حساب
01-24-2011 11:35 AM

ساخ سبيل

حساب

الفاتح جبرا

ــ

أجب مستعيناً بالله تعالى على جميع الأسئلة التالية مع تبيين خطوات الحل بوضوح :



السؤال الأول:



( حمدان) يعمل موظفاً يإحدى المصالح الحكومية مرتبه يبلغ 500 جنيه وهو يعول أسرة مكونة من أربعة ابناء بالإضافة إلى أمهم ويسكن في بيت إيجار في منزل صغير بحى شعبى بأطراف المدينة بأجرة شهرية تبلغ 250 جنيه . أحسب كم يتبقى من مرتب حمدان الشهري بعد خصم قيمة الإيجـــــــار



السؤال الثاني:



إذا كان حمدان يركب يوميا مواصلتين كيما يذهب لمكان عملة وكانت هاتان المواصلتان قيمة تذكرة الأولى نصف جنيه والثانية جنيهاً واحداً بحساب مجموع المبلغ الذى يدفعه حمدان للمواصلات شهريا ذهاباً وعودة ؟! مع مراعاة تقريب الناتج لأقرب عدد صحيح جبراً للخواطر.



السؤال الثالث :



كم يتبقى من راتب حمدان بعد خصم إيجار المنزل وتكلفة المواصلات الشهرية؟!



السؤال الرابع :



إذا علمت أن منزل حمدان لا يحتوى على (أي جهاز كهربائي) وعلى الرغم من ذلك فإن قيمة ما يدفعه شهريا للجمرة الخبيثه (الكهرباء) هو 50 جنيهاً كما أنه يقوم بدفع قيمة المياة الشهرية التى تبلغ 16 جنيهاً إضافة إلى رسوم النفايات الشهرية التى تبلغ 7 جنيهات فكم يتبقى من راتب (حمدان) بعد خصم قيمة الكهرباء والمياة والنفايات؟!



السؤال الخامس :

يذهب أبناء حمدان الأربعه إلى مدارسهم (كدارى) دون ترحيل غير ان كل فرد منهم يأخذ مصروفاً مقدارة جنيهاً واحداً يكفى لشراء عدد واحد (سندوتش) فول (غير مصلح) – أحسب قيمة ما يدفعه حمدان شهرياً مصروفاً لأبنائه مع الإنتباه إلى حذف أيام العطلات الأسبوعية والرسمية ثم أخصم المبلغ مما تبقى له من مرتبه .

ملحوظة :

تم إعفاء أبناء (حمدان) من (الرسوم الدراسية الإجبارية) بعد ما قام بإستخراج (شهادة فقر ومسغبة) من اللجنة الشعبية .



السؤال السادس :

يتناول حمدان وأسرته وجبة واحدة فقط فى اليوم ولحسن حظ حمدان فجميع أفراد أسرته (نباتيون) لا ياكلون اللحوم بانواعها ولا (الأجبان) ولا يشربون (الألبان) لذلك فتلك الوجبة غالبا ما تكون (فتة عدس) فإذ كانت تكلفة هذه (الفتة) كالآتى :

نصف كيلو عدس ________________ 5 جنيهات

12 (مايكروعيشة) بواقع عيشتين لكل فرد _ 3 جنيه

نصف رطل زيت ___________________ 2 جنيه

بصلتين +طماطمتين + ملح+شطة ________ واحد جنيه

كيس فحم صغير ________________ واحد جنيه

أحسب قيمة هذه الوجبة الرئيسة (فى الشهر) ثم أخصمها مما تبقى لحمدان من مرتبه (إن كان هنالك بقيه)

تنبيه :

حمدان وزوجته (عاملين رجيم) لذا فهما لا يتناولان غير هذه الوجبة فقط !



السؤال السابع :

لدى جميع أفراد أسرة حمدان ( لحسن الحظ و لسوئه في أن واحد!) مرض وراثى باللثه يمنعهم من إستعمال أي نوع من (معجون الأسنان) لذلك فهم يستخدمون (المسواك) فإذا كان كل فرد منهم يستهلك مسواكا واحدا في الأسبوع وكانت قيمة (كل 6 مساويك) تساوى واحد جنيه. أحسب إجمالى قيمة المساويك المستهلكة شهرياً ثم أخصم المبلغ مما تبقى من مرتب حمدان (إن كانت هنالك بقية)



السؤال الثامن :

لا يقوم أفراد أسرة حمدان (بكى ملابسهم) بل يكتفون بغسلها فقط ويستخدمون (صابون الغسيل) ماركة (أبو من غير رغوة) لغسيل الملابس و(الإستحمام معاً) بواقع (لوح صابون) لكل فرد أسبوعياً فإذا كان كل 6 ألواح صابون تكلف 3 جنيهات . أحسب إجمالى قيمة (الصابون) المستهلك شهرياً ثم أخصم المبلغ مما تبقى من مرتب حمدان (إن كانت هنالك بقية)



السؤال التاسع :

لا يتناول افراد اسرة حمدان (الشاى) بل يكتف كل فرد منهم بعدد 2 ملعقة سكر صغيرة فقط في اليوم (مذابه في الماء) فإذا كانت معلقة السكر الصغيرة الواحدة تحتوى على 5 جرامات من السكر أحسب كم جراماً من السكر تستهلكة أسرة حمدان شهرياً ثم أخصم القيمة الإجمالية مما تبقى من مرتب حمدان (إن كانت هنالك بقية) علماً بان سعر رطل السكر هو 2 جنيه وأن الرطل يساوى 454,5 جرام



السؤال العاشر :





هل تستطيع أن تحسب المتبقي من راتب حمدان للشهر بعد القادم بعد سداد الديون المستحقة لهذا الشهر والشهر الذى يليه إذا أمد الله في عمره علماً بأن هذا الإختبار قد خلا من أشياء أساسية كثيرة كالعلاج والدواء و(الكساء) و(المواجبات) و(الحياة نفسها) ! !



سؤال اختياري (خمس درجات إضافية) :



(أ) هل لديك أي إقتراح يقلل من منصرفات حمدان بحذف بعض البنود (البذخية) !

(ب) هل من نصيحة توجهها لحمدان (دون أن تعرض حياته للخطر) .



كسرة :

(هو فى خطر أكتر من حياتو دى ذاااتا ) !





تعليقات 38 | إهداء 13 | زيارات 5940

خدمات المحتوى


التعليقات
#85152 [نخفتتلل]
0.00/5 (0 صوت)

01-26-2011 09:11 AM
أتمني أي سوداني يفكر أو يخمن كم مصروف عوض أحمد الجاز أو عبدالحليم المتعافي
..؟؟؟؟
لصوص المؤتمر الوطني ... عمرالبشير لو داير يطبق الشريعة الأسلامية نحن نتمني ذلك بس
يكون صادق ويبداء بأقرب اللصوص عوض الجاز والمتعافي ..
ويرجم ويجلد كل أفراد المؤتمر الذين يقعون في الزنا والرشاوي ونهب المال العام


#84724 [ِAbu Galib]
0.00/5 (0 صوت)

01-25-2011 04:30 PM
قلت لي اسمو ( حمدان) ودي مقصودة ولا جات كده;) ;) ;) ;) ;)


#84639 [جعلي ومع الحق]
0.00/5 (0 صوت)

01-25-2011 02:20 PM
على حمدان الدخول في المؤتمر البطني واكيد بعد 6 شهور بالكتير بسكن كافوري وبركب برادو واولادو حيدرسوا في ماليزيــــــــــــا يعني هو احسن من فتحي شيلا ولا الحاج ادم ؟


#84607 [مونتي رغلو]
0.00/5 (0 صوت)

01-25-2011 01:24 PM
حمدان ده بكون شقال بحكمة الله ما شقه حنكا ضيعو
والدليل علي كده اهو حمدان ما قتلو الجوع ولا اولادو كمن كتلم الجوع


#84430 [Zaid ]
0.00/5 (0 صوت)

01-25-2011 09:11 AM
تم إعفاء أبناء (حمدان) من (الرسوم الدراسية الإجبارية) بعد ما قام بإستخراج (شهادة فقر ومسغبة) من اللجنة الشعبية (علييك الله دفع في الشهادة دي كم؟؟؟)


#84396 [ابو احمد]
0.00/5 (0 صوت)

01-25-2011 08:16 AM
يجب على حمدان ان يعمل للحصول على مصدر دخل اخر ، كل الناس في كل العالم تشتغل اشياء اخرى لتحسين الحياة.. يمكن لزوجة حمدان الاتجاه لمشاريع دعم الاسر المنتجة.. يمكن لابناءه بيع منتجات خفيفة(فول تسالي _ يعملوا ليهم شنطة اورنيش)
لاتجعل السودان سوداويا لهذه الدرجة زز

افرحونا شوية وخلو الردحي


ردود على ابو احمد
Sudan [الماكوك] 01-25-2011 12:54 PM
يا ابو احمد وريني اولادك شغالين ورنيش وين عشان امشي اشتري منهم

اما حمدان حالو ماشي عشان بلاقيك في كل مسجد عقب الصلاة شايل ورقه (جاجة لله يا محسنين


#84394 [كتكوت]
0.00/5 (0 صوت)

01-25-2011 08:14 AM
والله حلوا الوحيد انو ياخد كورس تونسى!!! ونحنا طبعا معاهو


#84357 [وجع الزمان ]
0.00/5 (0 صوت)

01-25-2011 07:10 AM
معقولة ياجبرة حمدان مع فلسو دا بالو طويل للدرجة دي واخذت منو كل المعلومات دي .
كسرة:
لو انا حمدان كان انا واولادي ومرتي فلقناك بالحجارة لانك بتهيج لينا المواجع


#84317 [دمعة وطن]
0.00/5 (0 صوت)

01-25-2011 05:30 AM
شكرا الفاتح
ولكن السؤال من وين حمدان يطلع نفايات ؟؟


#84292 [حميدان]
0.00/5 (0 صوت)

01-25-2011 12:15 AM
والله البلد دي مليانة (حمدانات) والشئ المحير كلهم صوتو لـ (الشجرة) عليك الله ديل (حمدانات) يرفعو ليهم علم؟؟ عليك الله فكونا؟؟


#84291 [واحد من الشعب (الفضل)]
0.00/5 (0 صوت)

01-25-2011 12:07 AM
حمدان دا (حاوي) عديييييل كدا !!
عندي واحد صحبي حالتو زي حالة حمدان (دا) اعلامياً فقط نظام تضليل وكدا !! لكن (تحت تحت) يقال انو عندو ركشتين!!


#84272 [الحقيقه]
0.00/5 (0 صوت)

01-24-2011 09:54 PM
الظاهر انو حمدان ما من حجر العسل ولا من حجر الطير الخلو ريحة السودان طير طير


حمدان ) مواطن تابع) وهو افضل حالا من المواطنين مجازا المواطنين في السودان مقسمون علي النحو التالي

1/ مواطن من الدرجه الاولي حوش بنقا واتباعهم نوري وحاشيتها وحجر العسل وحجر ا
لطير وجيرانهم

2/مواطن من الدرجه الثانيه الجنوبيين
3/ مواطن تابع وهم من يسكن بالقرب من المواطنين من الدرجه الاولي
4/مواطنين مجازا ( فور وبجا ونوبة الجبال والانقسنا والمؤلفة قلوبهم ) وهؤلاء بيوتهم من البروش والخيام وكراكير الجبال واسرتهم الارض ويلتحفون السماء ويشربون مياه الخيران ... بختك يا حمدان 500 الف جنيه ياللهول احمد ربك وخلي الا نيميا والسل لاهل المجاز في بلد الجاز

يا جبرا انت مفجوع في حمدان !!!!!!!!


#84252 [كرملو]
0.00/5 (0 صوت)

01-24-2011 08:42 PM
حمدان من السؤال الثاني المفروض يكون أصحاب الدين دخلوه السجن أويكون قد فقد يده اليمنى والرجل اليسرى حد السرقة ولا تكون القوانين السارية الآن غير الشريعة... بس في حاجة لابد من ملاحظتها وهي اذا كان امثال حمدان تطبق عليهم الشريعة حقيقة نلاقي حوالي آآآآآآآآآآآآآآآآآآآآآآآ ولا أقول ليك ياجبرا أحسب لينا عدد الذين يجب أن تقطع أياد يهم من أمثال حمدان من الشعب السوداني إذا فضل حسب تعداد السودان قبل الأخير مع حساب حد السرقة بالجنيه القديم مع ملاحظة توقيت البكور ...... أتحداك لوتحسبها ... ولك فايق الشكر بس حيرتنا البتاع دا بتجيبو من وين.!


#84239 [umhadeel]
0.00/5 (0 صوت)

01-24-2011 07:56 PM
ما عشان ما قدرن نحل اللاسئلة دي سقطنا فى اللامتحان داخل الوطن فهربنا الي الشهادة العربية


#84214 [وحيد]
0.00/5 (0 صوت)

01-24-2011 06:36 PM
حمدان راجل ًرساليً و يقدر ما تقوم به الدولة ً الرساليةً ً لذلك هو لا يشكو لا يتذمر و لا يحرق نفسه و لا يثور و لا ينتفض و ينتظر ان تتنزل الملائكة لنصرة حكومته الرسالية


#84213 [hima]
0.00/5 (0 صوت)

01-24-2011 06:33 PM
يتوكل علي الله ويمشي الذهب


#84212 [القنداوي]
0.00/5 (0 صوت)

01-24-2011 06:31 PM
حمدان دا قاعد في الخرطوم يعمل شنو ؟ وكمان عندو نفس يجيب عيال ؟؟ ما يرجع مسقط رأسه وهناك مرته ممكن ((تعوس )) كسرة ويشبعوا إن شاء الله كسرة بموية.قاتل الله الدجالين الفاسدين الظالمين آكلي السحت ومصاصي دماء الشعب مشاركة مع الملاريا الفتاكة .


#84192 [ابو الحسن]
0.00/5 (0 صوت)

01-24-2011 05:35 PM
استعين بالخبير حمدى 2 عشان اجدول ليه الميزانيه


#84186 [shaza]
0.00/5 (0 صوت)

01-24-2011 05:25 PM
من سكت عن الحق شيطان اخرس وجبرة ما شيطان ولا اخرس دي الحقيقة
طيب يا جبرة قسم لي مرتبي وانا العائل الوحيد في المنزل وهو 319 جنيه ومهندسة كمان
يا خوانا طلعوا الحق وخلوا صاحب الكلمة يفشنا


#84152 [majed]
0.00/5 (0 صوت)

01-24-2011 04:32 PM
امشى الكنيسة


#84144 [ابو سامي]
0.00/5 (0 صوت)

01-24-2011 04:21 PM
يا جبرا الحساب دا حسبته سنة 1995 وانا معلم وجدت نفسي ممنوع من المرض والولادة واللحوم بانواعها والالبان طازة وجاف وممنوع من المناسبات المفرحة والمبكية وممنوع من اللباس والاطفال ايضا وممنوع من اصلاح ما مكن أن يفسده الزمن من مسكن ومفرش وملبس ورغم كل الممنوعات وجدت نفسي وبالكفاف يمكن أن اعيش بالراتب مدة اسبوع واحد فقط لا غير لذا رميت الطباشيرة وهجرت البلد أم صاحبنا حمدان علي النعمان وهو زميل عمل ما زال يعمل بالتدريس ولكن ابناءه أميين ولم يصلوا المرحلة التي أهلت ابوهم ليكون مدرسا وعليه قس


#84129 [أبورماز ]
0.00/5 (0 صوت)

01-24-2011 03:54 PM
أما كلكم أولاد أغبياء .. يعنى ما عارفين حل مشكلة حمدان واللا خايفين ...

أنا بقوله :

يتوكل
على
الله
ويشتغل

رقااااااااااااااااااااااااااااااااااااااااااااااااااااااااااااااااااااااص ................ه


#84112 [ضبعه]
0.00/5 (0 صوت)

01-24-2011 03:20 PM
حمدان 00 حمدان قوم جيب شاى


#84105 [ahmed]
0.00/5 (0 صوت)

01-24-2011 03:10 PM
يدخل النقابه فى الشغل بتاعو
انا بعرف واحد كاتب فى مصلحه حكوميه ماسك النقابه طبعا معين تعين
عندو عربيه الكتور ما عندو
وعندو جنس شلاضيم
وحاجات تانيه
خلو حمدان يمشى ليهو


#84080 [محمود]
0.00/5 (0 صوت)

01-24-2011 02:34 PM
واللة يا استاز الاقتراح الوحيد ابقى كوز


#84062 [ASHREF]
0.00/5 (0 صوت)

01-24-2011 01:53 PM
حمدان تعيشو انتو .انشالله اولادو يطلعو رجال وبحبو البلد.لكن يحبوها كيف وهم عاشو كل العذاب فيها وما شوفو فيها يوم حلو .اذن اولادو حيطلعو يااما زيو او يحاولو يبقو كيزان .بيعتمد على تربيتو ليهم لو رباهم كويس حيطلعو جبانين زيو لو مارباهم حيطلعو كيزان.لان الكيزان الحاليين هم ابناء حمدان تانى ماربى اولادو وطلعو كيزان حاقدين وصوليين بيكرهو السودان وبيكرهو السودانيين


#84053 [أبو احمد]
0.00/5 (0 صوت)

01-24-2011 01:45 PM
أنا شايف زى المعلقين بيهاجمو جبرة مع أنه جبرة دا واحد من السودانين المكتوين بنار الحاصل دا ، يا ناس حاكمو جمرة مش جبرة عارفين جمرة دا منو الخوفنى وخوفكم وطلعنا من بلدنا ولا بس فالحين لجبرة المسكين دا


#84044 [السر ]
0.00/5 (0 صوت)

01-24-2011 01:30 PM
الفاتحه
تعرف ياجبرا علي شنو




الله يرحم الصحافه والكتاب السودانيين


ردود على السر
Oman [وليد] 01-26-2011 10:41 AM
يا جبرا ما تشتغل بيه
الكلب ينبح والجمل ماشي
.
.
.
.
وبعدين طالما ما عاجبك الكلام دا امشي اقرا كلام المتملقين وماسحي الأحذية


#84030 [bam]
0.00/5 (0 صوت)

01-24-2011 01:20 PM
يبقى هذا الحمدان مؤتمرجي نفعي مصلحي وصولي انتهازي ويهتف بالشريعة وهو غرقان في الفساد والظلم بتنصلح حاله في الدنيا وسوف يشتري منزل ويستاجره لانه سيسكن في منزل حكومي حيث الكهرباء والماء مجاناواولاده سيذهبون الى مدارس خاصه بسيارة خاصة طبعا غير التي يمتطيها هو ولن يضطر هو وزوجته الي اللجؤ الى الرجيم لان هنك في المنزل او المطاعم التي يذهبون اليها كل ما طاب من الماكولات وهكذا ---- سوف يكسب حمدان الدنيا ويخسر الاخرة - وهذا حال ناس كثيرين الان = انا افضل ان اكون حمدان ابو خمسمية جنيه


#84023 [خالد فارس]
0.00/5 (0 صوت)

01-24-2011 01:11 PM
سؤال اختياري (خمس درجات إضافية) :

(ب) هل من نصيحة توجهها لحمدان (دون أن تعرض حياته للخطر) .
عليك الله ياجبرا في خطر اكثر من الفيهو ده 0
للمعلق الزول السمح ناس السودان كلهم لوشخطو الكبريت الحال ياهو ذاتو الحال المهدي الترابي الميرغي المعارضة0


#84014 [علي تمساح الكدرو]
0.00/5 (0 صوت)

01-24-2011 01:04 PM
الأخ الأكرم والاستاذ الفاضل/الفاتح صدقني الواحد لو شايل معاه كل المراجع اللازمة وبرشامة برش وكل دفاتر المحاضرات ومعاهم الاستاذ زااااتو ما أظن في واحد ح ينجح... وتبقي زي مدرسة النجاح لم ينجح أحد....نحن منتظرين الملحق بس.
وتبقي الحقيقة انو ثلاثة أرباع الأسر زي حمدان والثلث الباقي أخير حمدان..حضر لينا الملحق ساي بس.


#84010 [Aman]
0.00/5 (0 صوت)

01-24-2011 12:58 PM
الامتحان مكشوف للكل ما في اسئله اصعب من كده يااستاز جبره عشان ناس الشهادة العربية وكده يعنى !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!


#83987 [هاشم عبد الماجد خالد]
0.00/5 (0 صوت)

01-24-2011 12:26 PM
يا ود جبرا
انت قاصد حمدان والله قاصدنى انا
حمدان احسن ليك شوف ليك عزبة بايرة
او امراة شهيد مقندلة
او متحصل فى محلية
او تبيع كواميت وارد واو لعمك الفاتح جبرا


#83982 [ابو الهول]
0.00/5 (0 صوت)

01-24-2011 12:23 PM
هه ههه و الله ده امتحان صعب خلاص , ده الامتحان الصقط بن علي و شكله كده ح يصقط ال....




#83980 [ASHREF]
0.00/5 (0 صوت)

01-24-2011 12:21 PM
اذا كان حمدان راجل جبان ومستكين وبحب العزاب وبستمتع بيو وبمشى يصوت فى الانتخابات لصالح البعذب فيو وبمشى يهتف الله اكبر وراه .اذن فهو يستحق ان ياكل عدس وياكل طين كمان.واذا كان حمدان باقى ليو شويه نخوه وشويه رجوله يمشى الشارع ويطلع ويثور .لكن ما اظن حمدان بقت فيو اى كرامه وعزه .رغم انو اجدادو وصوه على الوطن


#83968 [الطيب]
0.00/5 (0 صوت)

01-24-2011 12:00 PM
يا استاذ جبرا بعد ان اضفنا الادوات المدرسية والمشاركة في المناسبات الاجتماعية وحطب الطلح وكريمات المسوح وورنيش الاحذية وصابون الحمام ورصيد المكالمات وجدنا ان مرتب حمدان يكفي لمدة عشرة ايام مع الترشيد الشديد وعليه فان حمدان ان اراد ان يعيش كريماً فعليه ان يتحول من وظيفته الي مهنة قدو قدو ههههها


#83965 [ابو احمد]
0.00/5 (0 صوت)

01-24-2011 11:53 AM
ربنا يعينك ياحمدان بس منظمة الله كريم موجودة وفي كم حمدان ياجبرة في السودان وفي ناس حمدان يعتبر من الاثرياء بالنسبة لهم الله المستعان


#83963 [الزول السمح]
0.00/5 (0 صوت)

01-24-2011 11:49 AM
والله ياجبرا... أنا بشوف إنو حمدان ده قدامو حل واحد ماليهو تالى

يقنع ليهو من تمانية جنيه ونص ( بالقديم ) يشترى بيها جالون بنزين سوبر ويمشى السوق العربى يكب البنزين ويشخت كبريت وبعد داك يهب السودان كلو وتتغير الحكومة ويخلد حمدان بنصب تذكارى فى ميدان الأمم المتحدة ( سابقاً ) واهو يكون ريحنا من الكتابة الكل يوم دى


ردود على الزول السمح
Sudan [ahmed] 01-24-2011 09:33 PM
السؤال الحادي عشر:

كم حمدان في السودان؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة