09-24-2014 02:27 PM


كل السخائم الحادثه الان بين غندور ورزق يضحك الناس عليها لانها من باب وجعل الله كيدهم في نحرهم ومسالة تمويل المؤتمر الوطني من الدولة لا تحتاج لدرس عصر او دروس خصوصية وراعي الضأن في الخلا يعرفها ويحفظها عن ظهر قلب ولا تحتاج لهذه المغالطات وهي مغالطات مكشوف امرها لالهاء الناس عما حاق بهم مما فعلته الانقاذ وعندما يقول غندور ان للمؤتمر الوطني كشوفات عضوية فهذه حكاية يبلها ويشرب مويتها لان هذه كشوفات الكيزان القديمه ستعاد طبعاتها بعد حذف اسماء الذين ذهبوا للمؤتمر الشعبي وكل شئ جائز بعد ذلك من فبركة الايصالات الوهمية انتهاء بالميزانية المخجوجة يا عثمان ميرغني ولكن ما يكذب غندور هو الواقع والوقائع الماثله وهذه واحدة من شواهد الاثبات ولكن علينا ان نسال قبل تلك الشواهد لماذا استجلبت ماكينة طباعة النقد ولماذا تم تحطيم كل لوائح الايرادات والصرف ولماذا يتم تجنيب الايرادات بعيدا عن مواعينها الحقيقية والمبالغ المجنبة اين توضع ومن منهم المخولين بالصرف منها واين صرفت واين مستندات الصرف اما اشواهد الاثبات علي في عينك ماتشوف الا النور من اين تم بناء مقرات الحزب الحاكم ومن اين تم تمويل مؤتمراته الكثيرة ومن اين يصرف علي المتفرغين للعمل بالحزب بل اقولك شئ انت لا تعرفه ربما عليك شهريا ان تراجع وفود نساء المؤتمر المسافرات للامارات وخاصة دبي وعليك ان تراجع كيف كانت احوالهن والان اين صارت بل مرة احداهن قادمة من دبي تتكلم بفصاحة وعنجهية بعد ان تبدل حالها من بيت جالوص الي عمارة قواعدها تؤكد شاهق البنيان وما تم انجازه حتي الان يحير الالباب وكل شئ مستورد بالحاويات من دبي واسمعها تتكلم وتقول ( المؤتمر الوطني ما يعطي من يد ليد لكن بوريك من وين تشيل ) اي والله هكذا تتكلم مع انها فيما اعلم ربما تكون من ادني الترتيب ولا يؤبه لها واذا اردت ان تتاكد من ذلك اكثر اذهب لاي عضو في اي حي من احياء الخرطوم واسال بطرف خفي عن الاعضاء وكيف يبدلت احوالهم وبرضو تقول اشتراكات يا اخي الاختشو ماتوا يا اخي اذا كان الاستاذ يسن حاج ماجد اقترح علي اعضاء سئ الذكر الاتحاد الاشتراكي ان يكون باشتراكات شهريه فقامت عليه الدنيا ولم تقعد حتي اخمدوا الفكرة وكيف ان الرئيس نميري كتب الي المراجع العام بان يسحب فرق المراجعه التي جاءت ليوم واحد هو اول يوم واخر يوم واهديك هذه النكته للجنوبي مايكل عن معسكر سوبا الشهير ايام مايو حين جاءنا مايكل من الصحافه علي الغداء عطفا علي الجوار القديم طالبا المساعده في توفير بعض السلع المعدومة ايامها فسالناه كيف معسكر سوبا فضحك ضحكة جنوبية ظريفه :
مايكل : والله مصيبة كبير !!!
الجماعة : كيف !!!
مايكل : والله خساره كبير علي بلد دي قروش راح في الهوا !!!
الجماعه : اها ان شاء الله في النهاية طلعت بي شئ !!!
مايكل : ضحك لما دموعو جرت لما انتهي المعسكر وبدينا الترحيل انا الوحيد بين كل السواقين مشيت المقر بعدين سالت واحد شمالي انتو بتمشو وين. !!!
الشمالي : انت وين بتمشي يا مايكل !!!
مايكل : مقر الحزب
الشمالي : والله يا مايكل انت مجنون وسجمك ورمادك حصل العقاب كان تلقي شي !!!
الجماعة : اها يا مايكل لقيت شنو
مايكل : يضحك وهو يقول والله بس تربيزة متوسطه و4طقطوقات صغير معاها وكم مرتبة وعرفت بعدين الناس شالت كل شئ حتي الخرفان حي ونجيض ما في حاجة رجعت للمقر غير دور واحد مني !!!
اها يا غندور عايز تقنع منو في السودان بحكاية اموال المؤتمر الوطني وكل الناس عارفه انو السويتو انتو الشيطان يستحي منو بل بالعكس وعلي راي النكته انو الشيطان نفسو هاجر من السودان ولما سالوه ليه قال ( الجماعة علمتهم كل شئ فاتوني بي غادي ومش كدا وبس بل قرضو علي كانهم ما بعرفوني بعد ما كل واحد قعد في كرسي وثير ومكتب كبير وعلق لافته علي الجدار وراهو مكتوب عليها (هذا من فضل ربي) علي حسب ما تقول النكته !!! واذا كان حال اللجان الشعبية اتغير والسف في المحليات علي قفا من يشيل او كما قالو اي واحد في السودان بمرتبه لا يمكن ان يعيش ويبني قصور الا اذا كان تابع للمؤتمر الوطني وما حنسالكم من السارات وتبرعات اتحاد الطلاب السودانيين لغزه وما حنسالك عن اموال البترول وبيع سودانير ومشرووع الجزيرة لان ماليزيا شاهده علي ذلك وحسب تقرير الشفافية التنموية لديهم وكمان يشهد فندق فلمنقو الذي سيقام عليه احتفال خريجي الجامعات هناك وتعرف اين تقع فلمنقو لما ترجع حلايب حتي السهره هناك ويا عثمان ميرغني الحساب في السودان ساهل جدا ولا يحتاج لورق او مستندات او مراجع يكفي واقع كل مسئول كيف كان عام 1989 وكيف حالو الان واي ابراء ذمه بعد ذلك التاريخ غير معترف به هؤلاء فسادهم اكثر من حكايات الف ليله وليله ولا يحتاج لكل هذا الارهاق ..سهل جدا كل واحد يقبض البعرفو ما ضاع من الاتحاد الاشتراكي الي المؤتمر الوطني يبني بلاد من العدم ونحن الان نبحث العدم ما لاقنو !!!

- - - - - - - - - - - - - - - - -
تم إضافة المرفق التالي :
my photo2.jpg

تعليقات 1 | إهداء 0 | زيارات 627

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1114054 [الليل]
0.00/5 (0 صوت)

09-24-2014 06:57 PM
من اين بنيت مقرات الحزب ولا من اين بيعت قطع الاراضي القايمه عليها المقرات. وفي امامن مختاره بعناية (دار الحزب بالقرب من نادي الضباط بالخرطوم مثلا) وفي الولايات حدث ولا حرج. بقينا نشك في عقولهم وسزاجتهم .


سيف الدين خواجة
سيف الدين خواجة

مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة