في



مراقة لكل حرامي
04-28-2014 02:34 PM


تمض أيام على إستخدام (الجماعة) لعملية التحكيم (كمراقة) للصوص من مواجهة القانون الجنائي في قضية (الأقطان) حتي تم إستخدام المادة (13) من قانون الثراء الحرام والمشبوه لعام 1989م (كمراقة) من مواجهة القانون الجنائي لموظفين خانوا الأمانه حيث قموا بإستخدام أوراق رسمية وأختام مؤتمنان عليها وإنتحال صفة من إإتمنهما ومخاطبة المسؤولين بإسمه متملكين بذلك تملكاً جنائيا قطع أراضي تخص حكومة السودان .. فمرقتهم المراقه ذي الشعرة من العجين حيث أعادوا ما أخذوا وتم إطلاق صراحهم !
ماذا تقول هذه المادة (المراقة) من قانون الثراء الحرام والمشبوه تقول المادة :
يجوز لكل شخص أثرى ثراءً حراماً أو مشبوهاً أو ساعد فى الحصول عليه أن يحلل نفسه هو أو زوجه أو أولاده القصر فى أى مرحلة قبل فتح الدعوى الجنائية ضده .
دعونا إذن لا نقوم بالدخول في أي تفسيرات قانونية لهذه المادة ونتساءل (وريالة) الأطفال تسيل من أفواهنا
إن كان فتح الدعوي الجنائية يسد الطريق أمام إستخدام هذه المادة فلماذا لم يتم فتحها؟ بعد أن أشارت إصابع الإتهام لهذين الموظفين لا سيما أن ما قاما به من (جرم) أستهجنه الوالي بإعتبار ما تم منهما غدر وخيانه ؟
أليس الغدر والخيانه دافعان لإتخاذ الخطوات القانونية وأولها فتح بلاغ جنائي؟ وأليس عدم فتح البلاغ حتي لا يكون عائقاً أمام إستخدام المادة 13 من قانون الثراء الحرام والمشبوه لعام 1989م يضع علامة إستفهام كبيرة عندما تحال هذه الجريمة الخطيرة للثراء الحرام وليس للمحاكم الجنائية ثم تستخدم فيها هذه المادة التي شرعت من أجل إسترداد الأموال مجهولة الأصل وليست أموال هذا الشعب المسكين الذي أصبحت مرتعا خصبا وناعما ومأمون بالنسبة للصوص والحرامية وأكلي أموال المرضى واليتامى والمساكين .
تعريف الثراء المشبوه.إن تعريف الثراء المشبوه كما ورد في القانون : يقصد بالثراء المشبوه كل مال يطرأ على أى شخص ولا يستطيع بيان أى وجه مشروع لاكتسابه !
لكن في حالة (أولادنا الحرامية ديل) فمصدر القروش والأموال معروف للجنة التحقيق فلماذا أصرت اللجنة على مسألة التحلل واللجوء إلى المادة 13 ولم تلجأ لفتح بلاغ جنائي في مواجهتهما؟ ألا تري اللجنة أن ما تم يشكل خطراً على المجتمع عموماً وعلى الخدمة المدنية يجب التصدي له بكل قوة وحسم حتي لا يتكرر؟ لماذا لم ينظر أعضاء هذه اللجنة إلى مقاصد القانون وهم من نالو الدرجات العليا فيه ؟ ألم يسمعوا عن فلسفة العقوبة؟ أي رسالة تود اللجنة الموقرة التي قضت بإطلاق سراح هؤلاء (اللصوص) والموظفين غير المؤتمنين تريد أن توجهها للمجتمع؟ أن أسرقو وزوروا وأحتالو !؟
إن اللجنة بعدم إخضاعها لهذه القضية للقانون الجنائي إنما ترسل رسالة واضحة لكل مؤتمن على مال أو (ورق مروس) وأختام أو دفاتر شيكات .. أن (أعمل العاوزو) قم بالتزوير والإحتيال والسبعة وذمتا أغتني من مال هذا الشعب التعس الفقير ما شئت وفي الأخير الحبة ما بتجيك .. ح ترجع بس الشلتو وكمان لو القروش دورتها وربحت الربح ده ذاااتو حلالك !! ده في أسوأ الأحوال لو إنكشفتا وكده .. ولو ما إنكشفتا يلا إتفسح سااااكت !!
والله إنه لشئ يبعث على (الطمام) والغثيان والحنق والغضب أن يتم التلاعب بالقوانين والإجراءآت بهذه الصورة المخلة بمقاصد العدالة توطيناً للفساد الذي أصبحت رائحته فوق طاقة الأنوف من أجل ألا تطال يد العدالة أمثال هؤلاء اللصوص الذي خانوا أمانة الوظيفة وأعتدو على مال هذا الشعب المكافح الغلبان .
إن ما يحدث لهو والله نوع من (مسرح العبث) العبث بالقانون والعدالة وبمقدرات هذا الشعب اليتيم .. ولا يمت بأي صلة كانت للإسلام والمسلمين وبنبيهم الكريم الذي قال : لو أن فاطمة بنت محمد سرقت لقطع محمد يدها !
... يا جماعة عملتوها شينة والله .... يوم واحد خلو ليكم زول وااااحد يتسنفك لو حتفتشوا ليكم مراقة لى كل (حرامي) ح نخلي ليكم (الويست) ذااااتو !

كسرة :
بعد أن تم إستخدام (التحكيم) كمراقة من التحاكم إلى القانون الجنائي في قضية (الأقطان).. وبعد أن تم إستخدام (المادة 13 من قانون الثراء الحرام والمشبوه) كمراقة لموظفي مكتب الوالي .. كدي شوفو ليكم مراقة لي (خط هيثرو ده) !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

fatih.jabra@gmail.com





تعليقات 39 | إهداء 0 | زيارات 7436

خدمات المحتوى


التعليقات
#990138 [salma]
4.00/5 (4 صوت)

04-30-2014 08:08 PM
لاستاذ الفاتح جبرا
ارجو التكرم بلبحث والتقصي حول الموضو ادناه
موضوع طلاب الهندسة المعمارية كالاتي
كل الدفع بضم الدال من خريجي كلية هندسة العمارة من جامعة المستقبل رفض المجلس الهندسي منحهم الرقم الهندسي وهو الرقم الذي يخول لكل مهندس معماري رسم الخرط واجازتها من وزارة التخطيط العمراني والاشراف علي المباني من بناء وهد وخرصانة وغيره جاء الرفض بحجة ان الكورسات التي درسها الطلاب لاتتوافق مع المناهج في الجامعات التي بها كليات هندسة معمارية كجامعة الخرطوم وغيرها
توصلت وزارة التعليم العالي والمجلس الهندسي والجامعة الي حل وسط وهو عمل كورسات اضافية للطلاب تحت اشراف المجلس والجامعة والوزارة ورضخ الطلاب لذلك وجلسوا للكورسا ت وللاسف الاسيف لم يكن هناك اتفاق بين الجهات الثلاث حول من يعد الامتحانات ومن يقيمها ومن يصححها ولا كيف تكون طريقة اعدادها وهكذا رجعنا الي المربع الاول
نحن كاولياء امور نحمل الجامعة برئسها الدكتور ابوبكر مصطفي اولا هذه المسئولية والمجلس الهندسي ووزارة التعليم العالي مسئولية مستقبل ابنائنا ونسال الله ان ينتقم منهم جميعا
نحن نتالم عندما نري الحسرة والالم في اعين ا بنائنا دون مستقبل ودون وظائف علما باننا كنا ندفع الرسوم كاملة بالملايين ( دون تقسيط ) كشرط اساسي للقبول واستمرار الطالب في الدراسة
اللهم ارنا فيهم يوما اسود كيوم عاد وثمود وفرعون وقوم لوط
علما باننا ومع ابنائنا نعمل علي رفع قضية علي كل هذه الجهات حتي ينال ابناءنا حقهم
نحن اولياء امور الطلاب نعول عليك ونامل ان تاخذ هذا الموضوع علي محمل الجد
وحسبنا الله ونعم الوكيل


#989334 [ضحى خالد]
4.00/5 (1 صوت)

04-30-2014 08:51 AM
الأستاذ الفاتح جبرة تحياتي واحتراماتي لك ولقلمك الشجاع ... ياأستاذ إنتو بتتكلموا ساكت أي شعب وأي بلد الناس ديل البلد حقتم والشعب مالو أي حق فيها يقسمو جزء ويبيعو الآخر وأعمل حسابك بيتك ذاتو ( دا كان عندك بيت ملك ) بعد شوية ببيعوهو ليك ماعايزين تفهموا إنكم ضيوف في البلد دي أحسن ليكم تحترموا أنفسكم وغربتكم الداخلية دي وتقعدو بأدب .... وكان الله في عون السودان واهله


#988731 [الولايات المتحدة السودانية]
4.75/5 (3 صوت)

04-29-2014 02:10 PM
كوز = شخص غادر وخائن (حبيساً ورئيساً) !!!
كوز = متاجر بدين الله (شهداء صاروا فطائس ) !!!
كوز = حرامى يسرق حتى لبن الأطفال من أفواههم (قصص الفساد والحرمنة التى تزكم الأنوف) !!!
كوز = شخص جبان رعديد يبيع شرف وطنه خوفاً وطمعا ( حلايب وشلاتين والفشقة )!!!
كوز = إنتهازى يبرر لموبقاته بسن تشريعات من وحى خياله المريض (فقه السترة)!!!
كوز = التفسخ والانحلال ( عفو رئاسي عن محفظ قرآن زانى)!!!!!!!!!!!!!!!!!!!!!!!!!!!!!!!!!!!!!
كوز = قتل النفس التى حرم الله إلا بالحق (شهداء سبتمبر وجموع الشهداء الآخرين عليهم الرحمةت)!!!!!!
كوز = كاذب كذاب يكذب حتى آناء نومه (يا جماعة أنا حصل كذبت عليكم ؟؟؟!!!)!!!!!
كوز = مفتت للوحدة الوطنية (فصل جنوب السودان ) !!!!!!
كوز = إبادة جماعية لكل من قال لا (جبال النوبة ودارفور والنيل الأزرق)!!!!!


#988530 [kiku]
2.75/5 (4 صوت)

04-29-2014 11:38 AM
والله انت رجل طيب وعلى نياتك --الم تسمع برسالة الماجستير لكبيرهم تحت عنوان تحديات تطبيق الشريعة الاسلامية فى الدول المعاصرة-- الجماعة بداؤا فى التطبيق لو انت معترض هذه الشريعة اعلنها واضحة ولا انت خائف من حد الرده


#988443 [FadlAllah]
3.25/5 (3 صوت)

04-29-2014 10:45 AM
إنت قايل ماحيشوفوها يا أسناذ

تبقى الحسرة فى قلوب الشعب المسكين
ولاحول ولا قوة إلا بالله
إن الله يمهل ولا يهمل زز


#988353 [الفيلسوف الجاهل]
5.00/5 (2 صوت)

04-29-2014 09:46 AM
و الله الوالى ذاتو داير مراقة هو بى اهمالو و جماعتو الجابم معاهو ديل ( الحاشية بتاعتو ) دى ماخيانة للامانة و الوالى داهو ماجبناهو نحنا المواطنين ديل اشان اراعى حاجاتنا دى و ولا ياربى الذول دا قايل روحو وصى علينا . الزول دا دمو بارد و مابخجل انا كان كنت فى محلو كان استقلت و خشيت فى ضفورى و كان انتحرت عديل كده !!!


#988174 [ابو خالد الدمام]
3.50/5 (4 صوت)

04-29-2014 08:04 AM
عبد الرحمن الخضر كان وزير زراعة في الشمالية وطردوه وكان والي في القضارف وطردوه وطبعا كفاية بهدلة ماعايز يطرد تاني قال احسن يتغدى بالجماعة ديل قبل مايطرد
طبعا هو اصلو ما كان حيقول الحقيقة ألا كما عرفنا من الاعلام انو الرئيس قال ليه ناس الامن الاقتصادي قالوا عليك حرامي قام خت اللوم على السكرتارية قال ديل خانوا الامانة
والله انا عايز الموضوع يفتي فيه عبدالحي يوسف مش هو رئيس هيئة كبار العلماء في السودان ياخي قول كلمة حق انت افتي لينا ده حلال ولا حرام عشان نحن على حسب الافتاء ننهب ونسرق وكمان نتاجر وندور فلوس الحرام ونرجع ليكم اللي سرقناه ونشيل الفائدة وكده نكون اتحللنا والله احسن اسلام اسلام الانقاذ وخليكم في الحكم عشان نشوف العجب بس والله خايفين يجي يوم تحللوا الزنا يجي واحد مسئول من ناس الانقاذ ديل يشوف واحدة سمحة ويزني ويجيبوا ليك مادة يقولوا والله ده اعجاب مافيه شئ ... حسبنا الله ونعم الوكيل والله انا مستغرب البشير ده ساكت ليه ؟؟؟؟


ردود على ابو خالد الدمام
[ضحى خالد] 04-30-2014 08:55 AM
إذا كان رب البيت للدف ضارباً فشيمة أهل البيت الرقص ... انت مابتشوف والله شنو ياأبوخالد


#988126 [ود يوسف]
3.00/5 (2 صوت)

04-29-2014 07:13 AM
السؤال أنه كيف تم استخدام المراقة في قضية الأقطان وهي لدى القضاء ؟؟؟


#987966 [alaaly]
3.50/5 (2 صوت)

04-28-2014 11:08 PM
يااستاذ تحية طيبة وين صاحبك العضو النشط حسب الرسول الجنو وجن النسوان واين هو من هذا العبث اتمنى اسمع ماذا يقول هل سوف يكتم الشهادة واظنة لفاعل وشكرا وزى مبقول الاستاذ شبونة اعوذ باللة


#987877 [حمزة محمد]
3.50/5 (5 صوت)

04-28-2014 08:43 PM
من هم المعنين بقانون الثراء الحرام والمشبوه وهيئات التحكيم اليس جماعة المؤتمر هم الوزراء والولاة والمديرين ورؤساء الشركات والنيابات والبنوك والمؤسسات اذن هذا القانون مفصل وعلى المقاس على المشبوهين بالثراء الحرام ومن المال العام وهم موقتين وعارفين وحاسبين حساب اليوم ومجهزين قوانينة هذه القوانين لاتعنى لا من قريب ولا من بعيد غير جماعة المؤتمر فهم الحرامية واللصوص والهنباتة ..اذن الى متى اللعب على الدقون والى متى التبريرات الواهية والشى المدهش هم مقتنعين انهم مازالو يخدعون الناس بتبرراتهم الكاذبة وفتاويهم من فقة الضرورة التحلل ولله التحايل والكلمة من حلال يعنى سرقتم حلال الم يقطعوا يد المختلس وبفتوة من احد كبارهم الم يشهروا ببنات وشباب الناس الم يقتلوا الشاب مجدى فى حر ماله وعندما بانت السرقة والنهب فيهم جاؤنا بالتحلل والتحكيم ومن اين جاء هؤلاء


#987860 [سوداني]
4.50/5 (6 صوت)

04-28-2014 08:20 PM
قال الله تعالي

( وَإِذَا أَرَدْنَا أَنْ نُهْلِكَ قَرْيَةً أَمَرْنَا مُتْرَفِيهَا فَفَسَقُوا فِيهَا فَحَقَّ عَلَيْهَا الْقَوْلُ فَدَمَّرْنَاهَا تَدْمِيرًا )


#987857 [ود عشمانة]
3.50/5 (3 صوت)

04-28-2014 08:18 PM
يا ود حبرة الناس ديل مخلنك كيف ...والا كلام ده شمار في مرق


#987804 [زروق]
4.13/5 (4 صوت)

04-28-2014 07:07 PM
الماده13 اذا استخدمت لخط هثرو بتكون هاكذا الباعو الخط يرجعوه ويا دار ما دخلك شر


#987770 [الصوت]
3.25/5 (4 صوت)

04-28-2014 06:25 PM
انتوا يا شباب ...مكافحة- ولا ايه مش عارف- الثراء الحرام دي مش الاسسها علي عثمان الثعلب ولا تشابه في

الاسماء ؟؟؟


#987763 [قاسم]
4.00/5 (6 صوت)

04-28-2014 06:18 PM
محاسب وادي سيدنا قطعوا ايدو لانهم اتهموه باختلاس جنيهات معدودة لا تساوي واحد من مليون مما سرقه اللصوص المتاسلمون .... المكاشفي قال انه وجد في حاشية ابن عابدين أو ابن فارغين جواز قطع يد المختلس ، و قال في تبريره لذلك : إن المال العام أحق بالحفظ و يقطع يد المحاسب حتى يكون ذلك رادعا للمسؤولين من المال العام ... طبعا عند الكيزان الناس نوعين : ناس لو اختلسوا ألف جنيه يقطعوا يدهم و ناس أولاد ناس ،أخوان مسلمين بأيادي متوضئة لو سرقوا 900 مليار و تاجروا و ربحوا مليارات فيمكن لهم التحلل و هنيئا لهم الأرباح ... انتو عالم وهم ما بتفهموا : هل يتساوى الكوز مع الإنسان العادي ؟ هل يتساوى من تداوى بماء الرجال بالرجال ؟ قوموا إلى قتالكم يرحمكم الله .


#987757 [الصوت]
5.00/5 (2 صوت)

04-28-2014 06:10 PM
خط هيثرو ركّبوهو التونسية زمااااااااااااااان يا جبرا ......


#987752 [ياسين]
4.75/5 (3 صوت)

04-28-2014 06:07 PM
اه اه ثم اه لو بتنفع اه ولاحول ولاقوه الابالله


#987723 [صه يا كنار]
3.00/5 (5 صوت)

04-28-2014 05:38 PM
يسلم فمك استاذ جبرة الجماعة ديل عملوها شينة وكبيرة ولسان حالهم يقول لكل صاحب امانة اسرقني ولا تطلبني وبرضو قاعدين على انفاس الشعب السوداني ديل شكلهم ما حيمشوا الا بعد ان يبيعوا كل شي وينهبوا كل شي ولا حول ولا قوة الا بالله


ردود على صه يا كنار
United States [المقهورة] 04-29-2014 12:24 AM
كلامك صح .. وعليه فليذهبوا الآن قبل غد
لأنهم باعوا ونهبوا كل شيئ


#987710 [الهادي كلين]
4.19/5 (6 صوت)

04-28-2014 05:15 PM
ومع ذلك (دفار) واااااحد يشتت اضخم مظاهرة، انه قرن الكيزان ، مواليد مابعد 1989 من بنى جلدتهم اصبحوا تنفيذيين بامتيازات محترمة وينتهجون نفس النهج وبالوان وانواع جديدة ومبتكرة، يبدو ان ثمن التغيير غير متوفر والفاتورة يصعبب سدادها مع طلوع شمس كل يوم جديد ، لانه يولد كوز جديد وربما (تكوزن) احد الذين يقفون فى المنطقة الرمادية ليلحق ماتبقى من فتات !


#987670 [وحيد]
4.13/5 (6 صوت)

04-28-2014 04:26 PM
يا اخونا استاذ الفاتح جبرا: ترزية القانون عاملين حسابهم و فصلوا القانون حسب مقاس اللصوص و الفاسدين . سيستمر الطناش عن خط هثرو لمدة خمسة سنوات و بعدها اذا تم فتح بلاغ سيتم شطبه من اول نظرة لان القانون المفصل على المقاس يسقط التهم بعد خمس سنوات . اطمئن على الجماعة السرقوا الخط .... عوجة ما بتجيهم .. كل شئ مرتب!


#987668 [العايش الدايش]
3.75/5 (8 صوت)

04-28-2014 04:24 PM
الشعب السوداني حيموت بالمجاعة وسوؤ التغذية والأمراض الفتاكة بس أهم شئ إنو ما يموت برصاص الحكومة دا الحنك مع إنو الموت واحد ...الحلب طلعوا أرجل مننا في كل الدول العربية .....وبعد شوية حيجيني زول بليد ويقول لي ( نحنا طلعنا أول ثورتين في المنطقة وأقول له خسئت والثورتين وإن كان المسمي صحيح فهي قامت والوضع كان أحسن بمليون مرة من الوضع الحالي والرؤساء حينها كانو أصدق وطنية لأنهم لم يبيدو ويقتلوا الشعب... كل اللي ماتوا كانوا أنفار ما يتعدوا علي الأصابع ,, ولكن الشعب عارف الراجيهو لو طلع لنظام البشير ,,فما تغشونا وتمجدوا أنفسكم والله نحن شوية جبناء إلا قليل من الشباب الذين وقفوا وضحوا في الاحتجاجات الأخيرة ولم يجدوا سندا من الشعب ودماؤهم راحت شمار في مرقة .....فكونا من الأوهام واللف والدوران دا......
نحن توشكي شهيده لينا ونحن بالمهدي اقتدينا
ونحن مادام روحنا فينا ما في زول بقدر علينا
ههههههههههههههههههههههههع .....


ردود على العايش الدايش
European Union [اشرف] 04-28-2014 09:00 PM
صدقت ....ينصر دينك ..شعب يستاهل اكتر من كدا


#987664 [samani]
4.50/5 (4 صوت)

04-28-2014 04:19 PM
يا جبرة التوقيع حق الوالي زاتو مافي تزوير اختام ولا حاجة...الدليل المسرحية الاتعملت حملوها الصغار وقالوا ليهم بنمرقكم ....المسرحية قديمة .....


#987662 [الحقاني]
4.25/5 (5 صوت)

04-28-2014 04:17 PM
المراقة لقوها زمان وانت الماجيب خبر تعبان في الفاضي فقه الستره


#987654 [hasco]
4.09/5 (8 صوت)

04-28-2014 04:13 PM
ياعمك دي سيك (سيك الوست) امسح واواتك دي وماتنفخ التسمية وخلي الناس تلعب لعبها كان مابتعرف وست امشي لي والي الخرطوم بعلمك اشان الشوتةالجاية تمسح واواتك الكتيرة دي وتكون عرفت اصول اللعبة واكون ورقك قافل عندك مربوطه وتسمي باص وتخلي زميلك اللعب وتديهم سيك في قبولهم
علي مقولة اخونا (ده سيك ولا شنو)(مجنون كشتينة سابقا حليا مجنون بعمايل الاسلاميين ) هي لله هي لله لا يلا نحت الشعب السوداني من (الاتوه)


ردود على hasco
European Union [متعوداديمن] 04-29-2014 08:33 AM
الناس ديل كان ماعندهم مراقه (راس كبير) اس ولا شايب مضمون كان لعبونا في قبولم؟؟


#987636 [سادا]
3.25/5 (5 صوت)

04-28-2014 04:00 PM
الماده 13 معناها 13 يد يعني بي كلام الوست تعتبر سيييييييييييييييييييك عديل.


#987624 [البركان]
3.88/5 (6 صوت)

04-28-2014 03:51 PM
باعوا واشتروا وقتلوا ونهبوا وسرقوا وفصلوا وعملوا السبعة وذمتهاوأكثرو فيها الفساد (إن ربك لبالمرصاد)يقول ربكم جل شأنه وعلا ( وأملي لهم إن كيدي متين) كفاية ربنا فضحهم على الملأ ولكن الكيد المتين أن يأخذهم الله أخذ عزيز مقتدر .


#987623 [مغترب]
4.27/5 (7 صوت)

04-28-2014 03:51 PM
استاذنا الفاتح جبرا متعك الله بالصحة والعافية،، وكان الله فى عوننا، آمييين


#987615 [ودالباشا]
4.13/5 (6 صوت)

04-28-2014 03:46 PM
يا استاذ قول يشوفوا ليهم غطاسة لخط هيثرو المراقة دى لى ناسهم الماكلين اما المأكول بغطسوا حجروا الله يغطس جحرهم


#987610 [كاسبر]
4.32/5 (5 صوت)

04-28-2014 03:40 PM
فردة الأتو عندى يا جبرا ما تخاف بتمرقنا


#987596 [البعاجى]
4.13/5 (4 صوت)

04-28-2014 03:26 PM
والله يا الفاتح جبرة الناس ديل سنفكونا عديل كده
وقابضين معانا دامة الاسود


#987591 [حمدى]
3.25/5 (3 صوت)

04-28-2014 03:22 PM
ناظر المدرسة قل لعبد الباسط وهو طالب فى المتوسطة
يا عبد الباسط انت بتسف
لا والله يافندى ما بسف
يا ولد انت بتسف
لا والله يا افندى ما بسف
يازفت انت بتسف
لا يا فندى ما بسف
امال الفى خشمك دا شنو
فندى دى سفه ساكت
يلا امشى ابصقها وادخل الفصل


#987587 [habbani]
4.00/5 (3 صوت)

04-28-2014 03:18 PM
يا جبرا الوالى قال دا إستغلال نفوذ .. يعنى ما سرقة !! وهؤلاء تحللوا من إستغلال النفوذ !!!
أما ما كان من أموال نتيجة لإستخدام النفوذ , فدى إسمها ناتج عرضى !!!! والناتج العرضى ممكن إجيب هوا وممكن ما إجيبوا فالأمر متروك لتقدير اللجنة !!!! وبعدين شهاداتنا بتاعت القانون دى كان ما منعت الهوا فايدة شنو لأى أفوكاتو !!!!!!
كسراتك كترت وملت علينا الشاشة إل نضاير تعليقاتنا دى .. مع السلامة


#987578 [كفاية]
3.38/5 (6 صوت)

04-28-2014 03:11 PM
المراقة دي يا استاذ الفاتح ليس المقصود بيها مروق الزول الشال القروش سواء كانت الاقطان او الولاية وانما المراقة دي مقصود بيها الناس الجد جد والذين لو الحكاية دخلت محاكم وسين وجيم بتجرجر وتجيب ريسين كبار هم عند الناس بمثابة آلهة لا يأتيهم الباطل من بين يديهم ولا من خلفهم عشان كدا بس يباركوها ويرجعوا القروش انتوا مش عايزين قروشكم خلاص !!!!

هذا يذكرنا بالقصص التي تتداول عن المهندسين والعمال الصينيين والذين يعطون بعض العاملين معهم من السودانيين بعض المواد والمعدات المسروقة من مواقع عملهم لبيعها ويقولون قولتهم المشهورة ( لو ما قبضوك انت علي بابا وانا علي بابا لو قبضوك انت علي بابا براك ) طبعا يقصدوا بعلي بابا (الحرامي) بالله دي مش ياها زاتها حكايتنا


#987576 [حامد الجاك]
4.50/5 (2 صوت)

04-28-2014 03:11 PM
جبرة اخجل بعد الشفتو وسمعتوا دا عاوز ليك محاسبة لخط هيثرو كمان . ما هو الحرامى الكبير يمكن داخل فى هذا الموضوع وكده وقاليهم انا اوجه وانتوا تدقوا طناش , اللعبه هى كده .


#987574 [jangy]
3.75/5 (4 صوت)

04-28-2014 03:10 PM
الفاتح يوسف تحياتنا واللة دكرتنا ايام الوست والكنكان فى بيت حسن خزرجى فى الرياض الثمانينات واخر سنفكة والتجهيز لمعهد الكمبيوتر خاصتك اها سويت المعهد وللا بقيت مدرس ساكت طبعن الجماعة ديل ما بيكونوا ادوك فرصة شلهبوك وشلهتوك نصيحة اخو قديم امشى البحر جنبك ابروف او بيت المال وانتظر شيطان القلة وما تنسانا لو اداك فرصتين تحياتى معليش للراكوباب اخونا جبرة هيج علينادكرى اياملها ايقاع


ردود على jangy
[الصوت] 04-28-2014 06:20 PM
jangy ما انت جنب البحر كمان .... كدي حوم لينا بهناك يمكن ترزق بالقُلة قبال جبرا ....


#987566 [ربشه]
3.25/5 (5 صوت)

04-28-2014 03:02 PM
الملامح الشخصية للمختلس :
1/ ذكائه وفطنته الشديدة في عمله
2/ التعرف على احداث الدائرة الصغيرة والكبيرة وحتى التي لاتعنيه
3/ علاقته المتميزة مع روؤسائه ومروؤسيه
4/ مد خطوط العلاقة المتينه مع الرئيس الاعلى في دائرته
5/ بناء علاقات دائمية مع موظفي وروؤساء الدوائر الاخرى وخاصة الدوائر المماثلة لعمل دائرته
6/ استغلاله للعلاقات الاسرية والحسب والنسب في اجراء عمليات الاختلاس
7/ مشاركته المباشرة وغير المباشرة في حل حالات الاختلاس ودراستها والتعرف عليها في الدوائر الاخرى
8/ يتحلى بالوطنية والاخلاص ونكران الذات والتضحية من اجل المصلحة العامة
9/ يتحلى بمعرفته في اصول الحلال والحرام وغالبية الامور الفقهية 0
10/ شديد الحذر في عمله وتصرف


#987559 [osama dai elnaiem]
5.00/5 (2 صوت)

04-28-2014 02:58 PM
ياستاذ انت عارفني انا طيش الفصل وفهمي تقيل وقت اصلو فيها(مراقات) ما تشوف لينا (مراقة ) لابو كبير من المحكمة الجنائية عشان يستقبل 2016 وهو رئيس جديد كما ولدته امه ويزور امريكا ويتعالج في (لندن كلينك)وبعدين موضوع ( المراقات ) صناعة انقاذية في القانون يجب تصديرها لبعض الدول (الاخوانجية) عشان (الاخوان ) ما يتعرضوا لسجون واعدامات ومحليا (المراقة)هل تقف عند الوالي وموظفيه ام تمدد لناس الشيكات الطائرة---- ياخي ما قلت ليك انا فهمي تقيييل!


#987558 [ربشه]
4.00/5 (7 صوت)

04-28-2014 02:57 PM
طرق الاختلاس :
1/ الاختلاس المباشر
2/الاختلاس المقترن بحيلة
3/شراء مواد مخالفة للمواصفات
4/ اجراء صيانات وهميه للمركبات والمكائن والاجهزة
5/ صرف قيمة اعمال وهمية
6/ سوء تنفيذ في اي امر
7/عدم مراعاة الانظمة والقوانين لجهة موضوع الشراء او البيع والمناقصات وعرض الاسعار وانظمة العقود وفض العروض وغير ذلك0
8/ تبديد الموازنة وعدم انفاقها مما يؤدي الىضرر في المصلحة العامة
9/ سياسات التخريب لاسيما عدم وضع الانسان المناسب في المكان المناسب0
10/ انفاق موازنة التدريب على امور ليست ذات جدوى0
11/ التزوير تمهيدا للاختلاس0
12/ استبدال المواد بمواد أقل جودة
13/ الموظف الذي ينظم أذن سفر او جولة تفتيشية وهمية ويقبض اقيامها0
14/ اتلاف الحسابات او الاوراق الرسمية او المعتمدة 0
15/ د س كتابات غير صحيحة في السجلات والدفاتر الحسابية او الاوامراو الكتب الادارية
16/ الاعتماد على التفسيرات والاجتهادات الشخصية للقوانين وعدم الاعتماد على التعليمات الرسمية


#987553 [Abdo]
4.32/5 (7 صوت)

04-28-2014 02:55 PM
و الله يكفيك انك بتبرئ ذمتك يا أستاذ ،،، و أنا بضم صوتي المبحوح لصوتك عسى ان اكون دخلت في زمرة القائلين لكلمة حق عند سلطان جائر ،،،


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة