05-06-2014 11:34 AM



ياريت لو بنقدر نفرح لانو جابو لينا والي جديد في الجزيره. فرحه وين ياعمك مع ناس المؤتمر الوطني ديل. قالو ليو شنو؟ بلاي امشي لينا علي خطي الوالي القديم. هو بلاي القديم دا خطاه كانت خلاص يعني؟ ماكان زول جهاد ساي وناطي كل يوم الخرطوم لي اولادو وسايبنا في الولايه لمن الجوع نهانا عديل وبقا بطونا متلصقه مع ضهرنا زي فروه الفكي. نقول ليك حاجه كبدايه, كدي انسي حكايه الوالي القديم دا لانو بصراحه بتجيب لينا العصبي.
سمعنا الوالي الجديد حلا الحكومه وعمل ليو شويه قرارات ثوريه كده, بس لسع الحراميه متلمين حولو. ياجماعه انتو قايلين مصيبتنا في شنو؟ مصيبتنا بالمناسبه بتتمثل في الارزقيه البكونو لافين حوالين كل زول جديد. وعندنا قناعه تامه انو نسبه كبيره جدا من ناس المؤتمر الوطني ديل حراميه, وبقت عندهم فنون في التلون والتلوي وتغير الوش وقوه العين يحسدهم عليها ابليس. هسع مع ظهور الوالي الجديد حيقومو يلبدو شويه كده وبعد داك شوفو براكم الهبر بكون كيف. ناس لا بتعرف الله ولا بتخاف منو.
نحنا بالواضح ياسياده (الجديد) بنقولا ليك بصراحه في حاجات كده من هسع لو بدت تظهر بنقيف ضدك وبنكرهك الحياه. اول شي ماتقول لينا عينته فلان لانو العفيق وقايم الليل وبخاف الله. والله لو عفيف وبقوم الليل فلي نفسو. ونحنا لو بسرق زول بنقطع يدو, البقوم الليل دا لو سرق, بنقطعهم الاتنين. والبنشوفو في المسجد كل يوم وطلع فاسد, بنعاقبو دبل مش عشان غشانا نحنا بس, لانو بكون غشه ربنا بي جلاله قدروكمان. في الفتره الفاتت, ثبت لينا بمالا يدع مجال للشك انو ناسكم ديل متدينين عشان يصلو للدايرنو ومافيهم زول بعمل حاجه لله كده. الدين عندهم سلم بطلعو بيو للمال والنساء والفشخره. امبارح في برنامج تلفزيوني واحد قانوني قال قانون الثراء الحرام بديك الحق اي زول تحس بي اثار ثراء ظهرت عليو ممكن تقبضو طوالي وتسالو من اين لك هذا. مش انته, اي زول عادي ممكن يعمل كده. نحنا دايرنك تدي الناس الامان يقولو ليك كده. عشان اي ولد صغير في الولايه ممكن يوريك فلان كان كيف وبقي كيف.
موضوع تاني. حكايه اللوبيات البدت تظهر في محليات الولايه وكل ناس حته عندهم زول دايرين يجيبو عشان يكبرو كومهم. ياخ جماعتكم ديل حراميه ومابخافو الله. قلنا في الاول مامشكله الزول يخبت ليو بيت وعربيه وبعد داك ينعدل. ناسكم طلعو زي خور ابوعنجه مابتملي ومال المسلمين كلو مابكفيهم. عشان كده دايرين نشوف الاسماء الحاتشتغل معاك منو. تعرف لو جبته لينا اي زول عشان هو مؤتمر وطني قيامتك قامت. انته مأمون علي امهاتنا واباءنا واولادنا ولازم تكون علي قدر الامانه دي وتختار الناس البحملوها معاك. الوالي القديم شالو ناسكم لانهم سودو وشو واتولد ضغط شعبي جاب خبرو.
في حاجه لازم تختها في بالك. نحنا بالمناسبه عارفين كل شئ وبنعرف الناس بالاسماء. اقيف بس في شارع النيل ونادي اي زول انشا الله سايق عربيه كارو قول ليو الحرامي منو بوريك ليو. الناس معروفين ولهطو كم وكيف معروفه. ابعد لينا من الناس الاشتغلو سنوات طويله زي الكرنكي والاسماء المكرره دي. لو جبتها بترفع ضغطنا وبنقوم عليك وبنفارقك تاني مابنتلمه الا وتكون نهايتك اتكتبت علي حائط التاريخ.
انسي لينا انك ولد الجزيره البار وخريج وين وعملته تدريب كيف ودرسته شنو. هسع بلاي في زول قرا اكتر من القديم؟ طلعت قرايتو فشنك ساي. الثقه بينا وبينك بتتبني بي افعالك رغم قناعتنا انو تاني مابنثق فيكم حتي لو (ولج الجمل في سم الخياط). بس كمان ياحسره انته مفروض علينا بي قوه السلاح ولازم نتعايش معاك.
كدي نديك فرصة 100 يوم (ممكن نقطعا في اي لحظه) عشان نشوفك زول نجيضه ولا زيك وزي السبقوك. بس ابعد لينا من حكايه الجهاد دي. تقول جهاد بنتجنن عليك. ياخ نحنا عندنا جيش عديل كده بندفع ليو عشان يحارب, ممكن جهادك يكون علي الفقر والجوع والمرض. وخت في بالك ولايه الجزيره دي فيها ناس متعلمين (لمن غلط) ولو داير لسته من 5 الف نفر في ثانيه ممكن نجهزا ليك ولا واحد منهم مؤتمر الوطني. وكلهم خبرا واساتذه جامعات واطباء ومحامين وغيرهم عشان ماتفتكر خلاص الدنيا مافيها غير الكيزان.
وانته ماشي في شوارع ولايه الجزيره, اعرف كل العيون بتعاين ليك وكل الناس بتراقب فيك وكل خطوه تعملا محسوبه ليك او عليك. مش دي ولايتك وعارف ناسا؟
قال شنو؟ خطا الوالي القديم. اعرف انو ميزان حسناتك البرجحو ليك, مفارقتك لي خطا الوالي القديم.
Follow me in [email protected]_elrazi

[email protected]

تعليقات 4 | إهداء 0 | زيارات 2530

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#996497 [Kasir]
0.00/5 (0 صوت)

05-07-2014 07:55 PM
تحياتي


#995916 [omar]
0.00/5 (0 صوت)

05-07-2014 10:53 AM
ياجماعة ناس ابو قناية ديل شايتين على وين ؟؟ حيرونا ؟


#995637 [تجاني مصطفي]
0.00/5 (0 صوت)

05-07-2014 07:54 AM
اول حاجة .. وأول قرار لو عايزنا نصدق انك مختلف عن من سبقوك .. نحنا المعلمين في ولاية الجزيرة ادينا حقنا الادانا ليهو المركز ال20% طبيعة عمل وهي التي لغفها الوضيع ودبدر واستمر الولاة التافهين الذين مروا علي ولاية الجزيرة في لغفها .. وفي هذا عندك شهر واحد ... وإلا ...؟؟؟؟


#995148 [أبو اليسع]
0.00/5 (0 صوت)

05-06-2014 01:57 PM
يا صديقي أبو قناية، كلامك كلو سمح ومقبول ومعقول لكن ( لانو بكون غشه ربنا بي جلاله قدروكمان ) دي محتاجة استغفار لأنو ـ وانت سيد العارفين ـ ربنا عز وجل مافي زول بقدر يغشو. قول لأنو بكون حاول يغش أو قايل بغش . ولا ما كدي يا دكتور ، زلة قلم أكيد وانت ابن فقيه المدينة/ لك حبي ومودتي


د .الرازي الطيب ابوقنايه
د .الرازي الطيب ابوقنايه

مساحة اعلانية
تقييم
10.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة