المقالات
السياسة
عانسٌ أنا عانس..!!
عانسٌ أنا عانس..!!
09-04-2014 12:59 AM



أرجوك ياخى خلينى النقول بصراحة
نحن قطرنا صفَر ما شفنا غير كتاحة
عانس عمرى فات فاتت معاه سماحة
لا فرحة شفناها لا طفلة تملأ الساحـة
طيب دى يحلوها كيف...؟
الحل برضوا فى يد الحكومة ..
يعنى شنوا وين القسمة والنصيب تبع الحكومة برضوا ولا شنوا..؟
أنا قدامك يا أستاذ نموذج حى تجاوزت العمر الافتراضى للزواج وقد جاء القطار ولم يتوقف فى محطتى ولا محطات كثير من نديداتى وقد ولى مسرعاً وصرنا عوانس ولا أتحرج فى أن أصف نفسى بها كيف لا وأنا عانس رغماً عن أنفى ومهما تجملت وتزينت وأخفيت بعضاً مما فعله الزمان بى حتى أبدو أصغر سناً لمن لا يعرفونى أما من هم حولى فهم عارفين (الحلة وغتايتا) وقبلهم نفسى التى لا استطيع أن أغشها بقليل من مسحوقات وكثير كريمات ..فأنا يا أستاذ وبكل شجاعة أقولها أنا عانس عانس..
ما دخل الحكومة بعنوستك أنت ومن معك...
العرسان يجو من وين كتيير منهم هاجر يأمن مستقبلوا بعد أن ضاقت هنا وما جاء راجع ولا حيجى فيهم من عرس هناك وفيهم من قاعد عامل فيها معارض وواحدين عرسن ليهم أخواتم ورسلوا ليهم العروس غير الاستشهدوا والإتعوقوا فى الجنوب ومناطق الحروب التانية ديل طبعاً هم أندادنا وأولاد جيلنا وقسمتنا جابتنا مع هذا الجيل..وواحدين قاعدين هنا بلا طموح ومرتباتم ما مكفياهم يعرسوا من وين...وبنات المغتربين القدرنا ديل خليهم ساكت...
إذن مشكلتكم واحدة إنتوا والشباب الكبار القدركم ديل برضوا..
لا يا سيد ديل الواحد فيهم مما يلقى ليهوا شوية قريشات يعمل ليهوا رويشات يقول ما داير لى بت كبيرة ويمش يعزل ليهوا بت صغيرة وسمحة من بنات الجامعة أو الثانوى البنية ما تصدق تقبل بيهوا والمحظوظة فينا يمكن يجيها راجل مرا جايز طمعان فى العندها وطبعاً ما داير ليهوا أطفال وهو أصلاً فى أطفال بجو بعد العمر ده إلا بقدرة ربنا يكون قاسم ليك جنا...
دايرة الحكومة تسوى ليكم شنو ..أنا حأكتب الكلام ده زى ما هو..
أكتب زى ما إنت عايز شكلك عاجباك قصة الزواج الجماعى الشايفوا بعملوا فيهوا ده ما بخصنا ده بخص البنات الصغار ديل أما أعمارنا فلا دخل لنا به يا أخى اليفكوها شوية..
تحدثت هى عن نفسها وبنات جيلها بجرأة ربما غير معهودة لكنها أفصحت عن ظاهرة كاذبٌ هو من ينفيها ..تعددت أسباب انتشارها بيننا وانعدمت الحلول فى ظل أوضاع اقتصادية متردية الله وحده أعلم متى انفراجها وقد ضاقت حقا..
الله وحده هو المستعان..

بلا أقنعة...
صحيفة الجريدة...

تعليقات 9 | إهداء 1 | زيارات 2235

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1097418 [أرسطو]
0.00/5 (0 صوت)

09-04-2014 09:54 PM
( ما دخل الحكومة بعنوستك أنت ومن معك )!!!!
نعم الحكومة ( سحقها الله ) هى المسئولة أولا و آخرا عن عدم زواجى و عنوسة أخواتى _ أنا مواطن صالح أكملت مراحلى تعليمى و نلت أجازة البكالوريوس و عملت موظفا حكوميا أأدى وجباتى بكل أمانة و مهنية و أنضباط - وترقيت فى السلم الوظيفى - و الآن أنا داخل على 48 سنة من العمر - والراتب الذى أتقاضاه من هذه الحكومة ( لعنها الله لعنا كبير) فقط 150 ألف جنيه -مليون ونصف مليون بالقديم - بربك هل هذا الراتب بؤهلنى لمقابلة نكاليف الزواج و فتح بيت ؟؟- طيب كيف تقول مادخل الحكومة بحالتى هذه - أنت كوز فاسد واللا شنو ؟؟؟


#1097231 [نصيحة عامة و مهمة]
5.00/5 (1 صوت)

09-04-2014 04:04 PM
يا بنات الناس الواحدة تركز علي الحشمة و الوقار و الأدب لسبب بسيط انو أي شاب مهما كان فوضجي عند الزواج يبحث عن أكثر واحدة مؤدبة لامن الناس تنزهل من اختياره لأن تكوين الأسرة لا يتحمل أوصاف الشابة ذات الفهلوة و مغازلة الشباب و التي لها مجموعة زبائن من بقالة - ركشة - تكسي - عطور - ملابس - أستاذ جامعي – موظف و هكذا، دا حيكون مشكلة كبيرة.
صحيح المرأة مطلوبة لا طالبة فالتي يتقدم لها شاب عليها أن لا تتعجل الرفض بل تدرس ذلك بتأني مع الإنحراف أكثر للموافقة لأنه بالمقابل الرجل لا يقبل الهزيمة فعندما ترفضه هذه سيبحث عن أخري و لكن كل شاب يسمع أن فلانة رفضت فلان فلن يجرؤ علي التقدم لها لكي لا يلاقي نفس المصير خاصة لو كان بأقل من مؤهلات الأول --- عليه علي الفتاة أن لا تكثر من المبالغة في القبول (نعم هذا لا يعني أن تقبل باي رجل) لكن السعي للتوافق ما أمكن يمثل استراتيجية أفضل. وفوق كل ذلك علي الفتاة بعد الإلتزام بالحشمة و التقوي التضرع الخالص لله عز و جل أن يرزقها العفة و الطهر مع زوج صالح تقي ورع و الله خير مجيب.


#1097128 [امير]
5.00/5 (2 صوت)

09-04-2014 01:54 PM
تزوجوا فقراء يغنيكم الله من فضله .
يجب تسهيل الزواج من اولياء الامور وتبسيط المراسيم والاجراءات مايحدث في السودان عبارة عن تبزير وشوفونيات . سيدنا علي كرم الله وجهه تزوج السيدة فاطمة بدرع حديد اين نحن من سيدنا علي واين هن من السيدة فاطمة . ( خيرهن اقلهن مهرا) .
كل ما يرتبط بمراسيم الزواج لا قيمة له دينية ولا اجتماعية ومهما تعمل عرس فلان كان احسن واحلا من عرسك وهكذا .
على الاباء رفض كل هذه الممارسات خصوصا الموسرين منهم ليكونوا قدوه لمن سواهم .وربنا يستر على اولادنا ويعفهم .


#1096941 [الفاتح الاسد]
5.00/5 (1 صوت)

09-04-2014 10:07 AM
اللهم أستر شبابنا وشاباتنا وزوجهم ، ذكراناواناثا، وارزقهم العفة والعفاف واكتب لهم القناعة بالقليل ، امين انك سميع مجيب ، قولوا امين جميعا .


#1096937 [ليدو]
5.00/5 (1 صوت)

09-04-2014 10:06 AM
السبب الأساسي هو حكومة السجم والفساد دي .


#1096907 [Abdo]
5.00/5 (1 صوت)

09-04-2014 09:39 AM
عزاءك إختي و الكثيرات أن من يتزوج يموت و من لا يتزوج يموت ، فما الباقي ؟ العمل الصالح و نسأل الله حسن الختام ، فالحياه بكل أشكالها مسئولية كبيرة قليل من يتحملها بحقها و لكي أن تعيشي الجانب المشرق من الوضع الذي إنتي فيه و لا تبتئسي


#1096871 [Tarig Amman]
5.00/5 (1 صوت)

09-04-2014 08:56 AM
سبب العنوسة واضح و ما يحتاج درس عصر .... مفاهيم المراة السودانية اتغيرت و للاسف اتغيرت للاسؤا ... عايز تدرس و بعد ده عايز تشتغل عشان كل يوم تمرق و يشوفوها الخطاب و بعد ده عايز تكمل دراستها ... و بعد دا كلوا عايز تعرس تكون وسصلت من العكبر عتيا ... و يقولوا الهجرة و الكلام الكتير ده .... البنت اللى عايزة العرس تقعد فى بيت ابوها ... و اللى داير الشارع و الحوامة و الشغل و الكلام ده ..تقعد تنتظر لما يجيها ود الحرام ..اقصد ود الحلال اللى ياخد قروشها و دهبها و بمشى لمرته ام عياله .... تشتكوا من العنوسة و العيب فيكن .


ردود على Tarig Amman
Sudan [أين العفة] 09-04-2014 03:58 PM
أخي طارق اتفق معك في تغير مفاهيم البنات كما قلت --- دايرة تدرس و تشتغل و تحضر و تعمل ليها تلفون جلكسي و تعديهو حوامة بين الجامعة و زبون الركشة و المطعم و السوق و البقالة و الكفتيريا و واحد من الطلاب عاملاهو ليها صديق و مع تستخدم ليك في الكريمات بأنواعها و تلوين الحواجب و الملوثات الأخري بكل أنواعها و الملبوسات الكاشفة للجسم و تراوغ في الشباب و تتنوع في الغزل و خاصة لو كانت موظفة و مع هذا هي في غفلة فجئة تكتشف ليك انو دي ما السكة المقصودة و تبدأ في الجري البلا عوض.


#1096822 [حزينة]
5.00/5 (1 صوت)

09-04-2014 08:13 AM
المحزني كتيير من البايرات سمحات ومؤدبات. ربنا يديم علينا نعمة الزواج والما ضاق يضوق السيرة


#1096745 [إبراهيم]
5.00/5 (1 صوت)

09-04-2014 05:55 AM
أنا اتعاطف مع هذه الأخت ، وكل ما قالته صحيح ، وكأنثي ؛ حقيق عليها أن تجزع ، ونحمدالله عليها الصبر والعفة ، في زمن قل فيه الصفتين ، فرأينا وسمعنا " بالمايقوما " وما خفي أعظم . وكل ما قالته عن غزوف الشباب عن الزواج مشكلة حقيقية ، فكما يقولون " الزواج ساهل ، ولكن المشكلة ما بعد الزواج ". ما عادت النفوس قنوعة في زمن غلبت فيه الماديات ، والتطلع لحياة أفضل . الإغتراب ما عاد هو الإغتراب .فماذا ينتظرنا ، غير الموت صبراً .


زاهر بخيت الفكى
مساحة اعلانية
تقييم
10.00/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة