09-04-2014 08:00 PM

نازل قريب
من جوف وطن
بايت مستف بالشجن
وانا بيني بينك ما حريف
نازل قريب
يا تخلص الريد الزمان
يا الباقي فنو
على الرصيف
نازل قريب
ما تدفع الريد بالأسى
أنا أصلي طالب
نص عمر قضيتو
راجيك الخريف
وأمسك بطاقتي
وشوفها زين
طالب قرب لعز بلد
ما فيهو خداع
ما فيهو زيف
نازل قريب
وما تشيل لهم الجاي وراي
بفسح مكاني
عشان أقيف
ما أصلو واقفين من زمن
واقفين وندفع في التمن
واقفين ومالينا النزيف
نازل قريب
وما تقفل الأبواب تخاف
حجم الغرامة بندفعها
لو كان ضميرك
لسا صاحي وكان نضيف
افتح الأبواب وشوف ...
شكل الشوارع عاملة كيف
ما بتندخل ما بتنهبش
ما بتلقى حتة
عشان تقيف
وبي وين تشوف
وانت المظلل للقزاز
وكيفن صراخنا بيوصلك
وانت الغنا معليهو
باقيلك وليف
( المدفع الرزام طلقاتو من حرسك
شوف سقفنا العريان عارشنو بالتسويف
شفنا العدو البي فوق ...
وبقينا فراجة مافي العتم والليل ...
نص النهار والصيف )
نازل قريب
ونزولي تامي ومن زمن
وخمسيني ما راحت علي
خمسين سنة وانا كنت بتأمل تقيف
لكن بجرك يا وطن لبر وريف
نازل قريب
وانا بشكر الحركة الأصرت للبسوق ربط الحزام
وانت الوحيد السايقها
واحنا البنربط للحزام
وتسألني كيف ؟!
أنا تاني ما بربط حزام
أنا نازل الشارع وجاي
نازل قريب وأنا ما براي
نازلين معاي من كل بيت ..
من كل شارع وزنقة زنقة
وكل قيف
نازلين عشان
نسقط معاني الانهزام
نازلين عشان
ما نرسِّي اسباب السلام
نازلين عشان
يرجع وطن
لكل معاني الاحترام
ما قلت ليك ... نازل قريب
من جوف وطن
بايت مستف بالشجن
لكني أبداً ما حريف
هو في زول حريف
يرجاك نص خمسين سنة
وما يلقى غيرك زول عفيف
نازل قريب ... نازل قريب
image

كمال الدين سر الختم محمد
[email protected]

تعليقات 2 | إهداء 0 | زيارات 650

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1098402 [كوكي]
0.00/5 (0 صوت)

09-06-2014 12:53 PM
اصلك نازل بي 10 هارت


#1098384 [Amin]
0.00/5 (0 صوت)

09-06-2014 12:40 PM
جميلة جداً وممتعة ومعبرة


كمال الدين سر الختم محمد
مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة