05-02-2014 09:08 PM


كذب المتعافي علي الشعب السوداني بي كل قوة عين وعلي مراي ومسمع العالم. فقناة النيل الازرق وبرنامج الطاهر مش اي كلام, وبتشافو في اي حته. اتخيلو زول من تركمستان صاحبو سوداني ومتعاطف جدا معانا وشاف الحلقه ديك, وركز في مرافعات الدكتور, والورق الكتير القدامو المدبج باللون الاحمر والاصفر والاخضر والحركه بينهم, ويرفع دي, وينزل ديك وكده, مش بلاي حيقول نحنا بنتبلي علي الزول دا ساي؟ وخصوصا لمن قال بي كل قوه عين امشو اسالو في السفاره الهنديه. ناسي سيادتو انو (مس انديا) اكبر بلد فقير ديموقراطي في الدنيا ولا فيها وزير ولا سفير ولا زول بيشغل منصب حكومي ممكن يكذب. بس لو قرا التركمستاني بعد كم يوم العمود بتاع عثمان ميرغني القال فيو مشي السفاره الهنديه وقالو ليو في السفاره انو صاحبك دا (بتاع مكنات), حيقتنع بي انو نحنا شعب منكوب. ومال لو عرف عندنا الف واحد زي المتعافي دا يقول شنو؟ ياخ دي مصيبه شنو الوقعنا فيها دي, نطلع من والي الجزيره يجينا مدير سودانير, نقول ارتحنا, يطلع لينا والي الخرطوم, ننسي الاقطان ولجنه تحكيما, تجينا شركه الصمغ العربي ودولارات كنانه ولا حياه لمن تنادي. البغيظ انو المتعافي دا مما جات الانقاذ قاعد في راسنا زي الكانو فرعون, وكمان بتريق علينا وقال انتو قايلني كيشه؟
حاشاك يادكتور تتطلع كيشه يابتاع الملايين انته, دا نحنا الطلعنا كيشه. لو ما نحنا كيشه, معقول تجي انته علي رؤوس الاشهاد وتقول الكلام القلتو في الحلقه ديك وتحلف بي اغلظ الايمان, ونحنا بنتفرج عليك زي الكانو الكلام مابخصنا, تطلع الشركه جايبها السفير السوداني والبنك ماعندو علاقه بالموضوع دا؟ السفير بصفتو شنو يخرق القوانين الهنديه البتقول لازم تكون في شفافيه في اختيار الشركه الحاتنفذ, وكيف يجيب شركه (او اي ايه) بالاسم؟ ففي الحاله دي مش بكون خرق القوانين الهنديه, دا بكون بوظ الشغل الدبلوماسي كلو وبقي سمسار عديل كده. هو بالمناسبه الراجل دا صاحب المتعافي ولا شنو؟ والله لو طلع صاحبو تبقي مصيبه لانو في الحاله دي تبقي رقاصه وبترقص كمان (الكلام دا راجع للمصيبه بالمناسبه).
نحنا طبعا كشعب كيشه ماعارفين الاليه البتشتغل بيها الحكومه دي كيف ولا الرئيس ونوابو بتفاعلو مع الاحداث كيف. وماعارفين كمان اليات وزارة العدل البتقبض علي موظفي الحكومه من سفرا ورؤساء مجلس ادارات البخرقو القوانين بتتفعل كيف. نحنا شعب غلبان مسكين ندفع ساي وقروشنا ماشه وين ماعارفنا. عشان كده بنطالب الرئيس شخصيا (بصفته منتخب من الشعب) يشوف لينا الموضوع دا. وبصراحه ماحانستني الديموقراطيه الزي قطر نيالا دي. ملايين متلتله بالدولار ياعمك مش كلام ساي. وناس الامن الاقتصادي ووزاره الماليه وناس علماء المسلمين وائمه المساجد ديل مش اصلا اتوجدو عشان يحمونا ويدافعو عن حقنا, يلا بلاي ورونا شطارتكم واتحركو شويه لانو الموضوع دخل فيو كذب علي مراي ومسمع من العالم كلو واللهط مما كان مليون مليونين وصل 20. معقوله دي بس ونحنا الحانقود العالم اجمع؟
هل نتوقع في مقبل الايام القبض علي كل شخص كان ليو دور في القرض الهندي, وتوقيف مجلس ادارة سكر مشكور (يعني شنو مشكور, ولا اسم جد زول من الجماعه؟) وتقديمهم للمحاكمات فورا بدون تحريات فحلقه الطاهر وزياره عثمان للسفاره دليل ادانه. اذا حصل دا, بنقدر نقنع صاحبنا التركمستاني ينسي حكاية ظلمنا للزول دا وكده, (اظروايز) لكل حدث حديث. البحيرني المتعافي دا ممكن يكون في دورنا كدا وفات الستين بي قادك, معقول مابحس بالاخره زي مابنحس بيها نحنا؟ ملايين تعمل بيها شنو يارجل حرام عليك. وزي ماقالت امي حاجه مني الله يرحما "انتو قايلين قيامه مافي ولا شنو؟"
Follow me in [email protected]_elrazi
[email protected]

تعليقات 12 | إهداء 0 | زيارات 7780

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#992495 [ابويحيى]
0.00/5 (0 صوت)

05-03-2014 10:11 PM
ياخ المتعافى من قام شاطر اول ماشاف الطراده الحمراء(25قرش) وفيها توقيع مامون بحيرى محافظ بنك السودان لما كان السودان سودان حدادى مدادى اختصر الطريق وفكر فى الزواج من ابنته وتم له ذلك يعنى الراجل عبقرى متملق منذ نعومة اظافره واعتقد مشكور اسم جده لوالدته او والد جدته او خال البشير او وداد بابكر اقل شىء شوف عثمان ميرغنى يحل لنا لغز التسمية.


#992414 [المتعافن يزداد لؤما!!]
0.00/5 (0 صوت)

05-03-2014 08:12 PM
ملايين تعمل بيها شنو يارجل حرام عليك!!!!!
انتو قايلين قيامه مافي ولا شنو؟

حرامي وبيتجمل!!! فعلا هؤلاء لايستحون ويمكرون بفقه الضرورة والاكاذيب التي تربوا عليها نسوا الله فانساهم انفسهم!!!!
وليس لنا غير اكف نرفعها ونبتهل لله ان لعنة الله علي الظالمين!! فاللهم عليك بهم انهم لايعجزونك!!! فقد نجيت موسي من الغرق فنجنا مما نحن فيه من ظلم بفرج عاجل غير اجل وبرحمتك يارحم الراحمين من القوم الظالمين الذي شقوا علي امتك ونهبوا خيراتها وتلبسوا بدينك ظلما وعدوانا!!!واباحوا لانفسهم اموالا الناس وخيراتها بغير حق!!


#992327 [سوداتي]
0.00/5 (0 صوت)

05-03-2014 05:28 PM
دا الفرق بين دول العالم الاول ودول العالم الثالث فحكام الدول الراقية هم اساسا اغنياء جاءوا ليحكموا ويقدموا خبراتهم ويخدموا شعوبهم لفترة رئاسية واحدة او اثنين. اما حكام دول العالم الثالث هم فقراء انقضوا علي كراسي الحكم لينهبوا شعوبهم ويبقوا في كراسي الحكم لأطول مدة ممكنة للمزيد من النهب والسرقة والخوف من المحاسبة


#992227 [المؤمل خير]
0.00/5 (0 صوت)

05-03-2014 02:33 PM
كلام الحاجة الوالدة هو المختصر المفيد ... الله يرحمها ويرحم موتانا


#992064 [البركان]
0.00/5 (0 صوت)

05-03-2014 10:56 AM
الكيس من دان نفسه وعمل لما بعد الموت والجاهل من اتبع نفسه هواها وتمنى على الله الأماني تخيل الترابي والمتعافي والبشيرو دوسة والخضر ومن شاكلهم ممن جلبوا المآسي والدمار للشعب السوداني هؤلاء الذين أثروا وقتلوا ونهبوا وبنوا القصور في هذه الدنيا الفانية وجهلهم بالموقف العظيم - لا دار للمرء بعد الموت يسكنها إلا التي كان قبل الموت يبنيها, فإن بناها بخير طاب مسكنه وإن بناها بشر خاب بانيها- خربوا وقتلوا ونهبوا وذبحوا وأفسدوا
وكذبوا.... ويل يومئذ للمكذبين...


#991988 [ابو محمد]
0.00/5 (0 صوت)

05-03-2014 09:22 AM
عثمان انهزم بطريقه مؤلمه ويحاول أن يجد مخرج خصوصا وأن صورتة اهتزة كثيرا أمام الرى العام وهو يحاول جاعد استعادتها بانه ذهب للسفير وكلام من هذا القبيل عثمان يسعى للاثاره ليس الا


#991892 [نائل]
0.00/5 (0 صوت)

05-03-2014 01:21 AM
المتعافي وهذا للتجربة لأني كتبت كم مرة وتطلع العملية فاشلة ويأتي الرد بأن رقم التحقق خطا وهو ليس كذلك


#991875 [عبدالله محمد عبدالرحيم]
0.00/5 (0 صوت)

05-03-2014 12:30 AM
ما هو دور الوزير السابق للسمانى الوسيلة فى هذا المصنع.بعض المجالس تقول انم قبضت عشرة مليون دوﻻر.هلا ظهرت على احهزت الإعلام واو
ضحت الحقائق ﻻن سمعتكم تهمنى؟


#991870 [عبدالله محمد عبدالرحيم]
0.00/5 (0 صوت)

05-03-2014 12:16 AM
كلهم نصابين


#991822 [[جنرال زمان]
0.00/5 (0 صوت)

05-02-2014 10:06 PM
(عشان كده بنطالب الرئيس شخصيا (بصفته منتخب من الشعب) يشوف لينا الموضوع دا) .....(وناس علماء المسلمين وائمه المساجد ديل مش اصلا اتوجدو عشان يحمونا ويدافعو عن حقنا) ..... هسع يا دكتور عايزنا نعلق نقول شنو ولا شنو؟ المتعافن بتاع طايوق وعمر بشير متربي بي بقايا حليب كافوري فتتوقع منهم شنو؟ وعلماء المسلمين ديل هم علماء للسملمين بتاعين الإنقاذ مش لي أي مسلم من طرف زينا كدا فتتوقع منهم شنو؟؟ والتعليق الوحيد هو أنه قد صدقت الحاجة والدتكم في تعليقها البسيط ("انتو قايلين قيامه مافي ولا شنو؟") وهي الصادقة لأنه الكيزان الكلاب ديل فعلاً مقتنعين أنه ما في قبامة أبداً رغم بشاعة موت من مات منهم شئ محروق وشئ في طيارة والشوية كدا مقطع في قلبة عربية! والله يقلب حياتهم زي ما قلبوا حياة الشعب السوداني وربنا يقطعهم قطع زي ما قطعوا السودان، عليهم لعنة الله وغضبه ومن والاهم أجمعين. آمين يا رب.


#991817 [محمد الحسن]
5.00/5 (1 صوت)

05-02-2014 09:55 PM
حكاية عثمان ميرغنى دى واحده من مسرحيات الكيزان عثمان ميرغنى والطاهر والمتعافى كلهم راضعين من شطر واحد المطلوب منهم فى المسرحيه دى يمثلوا معارضه وحكومه وتنهزم المعارضه التى يمثلها عثمان ميرغنى ويظهر المتعافى بمظهر البرىء شفت عثمان ميرغنى فى الآخر انكسر كيف ؟ العبوا غيرها ياكيزان


#991806 [المر]
0.00/5 (0 صوت)

05-02-2014 09:26 PM
لاتوجد قيامة لاهل الانقاذ فهم مكلفين من المولي عزوجلا بحكم السودان ومن يكلف من السماء فذنبه مغفور وبقية فهم كفر وملحدين واموالهم حلال وقتلهم مباح وعرضهم منتهك


ردود على المر
European Union [الفوج نوندي] 05-03-2014 10:38 AM
و الله يالمر اخوي
الناس ديل حاكمننا بنفس فهمك دا

ديل احتمال ملائكة عذاب و نحن ما جايبين خبر (استغفر الله)

بعدين يا دكتور قول المتعافي جابو كدا و جخخخ قطعو ليهو صنقورو دا
المسالة انتهت؟؟؟؟؟
ابدا لا لا
يا زول ديل عصابة

الدليل - الرئيس بغم ما قالها
المتعافي - والي الخرطوم - والي الجزيرة- والي سنار - ابو الجاز - نافع علي نافع
بتاع سندس - بتاع الاقطان - جمال الوالي - كبر - ديل ما كلهم حرامية اولاد ح را م

يا زول ديل مافيا عديل
بس يحلنا الحلا بلة

و الله غلبنا البنسويهو


د.الرازي الطيب ابوقنايه
د.الرازي الطيب ابوقنايه

مساحة اعلانية
تقييم
10.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة