المقالات
السياسة
عمرو أديب..قليل الادب
عمرو أديب..قليل الادب
10-20-2014 01:23 PM

نحنا ياجماعه لازم نرتفع لي مستوي الدول الراقية في التعامل مع الاحداث خصوصا في اعلامنا بشقيه الورقي والالكتروني. لاننا صراحة ورغم العمله فينا حكم الكيزان الظالم, بس برضو في ناس كتار مننا عاشوا بره السودان وحتي الناس الموجودين جوه
, سافروا كتير واختلطوا بي المجتمعات التانية.

مافي كاتب هسع في الساحه زي العبد لله (الا بسيطين) بظهر عداءه للنظام ده بمنتهي الوضوح والصراحه لانو خلاص مافي شئ بخوفنا تاني وبقينا ناس اخره ساي. الاولاد اتعملوا وحج حجينا والحمد لله عرفنا معالم الطريق المؤدي الي الله. بس في شئ مهم لازم اقولو هنا وهو محاولاتي الدائمة إنه كتاباتي تكون موضوعية واستند علي الادله الموجودة عشان كمان النقد يكون بناء. اي في بعض المرات بستعمل كلمات حاده. السبب الجماعة ديل وزي ماقال واحد دكتور صاحبي لو في طريقه الزول يعمل ليو جيش عديل كده سيبك من مقالات لا تثمن ولا تغني من جوع في الزمن دا.

الموضوع الشغلني اليومين الفاتو ديل زيارة البشير للقاهرة ومايمكن ان يسفر عنها من نتائج. بس للاسف في صورة ظهرت فجاة في الاعلام وغيرت اهتمام الناس 180 درجه. الصورة نشرها الاعلام المصري الرسمي وفي كتاب كتار علقوا عليها لانها للرئيسين وهم جالسين تحت خريطة مصر ومنطقة حلايب ظاهرة داخل الاراضي المصرية. والصورة برضو ابرزت العلم المصري خلف الرئيس السيسي وعدم وجود العلم السوداني خلف البشير.

معقول ياجماعة صورة تافهة زي دي تشغل الراي العام السوداني الالكتروني والناس يبقي ماعندها موضوع غيرا؟ بالنسبه لي انا وبعد شوية بحث في جراب عمك قوقل ورغم كراهيتي لي مصر ورئيسا ورئيسنا والاسمهم الكيزان ديل لا اني لقيت اصلو مافي سبب لي تشتيت الكورة وخلق معركة من غير معترك.

اي عارف انو اكتر شئ استفزه معظم السودانيين واولهم انا الحلقة التلفزيونية العملها الصحفي الغير مؤدب عمرو اديب وقام فيها بتحليل الصورة بطريقة سطحية وقال في نهاية الحلقة انو دا استهتار بالبشير ولو كان في محله كان قام وساب الاجتماع. انا رديت عليه مباشرة في موقع قناتة الالكتروني. وردي علي الزول قليل الادب دا كان مرتكز علي حقيقة واحدة انو سيادته خلق موضوع من مافي عشان يهاجم السودان والبشير. لانو لو عاينا للقاعة والطريقة المنظمه بيها والضيوف الاستقبلتهم قبل كده بنشوف فيها كرسين واحد علي اليمين بيجلس عليه الرئيس المصري ووراه العلم المصري والكرسي التاني علي الشمال وبجلس عليه الضيف (البشير) بدون مايكون وراه علم بلاده. خلف الرئيسين في صورة للخريطة المصريه (بغض النظر عن وجود حلايب فيها) والقاعه بي تنظيمها دا استقبلت رؤساء كتار منهم احمدي نجاة والرئيس الفلسطيني والاسرائيلي واسياسي افورقي وحتي الملك السعودي. يبقي حكاية الاستفزاز دي كلام (بنات شوارع) ساي من الرجل دا.

يبقي ياشباب (الست اب) بتاع القاعة ما اتعمل مخصوص للبشير ولا فيه اي حاجه مقصودة. فحقوا نحنا مانمسك في الحته دي ونصب كل هجومنا علي البشير ومصر لانه بكون مسكونا ضنب الككو ساي. بالعكس في حاجات كتيره ممكن كان الناس تعاين ليها في الزيارة دي خصوصا انها جات بعد زيارة البشير المخجله للسعوديه. فكان الناس تتكلم عن ماهي مطلوبات النظام المصري من البشير وماذا اراد هو من النظام المصري.

ركزو معانا علي الانتخابات والمؤتمر العام للمؤتمر الوطني لانو الحاجتين ديل بالذات دايرين نشوف هل المعارضه اتعلمت الدرس ولا بعد شويه حايطلعو لينا غواصات ويدخلونا في نفس الجحر بتاع 2010. نحنا صراحه دايرين نغير الادوات البنحارب بيها النظام دا والشعار الماحنتخله عنه اطلاقا هو (لا حوار مع القتله). بس صراحه في حاجه واحده شاغلاني في وجود البشير في القاهرة اكتر من موضوع حلايب وصورة اولاد بمبه (الكخه دي).

السيد الامام. كلنا عارفين السيد الامام في القاهرة. والبشير مشي القاهرة. الخوف يعملوا اجتماع سري والامام بي طبعوا حنين يقوم الكيزان ديل يلعبوا بي راسو يجيبه لينا الخرطوم ويسمح بقيام الانتخابات. الكلام دا لو حصل حيرجعنا للمربع الاول وحنفتش لي باريس تاني ماحنلقاها. انشاء الله ربنا يجيب العواقب سليمه. اركز يا امام وسيبك مع ناس ياسر عرمان اخير ليك من الحراميه ديل.

كسره:

قلتو لي عربات ما بتأجروها لكن لو في ضيوف سياديين ممكن تدوها ليهم؟ قصدكم ضيوف سياديين جايين لي اي زول ولا بس للمؤتمر الوطني؟ طيب انا عندي ضيف سيادي جاي يزور السودان ممكن بلاي تدونا عربيه بي مواتيرا؟ الضيف منو؟ ورونا في الاول سيادي يعني شنو وانا بوريكم الضيف منو.

Follow me in twitter @ elrazi_elrazi

Visit my blog at:elrazionline.blogspot.co.uk
elrazi@hotmail.com





تعليقات 8 | إهداء 0 | زيارات 4260

خدمات المحتوى


التعليقات
#1131445 [ابو محمد]
1.00/5 (3 صوت)

10-21-2014 03:33 PM
يا اخوانا الدكتور كلامو صاح
انا شفت الان في قوقل صور للسيسي معاهو اسياس افورقي وابومازن ورئيس الوزراء الايطالي وولي عهد ابوظبي
في نفس القاعة مافي علم للضيف والخريطة ياها ذاتا
فعلا سقطة اعلامية كبيرة لعمرو اديب
---- اكتب في قوقل السيسي يستقبل واعرض الصور ----


ردود على ابو محمد
United Arab Emirates [حسن جحا من كوستى] 10-22-2014 08:51 AM
فعلا كلامك صحيح يا ابو محمد


#1131341 [sky painter]
1.00/5 (3 صوت)

10-21-2014 01:20 PM
اخي الطيب ,كتابتك بالعامية افقدت موضوعك نكهته..لو التزمت الفصحى قليلا لكان افضل


#1131113 [الكوز الفى الزير التحت الراكوبه]
1.00/5 (3 صوت)

10-21-2014 10:03 AM
كلامك سمح بالحيل يا دكتور واكتر حاجه عجبتنى حكايه ضنب الككو و الزنقه بتاعت اجار العربات والضيوف السياديين لكن بس ماعجبتنى حكايه الجيش دى يادكتور أعقل شويه .


#1130911 [hassan]
1.50/5 (4 صوت)

10-21-2014 06:35 AM
انت منافق وكذاب وفي الراكوبة لو بتقرا

ظهرت صور للقاءت زؤساء تانين باعلامهم

وبدزن صورة حلايب وشلاتين

انت يا سيدي داير تعمل من الفسيخ شربات

قال الاولاد اتخرجو وحجينا

طيب الحرامية الكتار ديل كلهم اولادهم اتخرجو

وكل سنة قاعدين يحجو

شوف ليك ناس سزج من المؤتمر الوطني اقنعهم بكلامك دة

وشوف لعبة غيرها اقبض بيها التمن ما في الموضوع العريان دة

وما تشغلنا بعملرو اديب خلينا في الموضوع زاتو


ردود على hassan
United Kingdom [سوداني غيور] 10-21-2014 09:03 AM
المواقع الالكترونيه كلها جابت صور روساء تانين في نفس المكان بدون علم وبي نفس الخريطه..انتو السودانين بتخلقوا موضوع وتضيعو زمنكم فيه عشان كده الحكومه دي قاعده في راسكم الزمن دا كلو ياجداد الكتروني ياغبي


#1130630 [عصام علي دبلوك]
1.00/5 (1 صوت)

10-20-2014 05:41 PM
لم تحسن لا المية ولا المرمي يادكتور الانتخابات لاتعنينا في كثير لعدم وجود آلية واضحة لمناهضتها والاهم انها لن تكسب النظام شرعية في حال غياب المعرضة يشقيها واهم من الأهم قلة ادب عمر التي مست وجرحت كل سوداني


#1130574 [ضيف جديد]
3.00/5 (5 صوت)

10-20-2014 04:00 PM
يا دكتور.. تحياتي،
السودانية الدارجة قد تكون مقبولة كوسيلة للتخاطب ولكنها قطعا لا تصلح للكتابةلأن كل شخص يمكنه كتابتها بطريقة مغايرة لما يكتبه الآخرون!
لعل عدم الإلمام الكافي بقواعد اللغة العربية قد جعل العديد من كتابنا يلجأ للكتابة بالدارجة ظنا منهم أنها تخفي جهلهم بلغتهم ـ خاصة إذا كانوا ممن يحملون الالقاب العلمية الرفيعة!
وحتى لا يتهمني أحد بالتجني عليك ، أورد لك مثالا واحدا فقط من ما ورد في مقالك:
"مقالات لا تثمن ولا تغني من جوع"!!!!!

ألم تقرأ قوله تعالى في سورة الغاشية:
لَيْسَ لَهُمْ طَعَامٌ إِلَّا مِنْ ضَرِيعٍ (6) لَا يُسْمِنُ وَلَا يُغْنِي مِنْ جُوعٍ (7)

وتحياتي لمعلق الراكوبة الذي سيرد علي بقوله "نحن في شنو والحسانية في شنو"


ردود على ضيف جديد
Saudi Arabia [عيادي] 10-21-2014 08:41 AM
عكس تماما الكتابة بالدارجي انتهجها
كبار الكتاب في خارج السودان وليس شئ جديد
اتي به د ابو قناية
وهى اقرب لتوصيل الفكرة من اللعة الفصحى
بعدين د الطيب لا تعجزة الكتابة باللغة العربية

مقال جميل كما عودنا ود اب قناية دائما
الله يديه العافية

اقتباس
ما يكون مسكونا ضنب الككو ساي.
ههههههههههههههه

Saudi Arabia [المتغرب الأبدي] 10-21-2014 08:35 AM
بالضبط ليس هناك أي مبرر لكتابة مقل بكامله بالدارجي .. قد يتسامح القارئ في كلمة هنا أو كلمتين هناك مع وضعها داخل أقواس - كما يفعل الفاتح جبرا مثلا - لزوم تحلية المقال أو إضفاء شيء من الفكاهة أو الطرفة .. لكن مقال طويل كهذا وسياسي ؟؟

الأمر الثاني هو محاولة الكاتب صرف الأنظار عن التجاوزات البروتوكولية المتعمدة من الجانب المصري عند لقاء السيسي للبشير ، وقد رأينا العالم كله ينشغل من قبل عندما رفع الرئيس الأمريكي رجله ووضعها فوق الأخرى عند لقائه برئيس الوزراء التركي أوردغان الذي كانت ردة فعله الفورية مماثلة تماماً إذ رفع رجله هو الآخر ووضعها على الأخرى ..

http://www.youtube.com/watch?v=wZQBJXe7m34

هناك أمور يجب أن تحترم وينتبه لها ، خاصة إذا صدرت من طرف تشك في نواياه ..

Saudi Arabia [دابي السـوج] 10-20-2014 11:13 PM
انا معاك (ايها الضيف الجديد) ، ان رجلا متعلما ويحمل درجة عليا عليه ان يكتب بالعربية الفصحى البسيطة ولا مانع من اضافة بعض البلاغة ووالمحسنات اللفظية التي ترفع مستوى القارئ العادي بدل الهبوط به( عثمان شبونة مثالا") ، مع ملاحظة ان الكاتب الكريم يكتب حتى العامية بصورة خاطئة وعلى سبيل المثال يكتب كلمة ( بلاي ) بكثرة في مقالاته وهو يقصد ( بالله ). ليس هنالك مسوغ لاي كاتب مقال (راتب ) للكتابة بالبلدي وليعتبر نفسه مقروأ" من غير السودانيين ولبس كاتبا محليا" . ( دابي السوج ) يأمل ان يسمع ردا" من الدكنور كاتب المقال.


#1130566 [تينا]
1.00/5 (1 صوت)

10-20-2014 03:47 PM
فعلا عمرو اديب قليل الأدب ... ورد عليك (((خلق موضوع عشان يهاجم السودان والبشير)))؟؟؟ يعنى فعلا ذى ما اتوقعنا قاصد بيرسمو الكريه السودان كلو وليس عمر البشير فقط ... طريقة كتابك ظريفه شكرا ...


#1130541 [شليل]
3.00/5 (2 صوت)

10-20-2014 03:04 PM
غريب أمرك سيدي الدكتور ، هل تريد منا أن نحاكي العالمين تظاهراً بالرقي ؟؟ الفخ الذي وقع فيه مشيرنا الهمام لا يغتفر و لو اعتذرت الحكومة المصرية ، هذا الأخرق تلقى الضربة تلو الأخرى دون أن يعي و سيلدغ مرات و مرات ، بدل أن يقول كلاماً مقنعاً يشفي به صدور قوم سودانيين طفق يكيل اللوم على الاعلام الذي ينقل تعاسته و يفضح مخازيه ، لو اعلم أحداً مسك الشعب السوداني ضنب الككو سيكون أنت و رصفائك اصحاب العلم الذي لا ينفع فطوال عمر الانقاذ المديد لم تربوا جيل يعرف كيف يثور عمدتم على إخصاء العقول و القلوب و تركتم الجيل التالي لكم بين دباب و رباط و جنجويد يهتف و يراقص الرئيس ثم تأتي في هذا المساء مساء الانقاذ لتقول مثل هذا الكلام ، نحن نلوم و نحدد ما نفعل فإن كنت واعظاً فعليك بصاحبك المشير فلوم المحبين هذا لا يفيد


ردود على شليل
Saudi Arabia [محمود ود احمد] 10-22-2014 09:49 AM
شليل وينو أكلو الدودو ... شليل وين راح أكلو التمساح خمسة وعشرين سنة يا مفترى وتجى تتكلم عن " الأفخاخ " ومن الأخرق رمز بلدك أم أنت ومن شابهك الذين " يكاكون " خارج السرب أقول - وهذا مصطلح سعودى صرف - إنقلع عليكم جميعا اللعنة يا من تهدمون ولا تبنون وتشتمون ولا تهدون .. نسأل الله لكم الهداية


د .الرازي الطيب ابوقناية
د .الرازي الطيب ابوقناية

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة