في


المقالات
السياسة
إختطاف ياسر عرمان
إختطاف ياسر عرمان
05-22-2014 06:58 AM


اكبر (دلاما) تواجه السودان في مسألة الحوار, مشاركة الحركه الشعبيه قطاع الشمال وامكانية حضورها الخرطوم للانضمام اليه. ناس المؤتمر الوطني اكدو علي اعطائها ضمانات وحمايتها مهما طال امد المباحثات. وفي حالة تعثر الحوار وعدم رضاء الحركه منه, المؤتمرجيه قالو ممكن تنسحب من الخرطوم معززه مكرمه الي اي مكان تريد حتي لو كان هذا المكان كاودا وبطائره خاصه مع بعض الهدايا من تماثيل خشبيه وكرتونة منقه وقزازتين من عسل الدمازين الصافي.
طبعا قطاع الشمال تجاربه مع الكيزان لا تحصي ولا تعد وممتده لي سنين كلها غبن وعداء مستحكم. موضوع العداء دا بالمناسبه مامن هسع, ديل ياعمك (بتحادرو) من زمن الحركه الشعبيه ست الاسم عندما كان رئيسها جون قرنق وايام نيفاشا الخوالي. عشان كده, مافي زول بعرف الكيزان احسن من عرمان ومشار والحلو. والان الموضوع بقي بالنسبه ليهم اوضح لانو الكيزان اتغيرو ونفسياتم بقت معروفه للقاصي والداني وما بتشبه نفسيات كيزان زمان ناس علي عبد الفتاح وابودجانه وعبيد ختم. كيزان زمان ممكن تقول كان عندهم شويه علاقه بالدين. و (هي لله) ست الاسم بتاعة زمان كان فيها جزء من الايمان. برضو كان فيهم ناس مقتنعين تماما بالتوجهه الاسلامي والدوله الرساليه وعشان كده كتار منهم ماتو في سبيل قناعاتهم دي. كيزان هسع ديل حاجه تانيه, وبقو ناس اراضي وكاش بس. اراضيهم مازي اراضينا لاكما ولا كيفا. وكاشهم كمان مازي حقنا المابملا الجيب دا. ديل ياخال بتكلمو بي ملايين الدولارات. مره بنتكلم ونحنا مجموعه من ابناء الطبقه الوسطي فينا مغتربين ومهندسين ودكاتره واحد قال:" بلاي الكيزان ديل مش ببالغو؟ في زول ممكن يكون عندو مليون دولار في السودان دا؟ والله لو لقيت مليون دولار تاني ماداير قروش لمن اموت". انته في المليون دولار ولا في النقنقه والبرادو والجلاليب المغسله (بالدولار السوداني) دي. النقنقه طبعا بتجيب الكضب ونقض العهود. في مثل امريكي بقول ليك: "وراء كل غني كضبه كبيره".
نجي لي نقض العهود المشهورين بيه الجماعه ديل من زمن المفاصله لمن (كبيرهم الذي علمهم السحر) قالا في وشوهم بصحيح العباره. اكيد بعد النقنقه دي, نقض العهود حايبقي عادي زي الزبادي والسفر لي دبي بي غادي. والله ينقضوها ولا ترمش ليهم عين. اوريكم كيفّ !!
الكيزان بتمنو قطاع الشمال برئاسة عرمان يجي يتحاورو معاهم في الخرطوم. قال شنو, قال بنضمن ليهم لو الحوار في اي لحظه عصلج ممكن يرجعو من وين ماجو معززين مكرمين. اححا زي مابقولو اولاد بمبا. معقول قطاع الشمال وياسر عرمان بالتحديد يوافقو علي تعهد كيزاني (هلامي) زي دا ويجو كمان الخرطوم؟ دا يبقي خازوق عديل لانو الكيزان معروفين بالتفكير اللحظوي ومابعاينو ابعد من نخرتم. وكمان هم شلل شلل واي شله فيهم ممكن تركب خاذوق في التانيه بدون تفكير في الهب قال والرسول قال. تعرف ياعمك, الكيزان ديل مستعدين يحلفو بي كتاب الله عديل كده ومعاها بكيه قدام الوسيط الافريقي وسفراء الدول العظمي وممثلي عدم الانحياز ورابطة علماء المسلمين وجامعه الدول العربيه وريال مدريد والجن الاحمر, لو الحركه الشعبيه جات الخرطوم, يدوها الامان ويعزموها سمك في مطعم عوضيه. اول مايجو الخرطوم, يقابلوهم ليك بالبرادو وينزلوهم في برج الفاتح والمباحثات تبدا ويومين كده وعينك متشوف الا النور. الجرايد طوالي تشغل ليك الشريط بتاع (الفرع داك) ودموية عرمان وكان شيوعي ولا لا, وشويتين كده يجو ناس (انصاص الليالي ديلك) بي عربات التاتشر الماخمج والبدون نمر ديك, يخمو ليك وفد قطاع الشمال بي (عرمانو) لي جهه ولا الرحله 370 الماليزيه ذاتا. الما مصدقني يقرا جرايدهم اليومين ديل ولا يرجع لحكاية الناس الختفوهم قبل كده. ليه انتو ماشين بعيد, اتمعنو بي هدوء في قصة الصادق المهدي دي, مش بلاي ياهو الختف ذاتو؟ اها هسع إمام الانصار ولا ياسر عرمان؟ قوم لف بلا تعهد بلا خرمجه معاكم. اوعك تدقس ياعقار. اديس بس وحليفه ممعانا.
Follow me in twitter@elrazi_elrazi

تعليقات 5 | إهداء 0 | زيارات 3796

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1012402 [selman]
0.00/5 (0 صوت)

05-22-2014 12:41 PM
منتظرين رايك في موضوع الامام. تتذكر ايام يروكلين لمن شككتنا الزول دا سيدك..بالمناسبه وين التيمان؟؟


#1012342 [ابو الدفاع]
0.00/5 (0 صوت)

05-22-2014 11:57 AM
دي شنو الخرمجة دي وكمان دكتور؟؟


#1012134 [ابو الشيخ]
0.00/5 (0 صوت)

05-22-2014 09:24 AM
كيزان الزمن ده يا ابو قنايه لحقوا كلب ابزهانه تجيلو هانه ومن المهانه تقولو تك !!!


أين نحن من أيام كيزان ( أصلب العناصر لأصلب المواقف )


ودى


#1012124 [fadeil]
0.00/5 (0 صوت)

05-22-2014 09:20 AM
عقلية ياسر عرمان لا تدانيها عقلية الكيزان لو جمعتهم كوووووووووووووولهم عن بكرة أبيهم .


#1012064 [أنا رحت]
0.00/5 (0 صوت)

05-22-2014 08:46 AM
معقول الجبهه الثوريه تكون بالسذاجه دي.


د الرازي الطيب ابوقنايه
د الرازي الطيب ابوقنايه

مساحة اعلانية
تقييم
9.00/10 (2 صوت)


محتويات مشابهة/ق

الاكثر تفاعلاً/ق/ش

الاكثر إهداءً/ش

الافضل تقييماً/ش

الاكثر ترشيحاً/ش

الاكثر مشاهدةً

الاكثر مشاهدةً/ق/ش




الرئيسة |المقالات |الأخبار |الصور |الفيديو |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة