08-18-2014 02:27 PM


بعد أن إرتفعت تكاليف الحياة والمعيشة لدرجه يصعب على المواطن تحملها إتجه بعض ضعاف النفوس إلى ممارسة الإحتيال الذي لا يخطر على بال ، مستعينين على ذلك بمختلف الأساليب (وعدة الشغل) اللازمة .. ولا أخفي عليك ايها القارئ الكريم أن العبدلله (مع إنو عامل فيها تفتيحة) قد كان ضحية … هذا الإحتيال ..

كان العبد لله يسير بعربته نحو مدخل كوبري المك نمر متجها للخرطوم وعند بداية الكوبري إستوقفه أحدهم على طريقه (قدمنا معاك) كان أحدهم هذا في أواخر العقد الخامس من العمر يرتدي لبسة سفاري (بنية) بكم طويل تتدلي لحيته (كم سنتيمتر) بينما تزين منتصف جبهته زبيبة سوداء (علامة صلاة) وهو يحمل في يد شنطة وبالأخري مسبحة تكاد تلامس الأرض.
توقفت له .. جلس على المقعد وهو يلقي تحية الإسلام شاكراً ..ثم إبتدر الحديث :
– والله يا استاذ الحياة بقت صعبه خلاس
– الله بس يكون في العون
– أنا شغال في الأسواق الحرة هنا في الخرطوم .. وكمان في (النقابه) والله الماهية تكمل من يوم خمسة في الشهر مع إنو قاعدين يدونا تسهيلات ..
وما أن نطق بكلمة تسهيلات حتي قام بفتح الشنطه وإخراج بعض الاوراق المطبوعة في شكل جداول ..
– ناس الأسواق ديل يا أستاذ عشان نحنا في النقابة وكده قاعدين يدونا حاجات بالتقسيط .. تقريباً كل الأدوات والأجهزة الكهربائية .. (ثم نظر للجداول):
– تلاجات 16 قدم .. 12 قدم .. ديب فريزرا .. مكيفات موية 5 الف .. 3 الف.. مكيفات فريون 24 وحدة .. 18 وحدة .. إسبليت يونت .. غسالات 12 كيلو .. 10 كيلو .. 8 كيلو … وو (وهو يستعدل في الكرسي ويوجه حديثه لي) :
– ديل كووولهم يا استاذ بيدونا ليهم بالأقساط المريحة .. تدفع 10% بس والباقي على ستة شهور
– وإنتو بتستفيدو شنو ؟؟
– بنختا لينا حاجه بسيطة بس .. لكن والله والله أنا عشان طيبتك دي يا استاذ ووقفتك ليا دي ما عايز منك أي حاجه .. شوف إنتا بس عاوز شنو؟
لان العبدلله كان في أشد الحاجه لغسالة ليستريح من نقة المدام اليومية ومطالبتها الدائمة بشراء غسالة رغم حالة الفلس الدائمة فقد وجدها فرصة :
– والله ياخي عاوز ليا غسالة 10 كيلو
– (وهو يتابع بأصبعه على الورقة) … غسالة عشرة كيلو.. غسالة عشرة كيلو.. (يتوقف ملتفتا) .. دي يا أستاذ بي أربعة مليون .. 10% يعني 400 ألف !!
– جميل جداًوالباقي أكتب ليكم بيهو شيكات؟
– شيكات ؟ إستغفر الله يا استاذ .. بشيلا ليك على ضمانتي بس أديني رقم تلفونك لمن القسط يقرب انا بتصل فيك .. (ثم) الظاهر عليك مستعجل يا استاذ ؟
– والله فعلا مستعجل محصل ليا إجتماع الساعة حداشر ..
– خلاس انا بشيل القروش وبعمل ليك الإجراءأت تجي تلاقي الغسالة بره .. أنتا بس تعال الصالة بعد إجتماعك ده يا استاذ وقول ليهم عاوز شيخ عباس بتاع النقابة .. (يدخل يده في جيبه ) ..وأهو تلاقي تلفوني في الكرت ده !!
في هذه الأثناء كنا قد وصلنا إلى قرابة مبني الإجتماع نهاية شارع المك نمر .. أخذت جانبا .. أوقفت المحرك وأخرجت من درج العربه الأربعمية الف ..
قام بقفل باب العربة وهو يقول لي :
– إن شاء الله تبقى خوه في الله !!
بعد نهاية الإجتماع حاولت الإتصال بشيخ عباس .. (هذا المشترك لا يمكن الوصول إليه الآن) .. قلت ربما هي (الشبكة) .. أدرت محرك عربتي صوب الصالة التي اشار عليها .. أوقفت العربة ودلفت إلى الداخل .. وجدت بعض الموظفين :
– يا جماعة بدور على شيخ عباس بتاع النقابة
– (في صوت واحد) : أوعا تكون حاجات كتيرة !!
كسرة :
– العبد لله طلع طيرة ومباري السيرة !!

- كسرة ثابتة (قديمة)
– أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و
– كسرة ثابتة (جديدة):
– أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و

تعليقات 35 | إهداء 0 | زيارات 6252

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1084025 [كاسبر]
0.00/5 (0 صوت)

08-19-2014 09:30 PM
لدغك يعنى!!!!تستاهل


#1083983 [Adam Ibrahim]
0.00/5 (0 صوت)

08-19-2014 08:36 PM
يعنى يا جبرا ما سمعت بالتمساح ابو دقن؟؟.. اعمل حسابك من ناس المظاهر ديل والجاتك فى مالك سامحتك..


#1083656 [محمد]
0.00/5 (0 صوت)

08-19-2014 02:09 PM
طبعا ما معقول...
انت بقيت زي حسين خوجلي تألف المواقف ولا شنو؟!!
واحد زيك يا أستاذ بالبساطة دي يديليه صاحب (دعوني أعيش) اربعمية ألف بدون سابق معرفة!!
كتيرة منك شوية يأستاذ..


#1083648 [محمدين]
0.00/5 (0 صوت)

08-19-2014 01:59 PM
هههههههههههههههههههه
تستاااهل يا أستاذ!

قلت لي شيخ عباس ..


#1083601 [الحاج عمر]
5.00/5 (1 صوت)

08-19-2014 01:17 PM
نحن منذ بداية التسعينات حذرنامن ان الجبهة الاسلا مية سوف تضرب بقوه فى اخلاق الناس وتدمرها,وهذا ماحصل لك بالضبط يااستاذ جبرا,والجاى اكتر كتير....


#1083588 [بن بادي]
0.00/5 (0 صوت)

08-19-2014 01:02 PM
يا استاذ والله أنا قايلك تفتيحه لكن طلعت تغميده عموما استاذنا الكريم الفاتح جبرا المؤمن صديق وانت قد صدقت هذا الرجل وصدقت نواياك في خوة صادقة في الله لكن هذا المنافق باسم الدين عليه لعنة من الله يسيء الي رجال كثر أوفياء اطلقوا للحاهم العنان تقوي لله سبحانه وتعالي واحياء لسنة رسولنا الكريم سيدنا محمد صلي الله عليه وسلم .
احتسب ما حدث لك عند الله وثق بأن الله لن يخذلك أبراً وتوكل علي الله وما سلب منك نصباً واحتيالاً سيعوضك عنه الله أضعافه أن لم يكن في هذه الدنيا الفانية حتماً سيكون في دار الخلود وما أحوجك إلي مثل هذه الأموال المنهوبة والمنصوبة منك ..
ولك تحياتي
وأضم صوتي لكسرتكم الدائمة ::::: أخبار خط هيثروا شنو


#1083526 [nasr]
5.00/5 (1 صوت)

08-19-2014 12:01 PM
أنا بجيب ليك عباس أبو دقن دا من تحت الواطة تدينى كم ؟؟؟ كلام جد نتفق


#1083522 [nasr]
0.00/5 (0 صوت)

08-19-2014 12:00 PM
أنا بجيب ليك عباس أبو دقن دا من تحت الواطة تدينى كم ؟؟؟ كلام جد نتفق


#1083481 [نص صديري]
1.00/5 (1 صوت)

08-19-2014 11:37 AM
لقد شوهد من تبحث عنه بنفس الاوصاف التي ذكرتها في التلفزيون القومي وكان "يرتدي لبسة سفاري (بنية) بكم طويل تتدلي لحيته (كم سنتيمتر) بينما تزين منتصف جبهته (بصغة) سوداء (علامة صلاة) وهو يحمل في يد شنطة وبالأخري مسبحة تكاد تلامس الأرض." حيث قام بفتح شنطه وإخرج بعض الاوراق المطبوعة في شكل جداول، وقال يعد المشاهدين المغلوبين انه اذا عدو العام ده خنق وقدموا له فقط 70% من الجبايات ورسوم النفايات سيبني لهم مصارف وكباري ومسابح معلقة..الخ
انت متأكد يا استاذ جبره اللاقيتو ده ما زولنا النبي الخضر؟؟


#1083438 [ابو الرشا]
5.00/5 (1 صوت)

08-19-2014 11:11 AM
علي الطلاق بالغت ههههه هههه والله اناضحكت حت الدموع ربنا يخلف عليك


#1083437 [ابو الرشا]
0.00/5 (0 صوت)

08-19-2014 11:10 AM
علي الطلاق بالغت هههههههه هههههههههههه والله اناضحكت حت الدموع ربنا يخلف عليك


#1083296 [مصطفي سعيد]
5.00/5 (1 صوت)

08-19-2014 09:46 AM
فعلا طيره ومباري السيرة مامفتح ولاحاجه معقولة بالله طيب الناس الساكت يعملوا فيهم شنو ؟


#1083088 [العارف عزو]
0.00/5 (0 صوت)

08-19-2014 07:45 AM
دا كوز مسكين البيلهف 400 من جبرا !! الكيزان بيلهفوا من 4 مليار وانت طالع


#1083024 [Haj Ahmed]
1.00/5 (1 صوت)

08-19-2014 06:12 AM
مايفوق ال ٤٠٠ الف جنيه في الطبلون، من دون خلق الله واقف لواحد بلحية وسبحة، اجتماع في شارع المك نمر، غسالة، الفيك اتعرفت


#1082940 [الشاف بى عينو]
3.00/5 (2 صوت)

08-19-2014 12:47 AM
بعد الحصل دة شوف ملفك انت خليك من ملف خط هيثرو ، كسرة زول بالشكل الوصفتو دة الموقفك ليهو شنو!!!!!!!!!!!!?


#1082938 [النيل أبونا والجنس سودانى]
5.00/5 (1 صوت)

08-19-2014 12:45 AM
أخبار شيخ عباس بتاع النقابة شنو(وووو وووو وووو وووو وووو وووو وووو).


#1082907 [مراقب]
0.00/5 (0 صوت)

08-18-2014 11:31 PM
خيال خصب يا استاذ العب الميدان مافيهو غيرك قال سيره قال هههههههههههاي


#1082838 [عصمتووف]
1.00/5 (1 صوت)

08-18-2014 09:35 PM
وانت ال400 دي لقيتها ووووووووووووووووووووووووين هو في حد بوفر ما كل طالع


ردود على عصمتووف
Sudan [ياسر] 08-18-2014 11:58 PM
انت ما عارف استاذ جبرا بيلعب بالبيضة والحجر؟!!
يضـحك علينا ويضحكنا بعلم وموافقة الكيزان اهل الحل والعقد!!


#1082828 [ابوعبدالله]
3.00/5 (2 صوت)

08-18-2014 09:24 PM
ياشيخ عباس اقصد ياشيخ جبرة انت معاك عربية واربعمائة واجتماع وبرضو تدعي الفلس

اها رايك شنو في المعاو 8 بنات وشغال في طابونة عامل صواني وحق التمباك ماعندو يقول شنو


حقيقة ماهزار ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#1082818 [شفق الغيب]
1.00/5 (1 صوت)

08-18-2014 09:09 PM
الجاتك فى مالك سمحتك يادكتور وديربالك


#1082796 [إنقاذى سادر في فساده]
3.00/5 (4 صوت)

08-18-2014 08:34 PM
خوة فى الله لامن لحقتك خط هيثرو
مليون الف مرة قلنا ليكم لمن تلقى واحد بى لحية تحسس مسدسك
وإذا سلك ابو لحية فجا فاسلك فجا غيره


#1082790 [cour]
4.00/5 (3 صوت)

08-18-2014 08:20 PM
واللة يا جبرة كنت فاكرك اذكى من كدة بكتير .احدهم هذا وباوصافة المذكورة اى مواطن ممكن يعرفة انة حرامى ومحتال ديل السرقو الوطن وانت الحذرتنا منهم تقوم تقع انت ذااااتك .الحمد للة ما احتال عربيتك يا مسكين ولا فقعليك عين زى عثمان ميرغنى


#1082765 [samy]
4.00/5 (3 صوت)

08-18-2014 07:32 PM
الله يخلف عليك يااستاذ وهي شيمة السوداني الحقيقي الثقة وتوسم الخير في الناس لكن بتاع التقسيط دا مافي شك واحد من هؤلاء الانجاس سحقهم الله


#1082760 [yousif]
3.00/5 (2 صوت)

08-18-2014 07:28 PM
معقول ياجبرا نحنا في شهر ثمانية


#1082669 [Awad]
3.50/5 (3 صوت)

08-18-2014 05:41 PM
الله يا جبرة ده خابور قوى خالص.أنت ما بتوب من ناس الدقون وغرة (السكن) ياأخى ديل من متعلمين من شيخهم الكبير الذى قال لأبليس أنت مابتعرف حاجة.الله يعوضك وأعمل حسابك تانى من هذه العينات ناس أخوانك فى الله وأنت عارف بطلوا يقولوا نحن أخوان مسلمين بقوا يقولوها أخوان فى الله.


#1082646 [عاطف]
1.00/5 (1 صوت)

08-18-2014 05:19 PM
هههههههههههههههههه الجاتك فى مالك سامحتك . دة حرامي ظريف


#1082634 [Awadelseed]
4.00/5 (3 صوت)

08-18-2014 05:04 PM
"" أوقفت المحرك وأخرجت من درج العربه الأربعمية الف ..""
والله ما شاء الله ياشيخ جبره ربنا يزيد ويبارك .. يعنى اب سبحه ده بس انتهى من كلامو كده فى نفس الوقت.. وفى الخريف ده.. فتحت الدرج طلعت اوربعوموميه الف..
عملتك دى باقى لى اجعص مليونير ما يعملها..
اتوقعتك ترد عليهو تقول ليهو خلاص ادينى فرصه ادخل لى صندوق اشيل الصرفه الاولى واديك القسط


#1082618 [ودالباشا]
2.00/5 (2 صوت)

08-18-2014 04:42 PM
والله كنت عايز اقوليك عيب السجم تتغشى بالسهوله دى لكن لمن عرفت نقة المدام الدائمة والله عذرتك صلو الحريم ديل ياهو حالن الازواج عندهم يملكون عصى موسى مش لو مفلس لو شحاااااد عديل الحاجة العايزاها لازم تجيبها كأنك الحاوى والمشكلة بلاهن ما بنبقى حلومر يا جبرا


#1082614 [شيخ عباس بتاع النقابة ذاتو]
4.88/5 (7 صوت)

08-18-2014 04:33 PM
انت القال ليك ركبنى معاك منو ** وبعدين لزومو شنو تخت ليك 400 الف فى العربية ** انت طلعت حمبرة ما طيرة ** الفلهمة ليكم شنو ما تغسلوا فى الطشاته ** كسرة : الفاتح جبرا .. جبر الله كسركم .


#1082581 [khalid]
3.00/5 (4 صوت)

08-18-2014 04:01 PM
الله يخلف عليك يا استاذ والجاتك في مالك سامحتك...تاني ركبهم وصر ليهم بالذات ناس ابدقن ديل...كلام أإأإأإ مافي


#1082573 [adilnugud]
3.00/5 (2 صوت)

08-18-2014 03:50 PM
واجابات كسراتك ده................بتلاقيها عند حاج عباس بس هو منو فتش عليه


#1082557 [fahad]
2.75/5 (3 صوت)

08-18-2014 03:30 PM
الله يخليك ياجبرة دائما تمتعنا بس انا ما عباس لو مشكلة الغسالة مااتحلت بجد ارسلها ليك من السعودية هنا وما داير لا 10 في المائة ولا واحد في المائه....دمت ياغالي


#1082551 [komikukulo]
4.00/5 (3 صوت)

08-18-2014 03:25 PM
هذا شيء خطير، لكن مشكلتكم انتوا اخوتنا المسلمين شغالين بالمظاهر واحد عندو دقن وشايل سبحة خلاص دا مولانا، والمحتالين فهمو الناحية دي.


#1082533 [المر]
4.00/5 (4 صوت)

08-18-2014 03:04 PM
طول لحيتك وطول سبحتك وألقف لقفتك ماهي برضولله (وانت براك مباري السيرة....ماشعب السودان كلوا مباري السيرة


#1082509 [الفاتح جبرة طلع طيره]
4.50/5 (5 صوت)

08-18-2014 02:43 PM
العبد لله طلع طيرة ومباري السيرة !!
الجاتك في مالك سامحتك
حاشاك وكلا ... انت ما طيرة انت طيب
لكن العترة تصلح المشي . دم بخير وربنا يخلف لك خيرا منها
وفي النهاية هى اخلاق ازمة


ردود على الفاتح جبرة طلع طيره
Saudi Arabia [أبو عمر] 08-20-2014 03:11 PM
بعد فصاحاتك دى كووووووووووولها وطلعت طيرة ما معقول وكمان فتحت الدرج و فيه 10% بالضبط ألعب غيرها ، لا إيصال لا أى إثبات إنت قايل نفسك فى سودان نميرى ولا شنو ؟ على كل حال شكرا ضحكتنا و خليت الناس دى تفضفض

Sudan [سنارى] 08-19-2014 01:10 PM
عندى احساس انو هذه القصة لم تقع بل مجرد حبكة قصصية ليس الا


الفاتح جبرا
الفاتح جبرا

مساحة اعلانية
تقييم
9.07/10 (7 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة