المقالات
السياسة
سودانير..المدير العام
سودانير..المدير العام
03-05-2014 07:12 AM


يتبجح السيد المدير العام هذه الايام امام خاصته من الموظفين التابعين له بالقول " انتو قايلين انا محتاج لي سودانير دي؟ انا والله لو ماساي البيض والبقر حقاتي اهم لي منكم ولي 3 اسابيع ماشفتهم" تخيلو بس سيادته بقارن البيض والبقر المتناثره علي ارض الجزيره الخضراء بي سودانير بي كل تاريخها وخبراتها. هل يمكن لرجل كهذا ان يتفهم خطورة الديون التي تثقل كاهل الشركه حتي يعمل علي سدادها؟ ديون تفوق ال500 مليون غير الديون الخارجيه (كما جاء علي لسان المجلس الوطني) تتغاضي الحكومه الطرف عن معرفه من تسبب فيها.
ربما تكون الابقار محتاجه الي سياتكم, ولكن قطع شك سودانير ليس كذلك لانها غنيه بي ناسها (بس مابتدي حريف). فاصغر موظف عمليات او حركه او حجز او حتي (طباخ) في سودانير يمكن ان يقوم بادارتها احسن من سيادتكم بدون شك. فمن تكون انته حتي تجئ اخر الزمن وتعتبر ان سودانير في حوجه الي خدماتك؟ مجرد انسان كان يعيش في خلاء الجزيره بين الحيوانات, ثم اتي اليه ابن عمته وقال له:" ها جنا هوي انا سايقك معاي الخرتوم". ثم اصبحت بجره قلم المدير العام لشركه الخطوط الجويه السودانيه والتي يساوي راس مال العاملين فيها من اطقم طائرات ومهندسين وموظفي عمليات وحجز وحركه مالا تستطيع ان تتخيله. ثم (كدي تعال هنا) ماذا تعرف انته عن سودانير؟ هل تعرف كابتن عبده عزالدين؟ اذهب الي ملفات الحكومه البريطانيه وستجد اسمه مكتوبا في قائمه الشرف للطلاب الاجانب الذين حازو علي درجات عليا في عالم الطيران مع كل من كابتن عمر علي وكابتن احمد علي عبد اللطيف. هل تعرف عبد الرحيم درارواسامه وقيع الله والفاتح عابدين؟ اذهب الي دهاليز الارشيف في المملكه الاردنيه وستجد اسماء مئات العاملين في قسم العمليات الذين نالو درجات ترفع اسم السودان عاليا في رخصة الدسباتش. هل تعرف المهندس صلاح بليل او عكير ولا عمك برعي الذي كان يقود العربه قبل صلاه الصبح لاحضار طاقم الطائره من الدروشاب والميادين مليئه بالماء حتي تقوم الرحلات المتجهه الي كل اطراف السودان في مواعيدها؟ هل تعرف زهره حامد وحسن عوض الله وجعفر العطا وكمال سابل؟ ام هل تعلم ان الخطوم القطريه ,الطيران الاول في العالم صاحب ال7 نجوم, قد شارك في وصوله الي هذه الدرجه الذين تربو في كنف سودانير والتي تتبجح الان انك لست محتاجا اليها وانما هي المحتاجه اليك. اخاف ان تفتكر ياسياده المدير بان طائراتنا ستتوقف عن الاقلاع اذا اقتطعت من وقتكم بضعة ايام لمراجعه ممتلكاتك في الجزيره او المتناثره حتي خارج الحدود؟ نحن نسمح لك بذالك, ونسمح لك ايضا بان تاخذ اجازه بدون مرتب مدي الحياه فقعادك ومشيتك سيان عندنا. فسودانير الحاليه تديرها مجموعه من العصبجيه لاهم لها سوي تجهيز الملعب (لهبره ما) لانها مولد وصاحبو غايب.
نحن ياسيادة المدير نكرهك ونكرهه كل الغزاه الذين اتو الينا واحتلونا مثلك. لا تغرك الابتسامات التي يوزعها عليك الذين من حولك, فهؤلاء لا يمثلونا كما انهم ليس جزء منا, وانما هم مجموعه من الاصولين الذين تعودو علي (كسير التلج) لكل مدير.
واخيرا رساله رقيقه للرجل الذي فرضك علينا "شكر الله سعيكم. يلا يلا لي بلدك يلا وسوق معاك ولد (خالك). اذا عايز تساعد الرجل, فامبروطريتك لا تغيب عنها الشمس."
[email protected]





تعليقات 7 | إهداء 0 | زيارات 3116

خدمات المحتوى


التعليقات
#933993 [لنيل الازرق]
1.00/5 (2 صوت)

03-06-2014 10:50 AM
هذه هى العقليات والنوعيات التى تدير دواوين الخدمة فى سودان التمكين ماذا نتوقع غير ماهو حادث الان من انهيار تام فى جميع مناحى الحياه


#933864 [kamuzu]
1.00/5 (2 صوت)

03-06-2014 08:43 AM
مدير سودانير هو الاسناذ عبد المحمود سليمان وهو ابن عمة رجل الاعمال المعروف جمال الوالي والاثنان من فداسي الحليماب - الجزيرة - وهذا الرجل تخرج من جامعة الخرطوم - كلية الاقتصاد- ونال الماجستير في الاقتصاد من جامعة بريطانية (عندما كان الدكتور ابوقناية يعمل مضيفا بسودانير ).. وتقلد عدة وظائف بالدولة من قبل وعمل خارج السودان بدولة الامارات ومن بعدها عاد ليتقلد الكثير من الوظائف الكبيرة والهامة بالدولة .. وهو من المشهود لهم بالنظافة .. واعماله الخاصة بفداسي قصد بها مساعدة الكثير من الاسر الفقيرة بها ..ودابو قناية لديه اصول اسرية قوية جدا بفداسي وكان الاولي به السؤال عن الرجل وخبراته قبل الخوض الخاطئء في سيرته..
لمدير سودانير ولدكتور ابوقناية عاطر تحياتي


ردود على kamuzu
European Union [ممكون وصابر] 03-07-2014 06:15 AM
يعني هسع فقراء الجزيره بشربو لبن وبياكلو بيض مجانا؟ الراجل تاريخو معروف وتجارتو البقومو بيها اولادو وعمو بتاع المجلس التشريعي في شمال كردفان معروفه وحكايه ال110 و220 فولت معروفه بس بقت علي د ابوقنايه الحيطه القصيره دي, رش الكيزان يادكتور ونحنا وراك وراصدين بيوتو الفي الخرطوم عماره عماره


#933301 [سوق معاك ولدك]
1.00/5 (2 صوت)

03-05-2014 03:46 PM
واخيرا رساله رقيقه للرجل الذي فرضك علينا "شكر الله سعيكم. يلا يلا لي بلدك يلا وسوق معاك ولد (خالك)....
يا الرازي أنت من وين ومن ياتو مكان حتى أنك لا تعرف عن إنسان الجزيرة غير الخلا والحيوانات ... كان من الممكن أن يكون خطابك أحسن بلا تعرية وبلا من ولا أذى ... ويمشي وين أهلو وين خارج السودان ولا داخله ... ولا يمكن الخرطوم بقت بلد تانية نحن ما جايبين خبر ... ياخي دي سقطة كبيرة ومخزية ومحزنة في نفس الوقت ... نسأل الله لك بالهداية .. وأن يصبرنا على أمثالك ...ونشكر الله أنك خرجت من البلد... وبقيت لا في ...ذكرتني بالهادي الضلالي ....


#933153 [فيصل]
1.00/5 (2 صوت)

03-05-2014 10:56 AM
نعم نسال سودانير اسم يرفرف علي اجمل منطقه روما بوسط البلد ساحه باربريني جوار القصر الرئاسي عندما هدمو سودانير كان مالك العقار يطير فرحا لان ايجار المكاتب قريبا ببلاش سودانير تمتلك بيتا بمنطقه اوستيا بجوار مطار ليوناردو دافنسي بروما من ال\ي باع البيت وباي حق بيت يعد من اكثر البيوت ثمنا في منطقه اوستيا وهي منطقه سياحيه تقع خارج روما وتبعد عن المطار خمسه كيلو متر وكان استراحه لكباتن ومضيفي سودانير كما بيع خط هيثرو بيع مكتب روما وبيت روما ولا يبقي من سودانير الا هياكل عظميه وحديديه ولكن ربكم بالمرصاد لكل من تجبر وتكبر


#933095 [ahmed//]
5.00/5 (1 صوت)

03-05-2014 09:08 AM
هذا قول منْ يريدون قيادة مؤسسات البلد حنكشة وعدم مسئولية ، وفى كل يوم يزداد يقيننا لماذا هذه البلد إنهارت لهذا الحد ؟ ببساطة القيادات راجل واحد فيها مافيها ..كلهم امثال هذا المدير العم ابو بيض ، وبقر .


#933078 [ود الماحى]
0.00/5 (0 صوت)

03-05-2014 08:32 AM
هل لديك شقيق يدعى امين , هو احد اصدقاء الصبا . اين هو الأن وشكرا


#933076 [عاشق الهلال]
0.00/5 (0 صوت)

03-05-2014 08:30 AM
هذا الجاهل الذى يقدم لاسمه بكلمة دكتور من الواضح ان القلم لم يزيل بلمه ،،، قد نتفق معه فى فساد المدير المعنى والذى لا اعرف من هو لقناعتى بان الفساد هو اهم شروط التعيين فى هذا الزمن ولكن استفزازه لانسان الجزيرة و الذى تعلم هو وابناء جيله على حساب كده وعرقه ،، ان يصوره بانه الانسان بتاع يا زول هوى ارح الخرتوم لينتشله من بين البهائم فهذه تدل على وضاعة الكاتب و الذى واينما كانت اصوله ورغم عدم قناعتنا بالجهوية الا انه سيجد اصوله قد نهلوا من خير الجزيرة التى اتوا اليها كخفراء ترع وعمال سكك حديدية ومحالج وخلافه ومع كل هذا تظل الجزيرة تفتح ذراعيها لكل السودان


د.الرازي الطيب ابوقنايه
د.الرازي الطيب ابوقنايه

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة