المقالات
السياسة
أنا مع عبد الرحمن الخضر
أنا مع عبد الرحمن الخضر
05-16-2014 12:32 PM

أنا مع عبد الرحمن الخضر!

هذا الوالي مظلوم ظلم الحسن والحسين. الآن الخريف سيبدأ في العاصمة. وقد بدأ بالفعل في بعض أجزاء من السودان الفضل. وبما أن الخرطوم دائماً منذ أعوام خلت تغرق في شبر موية فلا أظن أنّ هذا الخريف سيكون مختلف عن سابقاته من الخرايف. – مافي زول يقراها الخرفان- وبما أنّ الخريف يأت الخرطوم فجأة وكأن ناس الخرطوم لا يعلمون أن الأمطار جلبت الدعاش في كردفان .. وأنّ البطانة إترشّت .. وجمال نافع شبعت من الشدر الأخدر.. يقولون في الخرطوم المسؤولة: الخريف فاجأنا فجأة فتفاجأنا به .. ولهذا لم نقم بصيانة المجاري وتغطيتها وردم الحفر التي في نص الشوارع.

هنا يأتي دفاعي ودفعي الرباعي عن الدكتور عبد الرحمن الخضر والي ولاية الخرطوم حتى لا يلومه الناس على مفاجأة الخريف له ولأركانحربه في المديرية. الرجل مشغول بالجماعة الذي (سفسفوا) شوية ملاليم لا تتعدى ال900 مليون جنيه جديد. ولكنها صفت على 600 مليون ملطوش!! وبكل أريحية سددوا ما يقارب ال18 مليون ملطوش.. بالله نحن الشعب السوداني الكريم الأبي يتعارك في مبالغ تافهة زي دي؟ ما تخلوها ليهم ويقوموا يتحللوا عشان يحللوها على ورثتهم في جنة النعيم السوداني. وبما أن الدكتور الخضر مشغول مع كيفية حلحلة هؤلاء الناس أو تحللهم فلم يجد هو ومن معه من الذين كانوا رايحين ساكت وقتاً للقيام بمهمتهم في العمل على تخفيف حدة الخريف على العاصمة وأطرافها على وجه الخصوص.

سمعت أن الخبير ربيع عبد العاطي قال: أن الفساد سببه الشعب وقدّم مرافعة قوية تؤكد وتثبت نظريته. سؤال: هو الزول دا جايب الدكتوراة بتاعته في شنو؟ مرة يقول ليك الدخل 1800 دولار ومرة يقول أن الخرطوم أرخص من طوكيو ومرة فيصل القاسم يفحمه، وعليه بناء على ماقاله الخبير ربيع عبد العاطي وعملاً بمقولة أن الناس على دين ملوكهم، مش هو من ضمن جوقة الملك بتاعنا، فأنا اقول أن المواطنين الذين تتعرض منازلهم للإنهيار باسباب السيول أو الأمطار الغزيرة هم الغلطانين!!! وأسند قولي على ذلك المهندس، ماني عارفه هو وزير شنو في ولاية الخرطوم، الذي قال في أقصى وأقسى حالات الغرق والسيول لسكان منطقة في شرق النيل الذين إنهارت منازلهم بفعل السيول: لماذا لا تبنون بالخرصانة المسلحة بدلاً عن البناء بالجالوس؟ بالله الراجل مش كلامه صاح؟

ذكرتني كلمات هذا الرجل بقول أحد أبناء عمومتي من البقارة الذين يسوقون الآلاف من الماشية، عندما وجد إبن عمه الفقير يأكل في عصيدة بالماء. قال له: يا فلان .. لأكلك بألمي دا كِن أكل ليك بدِهِن ما أخير ليك؟ ردّ المسكين قائلاً: (البدين أبو شرفوفة.. أنا كِن لاقي الأكل بالدِهِن باكل بألمي). وإنت يا سعادة الوزير الناس المساكين دول كان لاقين طريقة للبناء بالخرصانة المسلحة والأسمنت كان بنوا بالجالوص؟

هذا الوزير العجيب تمّ الناقصة وقال: لماذا يبني الناس في مجاري المياه؟ رمتني بدائها وانسلّت. هؤلاء الناس بنوا في قطع سكنية دفعوا قيمتها لحكومة ولايتك. وسلمهم المهندسون المختصون العقودات والخرط. هل كان المهندسون يعلمون أنها مجاري مياه أم لا؟ فإن كانوا يعرفون وسلّموا القطع للسكان فهذه مصيبة. وإن كانوا لا يعرفون أنها في مجاري مياه – وهو الأغلب- فالمصيبة أعظم.

لهذا قلت لكم أنا مع الدكتور الخِدر حتى لا تلومونه عند إنهيار منازلكم أو غرقها بواسطة السيول الجاية من سهول البطانة وشمال كردفان، فالرجل مشغول لشوشته فنرجوكم أعطوه فرصة شوية كدا يحك راسه.(العوج راي والعديل راي).

كباشي النور الصافي
kelsafi@hotmail.com





تعليقات 7 | إهداء 0 | زيارات 2394

خدمات المحتوى


التعليقات
#1006230 [أبومحمد]
0.00/5 (0 صوت)

05-17-2014 11:39 AM
(
الجنس) ( للجنس) رحمة، يعني ( القبيلة) أو صلة الرحم، لتفهم المعني المقصود من لفظة (الجنس) و هذا الكاتب ( متكردف) حتى النخاح، وكذلك ( د. الخدر)، إذ إنني أتساءل ماذا حدث لصيدليته البيطرية بالأبيض، ولذلك (البوكس) القديم، وأظنهما كانا من مال حلال، ليس كمال البي أم دبليو، تلك ( الكردفة) جعلت الكاتب يتحيز ( للخدر) ليحضر له أعذارا فيما مضى وفيما سرق أو سرف بواسطته ومما هو آت - أبيت اللعن ( وأستجير بالله) من كل ذي إست ملمعة، يدخل فيها أصبعه لأشجعه.... أو كما قيل....


#1006228 [الكوز]
0.00/5 (0 صوت)

05-17-2014 11:37 AM
ممتاز


#1005754 [ودالنيل تمساح]
0.00/5 (0 صوت)

05-16-2014 07:00 PM
لمن شفت العنوان زهجت
لكن لمن دخلت فى الموضوع ارتحت حبه
ولد ابا اختيارك لعنوان الموضوع فى محله


#1005653 [aboahmed]
0.00/5 (0 صوت)

05-16-2014 03:38 PM
شنو مرة جالوص واخرى جالوس يا الانصارى ود الانصار؟


#1005617 [المهندس سلمان إسماعيل بخيت على]
0.00/5 (0 صوت)

05-16-2014 02:30 PM
يا جماعة غردون قال ليكم لا فساد وسط الكبار ودكتور ربيع الواطى قال ليكم سبب الفساد دا الشعب
وغردون بيقولالفساد وسط الصغار مسموح به وعشان كده دكتور تاج السر مادخل هو فى الفساد
دا دخل ولده وفى فقه الكيزان دا مسموح به
تاج السر محجوب سفيرنا فى نيجريا فرغ إبنه لإدارة الفساد فى السفارة دا كان عامل فيها خبير تخطيط إستراتيجى لنظام البشير لحد ما ضرب بتخطيطه الفاشل بالبشير ونظامه الواطه وهسي يبرطع فى ابوجا
خلوه
كل حد حر فى موزه
يا جماعة كلام غردون دا ماتابوه ساكت
فعلا فى وسط الكبار ( جدا ) مافى فساد - هسي الوالى دا لمان فكر فى الفساد مش جاب وليدات صغار نفذوا العملية وهو طلع بره - هو وقف فى نصهم - طيب كلام غردون غندور ما صحيح
أمشى وراء أى فضيحة فساد يمرقوا ليك وليد صغير ملازم أول والفرقاء والمشيرات والواليات بره
كلام غردون صحيح ميه فى الميه
هسي وينا قضية حاويات المخدرات - حيركبوها شخص ما حيلته اللضاء - يقبض ليهو كم مليون ويقولوا ليهو بنضمن ليك محاكمة ماتزيد عن 10 الى 12 سنة ودى 120 مليون جنيه لو خدمت بأيديك وكرعيك فى 12 سنة بتجيب 120 مليون - لا والله - خلاص - شركة الحلول المتكاملة دى كل أوراقها لدى مسجل الشركات حتكون بإسمك - وقع وقع - إستلم - أمشى سلم الملايين دى لأم العيال وتعال أدخل الحراسة لمان يحققوا معاك عارف بتقول شنو - خلاص قفل الملف - كلام غندور صحيح - عاوزننا ندمر المؤتمر الوطنى وحكومة الإنقاذ اللى كل المسلمين بيعاينوا ليها عشان كم حاوية مخدرات
طيب قضية الخضر قيت - حقيقة الملازم غسان دا كل المبلغ الذى إستلمه كان 2 مليار ودا مبلغ بسيط نحن كلمناهم يردوا للشعب 17 مليار ولغسان 10 مليار دى 27 مليار وباقى الـ 690 حلال عليهم السبعة كل واحد حوالى 95 مليار - طيب السبعة ديل منو عاوزين نعرف أسمائهم - السبعة ديل ما خلاص زابوا فى غسان وحيشيل الشيلة براهو - يعنى كلام غردون غندور صاح - وفى زول يقدر يقول كضب
وقضية تحكيم الأقطان - دى خلاص المذنب فيها مش من جماعة المؤتمر الوطنى محى الدين عثمان من جماعة أنصار السنة ماشايفين دقنه مو دقن كيزان كدى عاينو لى لحيته وقارنوها بحقت الوالى الخضر - فرق - مو من جماعتنا حنشيله الجريمة كلها ونمرق ناسنا زى الشعرة من العجين
كسرة من كسرات الفاتح جبره
سبق وأ تقدمت بإقتراح للإخوة فى إدارة الراكوبة أن توضع صورة الرئيس البشير بدلا من صورة السيدة حرمه لأنه هو من أخطأ فى حقها وحق ضرتها بنت خاله فاطمة التى يشتكى تكاسة شندى من أن إسطولها خرب بيوتهم - فهو المتهم الأول الذى سمح لهن بالظهور وليه وصلت الزوجة الثانية لمرتبة السيدة الأولى لسيدات العرب ونحن عروبتنا مازالت موضع شك والزوجة الأولى ومن دمك ولحمك يادوب تصل لصاحبة سيارات تاكسى فى شندى - قالوا فى زوجة وزير جنوبى ( شهيد برضو بفقه الكيزان )إستشهد فى واحدة من طيارات الإنقاذ الإنتنوفية - صدقوا ليها كشك فى لفة الكلاكلة ومسئول بدرجة رئيس جمهورية - عرفتوه منو - تزوج من أرملة زميل زوجها فى الحادث - قالت واحدين يزوجوها وواحدين كشك فى كلاكلة لفه وهده دا تكون جاذبة كيفن
أمل أن تستبدل صورة وداد بصورة زوجها لأنه هو المجرم رقم (1) والمرأة كانت حسنة السيرة والسلوك مع زوجها الأول والد عيالها - والمرأة على دين زوجها طبعا شفنا زوجة جمال كانت فى غاية الحشمة والأدب تلزم بيتها وتربية أولادهاجات بعده جيهان دمرت تاريخ السادات وأعقبتها سوزان دمرت مبارك ويقال فى إحدى حلقات المواجهة الأسرية حملها كل ماحدث له ولأسرته وقال لها أنت ياسوزان بتطلعاتك وطمعك دمرتى هذه الأسرة
قلنا عاوزين صورة المشير وأن تستبعد صورة زوجته نهائيا فنحن سودانين لا نهاب الرجال ولا نخشاهم حتى لو كان برتبة مشير ورئيس جمهورية لكن لينا تقاليد وأصول تجعلنا نحترم المرأة وخصوصيتها وحين تخطىء نحمل الخطأ لزوجها وزمان عندى فى الرباطاب إمرأة تجرأت وضربت رجل الرجل شال طوريته وفجخ بيها زوجها خلاص 40 يوم طريح الفراش وكل الناس شكروه وقالوا لو مد يده وصفع المرأة كان عيب يجلل فوق راسه لمان يموت عشان كده أى حرمه تخطىء فى حقك أنصحك تعاقب زوجها ومايقال عنك بيضرب إمرأة والرسول وصانا عليهن قبل مايموت
فى أمر كبير يشغلنى لو كنت أملك القدرة عليه لنفذته بيدي هاتين وهو أن تصمم قائم صورة وإسم تشتمل على كل قيادات الفسادات فى حكم الإنقاذ وتصمم فى شكل دبوس ايكونه يعلقه كل سودانى على صدره ويكتب عليهم
قائمة المفسدين فى حكومة الإنقاذ حتى يحرموا من ممارسة أى عمل سياسى فى مستقبل السودان
THE BLACK LIST OF THE SPOILERS OF KAIZAN AL- INQAZ CONTAMINATED DIRTY ERA
كل مفسد جديد يضاف لها ومن تحلل أمرقوه منها بره دا شرعا برىء هههههههههههههههه
بس عشان القائمة ماتفقد قيمتها المادية والمعنوية لا يضم أى مفسد إليها دون بينة مادية وألا تكون مكان لتصفية الحسابات والضرب تحت الحزام كل شخص بيكره زول يلفق ليهو تهمة بالكذب ويطالب بإضافته لقائمة مفسدي عهد الكيزان الإنقاذى ولازم شعب السودان يأخذ العبرة بأن من دمر هذا العهد هو الكذب الكذب الكذب يكذبون حتى على زوجاتهم يتزوجون عليها مثنى وثلاث ورباع وهى لا تعلم لمان يموت تفاجأ الحاجة أم العيال الكبار لديها 3 ضرات و15 طفل شركاء فى البيت الكبير ويقع الكوراك والفضائح – وهو كان وكان وكان
مافى داعى توخوا الصدق والصدق لا يخرج من فم رجل جبان
قائمة المفسدين سنطالب بتجريمهم وحرمانهم من تقلد أى وظيفة سياسية أو منصب حكومى ولو فراش فى محلية


#1005582 [مهدي إسماعيل]
0.00/5 (0 صوت)

05-16-2014 01:37 PM
لعلمك، الوالي الخضر في هذه اللحظة في بريتوريا، بيعمل شنو ما عارف!!


ردود على مهدي إسماعيل
United States [ركابي] 05-16-2014 08:14 PM
قالوا في شركة من جنوب افريقيا حتدير بصات العاصمة هههههههه


#1005562 [اسير الشوق]
0.00/5 (0 صوت)

05-16-2014 01:14 PM
لله درك يا كبش اضحكتني اضحك الله سنك


كباشي النور الصافي
كباشي النور الصافي

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة