المقالات
السياسة
عرديب كولا
عرديب كولا
09-03-2014 09:19 PM

واتفرج يا سلام
سماعين حسن شاعرنا الكبير كان عنده عمود صحفي بهذا الاسم وعايز اكون عايز اكون متفائل شوية ياخي بعد الشوم عليك ..وبتخيل انو السودان بقي كويس يفكرك وعقلك ياريس .. العطالة الكتار خلوا الضللة والجلاكسي ومعظمهم بقي مزارعي ولا صنايعي .. الشباب لانه اشتفل من الجنسين نقصت نسبة العنوسة لاكثر من 75% والناس الهاجرت شرقت وغربت معطمها رجع الوطن وقال جيناكم يا حبايبنا بعد غربة وشوق .. وسودانير عادت سفريات الشمس المشرقة وليها اكتر من 100 طيارة جامبو علي جامبو بتشيل اكتر من 300 راكب يعني شماعة مافي ورجع الترماي بس الكتروني بشيل في سكته اكتر من 200 اصله مكون من دورين وشغال بالططش مووف وكله بقي ذكي المطعم الذكي والمصرف الذكي والفرن الذكي الذي ينتج اكتر من 2000 عيشة في اليوم الكترونيا والطباخ الذكي الذي يستخدم بوتجازاً ذكياً س باللمس لا غاز ولا جاز ولا يحزنون .. الشوارع بقت ذاتها ذكية نضيفة وواسعة والركشات بقت ركشات طائرة زي الهيلكوبتر . وتقعد في البيت الذكي وزي ما قال عادل امام داير تفاح تاخد .. داير عونكليب مالو . داير بتلو تشوي . داير شوربة ضفادع تاخد . شارع مدني داك لغوه وسووا بدله شارع مزوج طاير والسكة حديد رجعت حديد ورجعنا نغني يا القطر تدشدش يا الشلت محبوبي . ومشروع الجزيرة عاد عملاقاً قطنا وقمحا ووعدا وتمني .. ورجعت مهرجانات الثقافة والحرية في كل مكان صحافة حرة فضائيات حرة والتعليم الكتروني والما قادر يجي المدرسة يواصل من البيت عبر شبكة لاسلكية . وحتي العمل ذاته بقي من البيت توفيرا للطاقة والبنزين والجازولين والمكيفات بانواعها . بدل الببسي كولا والكوكا كولا بقينا نشرب عرديب كولا وكركدي كولا .. حتي الكورة بقينا نصدر لاعبين محترفين لبرشلونة والريال والمريخ اتطور بدل سيكافا جاب كاس افريقيا الأول والهلال انفك نحسه الخارجي وشال السوبر الإفريقي واهلي شندي شال الممتاز بلدنا اتملت ايدي عاملة وخبيرة من معظم دول العالم بعد تدفق البترول في القماير والدهب في بني شنقول وبقينا مزار سياحي كبير والعرب خلوا صلالة العمانية وبقوا يجوا جبل مرة خضرة وزرقة وزفة الوان وشلالات تخلب الأنظار والخواجات اصبحت قبلتهم كسلا واركويت وحمد النيل.
حلينا كل الدين الخارجي وبقينا ندين ناس بوركينا فاسو وتحت تحت ناس اليونان اصحابنا الأغاريق الزمان .. وكتبنا في التاريخ اضافات جديدة عن مايو ونميري وعهد الإنقاذ اللي طال واستمرا وسوي الفعلته والتركته كله بقي تاريخ.
وفجأة صحيت من نومي بدري صحيت من نومي ولقيت عهد الإنقاذ لسه طال واستمرا وكلمني يا الهاجر وزورني مره عليك الله.

عمر الفاروق عبد الله
[email protected]

تعليقات 4 | إهداء 0 | زيارات 983

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1098409 [كوكي]
0.00/5 (0 صوت)

09-06-2014 12:57 PM
قمة الهبالة


#1097461 [الحلومر]
0.00/5 (0 صوت)

09-05-2014 12:17 AM
أُتيحت للانقاذ اموال طائلة وفرص ذهبية لتحقيق كل هذة الاحلام احلام اليقظة التي حلم بها كل الشعب السوداني وليس وحدك يا عمر الفاروق ولكن نفوس الكيزان الضعفيةوادعاءهم للعفة والتطهر ولبوسهم للدين كذباً وحبهم للمال والسلطة
كانت كلها عقبات اقعدت السودان مئة قرن وليس سنة
واتضح ان المستعمر الانجليزي كان اكثر وطنية وغيرة وحباً للسودان من الكيزان وانجازتهم ما زلت باقية وشاهدة علي امانتهم واخلاصهم للسودان


#1096903 [صديق على]
0.00/5 (0 صوت)

09-04-2014 09:33 AM
قوية و الله ياعمر قوية ...هههههههههههههه كتر خيرك خليتنا نفرح شوية.


#1096648 [حكم]
5.00/5 (1 صوت)

09-03-2014 10:24 PM
احلامك دى ابسط الحقوق
والمسألة ما دايرة درس عصر
عمل مهنى بتخطيط سليم ووطنية


عمر الفاروق عبد الله
مساحة اعلانية
تقييم
5.50/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة