المقالات
السياسة
المشروع الحضاري ... وفساد الممسوخ شيخ الخلوة ..مقطع (2) من قصيدة
المشروع الحضاري ... وفساد الممسوخ شيخ الخلوة ..مقطع (2) من قصيدة
04-23-2014 11:57 PM

عوض شيخ إدريس حسن

المشروع الحضاري ... وفساد الممسوخ شيخ الخلوة ..مقطع (2) من قصيدة
حوارية (أم زين .. كلام في الزّمة علي لسان السّرة بت محمود وحامد ود الطّفح )
تنــويه :-
نُشر جزء من هذه القصيدة في المّرة الماضية خاص بموت حامد ود الطّفّح تحت عربة الجاغوار بأمريكا
وسوف أواصل نشر الأجزاء الباقية
.................
نوستالجيا :-
متين ياليل يجينا صباح
نشيل من الشّمس مفتاح
وندخــــل في زمن باكر
من شيل التّقيـــل نرتاح؟؟
متين ياليل يعقبك ضو
يا زولي التِعِب من أو وقولة لو
مصاقر الضّلمة شن بتسو؟؟
..........................
النّص :-
شيخ الخلوه
طالق دقنو
جاتو البلوه
دافن راسو مع التّجار
شغّال سمسار ،،
بي إسم الدّين
باع طين أم زين ،،
الممسوخ شهوتو فالته
عاوز اتمتّع
عرّس تاني بعد التّالته
عاوز اتمتّع
توراً لاقي خريفو ويرتع
مادّي كريشتو
وكاتل حيلو
اتل واتفدع ،،
كيفن يا شيخنا
تشيل اللّوح
وتقري الشُّفّع
كيفن يا شيخنا
تشيل اللّوح
وتقري الشًفًع
.............
جاتك امانه
يا شيخنا نسيت .....
كلّ السّويتو مع ام حقين
بت المسجون حسن المسكين
البت يا داب زهرة ياسمين
تحت العشرين ..
مالقمرة بتمشي علي قدمين
جاها المسخوط صاحب (العمدة) !!
صارقيل الطّين ،،
فوق السّبعين زايد سنتين
وسّط شيخنا
شيخ الضّالين
زفّوا البت بي دمع العين
البت اتختّت بين موتين
في يوم باللّيل
والناس نايمين
تركت دُنيا ( العمدة) !!
وحتلت في قاع النيل
تركت دنيا (العمدة )
وحتلت في قاع النيل ..

يتبع ..

عوض شيخ إدريس حسن
ولاية أريزونا ..أمريكا

[email protected]





تعليقات 0 | إهداء 0 | زيارات 1312

خدمات المحتوى


عوض شيخ إدريس حسن
عوض شيخ إدريس حسن

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة