عاش الفول
04-24-2014 07:45 PM

عاش الفول

دنيا غريبه ... دنيا عجيبة
ما مفهومه ... ولا معلومة
تدي الخيخة ذي ما يريد
قصور وأموال ... وزينة حال
وصحة ...عيال
ودولارات وسيارات وسمح الريد
والدولار
لا ألف وألفين ولا عشرين
ولكن قول مليار وتلاتة اتنين
وجهاء حكام
وبرضو عظام
بياكلوا قعود وكبوش وحمام
وناس ما لاقية حتى الموية ..
حتى طعام
يفتشوا في الزبالة للقمة
ويرجعوا بمعدة فاضية تمام
حتى رغيف من داك المخبز
ليه الريحة وليه الشمة
يا الله ما إنت كريم
عظيم وعليم
فرج كربا لينا أليم
تبدل حال
لأحسن حال
ونلقى الجبنه وصحن الفول
وعاش الفول
يعيش الفول
معاي على طول
وآه وآه ولو تمرات
كمان يابسات
تشيل من بطننا الإمساك
ولو مرات
نقدر ندخل الحمام
والصحة تمام
يعيش الفول ...وعاش الفول
يا رب ما يزول
ويبقى معاي يا رب على طول
*********
في واحد اتغزل في محبوبته
تصوروا قال
تشبهي لي شهي الفول وكيس العيش
قالت له تعيش
تسلم وتعيش
وقال وقال
معاك يا الفول وحتى ممات
وحتى التربة والطوبات
*************
دنيا دبنقا
تسبب خنقه
وناس بتشرب حلو المنقه
عصيرا لذيذ
لكنه عزيز
للي زيي وزيك ما بيقرِب
إنت تشرق , هوَّ يغرب
خطوط متوازيه
ما بتتلاقى ولو في خيال
ذي ما قالوا
والخوجة القال
ملازمة محازية
ما بتتغير ولا بتتعدل
لا بتتبدل لا بتحول
قاصدانا عديل
وتتحدانا مهما نشد ونكرب الحيل
وشوية ناس
لحسوا السكر
شربوا السكر
سرقوا السكر
مصوا السكر



حسن إبراهيم حسن الأفندي
[email protected]


تعليقات 0 | إهداء 0 | زيارات 794

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




حسن إبراهيم حسن الأفندي
مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة