04-03-2014 08:30 PM

البوت
هوي يا أخوي وود بلدي
كفاك .. وكفاي .. كفانا سكوت
وهوي يا السمحة بت بلدي
كفانا خنوع .. كفانا قنوت
لشرع الغاب .. لصوت الجهل
لصنماً من كضب منحوت
وأول هام نقولوا بياننا للسودان
كفاك يابلدي حُكم البوت
ويلا نقوم علي النمرود
نحيل نار الظلم هبوت
وايد علي ايد بترمي بعيد
ويللا نقوم علي الجبروت
علي السيف الموشح دم
وفوق راس العباد مختوت
دحين لمتين ...كل يومين
تجينا شتيمة من هلفوت
كم رب أسرة في لحطات
بدون اسباب صبح مرفوت
وكم مظلوم رفع للصوت
صبح مكتول بكاتم صوت
وليكم ربي يا نسوان
ليكم ربي يا البنوت
بقالنا سنين بقالنا عقود
بننفخ في جراب مقدود
فِرِح سودننا باستقلال
تلاتة سنين وظهر البوت
وحلفا دغيم ولا باريس
وضيع حلفا بوت عبود
وغاب البوت ورجع البوت
واصبح لينا شوكة حوت
وبوت راكبين معاو احزاب
وبوت كذاب تقول مسخوط
وبوت شايل كلام هاروت
وبوت جايب كلام ماروت
وبوت حارمنا من القوت
وبوت غاشينا باللاهوت
وبوت جايينا بالاسلام؟؟
كنا نصاري ولا يهود؟؟

حليلا كرامة السودان
حليل نمولي .. وحليل توريت
في نيلنا الأزرق الوادع
صفق أشجارنا صار محتوت
وفي دارفورنا قدل البوت
ونام فوق الجثث مبسوط
وفي كادقلي سرح البوت
وهدم في جبالا بيوت
وبوت الغفلة يا خرطوم
حرق نخوتنا بالبارود
دحين لمتين عقُلْنَا يطير
ويهبط حُر بدون براشوت
دحين لمتين.. وبس لمتين
يكون نَفَسْ الكلام مكبوت
ويللا نقوم علي النمرود
نزلزل سدنة الكهنوت
يمين بالله بكرة بفوت
وكيف طالوت هزم جالوت؟
حليل (ودعبد اللطيف).. و(الماظ)
بوت سوداني كالياقوت
وحلفا دغيم ولا باريس
غُبار( أم در) ولا بيروت



ضياء الدين مدثر رجب/برلين
ragabdidi@yahoo.de

تعليقات 0 | إهداء 0 | زيارات 831

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




ضياء الدين مدثر رجب
 ضياء الدين مدثر رجب

مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة