المقالات
السياسة
قادر ربى ..مو نساى..!!
قادر ربى ..مو نساى..!!
08-03-2014 01:45 AM


يا أبو مروءة..هووى...
خير يالحاجة ..
مالك ضاربة للروراى..
تعال يا وليدى شوف البى..
قرب جاى ..
دحين ماك الناجى ود التاى..؟
بلحيل حبوبة يانى ود التاى..
تعال بى جاى..
أمك في الحساب بتى..
حبوبتك التاية..
بت عمى طه ود اب راى..
مطيرة أمس العصير الجات ..
تانى بالليل جات..
حمتنى الغمدة يا وليدى..
جاتنى الموية جوه البيت...
لقتنى براى..
ود بتى السُرة الوحيد سافر ..
ليه دورين..
لى بلد الدهب روَح..
وليداً عديييل ورزين..
ما فات حبوبتو تب..
وليداتك كتااار حبوبة دايرة شنو..
تسلم ياوليدى..
ياها المحرية فيك ..
خش لى جوه شوف البيت..
المرق مكسور..
الشباك وقع فوق عنقريب جدك العشاى..
أمرق هديمات ود بتى لى برة..
كريتينة صغيرة فيها عدة شاى..
الزير والبنبر المكسور..
الهباب والكوكاب والويكاب..
حبل السعف خاتاهو للكراب..
صفيحة مقرونة..
فيها الجَبَنة مصفى البن والقلاى..
عليبة صغيرة صفراء فيها حبوب..
خويتم الفضة راح منى..
سمح يمة ..
بمرق ليك حويجاتك..
بربط ليك سـخيلاتك..
بحلب ليك غـنيماتك..
بس دايرك أسى تمشى معاى..
لى ناس أمى ...
براك ماتقعدى يا حاجة..
لغاية ود بنيتك إجى..
تعالى معاه لى بيتك..
يغتيك الله يا وليدى..
يديك بت الحلال معاها المال..
قادر ربى هو العطاى..
بدى الناس كل الناس مو نساى..
يرجع ودبتى شايل الخير..
بالدهب الكتيير الجايبو ..
أشوفوا عريس ..
يحججنى..
يعَمِرخلوة جدو..والديوان..
يصبح قبلة للمحتاج ..
والعشمان ..
قادر ربى مو نساى.. قادر ربى هو العطاى..

بلا أقنعة..
صحيفة الجريدة السودانية...
[email protected]





تعليقات 0 | إهداء 0 | زيارات 802

خدمات المحتوى


زاهر بخيت الفكى
زاهر بخيت الفكى

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة