05-28-2014 02:23 PM


إلتقيت بإثنين من لاعبي الهلال في إحدى البنوك وذلك قبيل مباراة الفريق الأخيرة أمام الزمالك المصري في دوري المجموعات وأكثر ما أدهشني في الأمر هو قدومهم لمتابعة أمر يخص برامج التمويل حيث أنهم تقدموا بطلب تمويل سيارات لدى إحدى البنوك قبيل قرار بنك السودان وقد جاءوا لمتابعة إذا ما كان القرار سيطالهم أم لا ، كل هذا قبل أيام من مباراة الهلال المهمة.
والسؤال أين المعسكر الإعدادي وأين التركيز وأين أجواء المباريات وأين التدريب على الجٌُمل التكتيكية والتخطيط والإنسجام بين أفراد الفريق ومشاهدة المباريات الدولية ومعالجة الأخطاء الدفاعية والتدريب على الركنيات والضربات الحرة الغير مباشرة وهذه الأخيرة تذكرني بالمدارس السنية في أوروبا والتي يتدرب اللاعبين فيها بحيث أن أحدهم يكون متخصص فقط في الركنيات وآخر متخصص في الضربات الحرة الغير مباشرة ، ولكن .. أين نحن من ناس قريعتي راحت ديل.
الي متى سيظل اللاعب السوداني بعيداً عن أجواء الإحترافية وإلى متى يظل مشغولاً بقسط السيارة ورسوم الدراسة ومقدم الشقة ومهموماً بإلتزامات الأسرة ، إلى متى قلبه في الكرة وعقله مع سيد البيت ومواعيد الإيجار ، إلى متى يعود اللاعب من التمرين وهو يطارد في إيجار الركشة وإيراد الطعمية.
ومتى ستوفر إدارات الأندية للاعبين الضمانات المالية التي تغنيهم عن الإنشغال الفكري والبدني بإمور أخرى خارج نطاق المستطيل الأخضر.
ولاعبي المريخ ليسو أفضل حالاً من لاعبي الهلال بل هم أسوأ فعبد وداعهم المبكر لدوري أبطال أفريقيا وبعد أن صمم لهم النادي بطولة عسى ولعل ترضي قاعدة الجماهير العريضة فشلوا في ثاني تجربة أمام فريق فكتوريا حديث العهد بالمواجهات الخارجية وذلك مما دفع الألماني أتوفستر لشن هجوم عليهم عقب المباراة ووصفهم بعدم الإنضباط الوظيفي داخل المعلب وتركهم لتعليماته جانباً والإنصراف للعب بدون منهجية.
عليك الله يا أتوفستر منهجية شنو وكلهم ناس كورة شراب .
نتمنى من الله أن يعجل لنا بكأس العالم حتى نغسل أوجاع ومرارات الأربعة أعوام الماضية ، كلنا شوق لرؤية كرة القدم على أصولها 90دقيقة على نفس وقوة واحدة حتى لو زادت الـ 90 دقيقة لأشواط إضافية هو نفس العطاء ونفس الحماس ونفس اللياقة والقوة هيا لنرى تمريرات بالسنتيمتر وهجمات مدروسة ودفاعات صلبة وشباك تهتز بمتعة وذكاء الأهداف .
هيا لنشاهد (ليونيل ميسي) الأغلى عالمياً و(كريستيانو رونالدو) و(نيمار) و (أديسون كافاني) و(رادميل فالكاو) و(مسعود أوزيل) و (أندريس انييستا) و (ماريو غوتزة) و (واين روني) و(فرانك ريبري) .
لو سمحتوا بعد ما يبدأ كأس العالم ما عاوزين ولا صوت ....... هُس.


[email protected]

تعليقات 29 | إهداء 0 | زيارات 3583

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1020571 [kakan]
1.00/5 (1 صوت)

05-30-2014 06:05 PM
رائعة جدا بس ارجعي لتكريم الاوائل في امتحانات الاساس وذلك اللقاء الجميل مع الطفلة الاولي في الامتحانات عندما سالها مقدم البرنامج في التلفاز السوداني هلالابية انت ام مريخابية فاجابت منزعجة انا بشجع ريال مدريد


#1019799 [عبدو]
1.00/5 (1 صوت)

05-29-2014 05:10 PM
هس ولا كلمة
عسوله يا سهوره


#1019640 [Faisal]
1.25/5 (3 صوت)

05-29-2014 02:05 PM
وانا بضم صوتى مع التعليق بان كاتب هذا المقال رجل وليست فتاة لاننا عارفين فتياتنا بفكرن كيف وفى شنو وتفكيرا حدو وين .
اما اذا كذب هذا الاحساس وطلعتى صحى بنت فلك الف تحيه واضمن ليك انك ممكن تكونى احسن ناقض رياضى بالبلاد لانك ذكرت حقائق وواقع بعض النقاد يخافون من قوله
اذا كنتى فعلا سهير فسيرى للامام واتحفينا كل يوم بموضوع جديد


ردود على Faisal
European Union [someone] 05-29-2014 05:19 PM
قاعد في القرن الكم أنت ؟
إذا ده تفكيرك ...معناتها أنت تفكيرك محدود جدا !!!


#1019495 [مدحت عروة]
1.00/5 (1 صوت)

05-29-2014 12:01 PM
هى الكورة براها ؟؟؟
انتى منتظرة كاس العالم وانحنا بننتظر الانتخابات الهندية والبريطانية والامريكية والفرنسية وهلم جرا عشان نغسل دماغنا من انتخابالت الانقاذ وغيرها من الدول الفاشلة!!!
السودان فى عهد الانقاذ بقى الفشل يمشى على قدمين!!!!
25 سنة ما قدروا يحلوا مشكلة الحكم ويعملوا استقرار سياسى ودستورى ويجى امين حسن عمر ويقول الانقاذ العملته مافى حكومة عملته فى السودان وهو طبعا بيقصد الطرق والكبارى وصف الرغيف والبنزين وهلم جرا!!! عليكم الله شوفوا جنس الناس الحاكمننا الكبارى والطرق والسدود والبترول اهم عندهم من حل المشكلة السياسية والدستورية والاستقرار الدائم؟؟؟؟؟
لكن امين حسن عمر ليه حق امريكا بعد ما استقلت عملت مؤتمر دستورى وعملت الدستور ومؤسسات الحكم اها واصلا لحد هسع ما قدروا يبنوا كبرى ولا طريق ولا سد او يطلعوا بترول او تصنيع حربى زى الانقاذ بتاعة امين حسن عمر!!! هسع الواحد يضحك ولا يبكى؟؟؟؟؟؟؟؟؟؟؟؟ ولا يشوف ليه قنبلة ذرية يرمى بيها ناس الانقاذ ديل الجهلة الفشلة الاغبياء حكومة المافيا ؟؟؟؟؟؟


#1019471 [omer,AA]
0.00/5 (0 صوت)

05-29-2014 11:45 AM
يا بت انا ود الحله عاشقك وحيات الله !!


#1019455 [الغلبان]
0.00/5 (0 صوت)

05-29-2014 11:36 AM
100%


#1019392 [هيثم]
0.00/5 (0 صوت)

05-29-2014 11:08 AM
كدي اتكرمي واسألي عن اولاد بلدك في دارفور بدل ميسي ، لانك لو قابلت اي زول اجنبي اول سؤال حيسالوا ليك عن اللاجئيين اهلك البيشوفهم في الاخبار ( معليش مشيها انهم اهلك دي ) على الاقل يكون عندك اجابه بدل ما تقولي ليهو انك ذاتك بتابعيهم في الاخبار ، وخليك من العبط والعواره بتاعتك دي يا هبله .


#1019383 [Abu Ahmed]
0.00/5 (0 صوت)

05-29-2014 11:01 AM
لا يمكن ان نتقدم في اي مجال ابداعي مالم يكون هناك استقرار اقتصادي و امني وسياسي


#1019266 [ابو نسيبة]
0.00/5 (0 صوت)

05-29-2014 09:36 AM
احسن حاجة يشوفوا حالهم كان في السوق او الحوامة في البنوك او بالتمويل الاصغر او الاكبر .. كورة شنو العايزاها من زي ديل والله اللعيبة الشايفهم انا ديل لو قعدوا في معسكر مقفول في سيبريا وجابوا كل مدربي العالم واحد وراء التاني ما يطلع منهم واحد نقول عليهو لاعب ديل غير يمرضوا فشفاشنا ما عندهم فايدة لا لعب ولا حا حتى نتيجة بالصدفة


#1019221 [سيف الدين خواجة]
0.00/5 (0 صوت)

05-29-2014 09:01 AM
يا عزيزتي الحال من بعضه السياسه في السودان ضيعت كل شئ وما صرف علي هلاريخ لو صرف ربعه علي التعليم والصحة لكان اجدي وانفع فالرياضة لا يوجد لها مشروع وهل في السودان مشروع لاي شئ في الرياضة حتي المشروع الانجليزي بالمدارس مات كما مات مشروع الجزيرة انها محنة النخب السودانية


#1019211 [الحالم]
5.00/5 (1 صوت)

05-29-2014 08:52 AM
يابت الناس ابعدى من الكرة فى معلقين هنا ﻻ يعجبهم العجب وﻻ الصيام فى رجب هسى يلحقوك مريم يحى( ابرار


#1019188 [عبدالرحيم العمده]
0.00/5 (0 صوت)

05-29-2014 08:38 AM
كلام ينقط عسل زي ستو .. نتفق معك تماما" .. ولا كلمة حتى الانتهاء من مشاهدة نهائيات البرازيل ..


#1019146 [المتشائل]
0.00/5 (0 صوت)

05-29-2014 07:57 AM
عندما تتم معالجة الأخطاء الإملائية والنحوية في هذا المقال عندها يمكن أن نحلم بمعالجة أخطاء الكرة.


ردود على المتشائل
[السر موسى] 05-29-2014 11:56 AM
هههههههههههههههههههههه اه يا المتشائل يعنى حاتخلى بله جابر زى ميسي ولا الشغيل زى كاكا ولا الجزولى زى ابرهيموفيش ياخ ديل لاخلقه لا اخلاق لاكوره كلو عليهن وحلمهم معروف اقول ليك عاوز هايس ولا عاوز اعرس
والله انا اتمنى احد اللاعبين اكون معاهو لقاء تلفزيونى و اكون لابس كويس (بدله بمحتوياتها )بدل من العواليق البلبسوها دى قميص كاروهات فيهو مليون رسمه و الف كلمه انجليزيه والقيص مالاحق كمر البنطلون يا خ ديل شماشه
ولو ربنا حضرك زواج احد اللاعبين عينك ما تشوف الا القرف والمرض


#1019014 [caeser]
0.00/5 (0 صوت)

05-29-2014 01:41 AM
و بعد الجري وراء الحاجات القلتيها ماتنسي حبيبي الفول ( البوش ) وجبة لاعب الكرة عندنا بعد التمرين


#1018916 [زول ساكت]
0.00/5 (0 صوت)

05-28-2014 10:35 PM
حاضريييين لا صوت ولا حس


#1018753 [Wadalfa7al]
0.00/5 (0 صوت)

05-28-2014 07:04 PM
تحليل كروي رهيب وعميق..
عاوزين نشوف كرة قدم نسائية متقدمة في السودان.. في حائط الصد علي اللاعبين تغطية الصدر والمناطق الحساسة عشان ما تصيبهم الكرة... ما هي المناطق التي يجب علي اللاعبات تغطيتها قي حالة اصطفافهم في حائط الصد البشري؟
تحياتي


#1018728 [محايد]
5.00/5 (1 صوت)

05-28-2014 06:25 PM
و كمان تعرفي في الكورة كل التفاصيل دي؟ لا انت كاتب شامل، إنت ( تجضمي )!!الرجاء مواصلة الكتابة، قولي أي حاجة ،أكيد حتبدعي كالعادة، وفقك الله.


#1018686 [العميد المطرود]
0.00/5 (0 صوت)

05-28-2014 05:32 PM
علي بالقسم الكلام البتقول فيه البت الحلوة دي مازدا مابقولوا ولا الجاكومي ولا معتصم جعفر معقول حله وحمار ايو نسونا ناس نافع المانافع واللمبي العوير وبتاع الاعلام الشكله كده ذي الهاري في هدومه


#1018670 [هجو نصر]
0.00/5 (0 صوت)

05-28-2014 05:05 PM
اندهشت لمعلق قال ان بعض الكتاب في الراكوبة يكتبون تحت اسماء الفتيات وصورهن لانهم يمكن ان يفبركوا اي اسم انثوي ولكن من الصعب ايراد صورهن الا بالتراضي ! لا ادري حقيقة ذلك ولكن كلام البت دي الليلة ما انثوي ! تكون امحمد ولد ؟ وارجل من المدسي وراها ؟ ولا كورتنا الشينة دي جذبت السمحات ديل ؟


#1018657 [حليمة القديمة]
1.00/5 (1 صوت)

05-28-2014 04:52 PM
وووب على يا بنات أمى من البت أم شعرات دى....وا سجم خشمى دى ما جابت قون عديل كدا..

شوفوا جنس الفهم البتفهموا وجنس الكلام البتقولوا والله مارادونا ماعنده فهم قدر ده...

عشنا وشفنا، وا رمادى منكم يا بناتى ، هسى البت دى ما وقفت قلب اللعيبة والمدربين...

عاد جنس فهم ..عاد الدولة لازم تهتم بى جنس البنات ديل..والله بى كلامها ده السودان يجيب كأس

العالم.....ووووب على منك يا بتى ياسهير الله يحفظك لأهلك..


ردود على حليمة القديمة
[الدنقلاوي] 05-29-2014 06:49 PM
يا حليمة يا حاسدة أنت قايلة الناس دي كلها ملمومة هنا فوق شنو ؟ ما فوق الشعيرات ديل ..
غايتو الزول السمح يقول العايزو و نحن نقول ليهو آمين
و سهير دي مكملاها كلو كلو

لذلكـ ما فينا إلا نقول آآآآآآآآآآمين يا سهير


#1018645 [عمران محمد الحسن]
0.00/5 (0 صوت)

05-28-2014 04:45 PM
والسؤال أين المعسكر الإعدادي وأين التركيز وأين أجواء المباريات وأين التدريب على الجٌُمل التكتيكية والتخطيط والإنسجام بين أفراد الفريق ومشاهدة المباريات الدولية ومعالجة الأخطاء الدفاعية والتدريب على الركنيات والضربات الحرة الغير مباشرة وهذه الأخيرة تذكرني بالمدارس السنية في أوروبا والتي يتدرب اللاعبين فيها بحيث أن أحدهم يكون متخصص فقط في الركنيات وآخر متخصص في الضربات الحرة الغير مباشرة ، ولكن .. أين نحن من ناس قريعتي راحت ديل..

لكن يا سهير لقيتك كدا (تفتيحة) حتى في كرة القدم..وأنا من هنا أقترح أنك تقومى بتدريب الهلال

لأنى هلالابى ومتأكد لو ده فهمك هلالنا راح يكون فوق مع مدربة وطنية مثلك...غايتو لقيتك حاجة كدا

ما بتتوصق (ماشاء الله)..وبرضو تقولوا مازدا ومدرب أجنبى !!!! عايزين سهير...


#1018642 [شيخ الدين عباس]
0.00/5 (0 صوت)

05-28-2014 04:42 PM
والله كانك تتحدثين عن لاعبين كبار وفرق كبيرة تحصد الكوؤس والبطولات,, يا ستى ديل لاغبي دافورى.. وابصم لك بالعشرة ان سيدات سيرلانكا او تشاد ممكن يتعادلوا بكل سهولة ان لم يفوزوا, انا والله احيانا بتفرج علي الدورى القطرى او دورى رديف الامارات فى نفس الوقت اللي بلعب فيهو الهلال والمريخ


#1018637 [hussam 1]
5.00/5 (1 صوت)

05-28-2014 04:38 PM
ارادت الكاتبة التظاهر بانها تعرف الكثير عن عالم كرة القدم الواسع مجاله جدا ولذلك عن قصد (حشرت ) اسماء نجوم كبار من العالم لتؤكد بانها تعرف!! ثم اظنها لاتدرى بل متاكد من ذلك ان اجر لاعب كرة القدم المحترف فى (هلال مريخ) وعلى كل علاته يساوى راتبها فى ثلاث سنوات وهل تعرفى بان نجوم الهلال حاليا والمريخ هم من اثرى اثرياء العاصمة ولايوجد بينهم من يسكن بالايجار وكلهم لديهم البنيان الشاهق ويمتطون افخم واغلى السيارات ليس لانهم نجوما كبارا لا ولكنها الحقيقة وعن (مصادفتك) لنجمين من الهلال فى بنك من اجل تمويل سيارة ما !!! ربما انت على حق ولكن ليس لانهم يحتاجون ولكن يريدون ان يستفيدوا من هذا الامتياز فقط وغيرهم يستفيد (بالتحلل) وعن دعوتك لمشاهدة كاس العالم هى مقبولة ولكن من العيب ان تكتبى وتوصفى لاعبو كرة القدم السودانية ب(ناس قريعتى راحت) وانت بالذات من ناس قريعتى راحت فى عالم الكرة واتمنى ان لاتتحدثى فيما لاتعرفين مستقبلا وخليك مع ناس السياسة التى اوصلتنا لهذه المراحل اذا كان هناك سياسة وسياسيين فى الاصل فى !!
ولعلمك يا انت ناس كرة الشراب ديل جلبوا لهذه البلاد كاس الامم الافريقية فى العام 1970 وانت اكيد كنت حاضرة المباراة الختامية .. وبالمناسبة ناس قريعتى راحت ديل يحفظوا الكرة العالمية عن ظهر قلب ويتابعون كل دورياتها يااااااخ قووومى لفى


ردود على hussam 1
United States [نقة بس] 05-28-2014 08:00 PM
ملاحظاتك تمام وفى محلها
ثروات اللعيبة اذا قسموها بين علماء واطباء وكل نخب المهنيين ، كان البلد كلها اتبنت

لعيبتنا عاوزين يقبضوا كمحترفين لكن ما يلتزموا لا بحياة محترف ولا بخطط مدرب
ما بيقدروا على شروط الإحتراف البيحسب عليك وجباتك ووزنك ولياقتك

خلاااااص بقت على الكورة؟


#1018610 [السفروق]
0.00/5 (0 صوت)

05-28-2014 04:13 PM
والله نجيضه في الرياضه ماشاءالله ماعندك عوجه تااااااب


#1018560 [Abu Areej]
5.00/5 (1 صوت)

05-28-2014 03:18 PM
أبدأ بـ (منهجية شنو وكلهم ناس كورة شراب ).. الذين لعبوا بكرة الشراب كانوا هم الاميز والاحرف على مستوى السودان بل العالم العربي ولك ان تبحثي عن تاريخ ابرز لاعبي كرة القدم في السودان .. أما لاعبي اليوم فلن يستطيعوا اللعب بكرة الشراب فلو لعبوها لما رأيناهم اشباح ..

ثانياً: المريخ وفر لللاعبيه المال وقد انشغلوا بالمال في استثماراتهم من عقارات وسيارات وغيره اكثر من انشعالهم باستثمارهم الحقيقي الذي جلب لهم المال وهو كرة القدم .. فليس المهم عندهم فريق المريخ او السودان وانما بعد قبض مقدم تسيجلهم ان لم يكن كله سعوا في الارض تجاراً ..

ثالثاً: قد يكون انشغال لاعبي الهلال بحقوقهم المتأخرة دوماً سبب رئيسي في تدهور احوال الهلال .. وليس بعيد عن الاذهان بيان قائد الفريق وقتها وحالة الجوع التي ارهقت اللاعبين.. ولكن الان بعد ان اشرفت الدولة مباشرة (بالمهندس وشقيق الرئيس) على الهلال اصبح في مقدور لاعبي الهلال الان الانشغال بالتجارة اكثر من انشغالهم بالمعايش والفريق .. ولا تستغربي وجودهم بالبنك

في الختام.. ليس هنالك لاعب كرة قدم يستحق المشاهدة في السودان على الاقل في الوقت الحالي .. فبعد ان كنا نشاهدهم يتناولون الشاي في الشوارع وجدتهيم في البنوك.. فليس هنالك كرة قدم في السودان ..


#1018558 [تنقش تنقش]
5.00/5 (1 صوت)

05-28-2014 03:18 PM
غلبك ال تكتبي فيه ؟؟
خلاص جيتي لي اللحم الميت ده ؟؟
تنقش تنقش تنقش


#1018525 [يا عثمان حسن]
0.00/5 (0 صوت)

05-28-2014 02:58 PM
انتي بتحومي في البنوك مالك؟؟؟؟؟
عجبي ....!!!!!!


#1018503 [الولايات المتحدة السودانية]
5.00/5 (1 صوت)

05-28-2014 02:35 PM
يا أختنا ,,, هي دولة من دول العالم العاشر ,, وفقرانة ,, وقالوا دافنين فيها نفايات من زمن نميرى ,, ومحتلينها المصريين والحبش والكينيين ,, وإتقسمت ,, وحروب مكان ما تقبل ,, وفساد ,, ونيقرز ,, وجنجويد ,, وتيراب البنية ,, وفقرا وفكيين ,, والناس الفيهم رقشة كلهم طشوا منها وسووا ليهم جوازات أجنبية ,,,
كورة شنو وفلفلت شنو ؟؟؟؟؟
ياخى أنحنا لو سووا كاس عالم فى لعبة أم الصلص حا نجى الطيش !!!!!
ياخى دهـ قرف ماطبيعى !!!!!


#1018498 [Al-zool]
0.00/5 (0 صوت)

05-28-2014 02:33 PM
لو سمحتوا بعد ما يبدأ كأس العالم ما عاوزين ولا صوت ....... هُس.


سهير عبد الرحيم
سهير عبد الرحيم

مساحة اعلانية
تقييم
5.50/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة