08-21-2014 05:25 PM

عندما دخلت عليه كان في حالة هياج شديد.. يرتدي فنيلة داخلية فقط وسروالا طويلا.. تبدو عليه علامات الإرهاق وبعض مظاهر الجنون.. كانت الغرفة شبه مظلمة، ودرجة حرارتها كما الفرن (مولعة نار)، كان يهذي بعبارات غير مفهومة، وما أن شاهدني حتى أمسك بتلابيبي قائلاً:
- معقول بس البيحصل ده؟
- قول بسم الله يا (عوض) في شنو؟
- عامل يعني عرفتني هسه؟
- (وقلبي ينفطر حزناً عليه): كيف يا (عوض) يعني ما أعرفك؟ كدي أنتَ حاول روق وأهدئ شوية.
- (وهو يشد شعر رأسه): أنا ما (عوض)... أنا ما (عوض).. أنا طيره ومباري السيرة (ثم ينظر لي في غضب) .. طيرة ومباري شنوووو؟.
- (في خوف): ومباري السيرة.
- ما أن أكملت له عبارته حتى أخذ يقوم بحركات راقصة ويعرض كأنه في سيرة حقيقية حيث أخذ (ينقز) ويهز رافعاً يده اليمنى إلى أعلى كمن يمسك بعصاة يرفعها تارة ويخفضها أخرى وهو يضرب الأرض برجله بقوة ثم فجأة يتوقف ثم ينظر إلى الأفق ويلتفت محركاً رأسه يمنة ويسرى وكأنه يخاطب أحد الحشود المليونية.. هنا قاطعته قائلاً:
- يا (عوض) يا أخي الظاهر انت متوتر شوية.. أجيب ليك كباية ليمون؟.
- أنا ما عاوز ليمون.. ما عاوز ليمون.. أنا عاوز كهرباء.
- لكن يا (عوض) كهرباء يدوك ساااي كده.. ما لازم أول نقابل دكتور نفساني.
لم يأبه (عوض) لحديثي أذ أنني اعتقدت أنه يقصد الكهرباء البيدوها للعيانين في الرأس لمن يعانون من الاضطرابات العصبية لولا أنه توقف مرة أخرى وهو ينظر إلى الأفق، و(يكشف) ويلتفت محركاً رأسه يمنة ويسرى، وكأنه يخاطب أحد الحشود المليونية ثم يصيح بأعلى صوته:
- أيها الشعب السوداني الفضل.. سوف يكون العام القادم هو آخر أعوام انقطاع الإمداد الكهربائي، وسوف تنعمون- بإذن الله- بإمداد كهربائي مستقر، وتودعون إلى غير رجعة القطوعات المبرمجة، وغير المبرمجة.. الآن الآن أيها الشعب السوداني الفضل قد اكتمل إنشاء أكبر سد في أفريقيا والقارات المجاورة.. (وهو ينظر إلى الجماهير المتوهمة) ويهتف:
- السد السد.. الرد الرد..
- السد شنووو؟.
- (متوهمأ أن تتم له الجماهير الجملة).. ثم مواصلاً.. نعم.. كووولكم ح تكتفوا من الكهرباء وكمان ح نصدر الفائض إلى الدول المجاورة.. مافيش تاني قطوعات بالمرة..
ثم أخذ (ينقز) ويهز رافعاً يده اليمني إلى أعلى كمن يمسك بعصاة يرفعها تارة ويخفضها أخرى وهو يضرب الأرض برجله بقوة ثم فجأة يتوقف ثم ينظر إلى الأفق ويلتفت محركاً رأسه يمنة ويسرى ثم فجأة ينخرط في موجة بكاء حار وقد امتلأت الفنيلة الداخلية التي كان يرتديها بالعرق، فقام بخلعها ثم (مصرها)، وهو يواصل النحيب بصورة جعلتني أخاطبه في شفقة ورثاء:
- ما معقول يا (عوض) البتسويهو في نفسك ده يا أخي .. خليني كدي أجيب ليكا موية غسل وشك ده وروق شوية ملعون يا أخي أبو الكهرباء على أبو القطوعات ذاااتا.
- (في أسى): بالله أنا مش طيرة ومباري السيرة؟ كل سنة وأنا أصدق كلام المسؤولين.. كل سنة يقولوا ليا السنة الجاية قطوعات مافي.. والسخانة طلعت عين أبو أهل الخلفونا وكل سنة نحنا في العذاب ده؟.
- معليش يا (عوض) ما تشيل هم الأمور ح تمشي وأي حاجه ح تتصلح والسنة دي ح تكون آخر سنة تكون فيها قطوعات وكمان آخر سنة الخريف يجيء فيها فجأتن بإذن واحد أحد.
ما أن سمع (عوض) عبارة (السنة دي آخر سنة) حتى أرغى وأزبد وهاج وماج وأخذ يخاطبني مهدداً رافعاً سبابته متوعداً:
- أوعك تقول كده.. أوعك تقول كده..
- ليه يا (عوض) ياااخي؟.
- قرفنا من الكلام ده.. الكهرباء دي عايزه كم عشان تتصلح.. عايزه كم؟ خلاس مرارتنا انفقعت... انفقعت... انفقعت.. ثم بدأ فاصلاً من البكاء والنحيب..
وهنا دخلت عليا زوجتي في الغرفة وصرخت:
- قطعان الكهرباء ده طلع ليكا في رأسك.. شنو مطلع فنيلتك وواقف قدام المرايا.. سجم أمي وكمان بتكلم في روحك؟ الحق شموف ليكا طريقة رسل مقالك بتاع بكرة..
كسرة:
غايتو أهو مشينا (نت كافيه) لحقنا ليكم المقال!!.

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و

تعليقات 11 | إهداء 0 | زيارات 4755

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1086499 [نص صديري]
0.00/5 (0 صوت)

08-22-2014 09:11 PM
(نت كافيه) ده بيقدم حاجات بارده وكده؟ لزوم السخانة وغليان الدم


#1086009 [ودالباشا]
5.00/5 (2 صوت)

08-21-2014 11:00 PM
انت البكسى الركبوك ليهو ناس الامن بسبب ارنيك 15 ووقروش النفايات جهجهك ونفسك قام اعمل حسابك احسن من المواجهه بمقالاتك دى وانت ما بتستحمل اشتغل تحت تحت وخليك حريف واستغل شهرتك


#1085978 [بت البلد]
5.00/5 (1 صوت)

08-21-2014 10:02 PM
ههههه أبدعت والله يا أستاذ جبرا فعلا الحاجة أم الاختراع... حسي بالله لو كانت في كهربا كنت كتبت لينا الموضوع السمح دا؟؟؟!!!! ياخي ناس الانقاذ ديل لو عدمناهم كنا نكون سكم بكم وكترة الكهربا تكتلكن


#1085932 [ali]
5.00/5 (1 صوت)

08-21-2014 08:17 PM
ابداع يااستاذ جبرة وعوض ليهو حق وليتهم يفهمون ويحسون بمشكلة عوض وشكرا


#1085877 [Awad]
5.00/5 (1 صوت)

08-21-2014 06:51 PM
أنت ياجبرة قاصد أبو ركبة البنطط ده ومتوهم الجماهير ويردد(السد..السد..الرد..الرد) أنت براك بقيت تدخل فى عش الدبابير ,احسن لك ما يودوك عند كلاب الأمن ]دوك الكهرباء الجد جد..صراحة مقال معبر عن حالة القرف العايشها الشعب.الله يحفظك.


#1085857 [التلب]
5.00/5 (5 صوت)

08-21-2014 06:16 PM
ذات مرة سأل المواطنون "بشة" : مامعقول ياريس اليوم كلو الكهرباء قاطعة وباليل النوم في تلتلة والباعوض شفط دمنا دا لو اصلاً في دم, لي كده ياريس وبعد دا كلو توهمونا ب " السد السد الرد الرد " !!

فأجاب بشــة : ياجمـــاعة كل الحاصل انو الجمــاعة الصينيين ديل غشووووونا!!
قالو لينا السد ح ينتج كهــرباء بعدين اتضح انو السد بيشتغل بالكهرباء ... .


#1085856 [digango]
5.00/5 (1 صوت)

08-21-2014 06:13 PM
من اخذ الاجر حاسبه الله بالعمل .بطل كلفته ياعم جبره!!


ردود على digango
Sudan [خلفان] 08-22-2014 12:03 AM
يعني عاجبك كده ؟ المسكين طشا شبكة و جنا و فقد المحنة و كمان بيكلم نفسو في المرايا و ما لاقي حتي كهربا توزن دماغه !!! ربنا يشفيك و يعافيك عمنا جبرة و يجازي الكان السبب .


#1085855 [magdi]
5.00/5 (8 صوت)

08-21-2014 06:11 PM
بيان رقم 1
جماهير شعبنا الوفى ، فى البرك والمستنقعات وتحت الأزيار والحمامات البلدية ، لقد ظللنا نتابع باهتمام شديد الحملات التحريضية التى شنها وزير صحة حكومة الإنقاذ والتى تهدف إلى الإبادة الجماعية و التطهير العرقي للضفادع ، تلك الجريمة الشنيعة التى تحرمها الأعراف والقوانين الدولي و قوانين حقوق الضفادع و من ضمنها الحق في الحياة علي المستنقعات و حرية التعبير – النقيق- الضفادع الشرفاء : لقد كنا نظن بادئ الأمر أن حكومة ولاية الخرطوم متمثلة فى واليها الهمام و وزير صحته قد إهتمت أخيرا لحالنا فوفرت لنا بيئة (صحية ) ومعافاة نمارس فيها حقوقنا الطبيعية فى العيش والنقيق، حيث خدعتنا بانها لم تقوم بردم البرك و رش المستنقعات و ظننا ان ذلك مراعاة لانسانيتنا عفوا نقصد ضفدعيتنا، كما ان وزير الصحة لم يضايقنا في سكننا في المستشفيات الحكومية حيث نقيم في العنابر مع المرضي و في الساحات و في البرك المجاروة للمستشفيات و بداخلها، الشئ الذي شجع كثير من عجائز ضفادهنا بالالتحاق بالمؤتمر الوطني و المشاركة الفاعلة في الانتخابات السابقة و ايضا المشاركة في كل المسيرات المناهضة للمحكمة الجنائية الدولية و نحن نردد خلف رئيسهم أن قاق قاق قاق قاق، ايها الضفادع الشرفاء في كافة مسارح العمليات في برك السوق الشعبي امدرمان و كافة المستشفيات و بكبري كوبر و نفق عفراءو كل شوارع بحري: فاجأتنا حكومة التطهير العرقي بتحريض الجياع علينا لالتهامنا متبعة سياسة فرق تسد الاستعمارية بين كافة المهمشين السودانيين من بشر و ضفادع و مستفيدة من حالة الفقر و الغلاء في اسعار الدواجن و لحوم الابقار و الاغنام و هو غلاء مخطط له ليضطروا البشر لالتهامنا و ظهر وزير صحتهم وهو ممسك باثنين من اسرانا الشرفاء الابرياء في منظر تقشعر له كل المشاعر الضفدعية-الصورة مرفقة- و متاحة للاعلام الحر..ضفادعنا الأبية :يجب أن تعلموا اننا سنقف بقوة وحسم أمام أى مؤامرة خارجية تستهدف حريتنا ، بل حياتنا ، ونحن إذ نصدر هذا البيان ، نهيب بكل ضفدع منكم أن يسارع ويلتحق بجيوشنا ويكون فى المستنقعات الأمامية حاميا وذائدا عن حمى الضفادع الأبى قاق قاق..قاق..... و نذكر اخواتنا البشر اننا نعاني التهميش مثلهم و هم يشاركوننا السكن في المستنقعات و يعانون ايضا من البعوض و الذباب و بقية الحشرات (الضارة) كما نعاني نحن........و نناشد العالم الخارجي و منظمات حقوق الضفادع بتبني قضيتنا و نناشد ايضا السفارة الصينية بمنع جاليتها من التهامنا حيث ان هذا قد يؤدي الي تدويل القضية تهدد السلم العالمي و قيام ثورة ضفادع في اقليم سيشوان و منشوريا ذي الاغلبية الضفدعية كرد فعل لجرائمهم في السودان ...... ولا نامت أعين الجبناء .....قاق قاق قاق قاق
من المستنقعات و البرك المحررة
كمرد ضفدوع قاق قاق جلبة
‎وجدي احمد‎'s photo.


#1085852 [JANGY]
5.00/5 (1 صوت)

08-21-2014 06:06 PM
ونسيت صاحبك لم الجماعة قالو لية فى مظاهرات رد عليهم وديل مالم كهربتم قاطعة وللا واقفين فى صف رقيف اها يا ابو ركبتين الكهربة قطعت ووزيرك قال لينا اكلو الكسرة يعنى مافى داعى للرغيف زاتو


#1085849 [لبني]
5.00/5 (1 صوت)

08-21-2014 06:05 PM
جينا السودان في الإجازة الصيفيه من تكساس ، وعبدوا في كرمة البلد ، طوال الأسبوع بتخش انو في شافع قاعد ينزل زر الكهرباء ، تقطع والهواء والحياة تقطع معاها!!! تجي والحياة ترد معاها


#1085841 [وحيد]
5.00/5 (1 صوت)

08-21-2014 05:54 PM
أخبار تنفيذ توجيهات السيد الرئيس بخصوص ملف خط هيثرو شنو؟ .... يعني الرئيس من الأول ما عارف انو الخط اتباع؟ و ما عارف فبركة شركة الفيحاء المسجلة بأسماء وزرا في حكومته؟
ثم ثانيا السد دا اعظم انجاز بشري منذ ان خلق الله الأرض و ما عليها ... و هو انجاز للرد على أمريكا و اوكامبو و ليس لتوليد الكهربا ...و الكلام فيهو خط احمر بجيب ليك " جماعة حمزة" الشايلين كلاشات و راكبين التاتشرات بدون نمر المحظورة الا للقوات الأمنية!


الفاتح جبرا
الفاتح جبرا

مساحة اعلانية
تقييم
10.00/10 (5 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة