10-17-2014 09:57 AM

قصائد تبحث عن مُغَنِي

قصائد تبحث عن مُغنِي

............................
(1)
حقيـــــقة عــــــتاب
...........................
زِيد وبالغ في غِيابك
واقطع الحبل اللّواصل بينا بينك
ما خلاص ملّينا وعدك
روينا من موية سرابك
...........................
لا بهمّك لو شفقنا عليك وضقنا
أو بنار هجرك حِرِقنا
يا ما بالدّمعات شِرقنا
والزّمن بعدك سرقنا
كلّ لحظات السّعادة اللّيها تُقنا
وياما في الأحزان غِرقنا
ياريتو بس لو لحظة فُقنا
من سجن ريدك مرقنا
........................
لمتين مراكب شوقنا ترسَىَ
لمتين قلوبنا الهوّدت تلقالا مرسىَ
ورينا كيف النّاس بتقسىَ
عشان نكون زيك وننسىَ
ننسى سيرتك وننسىَ ريدك
ننسى أحلامنا ووعودك
ننسى أشواقنا وعذابنا
حتى لوكان في وجودك
..........................
كلّ أوّل ليهو أخر
إلا أخرك دابو أوّل
كلّ غايب يوم بيرجع
مهما زاد في غيابو طوّل
لا قليبك حنّ لي ساعة الرّجوع
ولا عيونا إتعلمت تنسى الدّموع
............................
كلما يسألنا ســـائل
عن سنيـنك وعن غيابا
ولوعة الحزن المـخيّم
في قلوبنا وسر عذابا
في عيونا يشوف سؤالو
وتبقى دمعتنا الإجابة

(2)
حـــُــلم البَعـــيد
(أموت وفي عيني دمعة من وطن)
.........................
مــدي إيـــــدك يا بِنيّة
تاتـيني مــن أخر الزّمـن
غطيني من شمس المغــــيب
شيلي من جواي مخـــاوفك
ضاريني من زمني العــجيب
.............................
جفّ ريق حرف الضّجيج جواي زمن
لا لقيتك في مناي لا لقيتك في غــناي
إنشحـــط قدامي دربــك تيــــه وصي
سارح بَدودِر في الخــيال
يادهشـــة الفرح الموكر
في شــــــرايين المحال
..................................
مـدي إيدك للبـــنادي عليـك سنين
بحّ صوت وتر الحنـــين أصـبح أنين
من البُعــاد ....
لبستَ وشك توب حـِـــداد
من السّهاد ....
حُزنِك صبح في الدّم مداد
كتبت بيـك حال البَــعيد
رسمت طايـر في الجــدار
مَحَنان مَجنـــدل بالحديد
لا صبــاح وشوش جناحو
ولا دعاش قِبلِيك غشاهو
.............................
مـــدي إيـــدك يا بِنـّـية
ساكنة فــي حلــق القوافي
وراقدة فـــوق صـدر الكلام
ولّفتي قلبي عــليك يريدك
ويحمِلك إعلان ســــــــلام
........................
مــدي إيدك لي وريـــدك
قولي للطير في سمـــاكي
قولي لي مجنـــون هواكي
للحــلوق الجــــفّ ريقا
للعــيون المــات بريقا
للبـيوت النـّـام طـريقا
بكــرة كل الأمنـــــيات
تصـــــــبح حقيـــــقة
مــدي إيــدك يابنـّــية

(3)
تاكي باب قلبي وراك أمرقي
...........................
بسألِك عن زول
مودّر دربو في تيه الأسف ،،
وبسألِك عن القمر
الشّال عيونو وضي سماي
فات إنكسف ،،
كيفن عرفتي الكأس
بيفرح وينتشي
لو إترشف ؟؟
كيف الوتر بشَرَق فرح
لو إتعزف ؟؟
ما قلتي لي ..
كيفن هتف
قلبي المغيّب يوم لقاك
سرو انكشف ؟؟
كم دمعو سال ..
بنى في خيالو
لقاك جبال ،،
ونسج خيوط
من الرّمال و الإحتمال ،،
ياحليلو ضاق بيهو السّؤال
يوم إحترق بنار هواك
إنِّك محال ...
عينيك ترف قلبك يشف
لو مرّة بس خاطرك هداك
إنّو الجّريح ما بستريح
كان قلّ نومك وطال أساك
وكان عرفتي عوج قساك ،،
خلاص كفاك
حان منتهاك ،،
ساحة تمرحي فيها تاني
ما أظن زي قلبي تلقي
قايلا زي صندل زمان
تشيلي في حطبو وتحرقي
زي ما اصطفاك
خلاص نساك
تاكي بابو وراك أمرقي ،،
كان بابو فاتح لي مجيك
إيقاعو كان
دوزن خطاك نغم مشيك
كان ليك سياحة واستراحة
تاكي بابو علي عذابو
يبقى للعشاق مراحة
ودار مناحة .

عوض شيخ إدريس حسن
ولاية أريزونا . أمريكا
[email protected]

تعليقات 3 | إهداء 0 | زيارات 786

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1129469 [عزالدين الشريف]
0.00/5 (0 صوت)

10-19-2014 01:06 PM
قصائد جميلة بلا شك ... شفنا وش تاني لمبدعنا ...


#1128708 [السودانى]
0.00/5 (0 صوت)

10-18-2014 01:19 PM
قصائد جميلة تهز الوجدان


مدنا بالمزيد


ردود على السودانى
United States [عوض شيخ إدريس حسن] 10-19-2014 10:06 AM
الأخ السوداني
شكراً كثيراً..لك كل الإحترام والتقدير علي كلماتك الطيبة
أتمني أن أكون عند حسن ظنّكم دائماً وأبداً
تحياتي


#1128341 [المكشكش]
0.00/5 (0 صوت)

10-17-2014 11:05 PM
يا أستاذ عوض أين الصور الشعرية والخيال الماتع الذي عودتنا عليه في أشعارك ؟؟؟؟ ما الذي جرى لك اليوم ؟


ردود على المكشكش
United States [عوض شيخ إدريس حسن] 10-18-2014 01:56 AM
الأخ المكشكش .. لكم كل التحايا والتقدير .. أشكركم علي المتابعة والإهتمام
هذه القصائد قديمة خشيت أن تموت في يدي قبل أن أموت أنا.. أيضاً قي إعتقادي
أنها قد تصلح للغناءأوربما يستطيبها البعض ..أشكر الإخوة في إدارة الراكوبة علي نشرها .... أكرر تحياتي وتقديري لكم


عوض شيخ إدريس حسن
عوض شيخ إدريس حسن

مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة