10-25-2014 11:07 AM

قدر ما الواحد عاين يمين شمال عشان يلقي ليه سبب مقنع اجبر البشير بي حكاية الرئاسه دي مالقي غير سبب واحد بس وهو انه زول ثقيل. جد والله الراجل دا ثقيل واهبل كمان. كيف يعني بعدما فاضت الصحف المحليه والعالميه بي تصريحاتك النارية من قبل كم سنه, وانك لن تكون رئيس في, تجي بي ابتسامه وشنب مصبوغ تبلع الكلام دا كانك سمسار في سوق العربات؟ كيف تبقي المرشح والوحيد للرئاسه ضارب عرض الحائط مش بس بالنظام الاساسي لي حزبك, وانما بالدستور شخصيا كمان؟ والله انا كنته بتخيل الزول ده او اي زول تاني في محله ماحايقدر يخت عينه في عيون الناس بالعمله المهببه دي ولا حتي يكون عنده نفس يتكلم تاني. بس الظاهر زي ماقلنا من النوع الثقيل جد جد.

طيب كدي النشوف الابالسة ديل حيغيروا نظامهم الاساسي والدستور كيف والتبرير الحايقولوا لينا شنو. ما افتكر حيقيف زول منهم عشان يقول لينا والله الدستور ده الناس ديلك الوضعوه في الاول غلطوا في حكاية ولايتين دي. لانو ياعالم (الناس ديلك) الوضعوه هم ذاتهم (الناس ديل). بيني وبينكم فيما يخص الشله دي مافيها ديلك وديل ياهم نفس الناس من سنة سبعة وسبعين ماحصل اي تغير ومن كترت بلاويهم بقوا زي مابقول المثل السوداني مغسلين وشهم بي (ولا مافي داعي) وممكن يجوا يقولوا اي كلام. هو اصلا الكلام بي قروش؟ وزي ماقال السلطان علي دينار " انته يقول كلام حلو وانا اقول كلام حلو."
شخصيا اكتر شئ بهمني فيما يتعلق بالترقيعات المتوقعه لي نظامهم الاساسي او للدستور طريقة صياغتها. هل مثلا حيقولوا لينا ظروف البلد بتتطلب ترشيح البشير لي فترة ثالتة, ولا حكاية الفترتين دي طلعت ماظابطه عشان كده دايرين يزيدوها؟ او احتمال يركزوا علي موضوع الشعب هو الداير يغير الدستور لانه رئيسنا لن يجود الزمان بمثله ويقوموا (يعرشوا) علي كده. بس ماتنسوا ياشباب انه الناس ديل كلامهم البقولوه كله (بل شت). يعني متوقعنهم عشان دا الدستووووور يغيروا نمط تفكيرهم البجيب الايبولا ده ويقولوا كلام مفيد؟

تعديلاتهم الداخليه دي اصلا مابتهمنا بي شئ انشاء الله رئيسهم يبقي (ودالفتلي). بس اتوقع مادام الموضوع اصله جايط يقوموا يعملوا تعديل في الماده 57 ويغيروا فترة حكم الرئيس من فترتين فقط لي اربعه فترات عشان يضمنوا فرعونهم ده قاعد في نفسنا حقبة كاملة دا لو ما (اتكل) وريحنا وريح الدول العربيه والافريقيه ودول عدم الانحياز والمجموعه الاتينيه الباسيفيكيه وناس الدلاي دلاما. او احتمال الجماعه يلغوا الماده دي نهائيا عشان مايلقوا نفسهم مجبرين لتغيرها تاني لو طلع الراجل بي سبعه ارواح. والله بيني وبينكم الشايف حكومة السودان بعد حين الاعمي شايل المكسر ماكضب. قالوا احمد عبد الرحمن بتاعهم داك التيم الشغال معه في المكتب كلهم ممرضين مهمتهم يودوا الحمام ويجيبوا ليو في الادويه بس حتي لو مشي جنوب شرق اسيا ويجي يتبسم لينا في الشاشه زي الكانه خلاص شغال يعني.

بما انه مافي زول من المعارضة لو نزل ضده حايفوز حتي لو كان بعانخي ذات نفسه, ولا في زول كمان من اعضاء حزبه حايتجرا وينزل ضده لانه ناس الامن ممكن يملصوا ليك من كل قرش كسبه في فترة الانقاذ دي ويبقوا علي الحديده, عشان كده احسن حاجه الناس ديل ينسوا حكاية القانون والدستور دي وينصبوا السيد بشه (الله لا غزه فيه بركه) رئيسا للسودان مدي الحياة. مش في رئيس افريقي اهبل قبل كده عمل نفس الحركه دي ونصب نفسه رئيس مدي الحياة والعالم كان بضحك عليه؟ مش احسن مما يجينا شيطانهم الاكبر ويقنعهم يسحبوا الماده دي عديل من الدستور او تغيرها علي مقاس بشه رضي الله عنه. يعني بدل كلمة رئيس, الماده ممكن تقول "المرشح الوحيد لرئاسة السودان هو عمر حسن احمد البشير مادام حيا لا ينافسه في ذلك انس ولا جان. ولا يحق لاي احد التفكير في الترشح لهذا المنصب. واذا تجرا اي راجل ود مره علي التفكير للترشح. فالقوات الامنيه لها كامل الصلاحيه يودوه في ستين داهية."
انتو الكيزان ديل بنسطلوا ولا شنو؟؟؟

Follow me in [email protected]_elrazi

Visit my blog at: elrazionline.blogspot.co.uk





تعليقات 8 | إهداء 0 | زيارات 2053

خدمات المحتوى


التعليقات
#1134656 [osman]
3.00/5 (2 صوت)

10-25-2014 10:27 PM
رفقاً بالقارئ يا دكتور اكتب بالفصحى واغلط. لكن تكتب بالعامية الأثقل من البشير دي وتغلط والله شينة منك. واعذرنا.


ردود على osman
Saudi Arabia [دابي السـوج] 10-26-2014 08:55 PM
انا معك يا عثمان وقد قلتها من قبل اكثر من مرة ، انه لا يليق برجل حامل درجة علمية ان يكتب بهذا الاسلوب الا اذا كان يعتقد ان القراء لا يفهمون العربية الفصيحة ، والسؤال للدكتور : لماذا تصر أن تكون الكاتب الوحيد بالراكوبة الذي يكتب بالدارجي ؟؟؟ الا تريد أن يقرؤك غير السودانيين وسؤال اخير: حتى بلغتك هذه لماذا ترتكب هذه الاخطاء الشنيعة ومنها خطؤك المتكرر عندما تكتب ( بلاي ) بدلا من ( بالله )ان واجبات الكاتب (الراتب ) أن يرتفع بمستوى وذوق القارئ ومعارفه ويثري لغته:( عثمان شبونة مثالا ) وليس العكس. انهي بما قاله الاخ عثمان ( رفقا بالقارئ ) ، وسامحنايا دكتور .


#1134648 [خالد حسن]
1.00/5 (1 صوت)

10-25-2014 09:47 PM
واحد قال هسع البشير بعد العمر ده داير يحكمنا خمسه سنه تاني
التاني رد ليه .. انت قايلوا غير ركبو دي عشان يسجل في اهلي شندي


#1134641 [قرفنا]
1.00/5 (1 صوت)

10-25-2014 09:22 PM
معقول ثقيل بس والله خففت عليه.بس حكايه احمد عبد الرحمن عجبتني قلته لي ممارضه بس طيب حكاية السفر الاسيوي دا شنو دي مش رحله بالطياره قريب لي يوم كامل زولك بقدر علي شغل زي دا ولا قلته لي معاهو الطاقم الطبي


#1134632 [مجدي]
1.00/5 (2 صوت)

10-25-2014 08:52 PM
لا جدال في ان البشير ثقيل واهبل زكل الشعب السوداني في حالة غيظ منه ولكنك يا ديك تور (2x1)اسوأ واسخف من البشير بلغتكالركيكه ، هل انت تحمل درجة دكتوراه حقيقيه ام


ردود على مجدي
[عقيد م] 10-27-2014 12:29 AM
اعجبني جدا تعليقك يا اخ مجدي ورغم كرهي للبشير الذي اري انه وعصابيته ارجعوا السودان الي حقبة الجاهليه الاولي وتضرر كل من لاينتمي الي ملتهم وانا احد اولئك الذين سلط عليهم سيف الاحاله الي الصالح العام فقط بسبب عدم تبعيتي لهم ، رغم كل هذا اتفق معك علي ان اسلوب الكاتب في منتهي الركاكه وسألت نفسي هل هو فعلا من حملة الدكتوراه ام انه اسبغ علي نفسه هذه الدرجه العلميه الرفيعه دون ان يكون له الحق في ذلك

United Arab Emirates [ود الدمازين] 10-26-2014 04:47 PM
فعلا لغته وأسلوبه أتعس منه ومن المطبلين ليهو،،،وبعدين ديل كلهم عايشين في فنادق خمسة نجوم مع البيرة والويسكي ومش واعيين

United Kingdom [رانيه بت امدرمان] 10-26-2014 01:21 PM
عنده دكتوراه في بني كوز بعنوان "الفروقات بين السرقه والسحت في السودان بين عامي 89-14" من جامعة القران الكريم..العجبني في المقال انه زول ثقيل.. ودي طبعا في السودان لمن نقولها للزول يعني بس افففففو عليه.

United Kingdom [د محمد علي] 10-26-2014 10:06 AM
يعني لا علقته علي قصه احمد عبد الرحمن ولا علي المساطيل ديل ولا علي ثقاله الراجل داير تقنعنا انو المقال لغته ركيكه؟ كده ياشاطر ورينا ركيكه وين والمامفهوم شنو. نحنا في الراكوبه عارفين تشتيت الكوره بكون كيف يا كوز ياقح..علي الاقل الدكتور شجاع وبقول الدايرو ماذيكم مندسين ورا اسماء وهميه وبتحاربوا في الشرفاء. نحنا عارفين في كل المواقع الناس البعلقوا علي المواضيع الثوريه زي تعليقك السخيف دا والكتبتو من غرفه مكندشه في مكاتب الجداد الالكتروني ومدفوع الاجر ياجرذ ياغبي هسع في راجل ود رجال بدفعو ليه بالدولار بس عشان يجي يقول والله المقال دا لغته ركيكه ياركيك. بشيرك دا زول تقيل وحرامي وبتاع نسوان وقاتل ومسطول كمان. سمعنا الحاويه بتاعه المخدرات اتحولت لي بيت تابع للجيش في حي المطار بنسطلو فيه شله الجياشه ديل اها رايك شنو

Saudi Arabia [حماد] 10-26-2014 12:50 AM
نحن نريد من يعبر عن دواخلنا ولا تهمنا لغته ولا درجته العلميه
الكلام اوجعك

[قهران] 10-26-2014 12:22 AM
تعرف يا اخ مجدي انو ناس المؤتمر الوثني لهم الحق في حكم السودان الي الابد اذا كان مستوي ثقافة و تعليم و كتابه دكتور ( كما يزعم )معارض بهذه الضحاله ويخيل لي انو ولدو بكتب عربي احسن منو

Sudan [الزمخشري] 10-25-2014 10:42 PM
كبر عقلك شوية يا مجدي .. فالدكتور مشكور يخاطب العامة بالبلدي كي تصل الرسالة بدون لولوة الصفوة.

United Kingdom [كاره الكيزان] 10-25-2014 09:24 PM
"بلغتكالركيكه." دا انجليزي دا يامرسي..واحد سالوه الكيزان اتسممو بي شنو قال ليهم بي جداد الكتروني


#1134573 [الكوز الفى الزير التحت الراكوبه]
0.00/5 (0 صوت)

10-25-2014 06:39 PM
هههههه( ودالفتلى ) الزكرك ودالفتلى شنو يا دكتور عندك جنازه بحر ؟


#1134561 [Awad]
0.00/5 (0 صوت)

10-25-2014 06:10 PM
يا الرازى يا أخوى بشه ده أحسن منه( أمحمد ود حليوه) بالله الفرق بينه وبين بشه شنو غير هذا يحي الكرسى خوفا من لاهاى وجماعته عاملنه حيطة ضرى من العواقب لكن (ودحليوه بحب كثرة لبس الساعات وأساءته لحاج مدنى رحمهم الله.


#1134523 [مفقوع مغص]
0.00/5 (0 صوت)

10-25-2014 04:24 PM
معليش يا دكتور اسلوبك لا بلبق واخطء املائية وبختك الراكوبة يبدو لا تراجع الاسلوب شنو


ردود على مفقوع مغص
United Arab Emirates [ود جحا] 10-26-2014 05:02 AM
ديك تور المفروض يرجع الروضة وبسرعة

Ireland [FFFF] 10-25-2014 09:57 PM
يا مفقوع تعليقك ماعنده علاقة بالموضوع والدكتور كتب بلغة سودانية
مفهومة. وكمان مؤدب وكتب (بُل شِت) بالعربى عشان ما يتعبك تجرى
تفتح دكشنرى عشان تشوف معناها. اذا ما عندك دكشنرى ف (بل شت)
هو كلامك ده ذو الرائحة الزكية.

United Kingdom [ممغوس من الكيزان] 10-25-2014 08:17 PM
جدادإلكتروني تخصص لغه عربيه


#1134440 [الحلومر]
0.00/5 (0 صوت)

10-25-2014 02:00 PM
والله حكاية بنسطلوا مابنسطلوا دي ما عارفينه لكن المعروف في حاويات مخدرات اختفت بداخل الخرطوم واعتقد انها قسمت بين الدستوريين كحوافز نظير ما فعلوه بالسودان والله اعلم


د الرازي الطيب ابوقناية
د الرازي الطيب ابوقناية

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة