04-28-2014 07:13 AM



قصيدة حوارية( أم زين .. كلام في الزّمة علي لسان السّرّة بت محمود وحامد ود الطّفّح)
تنويه :-
نشرنا في المرّة الماضيّة فساد الممسوخ شيخ الخلوة وقبل ذلك
موت حامد ود الطّفح بعربة الجاغوار بأمريكا
وسوف أواصل نشر الأجزاء الباقية

عزّة نفس :-
ما بابا المسيكين والفقير بِفقرو
ما عوّاس قُوالة ومارفيقي بعقرو
بنزل لجّة الوادي البتيتب صقرو
قلبي مكجّن النّاس السّوا وبتنقرو
( شاعر مجهول)
(1)
حكاية أم زين...........
لابتضارا ....ولابتتغابا
أوّل بادي.. جونا ضهابا
ساطوا الدّار .. قلبوها خرابا
قاسوا ومتروا ............
دار أم زين زرعوها حرابا
قسموا أم زين كومين إتنين
واحد للزنج الفي الغابا
واحد للعرب العرّابا
مابين اللّون والدّينّ
دقوا الإسفين في صدر أم زين
بقينا نشوف الزّول زولين
بقينا نشوف اللّون لونين
بقينا نشيل حربة وسكين
شان نكتل مين !!؟؟؟؟
شان نكتل مين !!؟؟؟
(2)
تاني البادي .......
بعد اللّيل ما هوّد وسوّد
الخدر الفينا بيسري
أولاد أم زين مابتدري
النايم ما بدري الغدري
جونا جماعة
من العصر الحجري
سرقوا أم زين بالليل
صلبوها بين ويلين
ويل الموت والجّوع الفقري
هاصوا ولاصوا
في قلب أم زين
فركوا وعاسوا
تمّوا النّاقصة
بعد الحمّى يجينا الجّدري ؟؟
بعد الحمّى يجينا الجّدري ؟؟
(3)
تالت البادي ......
قعدنا جماعة ..
إتشاورنا ....
حسمنا أمرنا
لي فرح أم زين
حدّدنا السّاعة ،،،
نظرنا بعيد ،،
ختينا اللّيد في اللّيد
بعد الرّوح في الجتّه اتردّت
قلنا نعدي الشّاطي اللاخر
زي ما لنّاس سبقتنا وعدّت
قلنا نعدي الشاطي اللاخر
شلنا فرحنا...
زي ما الناس ببناتا تفاخر
نحنا كمان بأم زين نتفاخر
في وجه السّمحة سرحنا
في البنت الشّربت موية النّيل
الأزرق بان في عيونا
كساها سوّاد وسمارة لون ،،
الأبيض بيّض قلبها
ذاب في الدّم سُكّر وليمون ،،
كيف ما يكون ؟؟؟؟
البنت الشّامخه
بين الناس رحبة ومتسامحه
شلنا جمالك غنوة فال
غنّاك برقاً دندن هطّال
غنّاك نخيل طربان
علي نيلك مال أدا الشّبال
غناك فجراً وشلناك موال
شلنا فرحنا ....
إتلمّينا
إتحمّينا
بسم أم زين سمّينا
بعد الرّيح الهوج ما خفّ
نفضنا غبار الماضي الفينا
قلنا الناس تصّافا وتصفا
كانت زفّة يوم الوقفة
للبنت الزّينه ، الرّوعه ، العفّه ،،
بعد الرّوح في الجتّه اتردت
قلنا نعدي الشاطي اللاخر
زي ما الناس سبقتنا وعدّت
قلنا نعدي الشاطي اللاخر
جِبنا المركب !!
دِرنا الدّفة !!
يا (حسن ) أركب !!؟
يا (حسن )اركب !!؟
يا سجم اركب !!؟
يا سجم اركب !!؟
سجم الخاين صرّ وجيهو ونفّ
سجم الخاين جقلب وشكنب
مدَ لسانو فرق اسنانو
سجم الخاين قدّ المركب !
سجم الخاين قدّ المركب !
؟؟؟؟؟؟؟؟؟؟؟؟؟؟؟؟؟؟؟
تاني وقعنا علي دابرنا
وقعنا غرقنا
غرقنا حتلنا
يا بو مروّه... ؟؟؟
يا بو مروّه.... ؟؟؟
منو البنشلنا .؟؟؟
كان .. وكنّا
قال ...وقلنّا
فقدنا ضماير
بقينا عشاير
دمها فاير
كتل الرّوح
بيناتنا شعاير
ما قايلين بيناتنا خساسه
ناس للشر واللّوم عوّاسه
كتل الرّوح سموهو سياسه
غدر الزّول سموهو فراسه
فن الزّيف سموهو كياسه
من ملاكي وخونة كاكي
قرود بتحاكي
دقون بتكاكي
تجّار نخّاسه
وجهلة ساسه
بسم الدّين
باعونا بخاسه
قلبوا الحال بيناتنا خيانه
نفوس طغيانه
من الغش والزّيف تريانه
قلوب وسخانه
من الحق والخير عميانه
أطفال جوعانه
تبيت القوّى
من الجّوع
تشكي وتتلوّى
من مغص الجّوع
بتشم مصرانا
جور ومهانه
جور ومهانه.

يتبع ..
عوض شيخ إدريس حسن
ولاية أريزونا ... أمريكا

[email protected]

تعليقات 3 | إهداء 0 | زيارات 1424

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#987519 [محمد]
0.00/5 (0 صوت)

04-28-2014 02:32 PM
صقر الجن
هلموا تعالوا نحكيلكم
عن سودانا نحكيلكم
هلموا تعالوا يا صبيان
كان وكان يا ما كان
قريبا هانى فى السودان
كان حسابنا بالمليم .
شنو المليم ؟!
المليم , عشر القرش يا صبيان
ما فاهمين
حتى القرش ما تعرفوا ؟!
ما شفناه , وعشان نفهم لازم نعرف المعنى
تعرفوا جنيهنا فى السودان ؟
نعم شفناه .
خلاص فى جنيهنا ميّة قرش يا حبان
كان حسابنا بالمليم وكانت عملة فى المليان
تملى الليد , تملى القلب والجزلان
تملى الكيلة والميزان
تخش السوق راسك فوق تقول سلطان
وفى ذات يوم صبح ضبلان ....
هزيل حزنان
مرق من سوقنا ...
من ايدينا والجزلان
وناحت نايحة قالت مات
حزن الناس
وداشوا خلاص
منو اليا ناس يشيل الكان
منو اليا ناس يشيل الكان
وسط اللمّة والاحزان
دقت صدرها التعريفة قالت أنا ...
أنا البحمل هموم الكان ...
وبدل مليمة , خمسة كمان ...
على احد الوجوه فارسا من الهجان ...
على الآخر مضروب اسمك يا سودان ...
لونى جميل , شديد الصفرة واللمعان .
وفعلا كان
صالت صولة الفرسان
وضاقت متعة العرسان
وبقوا يغنولها فى ام درمان
ولّ زمان .*
دالت دولة الهجان
وقلنا نجيب صقر جديان
فارد ريشو للطيران
وقبل ما نضبط الميزان
طار الصقر , جفّل مهرنا الطربان
طار القرش واب قرشين واب خمسة واب عشرة
وحتى جنيهنا اصبح فى خبر ناس كان
أسرع نضبط الميزان
هات عشرة , هات عشرين , هات خمسين هات ميّة
جئنا بكافة الأوزان
جبنا القصر والجامعة
جئنا بمصرف السودان
استنفرنا ترهاقا
وكافة قوة السودان
وعشان نحبس الشقيان
قمنا عملنا كم مصرف
وكم خزنة وكم خزان ×
وما زال الصقر طاير
وما زال المهر عاير
*********************
ولما تعبنا من ها الشان
قلنا نكتلو صقر الجان
جبنا الحربة فى الخمسين
مصوّبة لى صقير الجن
تقول باتريوت تقول بيرشنق
وما زال الصقر طاير
وما زال المهر عاير
ولّ فشنك يا باتريوت
تهدد فى بنى الانسان
تلعلع فى خليجنا زمان
تصارع فى الحسين طربان
تغلبك طيرة فى السودان !
**********************
وجانا خبيرنا نجم الدين
خطّ الألف فى اتنين
وقال أحسن نشوف أهل الأسم والدين
لمّوا شيوخنا قروا ياسين
وبدل آمين
جانا السيل وعجن الطين
وما زال الصقر طاير
وما زال المهر عاير
*******************
اتلمّ الناس ..
وقنعوا خلاص
وفكروا زين
وقالوا نطفّش الأتنين
وننفيهم من السودان
دقوا الطبل للطاير
رفعوا الفروة للعاير
وصقر الجن حلف أيمان
تب ما يغادر السودان
وما زال الصقر طاير
وما زال المهر عاير
*****************
جاب الكرسى زول شقيان
خلى الناس
سأل الجن والشيطان
قالوا : تفرتق السودان ...
زى ما عملها قورباتشوف تسوّيها
عشان ما يلقى صقر الجن مكانا اسمه السودان
وسمع الصقر هذا القول
نزل حزنان
وهدأ المهر
وجينا قعدنا نتساءل
كيف يا فلان ؟
وشنو الكان ؟!
و كيف يا فلان ؟!
وجانا جواب
لأن الصقر سودانى
ولأن المهر سودانى
وكان الأمر ربانى
وعاشت وحدة السودان




محمد سليمان عجب الدانى
أم كدادة 1994


#987477 [اوكامبو]
0.00/5 (0 صوت)

04-28-2014 01:55 PM
منو العوض وعليهم العوض يا اخي العوض


#987159 [عبدالله احمد]
0.00/5 (0 صوت)

04-28-2014 09:54 AM
قصيدة رائعة اخي عوض .. كان الله في عون السودان واهله .


عوض شيخ إدريس حسن
عوض شيخ إدريس حسن

مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة