في



رباعيات عامية
05-05-2014 02:54 PM


صنقع: صنقع الرجل أى رفع رأسه فوق (زى العاوزين يكبو ليهو قطرة فى عيونو)
دنقر: عكس صنقع ودنقر الشخص رأسه أى خفضه (زى القاعدين يحلقو ليهو) ودنقير الرأس نحو الأرض دليل على الخجل والإنكسار لكن حرامية اليومين ديل حكمت الله زول بيدنقر راسو مافى ( مش أتحلل؟ يبقى خلاس )

سردب: السردبة (بضم السين وتشديد الباء) يقال انها فى العامية هى أعلى الظهر وسردب الشخص اى وقف منحنياً دون حراك علامة عدم تفاعله وإكتراثه للأمر كقولهم : والله الحياة بقت صعبه لكن مسردبين ليها (سردبو كده لحدت الولار يحصل عشرين ألف)
صهين : الصهينة هي إنو الزول يشوف الحاجه ويعمل رايح (وأحسن نقيف هنا) !!
دغمس : دغمس الشئ أي (جاطو) وغير وبدل في ملامحو (ذي شريعتنا دي)
شوشر : الشوشرة هي إصدار الشخص لأفعال من شأنها تدكير صفو آخر .. كقول متحصل النفايات لمواطن ما عايز يدفع إلا بأولرنيك خمسطاشر : (يا أخونا أدفع وما تعمل لينا شوشرة)
غتغت : من الغطاء حيث قلبت الطاء تاءاً كقوله : والله الجماعة غتغتو ليك الموضوع جنس غتغته (أي لحقوهو أمات طه) !
فرفش : فرفش الشخص إذا فرح وإنتشي (يا حليل الفرفشة)
شركن : الشركنه هي الظن السئ الذي يمنع المواصله في الفعل كقول أحدهم : أنا عاوز أمشي شركة (قنابير) دي أخليهم يشتروا ليا بيت بالأقساط لكن بس (مشركن) !
كبكب : الكبكبة هي الإفراط والتنطع في الإستقبال كما نشاهده عند البعض (لمن يشوفو ليهم مسؤول)
سلبط : السلبطة هي إدعاء ما ليس لك كأؤليك الذين (يتسلبطون) في الميادين العامة ويدعون ملكيتها (بي عين قوية كمان)
سمسر : السمسرة هي أن تأخذ عمولة علي إتمام (بيعة) ما .. كتلك الفتاة التي أخذت خمسين ألف دولار (سمسرة) لأنها قامت بإتمام صفقة (اليخت الرئاسي) !
كركر : الكركرة هي حالة الزهج المصحوب بغضب (الشعب كلو الأيام دي مكركر)
فرتق: فرتق الشئ أى جزأه وقسمه بعد إجتماع كقولك : تفرتقت الأحزاب المعارضة إلى أجنحة (هى بدون أجنحة ما عاملا حاجه) .. أو كقولهم فلان (فرتق الحفلة) أى إفتعل شجاراً فقام الفنان (شال عدتو ومشى)
كنكش : كنكش فى الشئ اى قبض فيهو قبضة (الجن ما يفكها منو) ككنكشة بعض المسئولين فى مناصبهم
برطع :البرطعة هى الجرى فى الفضاء بلا قيود أو موانع يقولون ان فلاناً بعد أن أمسك بزمام المسئولية فى المصلحة أصبح يبرطع فيها ساااى أى اخذ يفعل ما بدا له بصورة حرة دون قيود أو موانع مفيش حد بيسألو
فنجط: الفنجطة هى حالة تصيب الحمير وهو نوع الجرى بصورة غير منتظمة وغير متناسقة وغير مدروسة إذا أردت أن تشاهده فتفرج على أحدى مباريات القمة
هضرب: الهضربة هى الهذيان والكلام الخارم بارم الذى يتفوه به الشخص عندما تتملكه الحمى ويمكن للشخص أن يهضرب بدون حمى إذا ما واجه موقفاً صعباً كتلك الزوجه التى سمعت أن زوجها قد قام بتطليقها فقالت : عادى ما مشكلة بس خلوهو يطهر ليا البيت ويضرب ليا الأولاد جير
مزمز: المزمزة هى تناول الطعام فى لذة وتأنى خاصة المشويات والمحمرات والمتبلات والمقمرات وكده معقولة الزول يمزمز ليهو بى (بوش)؟
زرقن: الزرقينة هى أداة تستخدم فى ورش الحدادة والنجارة لكبس القطع وضغطها ويقولون ان فلاناً قد زرقنوهو فى التحقيق زرقنة شديدة (أكيد ما عندو ضهر)
طربق: الطربقة هى الكلام الكتير دون فائدة يقولون فلان طرباق أى (رادى وإتفتح) والطربقة من الممكن أن تصاحبها هضربة كما نشهد الأن تصريحات المسؤولين فيما يختض بملفات الفساد .. يوم تحكيم ويوم تحليل ويوم شنو ما بعرف داك !
سلفق: السلفقة هى الحصول على المبتغى دون إستحقاق كقولهم والله الزول ده وصل نايب مدير سلفقة ساااكت … (ما سلفقة كيف إذا هو كان شغال عامل بوفيه )
عصلج: يقولون الصامولة عصلجت بمعنى أنها أبت أن تنفك من المسمار ووقفت فى حتة واااحدة وفلان راسو معصلج أى لا يقبل التفاهم والموضوع معصلج (ذي موضوع ملف هيثرو ده)
خرخر: الشخص الخرخار هو ذلك الشخص الذى لا يتقبل الهزيمة أثناء اللعب ويغالط فى مجريات اللعب والنتيجة ولا يمتثل لقانون اللعبة وربما قام ببعض المخالفات حتى يكون الفوز من نصيبو وكده
حندك: يقولون ان فلاناً قد حندك فلاناً إذ أخذ الأول فى التلذذ بشئ أمام مرأى ومشهد الأخير دون أن يكون للأخير مقدرة التلذذ بذلك الشئ وشعب محندك إذ كان معظمه يرى القلة تتلذذ وهو قاعد يعاين بي عيونو
طمبج: طمبج الشئ أى زادو مويه أكتر مما يجب ، وشوارع وساحات مطمبجة بالمياه يعنى مليانة موية من الخريف الما قاعدين يستعدو ليهو ده .
بشتن : بشتن الشئ أى زاده قبحاً والشخص المبشتن هو ذلك الشخص الذى يرتدى ثياباً قبيحة بالية غير متسقة والشوارع المبشتنة (زى شوارعنا دى)
حمبك: أنظر خرخر
عنقد: العنقدة هى أن يحول شخص أو شئ دون إكمال موضوع ما كقول أحدهم: والله كنت جاييك لكن بس ناس المرور عنقدو ليا … (عربيتو ما مرخصة) !
كسرة :
جهجه : جهجه الشئ اى أفقده البوصلة وخلاهو ما عارف الإتجاهات مما جعله يفقد السيطرة على الأشياء
كقول أحدهم: أول ما تظهر قضية فساد يجهجهوها ليك جنس جهجهه
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟





تعليقات 16 | إهداء 0 | زيارات 6433

خدمات المحتوى


التعليقات
#994909 [سوداني ون تو]
3.88/5 (4 صوت)

05-06-2014 10:47 AM
لك التحية الأستاذ الفاتح جبرة
في مصطلح جديد إسمو "المنتشه"
والمنتشه هي حاجة كده ما معروفة شنو بالضبط
يعني نقدر نقول أنها خليط من العوارة والهبالة والإستعباط والإستهبال.. وإلخ
الحاجة دي جسدها و قدمها لنا أمين حسن عمر بالأمس
في برنامج حتى تكتمل الصورة على قناة النيل الأزرق
بي إختصار شديد الزول ده كان قاعد "يتمنتش"


#994830 [الامير]
1.50/5 (2 صوت)

05-06-2014 09:45 AM
يا استاذ جبرا كانه ماعندك موضوع تكتب فيه رغم انه الساحه تعج بالمواضيع الساخنه التى ان يمكن ان تسمح لك بالسخريه كما كان يمكنك ان تختار مصطلح واحد وتكتب فيه اما مااوردته بهذه الكثافه فلعلك اضعت على نفسك فرصة كتاب كامل يمكن ان تبيعه لمن يريد واقترح عليك مصطلح (فرتق) ,(فكنا) . الناس فى شنو والحسانيه فى شنو


#994823 [بنونة بنت الملك]
3.50/5 (2 صوت)

05-06-2014 09:41 AM
أهلا جبرا كلام حلو لواقع مر ولما كان رمضان قاب قوسين أو أدني – اللهم بلغنا رمضان برانا – جاز أن يكون الحلومر متناسق في الواقع.
ما قلت لي الكلب شنو بعملتنا يعني هل هو الجنيه ولا الألف ولا المليون.
والقندلة كحالة قالوا عنها أنها تحاكي حالة قارون وكير في بلدى المقندلين من الهوا ساااكت
تصاب بالغضب عندما يقول لك أحدهم في لمة شلة بلغة الشلة يااااها بنطلونك عفن ، فيحمر وجهك ويخضر ويصفر لكن فجأة كده تنتشي حين تعلم أن العفانة هنا تعني الجمال ، كيف الجواب بكلام ناس الشام هيك.


#994803 [abu shawarib]
2.25/5 (3 صوت)

05-06-2014 09:31 AM
للمبدع أو الابداع مامعناه : أنك عندما تسمع أغنية أو تشاهد لوحة أو تقرأ قصة أو تطالع مقال أو أو أو ... تحس بأن ذلك يعبر عنك أو أنك كان يجب تقوم بهذا الشئ وذلك هو الابداع وذلك هو ما تفعله ..... لك الله

اضافة :
ملوطة : وهى الضحك أثناء الكلام الجاد وتحريك اليدين دون داع فى حركة تشى بقدر كبير من (السحسحة) وهى ايضا يأتى معناها فى ثنايا ( الملوطة ) المذكورة آنفا
وخير مثال لمن يقوم بذلك شيخ ... .......

توجيه :
لفك النقاط وتركيب الاسم اتبع التوجيهات :
1- الاسم مكون من اسمين
2- صاحب الاسم يحمل درجة الدكتوراة
3- يقال ان ابوه قد منعه من دخول قريتهم عشان حركاتو دى
4- له علاقة نسب بشخص يدعى ( السندكالى )
5- له مقولة مشهورة أعطت من لا يملك المؤهلات ما لا يستحق من المناصب ( ورد فيها كلمتى ( القصر ) و ( السجن )
6- له مقولة أخرى تصب فى نفس معنى كلمتنا الرئيسية ( الملوطة ) معرفا لها بأنها حالة تعترى أجسادا ( سماها بالخبيثة ) برغم طيب نفوس أصحابها
7- تشوفوا تزهج وروحك تحرقك


#994679 [osama dai elnaiem]
1.50/5 (2 صوت)

05-06-2014 08:26 AM
فرتق السودان: اي جزاه لدولة مسيحية في الجنوب واخري(----) في الشمال.
برطع : كما المتعافي الطبيب المداوي وهو يبرطع في الاقتصاد والمال العام السوداني ويجيب الشركات الهندية لتحصل علي عمولات (مكاجرة ) ساي والاخيرة تعني تسلبط اي ادعاء ملكية الشء دون وجه حق وكثيرا ما يحصل من المسؤولين في ميادينكم.
سلفق : محاورة امين حسن عمر في برنامج حتي تكتمل الصورة عبارة عن سلفقة ومحاولة مقارنة حزب بعث عبد الكريم قاسم مع المؤتمر الوطني الاول قتل عدد بسيط في العراق وقامت الدنيا والاخير اعترف بعظمة لسان رئيسه انه قتل عشرة الاف سوداني(بس) في دارفور ومحتج كيف يقدموه لمحاكمة.
خرخر: كما يفعل النظام الايام دول مع (دمامل) و(فقاعات) الفساد حيث يخرخر النظام ويقول عاوز ادلة وما كلام عام ونسي نحن في السودان كتاب مفتوح لعبنا دافوري مع بعض ومشينا ذات الاوليات والمدارس وشلنا شنط الحديد وركبنا الدرجة الثالثة في القطر او العربات مع شحنات القمح والعيش والبصل وحضرنا للخرطوم واما دخلنا في داخليات جامعة الخرطوم نتناول البيرسري شهريا او تصلنا كبونات البريد حوالة لامر فلان بمبلغ مائة وخمسين قرش او جنيه ثم جاءت الانقاذ وصارت عندنا مليارات وبعدين تخرخر وتقول عاوز اثباتات من اين لك هذا--- بسيطة نجيب لك شلة الدافوري وشلة تخميسة السيجائر او شلة(الشيرنغ) في قزارة بيرة ابو جمل وعشاء(عتان) في مطعم مشهور شمال مستشفي الخرطوم(نسيت اسمه) ولو محظوظ تمشي اثني او بار الامير---- ياخي السودان ما هو لندن عشان تقول عاوز اثباتات للفساد بس خرخر خرخرتك والاثبات جاهز. ولك التحية استاذي الكريم علي هذا المعجم الفخيم.


#994591 [كاسبر]
4.00/5 (3 صوت)

05-06-2014 06:49 AM
خذ عندك كمان
مرمط وتعنى مسح ويقال مرمط بيهو الارض
كلفت وهى عدم الاتقان والاسراع فى الانتهاء من العمل دون اجادة
زعمط شد الشعر أو قص الشعر بطريقة غير سليمة
جلبط اعطى الشى منظرا منفرا متسخا


#994514 [الكردفاني]
4.07/5 (5 صوت)

05-06-2014 12:53 AM
سرسوب : سرسبة مليار دولار امريكي ( وديعة قطر ) .


#994508 [حمدان الجامعي]
4.00/5 (4 صوت)

05-06-2014 12:38 AM
تقريباً تقريباً تقريباً يا فاتح جبرة أطول كنكشة في التاريخ تقريبا عندنا في حزب الأمة رئيسنا الديمقراطي استمرت لأكثر من أربعين عاماً ومرشحة الكنكشة لتصل لنصف قرن وعاشت الكنكشة الديمقراطية !!!!!!.


#994370 [بت البلد]
3.75/5 (4 صوت)

05-05-2014 09:04 PM
والله يا جبرا أنا الأيام دي عليا جنس كركرا... وقرفت من الغلا والبشتنه, وكان لقيت لي طارف في سمسرا أمانه ما أمزمز مزمزه, وهاك يا برطعه ما أصلها هي سلفقه في سلفقه, وكمان أحندكم حندكه, وكان قدرتو قلتو شيئ أمانه ما أخرخر خرخره واحمبك حمبكه... مش انا بقيت فووووق زي الناس القاعدين في كرسي المملكه !!!!؟؟؟


ردود على بت البلد
United States [ابو الهول] 05-06-2014 08:21 AM
ههههههههههه .. روعة والله يا بت بلدي


#994355 [Wadalfa7al]
3.13/5 (4 صوت)

05-05-2014 08:41 PM
ههههههههههههههههههههههههه


#994192 [jangy]
3.00/5 (5 صوت)

05-05-2014 04:22 PM
كر كر هو مكان تجميع المواصلات المافى اصلا يعنى ميدان فاضى وكر كر تقال للدجاج عندما يشارك ابنك الصغير وجبتة سؤال برىء دى من وين ياجبرة


#994170 [أبو الطيب]
3.50/5 (4 صوت)

05-05-2014 04:01 PM
استاذ جبرة متعك الله بالصحة والعافية وأدامك فخرا لنا 0 بس ياخوي شايفك قلت ( الخريف الماقاعدين يستعدو ليو ) طيب وريني كيف يستعدو ليو وهو كل سنة قاعد يجيهم ( فجعة ) . مع خالص تحياتي مقرونة بتمنيات الصحة والعافية


#994146 [ود العجب]
4.13/5 (4 صوت)

05-05-2014 03:20 PM
والله يا استاذ جبرة شهر بالتمام ما ضحكت بس اليوم الضحك ما خلاني نقرا المقال - ودمعي انهمررررررررررررررررررررررررررررررررررررررررر !!


#994140 [الكناني]
4.00/5 (5 صوت)

05-05-2014 03:13 PM
شكراً علي قاموس المفردات المستحدثة ، ولكن هل هذا نتاج للغتغته


#994138 [مفجوع]
4.25/5 (4 صوت)

05-05-2014 03:11 PM
غايتو دلنا على الصنف بتاعك دا يالفاتح جبرا ..
متعك الله بالصحة والعافية يا أنيق ...


#994135 [nona]
4.00/5 (2 صوت)

05-05-2014 03:07 PM
هههههههه
ضحكتنا والله يا جبرة بالرباعيات دى
والله المسئولين فى السودان بقو كلهم ممن ينطبق عليهم القول
(..جابوا فزعة ..بقى وجعة !)


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة