المقالات
السياسة
في ساعة مخاض
في ساعة مخاض
04-28-2014 11:50 AM


في ساعة مخاض
بتول بت بله
الغيم منشر
والأرض منبلة
والليل يأذن بالرحيل
والصبح ما أنصلى
وكل الناس أيديها يا الله
البت البكر
يا رب تنحله
دايرنه ولييد
والكل من الله
ياذّنو ليه في أضنيه
ويقروا عليه آيات الله
من كتابه المنجي
وينادوا الخالة ليه تلجي
عشان بصفاته
بعدين يتحله
أبوه أحمد
سماه محمد
على شافع الملة
وهاك يا محمد
كل الناس بتنادي
وديك الخالة ليه بتأتي
تا- تيه
تا- تيه
في أحلى نغم
والخال والعم ..
زمان كل الحلة
ولما محمد
يبدأ يتكلم
وللقول يتمله
يسوقوه الخلوة
عشان يتعلم
يفك الخط
ومن أميته يتحله
ويعرف ربه
وكيفن حمده
ولما محمد
يحفظ الحمدُ
يقوم يقرءاها
لكل ما يلاقي
وبسرواله والعراقي
يلف الحلة
بكل لطافه
شايل لوحه
أدوني شرافه
كان قرشين
شيتاً زين
تمراً ملوه
يشيله الخلوه
حمامه فريخ
يديها الشيخ
* * * * * *
وديل الكانوا
أهلنا زمان
ناس حلوين
ولا بتنشان
بيوتهم فسحة
بلا حيشان
وناس آمنين
بلا (شيشان)
في جباهم عزة
لا دبورة لا نيشان
ولا في يوم
يرضوها الذلة
وديل الكانوا
أهلنا زمان
كل الناس
حنان وسمان
وكل الأسرة
زادهم حله
والزاد معروف
ديوان الحلة
كل الناس
هناك تتساوى
كل الناس
هناك تتخاوى
أيدهم واحده
بنيان يتقاوى
ببركة زادهم
الكتير والقله
يهزموا الجوع
(والبايت القو)
يكرموا الضيف
و ألزارهم طله
* * * * * * * * * *
وعم الزين
شيخ الحلة
يعاين زين
في القاعدين
يمن وشمال
شمال ويمين
ويسأل وين ؟
وين عبد الله؟
يجيه الرد
خبراً شين
بصوت محزون
وفيه اللين
جاته ( الورده )

حاس بعله
وناس الحلة
كيف أصبحت ؟
كيف أمسيت ؟
كفاره ليك ما رضيت
وتعاود الطله
ماشه وجايه
على بابه
زى نملاً شايل الغلة
وديل الكانوا
أهلنا زمان
لما الناس يملاها الهم
والعقل نشله
وما تلقاه فهم
يقولوا الأمر لشيخ الحلة
خلوه حكم
وبدونه سينات
ذ والمفروض
والجذر الصم
شيخنا يحله
والكل مبسوط
تمام يا شيخ
نقوله نعم
كبير وصغير
ما بطنطن لا
وده كان الحال
لما محمد
يدور الفال
كان بيدورو
والله حلال
ولكل الأسرة
تكون الشورى
بت العم
بت الخال
هي منانا
ونحن ندوره
لكل الناس
البت مخبوره
هديه رضية
والله صبورة
وبالموجود بتمشي أموره
وما بتتمرد
وتكشف حال
وده الكان في الزمن الوله
ما زمن الجماعي وكوره
علاج العنس
البورة
عرساً فله
الشبكة الموضة
أساس الأوضة
من سعد الله
وحالاً زيف
لا زولاً يسأل
حالك كيف ؟
لا رحم يتواصل
لا طلت ضيف
ولمن يحصل
قول يا لطيف
خليه خفيف
يسلم ويرحل
وبكرة بترحل
من الزمن القاسي مخاض
شترة
(1) الشيشان: مصطلح يطلق على الشرطة الشعبية.
(2) الورده: هي حمى بتطلع في الراس وبتخلي اشاراتك طاشه

لؤي الصادق
[email protected]





تعليقات 0 | إهداء 0 | زيارات 628

خدمات المحتوى


لؤي الصادق
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة