08-13-2014 10:37 AM

رد ..على قصيدة الأستاذ
الكبير/ هاشم صديق
***
(رُكب سيدي )

***


الباص يا هُمامنا الماكضاب
كان للمشوار شايل الركاب
لكن الحاصل كده بإقتضاب
الجاز الفيهو قليل و عقاب

حلبوه الكيزان ومصو الخزّان
وخلو الأحزان في الرحلة عيان
والكل في ضراعو رقد نعسان
نزل السواق وعمل عيان
والكمساري وقف يلعن زهجان

البوري ضعيف و الشاسي خفيف
والمكنة تدخّن صيف وخريف
لا طلنا السوق لا طرف الريف

الباص حارن قدام الحلة
لامن العالي إتدردق واتدلى
لاقام إستارتر لا بالمنفلة
لاجانا خبير ورانا العلة

عمنا داك الجنو كلام
ينظّر و ينضم كونه إمام
وحالف لازم يركب قدام
كراع في السلم والأيد في لجام
حصان الرجعة على الحكام
وأبوجبة رفع رأية الإستسلام
هوالهدد ولوّح بالإبها م
قال سلّم تسّلم ياظلاّم
والليلة مرق في البر عوام

والحاج فاروق تهديفو يسار
من بعدِ جناح الحركة الطار
في سحاب الصيف من غير أمطار
بقي يزرع أمال في أرض بوار
ويحرت في البحر الجد غدار
وياسر حايم وشايل الطار
والحلو قام لاحق مالك عقار
و غازي يلف في النص دوار
مريم تردح زي ست الظار
وعلى باريس سايقة الترتار
ابوها لبس كاكي الثوار
فرتق غادي و قال يا ستار
ونسيبو يمثّل في الأدوار
وجاهم راجع فوق راي مكار
والباعو ضميرهم برضو كتار
والبعضِ يتر من غير مترار
والبص واقف .. ركابو ودار
دايرين الجنة وحاضنين النار


الثورة زلط ماها بعيدة
وايضاً بالنص ممكن تحديدا
أو بالشنقيطي السرعة نزيدا
شرط الماكينة نجيبا جديدة

بس قول للنايمين أصحو شويه
و الدفرة تكون بي بياض النيه
إيد في إيد و الهمة سخيه
أصلو الواقفين ديل رباطية
القطعو الشارع بالزندية
حقرو الراكبين ..حجزو العربية
وسرقو الطاجن والنملية
دايرين خنقة وبونية قوية

كم لوري زمان.. وصلو الثورات
وفيها الركاب دارو الدورات
بس جو الشيّاب عند اللفات
تس بالمسمار قدو العجلات

والباص الكان مُسرع مليان
رجال وشباب وأجدع نسوان
يا خسارة برك في الخط خربان
وفهم الركاب تربس كملان
خايفين لو يرجع تاني فلان
ويعيد القصة البايخة زمان

لايصلو الحارة التالتة تمام
لا درب الرجعة أمان وسلام
الكبري الواقف يمسي حطام
ولا الموقف يصبح فيهو نظام

الباص يازول كاسر ركبه
والزيت في الموية نزل كّبه
وسخانة المكنة حريق شبه

وخلاصة القول والشغلانه
مانلوم الحافلة الغلبانه
الكانت واسعة زمان شايلانا
ده العيب محصور فينا برانا
ولو قلنا الدفرة تجينا إعانه
من بله الأبداً ما حلانا
وحلمت أحشانا الهتفت جيعاته
برغيف الوهم الني يحشانا
في ليل الوجع الطال بكّانا
سجم البتزغرد في الباص راجيانا
وقول للسوس العشعش جوانا
مابتلقى خشب للسُكنة سوانا
***
13/8/2014
[email protected]

تعليقات 8 | إهداء 0 | زيارات 3999

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1079950 [Saber O. Shadeed]
0.00/5 (0 صوت)

08-15-2014 12:13 PM
جراحة ركبة
(1)
يا ريسنا
يا دخرينا
الف سلامة
مليون كفارة كمان يا ريس
قالوا خلاص حتصين الركبة
ياخى سلامة و الف سلامة
بس بالمرة تصين الشمبر
و ممكن برضو تشوف الجِلبة
و لو متفضى
و ما متضايق
تعمل عمرة راس بالمرة
غير مصفى
و قلب طرمبة
و بديك فكرة ظريفة يا ريس
انك برضو تغير زمبة
جاتنا سيول و معاها كوارث
شعبك صابر و ما مهتم
يا ريسنا
بغير الركبة
بيوتنا اتماصت
نحنا فداك ياعمى الريس
اهم مكان فى الجسم الركبة
و قيمة الواحد من ركابينو
و ديمة بنفخر بى ركبينك
و ما ناسين اجمل رقصاتك
اهم حاجة تصين الركبة
و حاتتحفنا بأجمل رقصة
اجمل عرضة
و هزة وسط
و يمكن برضو رقيص بالرقبة
واثقين منك و من موهبتك
ما بتخذلنا
يا ريسنا
و حا تتحفنا
يا تاج راسنا
باجمل رقصة و اجمل عرضة
و يمكن فيها رقيص اسلولى
و حالفين نهتف لمن ترقص
مافى رئيس فى الدنيا مثالك
لا من قبلك و لا من بعدك
يا ريسنا
(نواصل)


#1078697 [أبوعلي]
0.00/5 (0 صوت)

08-13-2014 06:36 PM
السيّد/برقاوي

ألا ترى أن هناك بعض احباط يتقطّر علينا من ثنايا فحوى القصيدة!
إن كان لديك أي رأي سالب فقد أظهرته في وقت غير مناسب ومثبط


ردود على أبوعلي
Sudan [kamal] 08-14-2014 10:28 PM
ما هو السالب ، وما هو المناسب ..؟

United Arab Emirates [الدكتورة أم أحمد .. استاذة علوم سياسية] 08-14-2014 03:26 PM
والحاج (فاروق) تهديفو يسار
من بعدِ جناح الحركة الطار
في سحاب الصيف من غير أمطار
بقي يزرع أمال في أرض بوار
ويحرت في البحر الجد غدار
(وياسر) حايم وشايل الطار
و(الحلو) قام لاحق مالك عقار

المقصود واضح يا سيد أبوعلي الذي ضايقك هو هبش الرجل لليسار بواقعية فهمه لمستجدات العالم والمنطقة ، ولعله يقصد أن التفكير اليساري السوداني لابد أن يعيد النظر حتى في مسميات كياناته ناهيك عن المبادي الني إنهد معبدها على رؤوس أهله حتى في عقر دارهم .. صحيح هنالك بعض الجوانب الإيجابية يمكن الإستفادة منها خاصة في ضروب الإقتصاد لا ينكرها حتى مجتمع الدول الرأسمالية ، ولكن في ظل وضعنا الإقليمي الذي تمدد فيه الأرهاب الفكري باسم الدين ، الا يتطلب ذلك تغيير خطط اللعبة من أساسها للتهديف من خط الوسط والإعتدال الذي يكون مقبولا لعقلية مجتمعاتنا التي شحنها المتزمتون بأن الشيوعية أو العلمانية ذاتها هي الإلحاد الذي يقف في الضفة الآخرى من الإسلام!
أما أهل الجبهة الثورية فمكانهم ليس فنادق باريس ياسيدي وانما المواجهة في مناطق العمليات لكسر شوكة النظام ولا ينبغي أن يغيبوا كثيراً عن مقاتليهم أو طويلا ، وإن كانت حركتهم في عواصم العالم لها مدلولها الدبلوماسي وكسبها المعنوي ، ولو أنهم أقاموا بما يلقونه من دعم مادي
فضائية تلفزونية لمقارعة إعلام النظام الكاذب لكان ذلك أمضى سلاحاً من ضربة أبوكرشولة ذاتها !

United Arab Emirates [أبوعلي] 08-14-2014 11:47 AM
ما المقصود من هذا؟!

والحاج (فاروق) تهديفو يسار
من بعدِ جناح الحركة الطار
في سحاب الصيف من غير أمطار
بقي يزرع أمال في أرض بوار
ويحرت في البحر الجد غدار
(وياسر) حايم وشايل الطار
و(الحلو) قام لاحق مالك عقار

Saudi Arabia [ود يوسف] 08-14-2014 07:46 AM
الثورة زلط ماها بعيدة
وايضاً بالنص ممكن تحديدا
أو بالشنقيطي السرعة نزيدا
شرط الماكينة نجيبا جديدة

بس قول للنايمين أصحو شويه
و الدفرة تكون بي بياض النيه
إيد في إيد و الهمة سخيه
أصلو الواقفين ديل رباطية
القطعو الشارع بالزندية
حقرو الراكبين ..حجزو العربية
وسرقو الطاجن والنملية
دايرين خنقة وبونية قوية


#1078420 [الغاضبة]
0.00/5 (0 صوت)

08-13-2014 01:30 PM
بس قول للنايمين أصحو شويه
و الدفرة تكون بي بياض النيه
إيد في إيد و الهمة سخيه
أصلو الواقفين ديل رباطية
القطعو الشارع بالزندية
حقرو الراكبين ..حجزو العربية
وسرقو الطاجن والنملية
دايرين خنقة وبونية قوية


شكرا يا أستاذ برقاوي وبص الثورة ح ينطلق وقريب جدا لو ما الليلة بكرة صباحا بدري وانت والاستاذ هاشم صديق في مقدمة الدفارين ....


#1078331 [ابوغفران]
0.00/5 (0 صوت)

08-13-2014 12:31 PM
قصيدة لاتقل روعة عن قصيدة هاشم صديق . انت يااستاذ شاعر كامل الدسم , مامحتاج لاى دفرة.


#1078317 [مصطفي سعيد]
0.00/5 (0 صوت)

08-13-2014 12:21 PM
روعة استاذنا .... والتحية لشاعر الثورات هاشم صديق .... ( كمل الكلام ..)


#1078232 [ادروب الهداب]
0.00/5 (0 صوت)

08-13-2014 11:25 AM
روعـــــــــــــه...... الله يحقق الاماني والباص يشتغل والماكينة تدور
ومايقيف تب تاني!!!!!!!


#1078230 [عاطف عبد الله]
0.00/5 (0 صوت)

08-13-2014 11:24 AM
مريم الآن خلف القضبان ؟؟


#1078195 [شبونة]
0.00/5 (0 صوت)

08-13-2014 10:49 AM
يا سلام على برقاوى.. وكفى.


محمد عبد الله برقاوي
محمد عبد الله برقاوي

مساحة اعلانية
تقييم
10.00/10 (4 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة