ولد ما تسميهو ( حسين)؟ حاقد واحد ما عندك قبر زي آل الميرغني في السعودية!.. قال شرفة قال!!


ردود على ود الجزيرة
United States [المهندس سلمان إسماعيل بخيت على] 03-03-2014 07:51 AM
طيب أنتو العلمكم منو؟
نحن علمنا الجليل القدير العليم علمنا الله
نحن النوبة منذ مايزيد عن 7 آلف سنة والبشرية تأتى لمنطقتنا وتتعلم أساليب الري بالشادوف والسواقى وعلمنا العالم الزراعة بالأسمدة العضوية الطبيعية ونسميه الماروق
نحن النوبة ولاحرج
من يظن أن النوبة هى منطقتي المحس والدناقلة يكون مخطىء
من الذى أقام إهرامات النقعة والمصورات والبجراية
هل تعاقد الجعليون مع نوبة لعمل هذه الأثار - لا كلى - منطقة الجعليين وكل القبائل النيلية شمال الخرطوم قبائل نوبية من جعليين وميرفاب وانقرياب ورباطاب ومناصير وشايقية وبديرية ودناقلة ومحس وسكوت وحلفاويين يضاف اليهم النوبة المصرية كل هذه المنطقة منطقة نوبية وقريبا ستقام دول النوبة الكبرى على اراضى جنوب مصر وشمال السودان التى ذكرتها لكم وهذا الموضوع محسوم من سنوات ضمن مخطط برنارد لويس لتقسيم العالم الإسلامى والعربى
وقد بدأ تنفيذ مخطط برنارد لويس بقيام دولة تيمور الشرقية فى إندونيسيا وقيام أريتريا ودولة جنوب السودان وقريبا ستأتى دولة النوبة العظمى ودولة الشرق ودولة دارفور ولبنان الصغيرة الحتة دى حتكون 7 دول وسوريا 5 دول والعراق 4 دول ولا توجد دولة عربية لن يصلها ضنب الصوت
وإنتو يا ود الجزيرة دافعوا عن الجزيرة لحد ماتقلوا نفسكم مخنوقين لا ميناء بورتسودان لا مطار الخرطوم ماتبعكم ومابعيد المنطقة ستمر بمرحلة تقسيم شبيه بتلك التى حدثت بين الحربين العالميتين الأولى والثانية
يا ود الجزيرة اقرأ عن برنارد لويس
يا ود الجزيرة اقرأ عن حضارة النوبة
عرفته العلمتنا منو
وعرفته أنه نحن العلمناكم أما مازلت فى شك من أمرك


#929962 [حمزة]
0.00/5 (0 صوت)

03-01-2014 09:56 PM
هـسـع السعوديين يعرفون ان الباشمهندس عربي قح ومن قبيلة اسمها (بني رباط)؟!
قالوا في واحد سعودي سأل واحد من أهلنا ناس بربر عن اسمه فقال له: اسمي (عبيد).. فقال له السعودي: أدري انك عبيد بس ويش اسمك؟!!
امكن عشان كده اخونا (المهندس سلمان إسماعيل بخيت على) طول الاسم وربعه وذكر الوظيفة كمان..
هل الاسم (بخيت) مستعمل في السعودية؟.. وشكرا..


ردود على حمزة
United States [السماني] 03-02-2014 01:11 AM
يا حمزه الباشمهندس ما قال عربي، نكر العروبة ما قاعد في بلدها، قال نحن كلنا نوبيين طبعا دي دلالة على ان تاريخ السودان مزور، ماهنا شابكييننا نحن جدنا الرسول ونحن جدنا العباس وشنو داك ما عارف. نصدق منو ما عارفين؟.. هنا ما لاقين هواهكم بس في السعودية وباقي الدول العربية بخجلو من شكلهم ما بقولو نحن اولاد عرب نقعد نقيف....عموما انا بعزروا لأنو كما قال المثل ( لا يستطيع احد ركوب ظهرك الا اذا انحنيت)، وبصراحة كلنا منحنيين لأمثال ود بخييييت، لأنو معظم أبناء أهلنا مورثت ضدهم عنصريه ممنهجه في النكات في الاعلام في الونسات، ياخ نحن كل قبائل الغرب يطلق عليها ( ده غرباوي) وحتى معظم السودانيين لا يعرفون اسماء قبائل كثيرة بغرب السودان، قِمر، ميما، مراريت. أتحدى الباشمهندس أمثاله ان كانو قد سمعوا بها، فقط القبائل الشمالية التي ينبقي انا يعرفها الكل، هكذا أرادو ونفذوا وقبلنا، اذا لا تتباكو، والله انا اعرف كثير من أبناء جلدتي ( الفلاته) انسلخو لا يقولون انهم فلاته، لان الثقافة السائدة لهذا الاسم اريد لها ان تكون لل( الشغالة، بتاع الورنيش، الشحات وجاتني الفلاتية ونادي الفلاتية، وأقسم بالله الفلاته منهم براءا.. لمن بعرف التاريخ نحن من أدخلنا الاسلام ولا فخر في جميع الدول الافريقية ومنها نيجريا واقرأو عن دانفوديو، غينيا وغانا ومالي سميت لفرع من القبيلة يسمو ( الملو) ونحن سكان السودان القديم والجديد الأصليين مع غيرنا من القبائل والتاريخ والواقع يشهد، وما مالي ببعيدة حيث كانت تسمي جمهورية السودان لذمن قريب، نحن من انشأ الخلاوي في السودان ومنذ السلطنة الزرقاء ، يكفينا فخر لنا من التاريخ رصيد لا يملكه أحد، ولكن من يهن يسهل الهوان عليه...والله العظيم فقط أسرتي (عمي متزوج رباطابيه وابن عمتي متزوج جعلية وهم أيضاً متزوجين مننا.. وهذا فخر لنا ولكم لأننا جُبلنا على احترام الاخر وتحمل الجراح ، ال المهدي لنا نسب معهم، وكل امدرمان ، ومعظم الأسر. اسأل لكي لا تنفي الانتساب ونسب جملة بين الشماليين والفلاتة ..تجاوز الإساءات جزء من سمات هذه القبيلة ولكن أعدكم انها في طريقها للتلاشي فقط بالتاريخ ليس الا.. انا متأكد ان لديك صاحب من هذه القبيلة ولكن لا تكترث لانه، خلوق لا يرد، ام ناكر بسبب نجاح حملة التشهير ضد القبيلة التي ينبقى ان تملأ كتب التاريخ السوداني ولكن وا اسفاي كما قال النوبي الأصيل وردي،، ختاما للعلم فقط (اول برلمان وطني سنة 1954م . كان من بين نوابه الآتية أسماؤهم من أبناء الفلاتا يعقوب حامد بابكر وكان أول من طالب بإعلان استقلال السودان من داخل البرلمان . وكان أيضا ضمن الوفد السوداني الذي شارك في مؤتمر بإندونق مع رئيس الجمهورية آنذاك السيد / إسماعيل الأزهري) طبعاً الكلام ده قبل الحملة البغيضة التي مورثت ولازالت.
سامحوووني


#929672 [حسن]
0.00/5 (0 صوت)

03-01-2014 02:07 PM
عنصـرية وتفاهة هذا المهندس ظاهرة كالشمس ومن يريد التحقق يرجع الى كتابات سابقة له يتبجح فيها ويفخر بأنه كان يقود حربا شعواء على أهلنا سكان الاطراف (السكن العشوائي) ولا فرق سواء كانوا من اهلنا الجنوبيين اللادينيين او المسيحيين او كانوا من جنس آخر المهم انها مهمة خبيثة والظاهر ان بعض اللصوص وتجار الاراضي استخدموه لادائها حتى يخلو لهم الجو ليبيعون ويشترون.. ولا ادري كم دفعوا له مقابل قيامه بهذا العمل الوضيع؟؟!!


ردود على حسن
United States [المهندس سلمان إسماعيل بخيت على] 03-01-2014 05:40 PM
غريبة إسمك ( حسن ) وبديت كلامك بعبارة ( عنصرية وتفاهة هذا المهندس ) أولا أنت لست بحسن البته ومن تم ترحبلهم لم يكونوا فى مناطق سكن عشوائى ياحقير وياتافه ديل جنوبين يصنعون الخمور البلدية ويبيعون المخدرات ويتعاملون فى الرزيلة وقد إتخذوا من عدد من العمارات والفلل الغير مكتملة سكن لهم مبانى ليس بها ماء ولا كهرباء ولا دورات مياه وفى الليل يتسلل ابناء هذه العائلات الجنوبية للبيوت المجاورة ويمارسوا مهنة السرقة - انا لم ارحلهم ولكنها كانت مهمة مايعرف بقاضى النظام العام نحن سكان أحياء الرياض والطائف والجريف واركويت نزودهم بالمال الذى يسيرون به الحملات وتم نقل العائلات الجنوبية وسلمت لهم قطع اراضى مخططه لمان قرروا الإنفصال باعوها للشماليين
ويا ايها الرجل الحقير انا من دفع مال لتنظيف البيئة حول بيتى ومن سيدفع لى وهذه منطقة مخططة ولا اراضى فاضية فيها للبيع نحن لا نتحدث ياحقير عن غرب امبده انا اكلمك عن الرياض والطائف والجريف واركويت هل سمعت بها
يا حسن انت مريض مرض خطير ومرضك نحن بنسميه مرض ود الحاجة اتصل به عشان يعطيك الحبوب التى صرفت له الواحد يكون عارف الحقيقة ويتحدث كلام خارج النص
واكيد انت مجروح لأنك من آل .............. الله يعفيك


#929507 [المهندس سلمان إسماعيل بخيت على]
0.00/5 (0 صوت)

03-01-2014 11:43 AM
أنا لم أسب ولم أنقص من حق الفلاته والهوسا فى دورهم الكبير فى نشر الإسلام حتى فى دخول الطريقة التجانية للسودان ولم أحقر أو أسىء لفلاتى أو هوساوى حاشى وكلا ولكن أوردت حقيقة تاريخية أن كل أهل الجزيرة من أصول شمالية تجدهم منذ مئات السنين مستقرين بمدن وقرى وهجر الجزيرة من محس ودناقله وبديرية دهمشية وشايقية ومناصير ورباطاب وميرفان وجعليين وتصاهروا مع قبائل شرق النيل من بطاحين وشكريه وغيرهم ومن هو غير ذلك يرجع نسبه للفلاته والهوسا
هذه حقائق التاريخ
الفلاتى وبفتخر لو سألته هل لك أى نسب يربطك بالقبائل الشمالية لقال لك لا وقال أنا فلاتى وهو بيفتخر لأنه نسب يفتخر به
شخص آخر يقول لك أن جدنا الرابع أو الخامس شايقى ولكن حبوبتنا من الكواهلة ولان الحميمية والحنية تكون اكثر لاهل الأم والأخوال والخالات بمرور الزمن سلالة هذا الشايقى لاترجع وتتزوج من الجذور الشمالية ويمتد التواصل مع النسب القريب ( الكواهلة ) وتسأل أجيال اليوم يقولون لك نحن كواهلة ولا أحد يعود لذكرى الجد الشايقى وقد يكون بعضهم لايذكره وتنسى العلاقة التى تربط إنسان الجزيرة بالشمالية وقد ذكرت لكم بيوت من أسرتى توزعت بين جبال النوبة والروصيرص وكركوج والحصاحيصا ال الطيب عطا المنان وعلى ود الباشا والكاملين اولاد جبور وطلق النار - مع افتتاح مشروع الجزيرة حدثت هجرة جذبت كل الناس نحوها
الفلاتى نسب والهوساوى نسب ونسب كريم وارجعوا لى مقالى هل ذكرتهم بسوء ولكن ماذكرته حقيقة
إنسان الشمالية لقربه من مصر ولقرب مصر من اوربا كان اكثر تحضرا ورقيا من باقى مناطق السودان تعلم صناعة الطورية والمنجل والواسوق والكدنكة والمحرات وحرث الارض والزراعة قبل كل انسان مناطق السودان
انسان الجزيرة قبل مشروع الجزيرة حين كانت الجزيرة غابات سافنا غنية كان يمتهن فقط مهنة الرعى وكان اقرب لانسان الجنوب الحالى ولمان حسين خوجلى قال كلمته ( هو ناس الشمالية ديل عددهم كله كم ) اردت أن اخبره بمكانة انسان الشمالية ودوره فى نهضة وتوعية انسان الجزيرة ولولا الله ثم انسان الشمالية لكان انسان الجزيرة البدائى يمسح جلده برماد بعر البقر تفاديا للبعوض الذى كان يعيش فى غابات الجزيرة
انسان الجزيرة اليوم فيه المغربى والشامى وحدثت تداخلات وتصاهرات سكانية عديدة فأين الإساءة للفلاتى أو الهوساوى فى مقالى معاذ الله أن أقول مثل ذلك ولكن زولكم زول الشرفة القناة دى عملته نفخه وبدأ يفوت حدوده ومن لا يعترف بفضل إنسان الشمالية على كل أهل السودان جاحد وناكر والجحد والنكران لايلغى حقيقة التاريخ وأعيد وأكرر - كل أهل الجزيرة خليط متجانس بين قبائل شمال السودان وقبائل الكواهلة والبطاحين وجميع قبائل الشمالية قبائل نوبية صرفة بما فى ذلك من تعرب لسانه ونسى لهجته النوبية كالشايقى والرباطابى والجعلى إلا أن العديد من الكلمات النوبية مازالت تستخدم فى حياته اليومية كالواسوق والأربل والتقنق والساسوية والألس والقشق وأبو ديس التى جئت منها كلمة نوبية وتعنى ابو دم نسبة لجبل شرقها حين تغرب الشمس يتحول لونه أحمر كحمرة الدم لأحتواه على خام الحديد ومعادن اخرى لم تكتشف والله أعلم
الإخوة الأبناء
( آه منكم ) و ( فلاتى وبفتخر ) أنا لم أسىء لأحد منكم ومن حقك تفتخر بفلاتيتك وحتى لو لم تفتخر بها لن تجد لها بديل هى قدرك وانت قدرها ولا تتسرعوا وتتهموا الناس بالعنصرية - أين العنصرية حين أقول سكان الجزيرة خليط من كذا وكذا ... لكن لو قلت أن قبيلة الرباطاب أكرم وأشرف نسبا من الفلاته فهذا حديث عنصرى وبغيض ونهى الرسول ( ص ) عنه ( دعوها فإنها منتنة ) ولو كان فى حديثى همز ولمز فالمقصود صاحب القناة الذى بدأ فى التحقير وليست هذه المرة الأولى فحين إنطلق القطار بين عطبرة والخرطوم قال ناس عطبرة وبربر هم كلهم عددهم كم فلا يستحقون قطار وحين تعرض لبربر قال حديقة مافيها ولو عاوز طفل ايسكريم لازم ابوه يمشى لعطبره ، قولوا ليهو والله العظيم نحن فى الخمسينيات لمان نجى بربر بناكل اكل فى الخرطوم اليوم مافى والأيسكريم كنا نسميه الدندرمه وعرباته تحوم بشوارع بربر وتزمر
حيث خوجلى شبع يجى يتكلم شعبان يتجشأ ملأ القناة عفنه بالتجشؤ وسوء القول مما أستفزنى لكتابة هذا النص الذى قد يرى البعض أنه أساء إليه فأعتذر للجميع إلا لصاحب ( قناة الأحرار )


#929208 [آه منكم]
0.00/5 (0 صوت)

03-01-2014 12:03 AM
للأسف اصبح يتحكم في قبولنا للشىء أو رفضه نزعه جهوية بحته مثال لذلك النكات ما يضحك فلان يثير غضب فلان كل شىء قبلي وللأسف من من يدعون انهم مثقفون أمثال هذا الباشمهندس، قال ثامبو أمبيكي، والله لو عندنا زيو كان الزيك ديل ما اتفاصحو، هس لو شلت ثامبو ختيت اي زول ابيض الوضع يكون عادي، لأنو باعتراف منك صريح ( الأتراك ليس الأخلاق دفع الشماليين لتعليم الآخرين الدين والحياة كما يدعي عديم الحياء) وبرضو الإنجليز نفذتوا أوامرهم في أشياء كثير ما في داعي لذكرها نخليها ..... ما شطار أنتو ما زينا، طبعا النزعة العنصرية الفيك وألفي غيرك خلت القبائل التي يساء اليها هي فقط التي تنحدر للأصول الافريقية وأم لماذا، لم ولن نسمع شخص لمز ( اليمنين، الرشايدة، الشناقيط، الأقباط، الأغاريق ....) لا تسطيعو يا نقص ..


ردود على آه منكم
United States [صحيح] 03-01-2014 11:35 AM
أحسنت يا آه منكم


#929170 [فلاتي وبفتخر]
0.00/5 (0 صوت)

02-28-2014 11:02 PM
والله السقطة الوقعت فيها افضل منها حقت حسين بألف مرة وخاصة من زول مثقف وباشمهندس زيك، قلت الماعندو أصول شمالية يا فلاتي يا هوساوي يا .... طبعا تفسيرها بغيض لدرجة غلبك تكتبوا طيب انا أتبرع اكتبو ليك وله أحسن ....، ياخ انت عنصري لدرجه العمى. انا أرد كفلاتي وأقول بكل ثقة لا يخلو بيت شمالي في السودان الا ما ندر من الانتساب والنسب مع وللفلاته تلك القبيلة الصامتة لدماثة أخلاق من ينتمون اليها وصابرة على أمثال تغيؤات امثالك واقسم بالله بها من يستطيع الجامكم بكلمات ابلغ وأنجع، ولكن بقلة علمي أعطيك القليل:
١-اول خطاب مبايعة للمهدي كان من الشيخ حسن جمعه يوسف زعيم الفلاتة بدا فور ١٨٨٠
٢-كبير خلفاء الشيخ اسماعيل الولي جد الأزهري العالم محمد ابو زمام الفلاتي.
٣-اول وزير دفاع سوداني امين الفوطاوي الفلاتي ( امين للجبهانة) المهدية.
٤-اول وزير مالية سوداني آدم الاعيسر (امين بيت المال ) المهدية.
٥-أحمد عمر ابو حوة قاضي الشمالية / المهدية.
٦-خلوة الفكي ود عمر الفلاتي بدار الشايقية- يا علمتنا سنن الوضؤ
٦-خلوة الشيخ مدني السني مؤسس مدينة ود مدني - يا العلمتنا...
٧-امين دار الخريجين عباس قدح الدم.
كل هؤلاء لا يستحقون التأدب والاحترام يا عنصري يا بغيض، والله ما بتشرفنا، لكن اسأل حبوباتك بتلقى فلاتي من اجدادك.


ردود على فلاتي وبفتخر
United States [سودانى ساكت] 03-01-2014 12:52 PM
الفلاتة اهلنا ولكن الكلام فى الهوسا الحكومة خلتهم بقوا مسئولين ضباط قوات مسلحة والغريبة معظمهم طيارين حربيين بكل حقدهم وضرهم المعروف..وكمان قضاء ومحامين..حليل الرئيس نميرى..

[ود الحاجة] 03-01-2014 10:13 AM
اصبر يا اخي و عبر


#928844 [لن ترتاحوا يا لصوص]
0.00/5 (0 صوت)

02-28-2014 12:46 PM
والله يا باشمهندس مسحت بالكوز حسين خوجلى الارض ورفعت راس السودانيين بعد ان اذلهم ذلك الكوز الاعلامى الذى ينفذ برنامجه باتقان وفقا لاشراف جهاز الامن والمخابرات ..
كل ما ارجوه من الاخوة فى ادارة الراكوبة ان يحولوا هذا المقال الى الاخبار الرئيسية على ان يبقى فترة من الوقت ..مجرد رجاء مع حبى وشكرى وتقديرى ...


#928778 [المهندس سلمان إسماعيل بخيت على]
0.00/5 (0 صوت)

02-28-2014 10:33 AM
حسين خوجلى عنده غبينة ضد ناس الشمالية مايجى الحديث إلا ويقول لك ( هو الشمال دا فيهو كم نفر ) يا حسين إنسان الشمال هو الرحلتو التركية عشان يعلم باقى البشر السودانى الزراعة والصناعة والتجارة إنتو بلا إنسان الشمال كنتو لى حسع تتمسحوا برماد بعر البقر زى الجيش الأبيض - إنسان الشمال نقل عنوة من موطنه وتشتت فى ربوع السودان ونحن عندنا أهلنا رباطاب اليوم فى جبال تقلى العباسيين بجبال النوبة من أصول رباطابية ويفتخرون حتى يومنا هذا بانهم رباطاب وعندهم احد أبنائهم ضابط بالقوات المسلحة يقول لى ياخال ، والرباطاب تلقاهم فى الكاملين ناس بابكر ودجبور وخالى طلق النار وتلقاهم فى كركوج ناس ود المبشر والدناقلة تلقاهم فى الكاملين ناس نبق وفى كل مدن وقرى وهجر الجزيرة والماعنده أصول من الشمالية يافلاتى يا هوسواوى يا من ناس .......... فتأدب حين يأتى ذكر الشمالية ، الشمالية صدرت لكم عمنا بابكر بدرى والشمالية الطيب صالح ووردى والله لو شلنا منكم الشمالية تبقو زى أفريقيا الوسطى سنن الوضوء ما كان تعرفوها
بعدين عندك عبارة بتكررها كثير من غير وعى حين يأتى الحديث عن حقوق المواطن( لمتين ندلع فيكم ) إنت يا حسين الظاهر موعود بمنصب سيادى لو حزب البشير فاز عشان كده كلامك سيادى وكبير زى الدراب
شايفك اليوم بتصلح فى كلامك عن السعودية ونازل فيها كسير ثلج ومدح ، السعودية ليست فى حاجه لمدح أمثالك والعجيب أنك لمان تكتشف أنك مخطىء كان من الأدب أن تعتذر ، فحديثك عن وقف تحويلات النقد الأجنبى من البنوك السعودية والضرر الذى يلحقه بالحجيج والمعتمرين السودانيين اتضح لك انه كلام متسرع وخاطىء - الممنوع ووصول النقد الأجنبى من مصادر ماليه فى السعودية لمتطرفين اسلاميين فى السودان يذهب على شكل مال وسلاح ومتفجرات يشتروا بها مرتزقة مصريين وغيرهم من جماعة حماس لاشعال الحرب فى مصر ودا فى نظرى اجراء سليم حتى تنتبه الحكومة السودانية لمايجرى على اراضيها وقد يكون بعلمها ولا حيلة لها وقد يكون من غير علمها ، أمال النقد الأجنبى للحجيج والمعتمرين دا بيتجه من بنوك سودانية شرقا لبنوك سعودية ودا غير محظور أنت تسرعت وهاجمت السعودية ولمان لقيت نفسك تورطت فى خطأ غير مبرر جيت اليوم تزلل وتمسح الجوخ وتكسر الثلج يا جبان


ردود على المهندس سلمان إسماعيل بخيت على
[المهندس سلمان إسماعيل بخيت على] 03-01-2014 06:22 PM
من قال يا أيها الجاهل المريض أن الوطن يلغى الجهوية والقبيلة أعتز بقبيلتى ولكن لا أقدمها على الوطن تأتى فى الدرجة الثانية وأعتز بوطنى السودان ولكن لا أقدمه على ديانتى ولو خيرت بين السودان والإسلام لكان خيارى الأول الإسلام والثانى السودان ةالثالث قبيلة الرباطاب ما الضرر فى ذلك إن كنت لا أقدم القبيلة على الوطن
حسين خوجلى يحقرنا ويرفع من قدر أسرته الشرفه وأمى الشريفية ونحن دا كله عارفنه شرف نحننه وشرف مشكوك فيه ينسب الشرف له ولأسرته وينكر شرف المراغنة العندهم مقابر فى مكة المكرمة وهو فى مكة لو عاوز إقامة مابيدوها ليهو
فى ناس عايشه فى الجزيرة وتشعر أن من يعيش فى الجزيرة لايملك حدود جغرافية لهويته كالحدود التى تحد أرض الرباطاب شمالا بديار المناصير والشمخية وجنوبا بديار الأنقرياب والميرفاب وحقوقنا ملكية عين مسجلة من التركية السابقة وليس حكر بينما الظروف التى واكبت نشأة مشروع الجزيرة حديثا جمعت كل قبائل السودان فى نسيج اجتماعى متعايش سلميا لأن القبلية ذابت بينهم واختلطوا وتصاهروا وهذا شىء جميل يحمد لسكان الجزيرة فى زمن يقتل فيه ابناء العمومة بعضهم البعض فى دارفور ، فظهر هذا الإنسان الجميل الطيب المتسامح المظلوم الذى يسمى انسان الجزيرة
نحن ليس لنا مشكلة مع انسان الجزيرة لو كان من اصول شمالية أو جنوبية أو غربية أو شرقية نحن ياناس الجزيرة نحتقر ونهان من ابنكم الشريف الحسين بن خوجلى فى غفلة من الزمن عملت قناة فضائية وتخصص فى اساءة انسان الشمالية وكان لابد ان نرد عليه ولو هبشكم طرف الصوت يكون انطبق عليكم الحديث ( ايسب الرجل اباه قلنا كيف يارسول الله يسب الرجل ابا الرجل فيسب اباه ) حقيقة انسان الجزيرة جميل لكن يمكن العيب فى تربية سوق امدرمان

[ود الحاجة] 03-01-2014 10:07 AM
اذا كنت وطنيا فلا تكن جهويا أو قبليا

كيف سنبني السودان بهذه العقلية الجهوية

و بالمناسبة لا أود أن ارد عليك لكيلا اسير في الطريق التي تسير أنت فيها


#928704 [julgam]
0.00/5 (0 صوت)

02-28-2014 08:08 AM
حياك الله يا باش مهندس والله فشيت غبينه بايته،ولكن بمناسبة قناة أم درمان هذه أرجعك إلى الأيام الخوالى عندما قفل أبو عاج أبو صليب فكان أن إنداحت بيوت المومسات إلى الأحياء الشعبيه مما ضايق أسر المواطنين هناك فاضطروا للكتابه على أبواب بيوتهم(منازل أحرار)تمييزآ اها من منازل الدعاره...فكان أن كتبت العاهرات على أبواب منازلهن (أحرار فى منازلهم) فكمان حسين خوجلى حر فى قناته..يسميها حريه وجمال ،حق وجمال مخير..إلا حسين بالحيل وناس إلا فعله كعب أو كما قال ود تور شين لبعض الصنف من الناس :كلامكو حلو إلا فعلكو شيييييين..ويريته قال يا حسين..


#928440 [mustafa]
0.00/5 (0 صوت)

02-27-2014 07:09 PM
وفى هذه الحلقة امضى حسين خوجلى حوالى نصف الساعة يسرد لنا ما قاله للسفير السعودى ولكن سيادته نسى او تناسى ان يسرد لنا ما قاله له السفير السعودى .


#928403 [المهندس سلمان إسماعيل بخيت على]
0.00/5 (0 صوت)

02-27-2014 06:12 PM
لمان كان فى رجال بتعرف فن وأدبيات السياسة السودانى قاد الأمة العربية كلها وأتم صلحاً كان ضرورة حتمية بين السعودية ومصر ثمرته كان إنتصار حرب إكتوبر ولمان غاب الرجال بفينا نمد يدنا ونصافح ثامبو أمبيكى عشان يحل مشاكلنا مع أخوتنا أبناء السودان نصافح يدا لا متوضية لا قارية قرأن وتقول لى لو كان الدين بحر فنحن له كيزان - إنتو والله موز سبيل قديم ومخروم وبيدفق
الليلة جاء حسين خوجلى وطبزها حين قال للسعودية ( إنتى ولية أمرنا ) وحسين لا يعرف أن القاصر أو المجنون الغير راشد هو من يقام له ولى أمر
كدى يا حسين ورينا الشفته شنو فى ناس حكومتك دى
قاصرين لم يبلغوا سن الرشد
أم عقلهم فيه لوثه ومريضين غير مدركين
لو كانت الأولى تبقى مصيبتنا كبيرة
ولو بقت الثانية تبقى مصيبتنا مصيبتين وحقوا يمشوا يسجلوا اسمهم عند مولانا عبد الله خوجلى للعلاج
ولن تجد أى تفسير آخر لعبارة ( السعودية دى ولى أمرنا )
ياقاصر يامجنون
أنا شايف الإثنين من كلامك دا


#928349 [مرقنا... وادسينا تاني]
5.00/5 (1 صوت)

02-27-2014 05:03 PM
متعك الله بكل جميل فقد كتبت مقال جميل
شكراً لبلاغة قلمك ، شكرا لمعرفة أصلك كسوداني وصدقت ((ليأتى حسين خوجلى ويقول السعودية دى ما ولى امرنا – هكذا امة بكاملها يمسحها حسين خوجلى من الخارطة السياسة قبحك الله )) قبح الله كل كيزان الدنيا فهم اُس البلاء واصل الداء
لك الود


#928319 [أبوعلي]
0.00/5 (0 صوت)

02-27-2014 04:30 PM
حسين خوجلي لا يستحق إلتفاتة أو لمحة
لاتبهرك واجهة جسمه المكتنز حراماوكذبا
در حوله وتمعّن في خلفية جسمه (تأريخيّا)
عندها سوف تعرف أنّك تخاطب ( برميل نتانة)


ردود على أبوعلي
European Union [faisal.abdel rahman] 03-01-2014 05:57 AM
والله ابدعت ياابوعلي بلاغه متناهية ...انت مش ابوعلي واحد انت ابوعلييين

United States [لن ترتاحوا يا لصوص] 02-28-2014 12:57 PM
أبدعت يا ابو على وأفهمت غير العارفين ( بالتاريخ ) بطريقة ظريفة

United States [حسن] 02-27-2014 09:09 PM
لا تنسى أن حسين عنده خلفية عظيمة بجانب جسمه المكتنز...
نسأل الله أن يزيده في ذلك..


#928263 [المهندس سلمان إسماعيل بخيت على]
0.00/5 (0 صوت)

02-27-2014 03:27 PM
ياجماعة الإنسان يمكن أن يعيش لو توفر له أمرين : الأمن والغذاء وبدونهما أو أحدهما لا حياة
ممكن تكون شبعان وعندك أكل كافى ومال كثير فى دولة لا أمن فيها تجى عصابة تنهبك تقاوم تقتل تنتهى الحياة
آخر يعيش فى بلد آمن ولكن لا غذاء حتما يوما ما سيموت جوعا ومن لم يمت بالسيف مات بغيره
عشان كده البلد اللى فيها مجلس هندسى محترم تشرك رجال الأمن فى كل خططها – الأمن لا يعنى إعتقال الشعب وتعذيبهم وإرهابهم كما يحدث عندنا – الأمن ضرورة وقدم فى القرأن على الغذاء
الفتحات التى توجد بالجزر الوسطية للطرق والشوارع ينفذها مهندسون ولكن يحدد موقعها رجال الأمن لتلبى إحتياجاتهم الأمنية الضرورية
لمان تعلن عبر قناة فضائية مشاهدة من خلال برنامج ( مع حسين خوجلى ) وتقول الوزير مأمون حميده صرح على لسان الناطق الرسمى بإسمه دكتور المعز حسن بخيت إبن عم الريس وشقيق سكرتير الريس الصحفى السابق وشقيق رئيس التحرير حسن بخيت – دا إعلان كان يجب أن يؤجل حتى يقرر مسئول الأمن هل موقع صحيفة ألوان مناسب من ناحية أمنية لإستقبال العدد المتوقع – هسع العميان شايل المكسح وماشين كلهم من الفشقه لى الطيبنة من كجبار والمناصير لى بدوس وكرورى ويابوس صوب صحيفة ألوان وكل واحد شايل ورقه مكتوب فيها مولانا عبد الله خوجلى
العاوزه حسين خوجلى حيحصل وهو إحداث ضجة إعلامية لقناته وصحيفته ودا حيحصل وحيتصل الألاف بل الملايين هاتفيا مستفسرين والمكالمات دى بتصب ملايين لحسين خوجلى يبنى قصر بدل الفيلا الحالية ويعمل قناة زى الأم بي سي لكن هل حضر فريق عمل مكون من
معتمدية الخرطوم
مرور الخرطوم
أمن الخرطوم
صحة الخرطوم
ووقفوا على المكان الذى سيشهد هذه المعركة
خلونا نسميها معركة مولانا عبد الله خوجلى التى فاقت سمعة مولانا دوسه ومولانا احمد هارون
أنا متأكد لو كلام حسين خوجلى دا نفذ وأصبح شقيقه ومولاه عبد الله خوجلى المسئول الأول بوزارة الصحة الولائية الذى يأذن للمرضى من الفقراء دخول مستشفيات الدولة والعلاج المجانى الإمور حتهيص ومشاكل كثيرة ستحدث
ما هى مؤهلات وقدرات عبد الله خوجلى خريج شريعة لم يجد مكانا فى القضاء الجالس أو الواقف فعمل موظف بصحيفة شقيقه الأصغر
طيب تعالوا نتخيل أن ولاية الخرطوم هى السودان مريض فقير فى سنكات فى اب حمد فى مروى فى الضعين يركب بص أو لورى بكره يكون فى الخرطوم - ياجماعة الخير صحيفة ألوان بى وين ؟ يصل ألوان : ياجماعة عاوز مولانا عبد الله خوجلى ؟ شايف الصف داك امشى نهايته - لمان يتلم فقراء ولاية الخرطوم على فقراء الولايات الأخرى امام مولانا عبد الله خوجلى - كلام مامون حميده بيقول - من يأتى بورقه براءة فقر ومرض من مولانا عبد الله خوجلى نحن نعالجه مجان وحميده ادى تعليمات لمستشفياته
بعد شهر الصف بفوت صف سفارة ليبيا بعد مقتل القذافى
الناس تزحف والصيف قادم
ثلاثة ياخدوا ورقه من مولانا عبد الله خوجلى
وثلاثة لأحمد شرفى وفاروق من ضربات الشمس ما خلاص الصيف وصل
الامن يحول كل الإحتياطى المركزى لتنظيم الصفوف
ستات الشاى يتحرك واصحاب البيع المفروش على الأرض وأصحاب المرطبات وجاردل الموية
ويتفتح باب رزق جديد
ياجماعةالصف دا بتاع اى سفارة - دا مو محل تأشيرات دا صف مولانا عبد الله خوجلى
يا امحمد عاوز اقطع الجمار امشى وين ؟ يا اخى امشى وراء العربية ديك وفك ضيقت
عاوز لى مويه عشان استجمر
امشى لى بتاع الموية اشترى ليك قزازه اشرب وخلى الباقى الجمر بيهو
خلال اسبوع الحته كلها بيلان ووسخ وكمان براز
يظهر المعتمد الهمام نحن جبناه ليكم ساكت نمر وكمان لواء
قرار بقفل صحيفة ألوان وطرد المدعو الشيخ الفيه البركه مولانا عبد الله خوجلى
مو الصف القدام ألوان وبس
تانى فى صف منتظر جيت مولانا عبد الله خوجلى قدام بيته
فى النهاية تحدث ربكه وتطلع وشاعات مش اشاعات وشاعات ساكت
فى مريض عنده زايده خلوها وشالوا ليهو الكلية
وفى مريض عنده التهاب كبد وبائى بيعالجوا فيه من الملاريا لحد مالحق أمات طه
الحاصل شنو يا جماعة
البلد دى مافيها مسئول يشتكوا ليهو
فى أمشى قناة أمدرمان قناة الخير والحق والجمال وي وأسأل عن كبيرهم الذى علمهم السحر
قول أستاذ حسين وين
الله يرحم السودان
واقول لجيران صحيفة ألوان أمشوا شوفوا ليكم محلات وسكن جديد فوضعكم سيكون كوضع جيران ميدان رابعة العدوية بمصر أبان إحتلال الأخوان له


المهندس سلمان إسماعيل بخيت على
المهندس سلمان إسماعيل بخيت على

مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة