يا بروفات رفقاً بنا
09-18-2014 03:34 PM

حسب ما جاء في الموسوعات فإن بروفيسور بالفرنسية (Professeur) هو لقب يطلق على الأستاذ الجامعي المختص في علم ما، وهو أعلى مرتبة علمية في الجامعة، وترجع أصول كلمة «بروفيسور» إلى اللغة اللاتينية، وتعني الشخص المعترف له بالتمكن من مجال علمي ما، أو معلم ذي مرتبة عليا.
لدينا العديد من (البروفات) الذين تشهد لهم ساحات العلم والمعرفة ولكن دخول البعض منهم إلى عالم السياسة قد (فتك) بهم فلم نكد نتجاوز تصريح البروف (حميدة) وزير الصحة بولاية الخرطوم عن امتلاء الضفادع بالبروتين، داعياً إلى الاستفادة منها، ذلك التصريح الذي حاول (البروف) التنصل منه (ولم يستطع)، قائلاً: إنه لم يدع المواطنين إلى أكل الضفادع (يعني البروتين ده نتمسح بيهو)؟؟
لم نتجاوز تصريح (البروف) حميدة أعلاه حتى طلع علينا (البروف) غندور مساعد رئيس الجمهورية قائلاً: "إن شباب (حزبه الوطني) من طينة تانية).. يعني بالعربي (هم كوم وشباب البلد كوم تاني)، هكذا بضربة لازب قام البروف بتصنيف الشباب إلى نوعين.. شباب (أبو طينة تانية) وهو شباب (فرز أول) وشباب (أبو من غير طينة تانية)، وهو بالطبع فرز رابع.. فتأملو يا أحباب!.
ولم نتجاوز حديث (البروف) غندور حتى طالعنا حديث (البروف) عوض حاج علي عضو الهيئة التشريعية القومية، والذي دافع فيه عن سياسات الحكومة برفع الدعم عن المحروقات، قائلاً: "لا تدافعوا عن دعم السلع، والمُسعر هو الله والصدقات للفقراء والمساكين"!.
شفتو الحلول (العلمية) دي كيف؟.
ولم يقف (البروف) عند هذا الحد بل طالب بوقف الدعم عن الوقود والقمح والكهرباء باعتباره دعماً للأغنياء، قائلاً: (الحكومة بدلاً من دعم الدقيق والخبز يجب أن ترفع عنه الدعم وتدعم الموظفين بزيادة الرواتب)، وهنا تتجلى عبقرية (البروف) بافتراضه أن كل الشعب السوداني- الفضل- يعمل برواتب شهرية، مع أن هؤلاء قلة، ولو تأمل (البروف) لوجد أن معظم الأسر السودانية باتت تخلو من (جنس موظف حكومي)!!، ثم إن أي طفل يعلم أن أي ارتفاع في الوقود يعقبه اشتعال في السوق بنسب (تقول للارتفاع ذاااتو شنووو).
ومش كده وبس فقد دعا (البروف) وهو نائب برلماني من المفترض أن يكون (قلبو على الشعب)- دعا إلى وقف دعم البنزين، قائلاً: "هناك أسر تمتلك «5» سيارات في المنزل الواحد وهذا حرام».. يعني ديل يا (بروف) يعملوا ليهم (إحصاء) ويزيدوا ليهم برااهم علشان الناس البيركبوا المواصلات العامة ما يتأثرو معاهم وللا الفهم شنو؟؟.
وتمضي مطالبات (البروف) الساعية إلى نزع كمامة الأوكسجين من (رئة) الشعب- الفضل- فها هو يطالب أيضاً برفع الدعم عن الكهرباء، قائلا: إن (60% من السودانيين محرومون من الكهرباء).. طيب الناس ذنبها أيه؟؟ مش هي (الحكومة) المفروض توفر الكهرباء للجميع.. بعدين هم المواطنين ديل المحرومين منو شوية؟؟، عشان ترفع الدعم عن الكهرباء، وتزيد ليهم (حرمان تاني).
أما التصريحات الجاية للبروف (فلو عندك حبوب عزيزي القارئ أحسن ليك تقوم تبلعا وتجيء تواصل):
أقرّ (البروف) بأن 21% من الشعب السوداني فقراء «فقر مدقع»- أي ما يعادل خُمس سكان السودان.. يعني كل خمسة أشخاص فيهم زول (معلم الله)، وعلى الحديدة، (أيه الرفاهية دي؟)، ومش كده وبس ها هو البروف يعطينا الحل العلمي لزيادة دخل الفرد حيث واصل تصريحه قائلاً: (أي زول عايز يحسن معاشو يمشي الإنتاج يلقط ذهب أو يزرع، لكن لو اعتمدنا على الرواتب الحكومية ما حتكفي)... إذن هيا بنا (نلقط)!!.
ولم يفوت (البروف) الفرصة فها هو (يكشف حالنا) والترطيب والرفاهية والنغنغة التي نعيشها حيث قال: (إن آخر تقرير لصندوق النقد الدولي أثبت أن 82% من الدخل القومي في أيدي المواطنين، بينما الحكومة تمتلك فقط 18%، وزاد "القروش عند الشعب"... يعني القرووووش عندنا نحنا (بس نحنا الما واخدين بالنا) هئ هئ هئ، ولم يفوت (البروف) الفرصة فها هو يكشف حال المسؤولين حيث قال: "إن راتب رئيس الجمهورية لا يتجاوز 1200 دولار، وأن راتب الوالي حوالي (750) دولاراً".. يعني بيزوغو زينا كده من الجزار وسيد البقالة وبتاع اللبن!!.
وحتى يكتمل (انفقاع المرارة)، وينفجر (القولون)، ويلتهب الصمام الميترالي، فقد أشار (البروف) في حديثه إلى أن السودان بلغ رقم 9 في الرفاهية بالنسبة للدول العربية، بعد ما كان رقم 42 قبل (الإنقاذ)... طيب (الناس تمشي تلقط الدهب ليه) يا بروف وكت عايشه في رفاهية؟، ثم ما هي أداة قياسك؟، غايتو العبد لله يحسب أنه (ميزان ريختر)!!.
تنبية لأبنائنا التلاميذ:
عدد الدول العربية 22 دولة وليس 42 كما قال جدو (عوض)!!.

كسرة:
البروفات ديل (الحاصل عليهم شنووووووو)؟.
كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و+و

[email protected]

تعليقات 34 | إهداء 0 | زيارات 5404

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1110338 [عبدالحميد عبدالله]
3.25/5 (3 صوت)

09-20-2014 02:33 PM
كلام مظبوط


#1110035 [صالة المغادرة]
3.25/5 (3 صوت)

09-20-2014 09:53 AM
يا جبرة فى واحد مسطول سال صاحبه قال ليهو يا فردة انت كلمة عولمة القادننا بيها دى معناها شنو وبعد ان اخذ صاحبه نفس من سيجارتو ام كرتين والله الزمن ده كلو انا انا قايلك ناقش لكن لقيت داقش وقايلك فردة لقيتك فارة والعولمة حسب قاموس الانقاذ الذى لايتطرق اليه الشك ان كلمة عولمةمعناها ان الشعب السودانى علم الله فانفجر المسطول بالضحك وقال لصاحبه جزاك الله خيرا فقد وسعت ضيقا وبورك فيك وبيض الله وجهك يا اخى الكريم ونحسب انك قد اصبت كبد الحقيقة وبما الامر امر دين فعلى الشعب السودانى الفضل ان يصبر ويحتسب والاخرين يحسبون باليورو والدولار والين والمارك والليرة والدرهم والريال كما فعل اخونا فى الله قطبى المهدى صاحب اول صرافة منزلية فى التاريخ البشر ى واخرالكلام لالدنيا قد عملنا وهى لله هى لله لاللسلطة ولاللجاه .


#1109903 [osama dai elnaiem]
1.00/5 (1 صوت)

09-20-2014 07:59 AM
الجماعة من الاساس قسمت الكيمان ( اخو مسلم) و ( اخو قبطي) ده في النسخة الاصلية المصرية المولد وفي النسخة فرع الخرطوم ما وجدونا نفرق بين السوداني المسلم والمسيحي قاموا عملوها ( اخو)و( غير) والغير ده دمه حلال ورياله حلال في عرف ( الجماعة) وبهذا الفهم ( اخ جنوبي) و( اخ شمالي) لمن الجنوب انفصل وربنا وقع بينهم عند تقديم القائمة لاختيار خلف الزبير ظهر( اخو شايقي ) و( اخو غرباوي) وطبعا ده الخلي علي الحاج يفضل الجنسية الالمانية زي ما الجنوبيين فضلوا الانفصال واستمر الفرز ايضا عبر السجل الوطني وهاك يا تعيينات قبلية في وزارات بعينها لانه القصة انفرطت من الاول وبقي ما ليها قيف واجيك علي قصة برفسرات دي القصة زي السمكة لمن تطلعها من البحر ما بتقدر تعوم في رمل الشاطيء كما اخونا نافع مجرد ما طلع من الزراعة ودخل في حراسات الامن صار بلطجي نخب اول ولا يشق له غبار وهاك يا بلطجة حتي في العلاقات الدولية بالامس القريب يحرش الافارقة لمعاداة الدول الغربية يعني رجع بينا لسياسة عبد الناصر في الستينات معاداة الغرب لانه مصر قوية وتستطيع صناعة كل شئ من ابرة للدبابة وطبعا صنع صواريخ القاهر والظافر واخدتهم اسرائيل في حرب 67-- ياخي برفسير ولا غيره مجرد ما طلع من مجال تخصصة ما يزعجنا بقصة برفسير لانه شغله بيكون ( دق حلبة) ( جربندية) زي شغل مصطفي اسماعيل في الخارجية والاستثمار وزي شغل المتعافي الطبيب المغترب الذي اصبح في السودان اكبر مستثمر ومؤهلاته انه مامون بحيري -- عليه رحمة الله--- زوده ببعض النصائح في الاستثمار--- تري يا جبرا انا واخد الحبه لكن برضة من المغصة شاعر بدوخه وانت احسن عندك ناجي -- حفظكما الله- بيناولك الحبوب البعيدة.


#1109762 [عادل]
4.38/5 (4 صوت)

09-19-2014 11:18 PM
سألت احدى المذيعات البروفسور الحبر نور الدائم إن كان لديه مؤلفات وكتب مطبوعة
فقال لها: عندي ديوان شعر مطبوع !!!
واضح أنه نال البروفسورية بالأقدمية لأنه حاصل على الدكتوراة في اواخر الستينيات!!
يعني ضابط من الصف - من بتجاويش الى صول الى ملازم!!!


ردود على عادل
Sudan [سرور] 09-20-2014 09:02 AM
الأقدميه ممكن تتديك علاوة والى حد الربط فى الدرجة وبعدها تكون واقف الى يوم الدين او الى ان تترقى. أما الأستاذية عاوزه عمل علمى متراكم الى حد معلوم، يستفتى فيها ذوى خبرة وعلم فى نفس المجال من داخل وخارج القطر ولا تعطى الإ اذا وافق عليها ثلاثتهم اجماعا. إذا كانت حصيلته هى ديوان الشعر فقط فلقد نالها بطريقة ملتوية وغير سوية.


#1109742 [komikukulo]
4.00/5 (1 صوت)

09-19-2014 10:34 PM
طبعاً بروفات الانقاذ ماخدين بروف في الوضوء وبروف في التنظير وبروف في الكذب الله يعين الشعب السوداني الصابر على الحياة الصعبة مع هؤلاء وعلى اقوالهم التي هي في قمة العشوائية


ردود على komikukulo
Sudan [سرور] 09-20-2014 09:03 AM
والترابى ماخد الدكتوراه فى غسل الميت !!!!!!


#1109634 [على]
3.38/5 (5 صوت)

09-19-2014 06:18 PM
ماهو البروف قال عدد الدول العربية 42 بدل 22 لان التقسيم جاى ويمكن يزيد عن كدة يعنى البروف رؤيته استشرافية هههههههههههههههههه


#1109566 [wd alhaj]
0.00/5 (0 صوت)

09-19-2014 04:09 PM
.Really don't know what to say just GOD bless Sudan
We need a miracle to change the situation of our beloved country


#1109524 [Kabbashi]
2.75/5 (4 صوت)

09-19-2014 02:49 PM
يا حبيبنا الفاتح إنت متعشي قعونج ولا شنو؟ ياخي الprofessoship دي عندنا في السودان بقت بالوراثه ولازم يمضى عليها البشير إنت قايل الحكايه فوضى ذي زمان ولا شنو؟ بعدين ياخي منو القاليك القعونج ما غني بالبروتين إنت حصل ضقتو ولا بتتكلم ساكت. على حسب نظرية التحلل الأنا سمعت بيها إنو بول القعونج ممكن يُستعمل لتطعيم صحن المرارة خاصة خلال فترات الأفراح والأعياد ولو مغالط جربو في عيد الضحية البكره دا. أما حديثك عن بروف غندور فجانبه الصواب. ياخي الراجل قال كلام صحيح حيث أن معظم شباب المؤتمر الوطني نالو عضويتهم بالوراثه أيضاً وعشان كدي هم صلصاليون يعني بالعربي الدارجي كدي هم أحسن من الشباب الرجرجه البموتوا من أجل القضيه. يعني يا جبرا عايز تسوي أولادي بأولاد وزير المالية السابق ياخي خليك منطقي شويه. وحديثه شايفو بقى أكثر عدم منطقيه بتوجهك الإنتقاد غير المؤسس لبروف عوض ولله في خلقه شؤون. يعني إنت بكلامك دا بتفكر إنو التطبيل للحكومة من ذوي الدرجات العلى من الذين كنوزا مالاً لُبدا في غُرفٍ مؤصده هو عيب. يعني عندك أي شك في أنه المُسعِر هو الله؟ ذي ما قال البروف عوض جزاه الله خيراً. ياخي إنت بطرقتك دي يوم بتكفِٓر ليك زول؟ بالمناسبة الزول دا بروف في شنو؟ أنا أفتكر كلامو منطقي لحد. يعني على حسب علمنا بأنو الحيكومه رفدت ناس كتيره إتباعا لسياسة التمكين وهو كما سمعنا من ركائز الجهاد. والناس الفضلت شغاله في الحيكومه هم عضوية المؤتمر الوطني ومجاهدي التدخل السريع جدا. وديل كلهم بستحقوا ندعم ليهم مرتباتهم بدل دعم الوقود والسلع الأساسيه. ولا عندك راي تاني؟ إنت كلامك دا كان تكتبو لمن نافع كان ماسك الأمن. بعدين ياخي على حسب معلوماتي انت ما بروف كيف عرفت إنو رفع الدعم عن الوقود والحطب بيزيد سعر المواد الغذائيه وبيقلب حياة الماطن لسعر. أنا محتار بالجد كدى الكلام دأب تجيبوها من وين؟ يعني أنا بكتب ليك الكلام دا وراكب بص وحالتي ذي حالة بشرى الفاضل لمن كتب عن البت التي طارت عصافير ها يعني زيادة سعر المحروقات أنا بتأثر بيها كيف؟ يا عالم إنتو ما بتعرفو سياسه ولا شنو؟ بعدين ياخ حكاية الكهربا الوقعتو لينا فيها دي شنو كمان؟ أنحنا من زمان الخلفاء الراشدين ولغاية هسي الكهربا دي ما واقعه لينا وبعدين الإكتشفوها ناس ملحدين وكفرة وفجره عشان يوقعوا حكومة السودان في مشاكل. ونحنا العقول النيره في البلاد بنفتكر إنو الكهربا ومحكمة العدل الدولي معاول و أسلحة للحصار المفروض على السودان لإمانا وثباتنا على المبادئ. ويعني البيحصل شنو لو الناس لقطت الدهب وبدون اي safety measures توفرها الحيكومه يعني دا برضو مش جهاد. وفيها شنو لو ألوا الأمر منا إستفادو منو ومرة الرئيس شخصيا ختت جزء منو في safety boxes بتاعتها في بنوك لندن. يا خوي كلامك دا يمكن يعرضك للمساءله القانونيه وممكن كمان نتهمك بالكفر وبعدين تبقى في ورطتين واحده في الدنيا والتانيه في الاخره. في النهايه أقوليك كلام ناس صندوق النقد الدولي كلام صحيح ومترجم وموثق بواسطة المركز الإعلامي لسيادة الرئيس ولو عندك شك إتصل بيهم. وعدد الدول العربية لغاية هسي ما معروف على حسب تقارير الأمم المتحدة لأنها بقت ذي الأميبا كل يوم تنبت واحدة جديده مره في الصومال ومره في السودان ومره في سوريا وآخرها في العراق فبالله عليك ما تدي الجيل القدم معلومات مغلوطة بأنه عدد الدول العربية 22وليس 42 كم قال البروف والله أعلم والسلام.


#1109417 [سليمان احمد]
3.63/5 (4 صوت)

09-19-2014 11:31 AM
البروف ابراهيم الدخيرى - مدير البحوث- قالوا استجداها من المتعافى ليزيل عنه الحرج(الركوبة عدد 15 سبتمبر 2014) الكلام ده شنو ؟؟؟ ذكر احد الغردين فى هذا المقال انو شحدها شحدة من المتعافى ؟؟ هو المتعافى ده عندو كوته منها ؟؟ انتو كصحفيين ورونا الحقيقة.


ردود على سليمان احمد
Sudan [على م النور] 09-20-2014 09:06 AM
الله يقطعك يا سليمان !!! انتو الفضايح دى بتجيبوها من وين ؟؟؟؟

[عماد ا محجوب] 09-19-2014 05:20 PM
الدخيرى شحدها ليهو ولى نايبو من المتعافى ولم يقدم فائل علمى لانه ما عندوا عمل علمى اصلا ولم ينفذ اى برنامج علمى بحثى مجاز فى كل فترة عملو فى هيئة البحوث وزول منظراتى نمرة واحد وجاهل بشهادة وسنده انه كادر موتمر وطنى وسلطة دارفور وطبعا دى موهلات كافية جدا جدا فى الذمن ده والماعاجبو البحر اليومين ديل ملان لمان مدفق يشرب منو و يدى جيرانو كمان.لكن المحير فى الامر المتعافى ده بيدى درجات زى دى كيف؟؟؟ والله الانقاذ ورتنا العجب!!


#1109314 [aboaziz]
3.50/5 (2 صوت)

09-19-2014 09:18 AM
than u, real prof jabra


#1109290 [هجو نصر]
3.38/5 (5 صوت)

09-19-2014 08:23 AM
يا (حكم) والله كلامك كلام عقل . رغم انني هلالابي علي السكين لكني لم انسَ هدف سكسك المريخابي (السبنما) في فريق ليفربول الانجليزي كما لم انسَ الحكمة والمؤسسية التي اعطانا اياها مدير الفريق اياه حين هرع اليه احد الصحفيين يساله عن رايه في هذا الهدف فاجاب : هذا ليس من اختصاصي ! يمكنك ان تسال المدرب ! هذه بضاعتنا يا فتي ولكنا تركناها واخذها الخواجات ! قال الغزالي قديما - رحمه الله - : الحاذق في مجال لا يلزم ان يكون حاذقا في غيره بل قد يصيبه فيه الحمق والبله ! كأنه نظر الينا عن ظهر غيب ! انه الفكر الاستراتيجي حقا .


ردود على هجو نصر
Spain [حكم] 09-19-2014 06:30 PM
الأخ هجو نصر
لك التحية والإحترام .. تعيش وتفتكر لهدف سكسك ، والخواجات عاادى الواحد يقول ليك ما بعرف الحاجة دى.

يخيل لى المسألة مسألة تربية ..من صغار تشربنا انه ابوك وامك بيعرفوا اى حاجة فى الدنيا (طبعا الكلام دا صحيح نسبيا لأنهم بيعرفوا كل ما يهم الطفل) ..
بعد دخلنا المدرسة فهمونا انه الأستاذ دا ابو العلم زاتو .. بمعنى انه لو قلت ليهو اعمل لينا قنبلة نووية المفروض يعملها ..وطالما هو بيدقنا ويصحح لنا المفروض يكون عارف اى حاجة فى الدنيا..
طبعا دى جاية من العقلية البدوية العشائرية ، لأنه فى المجتمع العشائرى بيكون المتعلم شوية زى انشتين .. واسأل المعلمين الكانوا فى اليمن .. المجتمع العشائرى هناك بيطلبوا منهم يكونوا الدكتور والكهربجى والنجار وامام المسجد ( مش متعلم؟؟) ..
وبرضو نظامنا التعليمى القديم ، لما الأول بيكون جاب اكبر مجموع ، يعنى فى اى حاجة هو احسن زول (على الأقل دا الإحساس البيوصلوه ليهو الأساتذة والأهل) .. بينما يمكن يكون فى الفصل عبقرى بتاع لغة انجليزية لكن ترتيبه عادى جدا لأنه ما بيحب الرياضيات مثلا او عبقرى رياضيات وبنعرف عباقرة درسوا معانا راحوا فى الرجلين ساكت..
اها الموضوع يصل للجامعة، لمن واحد يدخل الطب واللا الهندسة (وباعتبار انه كان ممكن يدخل اى كلية تانيةهو يتمناها) ، عمره ما يشوف خريجي الكليات التانية احسن منه ، حتى ولو هو اتخرج من كليته فى 8 سنوات والتانى كان اول دفعته. عشان كدا المهندسين عاوزين يبقوا بتاعين اقتصاد وبتاعين قانون وينظروا فى اشياء هم بعيدين كل البعد عنها.
اها بعد الزول يبقى دكتور واللا بروف ، هنا تتم الناقصة .. ولو هو عرف قدر نفسه ، الناس ما تخليهو يقعد فى الواطة

انا ما عارف الناس مهتمة شديد بأنه الوزير لازم يكون عنده درجة علمية مرموقة ليه ؟؟ بالرغم من انه كل القرارات المهنية بتكون من الوكيل .الوزير مهمته الأساسية ادارية بحتة.

ما انسى صورة لوزيرة الدفاع الأسبانى وهى تزور القوات الأسبانية فى افغانستان ، فقد كانت إمرأة مدنية ومتزوجة وحامل (اتفقدت حرس الشرف وكرشها كبييييرة) ..

اما رؤساء الدول ، فنهضة البرازيل قامت على اكتاف لولا دا سيلفا الكان عامل فى طلمبة وبعدها عامل فى مصنع .. اما بتاع بولندا فكان عامل فى المناجم ..

نأسف للإطالة


#1109182 [نكدالدولة سخطان]
3.75/5 (3 صوت)

09-18-2014 11:51 PM
يذكرنى حديث غندور وبقيتهم بما قاله البروف عبدالله الطيب رحمه الله فى احدى قصائده:
وأطبة تركوا العلاج وأقبلوا يشكون من مرض الضمائر أضربا


#1109181 [نكدالدولة سخطان]
3.63/5 (4 صوت)

09-18-2014 11:48 PM
حسب اللغة الفرنسية التى درست كلمة (بروفسير) انما تعنى (المدرس) وكنا نقول لاستاذة اللغة الفرنسية(بروفسير) ولكل استاذ فى المدرسة(بروفسير) هذا مجرد تذكير لك باللغة الفرنسية.
أما على المسوى الجامعى فدرجة البروفسير لها عدة شروط اكاديمية بحتة من بينها:
عدد ونوعية البحوث المكتوبة التى قدمها الفرد وتم اعتمادهامن قبل جهات أكاديمية متخصصة فى ذلك المجال مهما كانت درجة الكاتب الأكاديمية فكم من عالم فى مجالات مختلفة حاز على جائزة نوبل فى العلوم او الطب او الأقتصاد ولم يمنح درجة البروفسير رغم اكتشافاته ولا أدرى كم(بروفسير عندنا اليوم فى السودان؟؟؟؟؟
وعلى عهدنا عرفنا عددا محدودا منهم لما تميزت به بحوثهم ومساهماتهم والتى اعترفت بها مؤسسات أكاديمية كبرىز
اما اليوم فقج أضحت خلاء وكل من هب ودب اصبح بروفسير بالتعييين وعددهم اكبر من عدد الفنانين والفنانات ومسخرة..مسخرة... مسخرة يا استاذى العزيز


ردود على نكدالدولة سخطان
Sudan [على شجرابى] 09-19-2014 11:25 AM
كدى ورونا الكلام القالوه فى البروف مدير البحوث ده صاح ؟؟ قال احد المغردين ان الدخيرى مدير هيئة البحوث الزراعية استجداها من المتعافى عندما عين مديرا للبحوث و هو لم يكن بروفيسرا وذلك حتى يشيل منه الحرج بتعيينه مديرا على هيئة بها اكثر من 30 بروف وهو يادوبك مساعد أستاذ(مقال باسم:هل يعود لمشروع الجزيرة مجده الذى سقط سهوا فى الراكوبة بتاريخ 15 سبتمبر 2014)؟؟؟ البروف الفشنك ده طالب بحل مجلس ادارة مشروع الجزيرة وهو عضوا فيه!! ورونا كدى الإيجابيات شنو اللى خلتهم يختاروه مدير للبحوث ولمشروع الجزيرة و هو الذى فشل فى ادارة وزارة الزراعة بجنوب دارفور والتى تشرف على بعض المساحات الصغيرة ليعين مديرا على هيئة البحوث و على ادارة اكبر مشروع مروى فى أفريقيا الآ وهو مشروع الجزيرة المكلوم و المغلوب على امره ؟؟؟ أفيدونا ياناس و ليتنحى البروفات الى حين.


#1109172 [حكم]
4.50/5 (5 صوت)

09-18-2014 11:21 PM
مشكلتنا هى مشكلة عقلية
الواحد ممكن يصل درجة علمية رفيعة ، لكن يخيل له انه بيعرف اى حاجة فى الدنيا
ممكن ينظر فى اى حاجة ويستحى يقول انا ما بعرف الحاجة الفلانية او الحاجة دى ما تخصصى
عشان كدا ربنا ابتلانا بى ناس متخصصين فى الحاسوب وينظر فى الإقتصاد
ووزير استثمار طبيب اسنان .. والقائمة تطول
بعدين فرق كبييييير بين العمل اكاديمى والعمل الإدارى

المشكلة فى انو البقنع الديك منو ؟؟


#1109131 [بت الخرطوم]
4.50/5 (3 صوت)

09-18-2014 09:33 PM
جزاءك الله الف خير ومنحك درجة البروف فأنت الوحيد البتستحقها لظرافتك والله أمنت أن شر البرية ما يضحك اللهم لا نسألك شر القضاء ولكن نسألك اللطف بنا يا قادر اللهم أرنا فيهم يوم مثل يوم عاد وثمود


#1109127 [عصمتووف]
4.13/5 (5 صوت)

09-18-2014 09:20 PM
بروفيسور بالفرنسية (Professeur) هو لقب يطلق على الأستاذ الجامعي المختص في علم ما، وهو أعلى مرتبة علمية في الجامعة
ليس في اعتقادي بل حقيقة في لقب البروف الاعلي مرتبة في الغباء والجهل والعبط والهبالة اعترف بهم بروفسيرات فيها لكن علميا بعد النجم من الارض ف اسمع واقرا واضحك انهم يجلبون السخرية لانفسهم والاحتقار مهما طالت لحيتهم البيضاء وكبر عمرهم العتية انهم لا يستحون والله نحن نستحي عند مشاهدات وجوهم البغيضة


ردود على عصمتووف
Sudan [الراجل] 09-20-2014 01:42 PM
انا مره قريت انو فى واحد اسمو منو كده جمال الدين عندو (بروفسيره)على وزن دكتورة فى الدراما وهو الوحيد على مستوى السودان والحمدلله طلع واحد بس بعد شوية حتقولو لينا فلان نال درجة الدكتورة فى النكات

United States [kabbashi] 09-19-2014 01:27 PM
You are a wise man


#1109123 [نبض التعب]
3.00/5 (5 صوت)

09-18-2014 09:09 PM
خارج النص وداخل البص:ــ

عسكرى اسمو ثابت قدر
ما الضابط يقول في الطابور
ثابت . هو يقول نعم
سعادتك .الضابط قال ليهو
انت غبي أنا قصدى اثبِّتْ
الطابور . يوم قالو وزير الدفاع
جاى زيارة . الضابط قال ادي
ثابت دا إجازة عشان ما
يحرجني مع الوزير . لما الوزير جاء
الضابط قال للطابور ثابت.
الطابور كلو قال: في
أجااااازة يا سعادتك.

ثابت ده أفتكر كان عمر البشير لامن كان طالب في الكلية الحربية .. عشان كده يا جبرة الزول ده كتّر من (البروفّات) والدكاترة يكسّرول ليهو التلج .. ويا بروف غندور: ثااااااابت!.


#1109113 [شهنور]
4.25/5 (5 صوت)

09-18-2014 08:54 PM
يااستاذ دا واحد مخبول يمكن قسمو البلد ل 20 حته ونحن ما جايبين خبر .


#1109093 [karlos the proff]
3.00/5 (3 صوت)

09-18-2014 08:08 PM
كما قال البروف جمال الوالى العارف عزو مستريح يتكلموا ساىىىىىىىىىى فى زول حيغالطكم يت كلموا25 سنه من الترايى الى الهندى عزالطين و نحن ساكتين و لو سكتنا بكرة البنشرجى حيبقى جراح و نافع بقى سياسى و الهندى بقى صحفى و حسب معلوماتى فى مساعد لورى بقى وزير ممكن اجيب ليكم رقم اللورى و اسم السواق لكن اسم الوزير على ناس الراكوبه مرارتنا يا ناس انا عمرى 50 سنه و احمد الله الى الا لم اصب بالسكر بعد و احمد الله على هذه النعمة لكن اليومين ديل حلقى ناشف


#1109089 [الصوت]
4.19/5 (7 صوت)

09-18-2014 07:56 PM
ديل يا حبيبي مش بروفات ديل (( رُفات )) متخرجة في مقابر الانقاذ العلمية وما جاورها ...


#1109062 [هجو نصر]
3.50/5 (3 صوت)

09-18-2014 07:12 PM
بالله القال للناخبين زمان انه حيشيد كبري للسعودية داك ما احسن من ديل ؟ علي الاقل دمه خفيف ! ديل دايرين يقنعوا بطون خاوية انها شبعانة ! وباحصائيات كمان ! جنس بياخة !


#1109054 [Abumohamed]
4.32/5 (5 صوت)

09-18-2014 07:02 PM
نبكي ولا نضحك مش عارفين ...

بروفات عايزة تأكل و تعيش مبحبحة عشان كده لازم ينافقوا حتى أخر حرف.

فرعون العريان برضوا كان حواليه بروفسيرات في الزمن داك.


#1109053 [نائل]
5.00/5 (3 صوت)

09-18-2014 07:02 PM
هناك أسر تمتلك خمس سيارات في البيت الواحد !!!!!!! ... وهذه أسر الجيش الجرار من الدستوريين بالعاصمة والولايات ولهم حصتهم المجانية من البنزين وما عليهم لو إرتفع سعر البنزين أو الوقود


#1109028 [الحلومر]
3.94/5 (5 صوت)

09-18-2014 06:12 PM
البروفات رطبو وبس ماشايفهم لامعين و ملس ... القوعنج لما يفقد الترطيبة يغوث تحت الارض بحثاً عنها وعندما يجدها يدفن نفسه ويستكين ...فالبروفات ديل وجدوا كراسي سلطة باأأأأردة اتوهطو ودفنو رؤوسهم


#1109009 [ملتوف يزيل الكيزان]
3.63/5 (4 صوت)

09-18-2014 05:40 PM
يا عم انت لسه ما فاهم. البرفات ديل بيقولوا الكلام ده عشان يعرفوا مدى تحمل الشعب للزل و الهوان و الجوع و المرض و التجهيل. عشان يزيدوا (وان شكرتم لنزيدنكم). و بعدين الخطاب له معنى اخر خفي . فهم يقولون لك نحن ناس كذابين و كنا نكذب عليكم لدة 25 سنة وسنستمر في الكذب و الماعاجبو يأكل قعونج.


#1109008 [احمد صلاح]
3.75/5 (3 صوت)

09-18-2014 05:38 PM
هييييييييييييييييييييييييييييييي ... بطنى وجعتنى, إستغفر الله العظيم


#1109002 [الطيب عثمان]
4.00/5 (3 صوت)

09-18-2014 05:30 PM
انت البروف يا ودجبره


#1108999 [بت البلد]
4.13/5 (5 صوت)

09-18-2014 05:26 PM
هههه والذكريات صدى السنين الحاكي ... ياااا حليل زمن اللقيط يا جبرا ذكرتنا أيام زمان زمن في شئ بنلقطو,(زمن المرحوم مشروع الجزيرة وقطنا طويل التيلة)زمن الاعلام يدفع الناس ويشحذ الهمم بقوله:
ايد على ايد تجدع بعيد
يا اخوي خليك نشيط
يلاك معاي نمشي اللقيط ...
والمصيبة يا جبرا ديل بروفسيرات زمان لكن اتبلدوا ... قالوا البباري الجداد بودي الكوشة أستغفر الله وأتوب اليه


#1108986 [محششش طوالى]
5.00/5 (2 صوت)

09-18-2014 04:57 PM
غايتو بروفات أخر زمن ، أشارطكم لو ما كان البروف دا أخد الدرجة فى زمن الانقاذ ومن أمدرمان الإسلامية


#1108972 [ابو محمد]
4.32/5 (5 صوت)

09-18-2014 04:38 PM
هئ هئ هئ


#1108949 [عزوز بن علي]
4.75/5 (3 صوت)

09-18-2014 04:07 PM
لأن معظم برفتنا أصبحوا يأكلون من فتات الملك


#1108947 [سيف الدين الجميلى]
3.49/5 (11 صوت)

09-18-2014 03:58 PM
((السودان بلغ رقم 9 في الرفاهية بالنسبة للدول العربية))ولمن نطلع دول الخليج الستة ونطلع سوريا واليمن وليبيا والعراق يفضل شنو.. دائمآ نفرح لمن يكون واحد وراء مننا زى حكاية البليد وطوالى ماسك الطيش الامرة واحده جاء تانى الطيش خالو اتكيف منو وقال ليه ماشاء الله جدعتا ليك واحد وراك لاكين مالك وسخان كدى قاليه ياخالى كنا ساكين الطيش


#1108944 [وحيات الشعب السودانى]
2.82/5 (7 صوت)

09-18-2014 03:51 PM
يا أخى عمر البشير زاتو ,فى زمن ما, كان عامل فيها بروف!!


#1108941 [صلاح محجوب]
4.25/5 (5 صوت)

09-18-2014 03:43 PM
دمعي الغلب اللقاط


الفاتح جبرا
 الفاتح جبرا

مساحة اعلانية
تقييم
5.48/10 (9 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة